وحدت نیوز(کوئٹہ) حکومت کی جانب سے زائرین کے لئے مشکلات اور رکاوٹوں کے خلاف آج کوئٹہ میں احتجاجی جلسہ منعقد ہوا۔ احتجاجی جلسے سے خطاب کرتے ہوئے مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ دہشت گردوں کو کھلی چھوٹ دے کر زائرین کے لئے راستہ بند کرنا نواز حکومت کی نا اہلی کی واضح دلیل ہے۔ دہشت گردوں سے خوف زدہ حکومت ملت جعفریہ سے کئے گئے اپنے سب وعدے بھلا چکی ہے۔ اب ایک سازش کے تحت زائرین کا راستہ بند کرنے کی ناپاک مہم شروع کی گئی ہے، مگر حکومت کو اپنے ناپاک عزائم میں ناکامی کے سوا کچھ حاصل نہ ہو گا۔انہوں نے کہا کہ شیعت کی۱۴ سو سالہ تاریخ مصائب و آلام اور امتحانات سے عبارت ہے۔زائرین کربلا کو روکنے کے لئے بنو امیہ ، بنوعباس اور متوکل عباسی جیسے سفاک حکمران ناکام رہے اب بھی انہیں ناکامی ہو گی۔ نواز حکومت شیعت کے خلاف سازشیں کرنا چھوڑ دے۔ در یں اثناء صوبائی وزیر داخلہ میر سرفراز بگٹی نے علامہ مقصود علی ڈومکی سے رابطہ کرکے زائرین کے مسائل معلوم کئے۔ انہوں نے یقین دلایا کہ وہ اس سلسلے میں وزیر اعلیٰ اور دیگر حکام سے بات چیت کریں گے۔