وحدت نیوز(لاہور) مجلس وحدت مسلمین پنجاب کے سیکرٹری جنرل علامہ مبارک علی موسوی نے صوبائی سیکرٹریٹ مجلس وحدت مسلمین پنجاب میں ایک ہنگامی پریس کانفرنس سے خطاب کرتے ہوئے کہا ہے کہ محرم الحرام ایک ایسے وقت میں منا رہے ہیں جب نجس اور ناپاک دشمن اس پاک وطن کی سرحدوں پر اشتعال انگیزی میں مصروف ہے اور ہمارے دلاور مخافظ جذبہ مرتضوی و شبیری سے لیس ہو کر اپنی مادر وطن کا دفاع کر رہے ہیں ،ہونا تو یہ چاہئے تھاکہ اس حساس موقع پر ہم اپنی باہمی وحدت اور نظم کے ذریعے دشمن کو ایک طاقتور پیغام دیتے مگردشمن کے آلا کار جو ہماری صفوں میں گھسے ہوئے ہیں وہ دن رات اس کوشش میں سر گرداں ہیں کہ کس طرح ہمیں داخلی مسائل میں الجھایا جائے۔بعض اوقات ہمارے نا عاقبت اندیش افسران ان کی کی سازشوں کا شکار ہو جاتے ہیں مثلاً عزاداری سید الشہدا جو ہم سب کی مشترکہ میراث ہے اور جو کہ اس وقت ملک کے طول و عرض میں برپا ہے اس پر پنجاب کی جیلو ں میں پابندی لگا دی گئی ہے ، مجلس وحدت مسلمین کے مسلسل رابطہ کرنے کے باوجود اس مسئلہ کو نظر انداز کیا جارہا ہے ، آئین پاکستان ہر شخص کو چاہے وہ اسیر ہی کیوں نہ ہو مذہبی آزادی کی مکمل ضمانت دیتا ہے ،اڈیالہ جیل کی مثال لے لیں جہاں کئی دہائیوں سے ہونے والے اہل تشیع اسراء کے جمعہ کی نماز کے اجتماعات پر پابندی لگائی گئی ہے ،عشرہ محرم الحرام میں وہاں پر ذاکرین کے جانے اور مجالس امام مظلوم پر بھی پابندی لگائی گئی ہے ،ڈسٹرکٹ جیل سیالکوٹ کی بھی یہی صورتحال ہے اور وہاں حالات بدتری کی طرف جا رہے ہیں ہماری اطلاعات کے مطابق وہاں قیدیوں نے بھوک ہڑتال شروع کر دی ہے،ہم ایسے ظالمانہ اقدامات کی شدید مذمت کرتے ہیں،انہوں نے کہا کہ ہم ذمہ داران کو ان مشکلات سے آگاہ کرتے رہے ہیں اور اس کے لئے متعدد طریقے اختیار کئے گئے جن میں حکومت وقت سے لے کر انتظامیہ کو خطوط لکھے گے ان سے ملاقاتیں کی گئیں مگر حالات کو خرابی کی طرف دکھیلا جا رہا ہے لہذا آج ہم آپ کے ذریعے ذمہ داران کو یہ پیغام دینا چاہتے ہیں کہ روش کو درست کریں ہم عزاداری مظلوم کربلا پر کسی قسم کا سمجھوتا کرنے کو تیار نہیں اور نہ ہی اس سے ایک قدم پیچھے ہٹیں گے ۔اس موقع پرسید محسن شہریارممبر پولیٹیکل ایگزیکٹیو کونسل مجلس وحدت مسلمین پاکستان،علامہ سید نیاز بخاری،سید حسین زیدی،باقر حسین ایڈوکیٹ،زاہد حسین مہدوی بھی ان کےہمراہ پریس کانفرنس میں شریک تھے۔
وحدت نیوز (اسلام آباد) مجلس وحدت مسلمین پاکستان کے سربراہ علامہ ناصر عباس جعفری نے کہا ہے کہ واقعہ کربلا ہمیں اس بات کیطرف دعوت دیتا ہے کہ ہم اسلام پر ہر چیز کو قربان کرسکتے ہیں، لیکن اسلام کو کسی چیز پر قربان نہیں کرسکتے، اس راستے میں اگر جان بھی دینا پڑ جائے تو دریغ نہ کریں، امام حسین علیہ السلام نے ہمیں کربلا کے میدان میں سبق دیا کہ انسانیت اور مظلوموں کی خاطر قیام کریں، ظالم اور جابر حکمرانوں کیخلاف اٹھ کھڑے ہوں، امام حسین علیہ السلام نے اُس معاشرے میں یزید کیخلاف قیام کیا جو پست ہوچکا تھا، یہ معاشرہ پستی کی اس حد تک جا پہنچا تھا کہ یزید جیسا شخص برسر اقتدار آگیا اور مسلمانوں نے اس کی بعیت کرلی۔ اس سے برھ کر مسلمانوں کیلئے کیا پستی ہوسکتی تھی کہ یزید جیسا بدبخت انسان امت اسلامیہ کی بھاگ دوڑ سبھال بیٹھا، وہ شخص جو حلال محمد کو حرام کرنے لگ گیا تھا، دینی اقدار کا تمسخر اُڑانے لگ گیا، ایسے میں امام علیہ السلام نے شہادت کی راہ اپنائی، کربلا میں ہر شخص شہادت کا عاشق تھا، معصوم علی اصغر سے لیکر جوان علی اکبر تک سب ہی شہادت کے مشتاق تھے، ان میں موت سے ڈرنے والا کوئی نہیں تھا۔ حضرت زینب سلام اللہ علھیا نے یزید کے دربار میں کھڑے ہو کر کہا کہ کربلا میں ہم نے اللہ کا جمال ہی جمال دیکھا ہے۔ جو شخص حسینی کہلاتا ہے، اس کیلئے لازم ہے کہ وہ میدان عمل میں آئے۔ گھروں میں بیٹھنے والے خانقاہی تو کہلا سکتے ہیں لیکن حسینی نہیں۔
نویں محرم الحرام کے جلوس میں آئی ایس او راولپنڈی ڈویژن کے کارکنان سے خطاب میں علامہ ناصر عباس کا تھا کہ ایثار اور وفا کے اعلٰی ترین نمونے ہمیں کربلا میں ملتے ہیں، کربلا اور امام عالی مقام حضرت امام حسین علیہ السلام کی ذات گرامی رہتی دنیا تک کے حریت پسندوں اور غیور مسلم امہ کے لئے مشعل راہ ہے، امام عالی مقام نے ظلم و استبداد کے سامنے اپنے 72 جانثاروں کیساتھ قیام کرکے دنیائے انسانیت کو یہ درس دیا کہ ظالم چاہے کتنا ہی طاقت ور کیوں نہ ہو، اس کے سامنے کلمہ حق کے لئے ڈٹ جانے کا نام ہی حسینیت ہے، کربلا حریت پسندوں کی درس گاہ ہے، آج دنیا بھر میں جتنی بھی حریت کی تحریکیں چل رہی ہیں، ان کا مرکز محور امام عالی مقام کی ذات اقدس ہے، یزید کسی شخص کا نام نہیں بلکہ ایک فاسق، فاجر، جابر اور ظالم کے عمل کا نام ہے، استعماری طاقتیں آج کے یزیدی کردار ہیں، ان کیخلاف آواز اٹھانا اور میدان عمل میں رہنے کا نام حسینیت ہے، کشمیر، فلسطین، شام اور یمن میں مسلمانوں کی نسل کشی کے پیچھے چھپے کردار یزیدی ہیں۔ علامہ ناصر عباس نے یمن میں سعودی عرب کی بربریت کی شدید مذمت کی اور کہا کہ اللہ صبر کرنے والوں کے ساتھ ہوتا ہے، سعودی عرب کو اس جنگ میں شکست ہوگی۔ امریکہ اور اس کے بلاک کو شکست سے دوچار ہونا پڑے گا۔ اللہ تعالٰی مظلوموں کے ساتھ ہے۔ علامہ ناصر عباس نے کہا کہ وطن عزیز میں دہشت گردی اور فرقہ واریت کو ہوا دینے والے دراصل اسی فکر کے پیروکار ہیں، جنہوں نے کربلا میں نواسہ رسولۖ اور خاندان رسالت کو شہید کیا۔
وحدت نیوز(فیصل آباد) مجلس وحدت مسلمین فیصل آباد کے سیکرٹری جنرل احسان جعفری نے میڈیا سے گفتگو کرتے ہوئے کہا ہے کہ ایم ڈبلیو ایم پاکستان اتحاد بین المسلمین پر یقین رکھتی اور ملکی سالمیت کو اپنے ایمان کا حصہ سمجھتی ہے، قومی ایکشن پلان پر اس کی روح کے مطابق عمل ہونا چاہئے، لیکن بے گناہ افراد کو دہشتگرد نہ بنایا جائے۔ دھوبی گھاٹ گرائونڈ فیصل آباد میں پریس کانفرنس کے موقع پر ڈپٹی سیکرٹری جنرل ایم ڈبلیو ایم پنجاب ڈاکٹر افتخار حسین نقوی، مولانا سید فضل عباس کاظمی، مولانا محمد علی جوہر بھی موجود تھے۔ انہوں نے کہا کہ ایام عزاء میں ہمارے روایتی پروگرامز کو بند کیا جا رہا ہے، ہم نے بار ہا افسرانِ بالا کی توجہ ان مسائل کی طرف دلائی، جو ہر دفعہ یہ یقین دہانی کرواتے ہیں کہ روایتی پروگرامز کے راستہ میں کوئی رکاوٹ نہیں ہے، جبکہ علاقے کا ایس ایچ او اس بات سے صاف انکاری ہے۔ اسی طرح ایف آئی آر درج کرنے کی رفتار خطرناک حد تک تجاوز کرچکی ہے، جبکہ گھروں میں ہونے والے چھوٹے موٹے پروگرامز بھی بند کروائے جا رہے ہیں، جیلوں میں ہونے والے عزاداری کے قدیم پروگرامز بھی روک دیئے گئے ہیں۔ انہوں نے کہا کہ حکام بالا عزاداری کو روکنے کے اقدامات کا فوری نوٹس لیں۔
