وحدت نیوز(اسکردو) مجلس وحدت مسلمین پاکستان بلتستان ڈویژن کا ایک ہنگامی اجلاس ڈویژنل سیکرٹریٹ میں منعقد ہوا جس میں بلتستان کی حالیہ کشیدہ صورت حال پر تشویش کا اظہار کیا گیا۔ اجلاس میں کہا گیا کہ بلتستان اور گنگچھے میں ہونے والے افسوسناک واقعات دراصل بیرونی خفیہ عناصر بالخصوص امریکی اداروں کی سازشوں کا شاخسانہ ہے اور اس سلسلے میں بلتستان انتظامیہ کی کارکردگی بھی افسوسناک رہی ہے۔ اجلاس سے خطاب کرتے ہوئے مجلس وحدت مسلمین پاکستان بلتستان ڈویژن کے رہنماوں نے کہا کہ گلگت بلتستان میں جب تمام مسلکی، علاقائی اور لسانی اختلافات داریل و چلاس سے گنگچھے تک مٹ گئے اور تمام مسلمان بھائی بھائی بن گئے تو یہ کام ملک دشمن عناصر سے ہضم نہیں ہو رہے تھے۔ دشمن کی ہمیشہ سے یہ کوشش رہی ہے کہ تمام اسلامی مکاتب آپس میں دست و گریباں رہیں اور خطے میں لسانی و علاقائی تعصب جاری رہے۔ بلتستان اور خپلو کے غیور عوام کو جاننا چاہیئے کہ جب سے یہاں کی عوام متحد ہو کر حقوق کی بات کرنے لگی ہے تو اس میں رخنہ ڈالنے والی مختلف مشنریاں سرگرم ہوئیں ہیں۔ جوانوں اور عوام کو ہوش کے ناخن لینے کی ضرورت ہے۔ شیعہ، سنی، نوربخشی، اہلحدیث دراصل یہ سب ایک ہی باغ کے گلدستے ہیں۔ ان کے درمیان تفرقہ ڈالنا اسلام دشمن عناصر کا کام ہے۔ اسی طرح علاقائی اور لسانی بنیادوں پر تفرقہ حسینیوں کا شعار نہیں، اگر بلتستان انتظامیہ ان واقعات میں فوری اور منصفانہ اقدامات اٹھاتے تو معاملہ ہرگز نہیں بگڑتا۔

رہنماوں کا مذید کہنا تھا کہ بلتستان بھر کے جوانان کم از کم اس بات کا احساس کریں کہ ایک طرف غزہ میں مظلوم فلسطینیوں پر اسرائیلی وحشیانہ مظالم جاری ہیں اور مسلمانوں کے خون کی ندیاں بہائی جا رہی ہیں تو دوسری طرف بلتستان اور گنگچھے میں ایک دوسرے پر حملہ کرنے کے درپے ہیں جو کہ نہایت شرمناک عمل ہے۔ یہاں کی عوام اور جوان باشعور ہیں اور دینی جذبات رکھنے والے ہیں انہیں لسانی بتوں کو توڑ کر ملک و ملت کے لیے اپنی توانائیوں کو صرف کرنا چاہیئے۔ بلتستان میں پے در پے حملے اور افسوسناک واقعات ایک بڑی اور منظم سازش معلوم ہوتی ہے۔ حساس ادارے اپنا مثبت کردار ادا کریں اور لسانی، علاقائی اور مسلکی اختلافات کے ذریعے بلتستان کے امن کو تباہ کرنے والوں کا گھیرا تنگ کیا جائے۔ مجلس وحدت مسلمین بلتستان بھر میں امن اور بلتستان کے مثالی اتحاد کے خلاف کی جانے والی سازشوں کو ہرگز کامیاب ہونے نہیں دے گی۔ شیعہ، سنی، نوربخشی، اہلحدیث، شینا، بلتی، گلگتی ، یشکن یہ سارے تفرقات اور تقسیم بندیوں کے نتیجے میں اسلام اور پاکستان نے کمزور ہونا ہے لہٰذا سب کا فرض بنتا ہے کہ مسلکی اور علاقائی اختلافات کو بالائے طاق رکھ کر اسلام کی سربلندی اور وطن عزیز پاکستان کی استحکام کے لیے کام کریں۔