وحدت نیوز(کراچی) سربراہ مجلس وحدت مسلمین علامہ راجہ ناصر عباس کے اعلان پر حالیہ پاک بھارت کشیدگی میں پاک افواج کے ساتھ اظہار یکجہتی اور ہندوستان کی جنگی جارحیت کی مذمت اور مقبوضہ کشمیر کے مظلوم عوام سے اظہار یکجہتی کیلئےمنعقدہ ملک گیریوم دفاع مادر وطن کے موقع پرایم ڈبلیوایم کراچی ڈویژن کی جانب سے جعفرطیار سوسائٹی تا مزارقائد براستہ محمود آبادموٹر سائیکل ریلی نکالی گئی،ریلی کے اختتام پر بانی پاکستان قائد اعظم محمد علی جناحخ کے مزارکے سامنے تقریب تجدید عہد منعقد کی گئی جس سے ایم ڈبلیوایم کے رہنما سید علی حسین نقوی ،علامہ صادق جعفری، اہل سنت عالم دین شاہ فیروز الدین رحمانی اور مولانا عبداللہ جونا گڑہی نے خطاب کیا ۔

علی حسین نقوی کا مزا ر قائد کے سامنے تقریب تجدید عہد وفاسے خطاب کرتے ہوئے کہنا تھا کہ دشمن کی گیڈر بھبکیوں کے جواب میں پاک فوج کے اقدام نے قوم کا مورال بلند کر دیا ہے اب اور بھی زیادہ حوصلے و جرت سے مقابلہ کرنے کو تیار ہیں ، پاکستان کو اس نازک اور اہم مرحلے پراندازہ ہو گیا ہے کہ دنیا میں ہمارے دوست اور دشمن ملک کون سے ہیں ۔جب تک ہم معاشی طور پرمضبوط نہیں ہونگے اور ہر معاملے میں قومی وقاراور مفاد کو مقدم نہیں رکھیں گئے ہمارے ساتھ کوئی بھی ملک کھڑ انہیں ہو گا ۔ہمیں ایک قوم بن کر ملک کی ترقی اور سربلندی کے لئے کوششیں کرنا ہوں گی، اس موقع پر ایم ڈبلیوایم کے رہنما ناصرالحسینی، احسن عباس رضوی، عارف رضازیدی، رضوان پنجوانی، حسن رضا سمیت کارکنان کی بڑی تعدادموجود تھی۔

وحدت نیوز(سکردو) گلگت بلتستان کی معروف عوامی شخصیت، عوامی ایکشن کمیٹی بلتستان کے سربراہ و مجلس وحدت مسلمین پاکستان گلگت بلتستان کے سیکرٹری جنرل آغا علی رضوی خون کا عطیہ دینے ضلعی محکمہ صحت کی جانب سے لگائے گئے کیمپ میں پہنچ گئے۔ تفصیلات کے مطابق پاکستان اور بھارت کے درمیان جاری کشیدگی کے پیش نظر ضلعی محکمہ صحت کی جانب سے خون کا عطیہ لینے کے لیے اسکردو شہر میں کیمپ لگایا گیا ہے، جہاں کسی بھی ناخوشگوار صورتحال سے نمٹنے کے لیے خون دینے والوں کے نام اور تفصیلات درج کیا حاتا ہے۔ ذرائع کے مطابق ہزاروں جوانوں نے اپنا فون نمبر اور بلڈ گروپ کا اندراج کرایا۔ اس موقع پر ایم ڈبلیو ایم کے سربراہ آغا علی رضوی اپنے کارکنان کے ہمراہ کیمپ میں پہنچ گئے اور اپنا فون نمبر سمیت دیگر تفصیلات کا اندراج کرایا۔ اس سلسلے میں آغا علی رضوی کا کہنا ہے کہ وطن عزیز کو جہاں ہمارے خون کی ضرورت پڑے گی وہاں ہم حاضر ہونگے۔ انہوں نے کہا کہ ہم خون کے آخری قطرے تک پاکستان کی حفاظت کرتے رہیں گے اور کسی صورت وطن عزیز کے دشمنوں کو طاقت ور ہونے نہیں دیں گے۔ یہ دشمن چاہے داخلی دشمن ہوں یا خارجی ہم صف اول کا کردار ادا کرتے رہیں گے۔ انہوں نے مزید کہا کہ ہماری جنگ ملک پر باہر سے حملہ کرنے والوں، ملک کو کمزور کرنے والوں، ملک میں کرپشن کرنے والوں، عوام پر ظلم کرنے والوں اور فرقہ واریت پھیلانے والے تکفیری دہشتگردوں کے خلاف ہے۔ ہمارا ہر ظالم طاقتوں کے خلاف اعلان جنگ ہے اور ہر مظلوم کے ہم حامی ہیں۔

