وحدت نیوز(گلگت) پاکستان تحریک انصاف گلگت بلتستان کے رہنماء چیئرمین احمد علی نے ایم ڈبلیو ایم کے مرکزی رہنماء ناصر شیرازی کے اغواء پر اپنے غم و غصے کا اظہار کرتے ہوئے کہا ہے کہ رانا ثناء اللہ کو مسلم لیگ نون نے شیعہ دشمنی کے لئے بٹھا رکھا ہے اور کالعدم جماعتوں کیساتھ انکا گٹھ جوڑ ہے۔ ایک مذہبی و سیاسی جماعت کے رہنما کا اغواء مسلم لیگ نون کی کارستانی اور جمہوری اقدار کے منافی عمل ہے۔ پورے پنجاب میں ملت جعفریہ رانا ثناء اللہ کی منافقت اور ظالمانہ پالیسیوں کے سبب پس رہی ہے۔ ہم ریاستی اداروں سے مطالبہ کرتے ہیں کہ ناصر شیرازی سمیت ملت جعفریہ کے دیگر بے گناہ لاپتہ افراد کو بازیاب اور اداروں کی رٹ بحال کریں۔ ماورائے آئین و قانون ناصر شیرازی کا اغواء ریاستی دہشتگردی کے مترادف ہے۔ انہوں نے کہا کہ پاکستان تحریک انصاف ملک بھر میں ایم ڈبلیو ایم سمیت تمام مظلوموں کے ساتھ کھڑی ہے۔ ہم ہر ظلم کے خلاف آواز بلند کرتے رہیں گے اور نون لیگ کے دہشتگردانہ چہرے کو بے نقاب کرتے رہیں گے۔