وحدت نیوز(قم) یوم انہدام جنت البقیع کے موقع پر فاطمیہ فاؤنڈیشن شعبہ قم کے زیراہتمام ایک تجزیاتی سیمینار کا اہتمام کیا گیا۔ مقررین نے جنت البقیع کے انہدام کے حوالے سے مختلف زاویوں پر روشنی ڈالی اور راہ حل سوچنے پر زور دیا۔ سیمینار سے خصوصی گفتگو حجۃ الاسلام ڈاکٹر سید شفقت شیرازی، مجلس وحدت مسلمین پاکستان کے مسئول امور خارجہ نے کی۔

 انہوں نے مختصر وقت میں جامع گفتگو کرتے ہوئے آل سعود اور امریکہ و برطانیہ کے گٹھ جوڑ کے مضمرات سے حاضرین کو آگاہ کیا۔ ان کے مطابق آل سعود کی پشت پناہی امریکہ و برطانیہ کی طرف سے کی جا رہی ہے، ورنہ آل سعود انتہائی کمزور لوگ ہیں۔ انہوں نے کہا کہ امریکہ متعدد ممالک میں رژیم چینج کرنے کی کوششیں کرچکا ہے۔

اگر مقاومتی بلاک بشارالاسد کی مدد نہ کرتا تو یہ شام میں بھی اپنی پسند کی حکومت لے آتے۔ ان کا کہنا تھا کہ پاکستان کی موجودہ امپورٹڈ حکومت آل سعود کے دباو پر اب انڈین حکومت سے غیر اصولی مفاہمت کرنے جا رہی ہے، ان کے مطابق ہندوستان کی خوشنودی کیلئے کشمیر سے لاتعلق ہونا موجودہ حکومت کی ایک اور خیانت ہے۔ اسی طرح اورسیز پاکستانیوں کے ووٹ کا حق ختم کرنا بھی اورسیز پاکستانیوں کے حق پر ڈاکہ ہے۔

 انہوں نے اپنے خطاب میں پاکستان کے موجودہ حکمرانوں کی سرزنش کرتے ہوئے کہا کہ یہ امریکہ کے نوکروں کے بھی نوکر ہیں۔ اس موقع پر انہوں نے ملت پاکستان کے استقلال، خود مختاری اور آزادی کے تحفظ، بقاء اور دفاع کیلئے جدوجہد کو جاری رکھنے کی ضرورت پر زور دیا۔