وحدت نیوز(اسلام آباد) مجلس وحدت مسلمین کے تحت ملک بھر میں یوم دفاع مادر وطن کے موقع پراحتجاجی ریلیوںاور مظاہروں کا انعقاد ، یوم دفاع مادر وطن سربراہ مجلس وحدت مسلمین علامہ راجہ ناصر عباس کے اعلان پرمنایا گیا، ریلیو ں کا مقصد حالیہ پاک بھارت کشیدگی میں پاک افواج کے ساتھ اظہار یکجہتی اور ہندوستان کی جنگی جارحیت کی مذمت اور مقبوضہ کشمیر کے مظلو م کشمیری عوام سے اظہار یکجہتی کرنا تھا۔ملک بھر کے تمام اضلاع اور اہم شہروں لاہور،کراچی ،کوئٹہ، پشاور،اسلام آباد ،آزاد کشمیرسمیت گلگت بلتستان کے مختلف اضلاع میں سینکڑوں مقامات پر دفاع مادر وطن ریلیاں نکالی گئیں کئی شہروں میں بھارتی وزیر اعظم مودی کے پتلے بھی نظر آتش کئے گئے ۔

سربراہ مجلس وحدت مسلمین علامہ راجہ ناصر عباس جعفری کایوم دفاع مادر وطن منانے کے حوالے سے اپنے پیغام میں کہنا تھا کہ ہندوستانی جارحیت کے خلاف پورے ملک کی عوام اپنے وطن کے محافظوں کے شانہ بشانہ کھڑی ہے تمام سیاسی و دینی قیادت اس حساس مرحلے پر متحد ہے۔ وطن سے عشق ہمارے دین اور ایمان کا حصہ ہے مادر وطن پر جان نثار کرنا ہر پاکستانی اپنے لئے باعث افتخار سمجھتا ہے۔ہم دنیا کی کسی بھی طاقت کو وطن عزیز کو میلی آنکھ سے دیکھنے کی اجازت نہیں دیں گے،بھارت امریکہ اور اسرائیل دنیا کی امن کے لئے ایک مستقل خطرہ ہے ہماری امن کی خواہش کو کمزوری نہ سمجھا جائے،جذبہ شہادت سے سرشار یہ غیور قوم دشمن کے ہر مذموم عزائم کو خاک میں ملانے کے لئے ہمہ وقت سر بکف تیار ہیں وطن کی سلامتی و استحکام کے لیے کسی بھی قربانی سے دریغ نہیں کرینگے ۔

اسلام آباد میں بھی ملک بھر کی طرح دفاع مادر وطن ریلی کا انعقاد کیا گیا جوکہ جامع مسجد اثناءعشری جی سکس ٹو سے نکل کر چائینہ چوک تک گئی۔ ریلی میں بڑی تعداد میں عوام نے شرکت کی ریلی کے شرکا ہاتھ میں سبز ہلالی پرچم تھامے پاکستان زندہ باد اور پاک فوج زندہ باد کے فلک شگاف نعرے لگاتے رہے ریلی سے مجلس وحدت مسلمین کے مرکزی قائدین نے خطاب کیا، سیکرٹری جنرل ایم ڈبلیو ایم ضلع اسلام آباد علامہ حسنین شیرازی کا اپنے خطاب میںکہنا تھا کہ دشمن کی گیڈر بھبکیوںکے جواب میں پاک فوج کے اقدام نے قوم کا مورال بلند کر دیا ہے اب اور بھی زیادہ حوصلے و جرت سے مقابلہ کرنے کو تیار ہیں۔

مرکزی سیکرٹری روابط ملک اقرار حسین کا ریلی کے شرکا سے خطاب کرتے ہوئے کہنا تھا کہ پاکستان کو اس نازک اور اہم مرحلے پراندازہ ہو گیا ہے کہ دنیا میں ہمارے دوست اور دشمن ملک کون سے ہیں۔جب تک ہم معاشی طور پرمضبوط نہیں ہونگے اور ہر معاملے میں قومی وقاراور مفاد کو مقدم نہیں رکھیں گئے ہمارے ساتھ کوئی بھی ملک کھڑ انہیں ہو گا۔ہمیں ایک قوم بن کر ملک کی ترقی اور سربلندی کے لئے کوششیں کرنا ہوں گی اس موقع پر ریلی سے خطاب کرتے ہوئے۔ ایم ڈبلیو ایم ضلع راولپنڈی کے سیکرٹری جنرل علامہ سیداکبر کاظمی کا کہنا تھا کہ مادر وطن کی حفاظت کے لئے کسی قسم کی قربانی سے دریغ نہیں کریں گئے۔مجلس وحدت مسلمین کا ہر کارکن مادر وطن کی ترقی کیلئےکوشاں اور حفاظت کے لئے تیار ہے ۔

وحدت نیوز(ملتان)مجلس وحدت مسلمین پاکستان شعبہ خواتین کی سیکرٹری جنرل و ممبر صوبائی اسمبلی پنجاب سیدہ زہرا نقوی نے کہا ہے کہ بھارتی جارحیت کے خلاف پاکستانی عوام پاک افواج کے شانہ بشانہ کھڑی ہے، پاک فوج نے بھارتی جنگی جنون قابل فخر جواب دیکر پوری قوم کاسر فخرسے بلند کردیاہے،گلگت سے گوادر تک عوام وطن پر جان نثار کرنے کے لئے تیار ہے ۔بھارتی بزدلانہ وار پاکستان کو اشتعال دلانے کی کوشش ہے ، ہندوستانی حکومت اسلحے کے انبار پر بیٹھ کر خوش فہمی میں مبتلا ہے، ہندوستانی سیاست میں جنگی نعروں کا رواج خطے کے امن کے لئے شدید خطرہ بن چکے ہیں، پاک بھارت کشیدگی کے دوران او آئی سی کا کردار شرمناک ہے ، بھارت کس حیثیت میں او آئی سی اجلاس میں شرکت کر رہا ہے ؟ پاکستانی حکومت او آئی سی ممالک سے فوری رابطہ کرئے، اگر او آئی سی معاملات کو درست نہیں کر سکتی تو خراب کرنے سے باز رہے ، ہندوستانی حملے کو عالمی قوتیں سنجیدگی سے دیکھے، ہندوستان خطے میں جنگ کی آگ کو بھڑکا رہا ہے بھارتی اشتعال انگیزی کے خلاف تمام سیاسی قوتوں کو متحد ہونا ہو گا۔

 ان خیالات کااظہار اُنہوں نے ملتان میں سیدہ فاطمہ زہرا سیرت کانفرنس اور بعدازاں ایم ڈبلیو ایم کے رہنمائوں سے ملاقات میں کیا ۔اس موقع پر صوبائی سیکرٹری جنرل علامہ اقتدار حسین نقوی، سلیم عباس صدیقی، مہر سخاوت علی اور دیگر رہنما موجود تھے۔ سیدہ زہرا نقوی نے مزید کہا کہ مودی سرکار ہوش کے ناخن لے الیکشن جیتنے کیلئے خطے کے امن کو تباہ نہ کرے، پاکستان ایک پُرامن ملک ہے ، دہشتگردی کا سب سے زیادہ نقصان پاکستان کو ہوا، ستر ہزار پاکستانی دہشتگردی کا شکار ہوئے لیکن پاکستان نے ہمیشہ امن کو ترجیح دی، پاکستان نے ہمیشہ دوستی کا ہاتھ بڑھا یا اور صلح کا پیغام دیا مگر دوسری طرف ہندوستان ہٹ دھرمی کا شکار ہے، پاکستان کا ہر بچہ ملک کے دفاع کے لیے پاک فوج کے شانہ بشانہ کھڑا ہے، وطن کا دفاع ہمارے لیے عزت، وقار اور کسی سعادت سے کم نہیں ہے۔

وحدت نیوز(فیصل آباد) مجلس وحدت مسلمین شعبہ خواتین ضلع فیصل آباد کے یونٹ 104 محلہ شمس آباد میں میلاد مسعود حضرت فاطمة الزھرا س کا انعقاد ہوا۔ جس میں ایم ڈبلیو ایم شعبہ خواتین کی مرکزی مسئول مدارس ،محترمہ بشری شریف نے خطاب کیا۔ اپنے خطاب میں آپ نے جناب سیدہؑ کی سیرت کے مختلف پہلوؤں کو بیان کیا ایک موقع پر آپ نے امام جعفر صادقؑ کا قول نقل کرتے ہوے کہا کہ جس نے بھی معرفت کیساتھ جناب فاطمہ زھرا ؑ کو پہچان لیا در حقیقت اس نے شب قدر کو پہچان لیا۔ فاطمہ ؑکو فاطمہؑ اسی لیے کہتے ہیں کہ کوئی آپ کی حقیقی معرفت حاصل نہیں کرسکتا ۔آپؑ سورہ کوثر کی تفسیر ہیں خدا نے رسول خدا صل اللہ علیہ وآلہ وسلم کو آپ کی صورت میں خیر کثیر عطا کیا اور آج دنیا کے ہر کونے میں نسل فاطمہؑ موجود ہے ، خدا نے اپنے محبوب نبیؐ کی نسل کو جناب زھرا سلام اللہ علیھا سے جاری رکھا۔

وحدت نیوز (چکوال) یومِ مادر، یومِ دختران، یومِ زوجہ یا یومِ ہمشیر المختصر یومِ خواتین* کے لیے کوئی دن مناسب ہے تو وہ ولادتِ با سعادت صدیقہ، طاہرہ، حضرت فاطمہ الزہراؑ ہےمجلس وحدت مسلمین پاکستان شعبہ خواتین ضلع چکوال کی جانب سے پر وقار جشن ولادت فاطمة الزھرا سلام الله علیھا کا انعقاد کیا ، اس جشن سعید سے محترمہ تغزل شاداب صاحبہ نے خطاب کیا جس میں مناقب و فضائل جناب سیدہؑ بیان کرتے ہوئے کہاکہ حضرت فاطمہ زہرا (علیہاالسلام)، پیغمبر اکرم (صلی اللہ علیہ و آلہ) اور حضرت خدیجة الکبری (سلام اللہ علیہا) کی بیٹی ہیں اور زہراء ، صدیقہ، طاہرہ، مبارکہ، زکیہ، راضیہ، محدثہ اور بتول آپ کے القاب ہیں۔

انہوں نے خاتون جنت کے عبادتی پہلو کو بیان کرتے ہوئے مزید کہا جب آپ گھر کے کاموں سے فارغ ہوتی تھیں تو عبادت میں مشغول ہوجاتی تھیں، نماز پڑھتیں،دعا کرتیں،خداکی بارگاہ میں گریہ و زاری کرتیں اور دوسروں کے لئے دعائیں کرتی تھیں، امام صادق(علیہ السلام) اپنے جد امجد حضرت امام حسن بن علی (علیہ السلام) سے روایت نقل کرتے ہیں کہ امام حسن علیہ السلام نے فرمایا: میری والدہ گرامی شب جمعہ کو صبح تک محراب عبادت میں کھڑی رہتی تھیں اور جب دعا کے لئے ہاتھ اٹھاتیں تو باایمان مردوں اور عورتوں کے لئے دعا فرماتیں، لیکن اپنے لئے کچھ نہیں کہتی تھیں، ایک روز میں نے سوال کیا: اماں جان ! آپ دوسروں کی طرح اپنے لئے کیوں دعائے خیرنہیں کرتیں؟ آپ نے کہا: میرے بیٹے ! پڑوسیوں کا حق پہلے ہے۔ اس جشن سعید میں خواتین کی کثیر تعداد نے شرکت کی۔