وحدت نیوز(کوئٹہ) ظالم چاہے جتنی طاقتور ہو جائے آخر میں فتح حق کو حاصل ہوتی ہے، دنیا کی تاریخ خود اس بات کی گواہ ہے کہ جتنے ظالم آئے ہیں وہ سب نست و نابود ہوئے ہیں۔ ہم پیروکاران شہدائے کربلاء ہیں اور ہم ظالم کی حکومت کبھی تسلیم نہیں کریں گے۔ ان خیالات کا اظہار مجلس وحدت مسلمین کوئٹہ ڈویژن کےرہنمااور کونسلر کربلائی عباس علی نے کیا۔انہوں نے اپنے بیان میں کہا ہے کہ محرم الحرام ظالم کے شکست اور ظلم سے انکار کا نام ہے، اسلام میں ظالم کی حکومت قابل قبول نہیں۔ اس مہینے میں خاندان رسول صلی اللہ علیہ و آلہ وسلم کو کربلاء کے میدان میں مظالم کا سامنا کرنا پڑا تھا اور مسلسل ظلم کے باوجود امام حسین علیہ السلام نے اپنے قیام سے ہمیں اس بات کا درس دیا کہ ہم کبھی ظلم کو تسلیم نہیں کریں گے۔عباس علی نے کہا کہ امام حسین ؑ نے کربلاء کے سر زمین میں اپنے اور اپنے خاندان کو راہ خدا میں قربان کر کے ہمیں یہ بتا دیا کہ ہماری جانیں اللہ کی جانب سے ہیں اور اللہ کیلئے ہیں ۔یزید نے ایک بڑی فوج کو امام حسین علیہ السلام سے بیعت لینے بھیجا ، اس کے پاس دنیا کی زیادہ تر آسائشیں اور دنیاوی طاقت موجود تھی مگر اس کے باوجود وہ ناکام رہا اور امام حسین علیہ السلام نے کم افراد کے باوجود حقیقی فتح حاصل کی اور اسلام کو بچا لیا ،جو اس بات کی دلیل ہے کہ عزت وذلت خدا کے ہاتھ میں ہیں کوئی ظالم اور جابر حق کی پیروی کرنے والے کو کبھی شکست نہیں دے سکتا ،خواں وہ جتنی چاہے بڑی فوج ساتھ لے آئے۔ انکا کہنا تھا کہ اسلام ہمیشہ حق کی حمایت کا کہتا ہے ۔ اگرتمام مسلمان ممالک اسلامی اصولوں پر عمل کرنا شروع کر دے تو دنیا کا کوئی بھی جابر و ظالم یا باطل بہ زور بازوں ہمیں نہیں جھکا سکتا۔ بیان کے آخر میں انہوں نے کہا کہ محرم الحرام ہمیں ظلم کے خلاف قیام کا درس دیتا ہے۔ جب کبھی کسی پر ظلم ہوتا ہے تو بحیثیت مسلمان ہماری ذمہ داری بنتی ہے کہ ہم ظالم کے خلاف آواز بلند کرے اور مظلوموں کی حمایت کرے۔
وحدت نیوز (لاہور) سربراہ مجلس وحدت مسلمین علامہ ناصر عباس کی جعفر ایکسپریس میں بم دھماکوں کی مذمت ،علامہ ناصر عباس کا قیمتوں جانوں کے ضیاع پر گہرے رنج اور دکھ کا اظہار کرتے ہوئے کہنا ہے کہ بلوچستان میں ٹارگٹ کلنگ کے بعد بم دھماکوں کا نیاسلسلہ انتہائی تشویشناک ہے،مرکزی اور صوبائی حکومتیں امن وامان کی بہتری کیلئے ہنگامی اقدامات کریں، کالعدم جماعتوں اور دہشتگردوں کے سہولتکاروں پر ہاتھ ڈالے بغیر امن نہیں لوٹ سکتا،حالیہ واقعات کے ذمہ داروں کو قوم کے سامنے لایا جائے، نیشنل ایکشن پلان پر عملدرآمد نہ ہونے کے سبب دہشتگرد اور ان کے سیاسی سرپرست و سہولت کار اب بھی دھندناتے پھر رہے ہیں،سیاسی جماعتیں و حکمران جماعت مصلحت پسندی کا شکار ہے،علامہ ناصر عباس جعفری نے مزید کہا کہ حکومت دہشتگروں اور ان کے حامیوں کو کنٹرول کرنے کے بجائے عوام کو حراسان کر رہی ہے،پنجاب اور سندھ میں عزاداری سید شہداء کو محدود کرنے کی سازشوں کو ہم قبول نہیں کرتے یہ ہمارا آئینی و قانونی حق ہے جسے ہم کسی کو چھیننے نہیں دینگے،علامہ راجہ ناصر نے شہدا کے خانوادوں سے اظہار تعزیت اور شہداء کی درجات کی بلندی کے لئے دعا بھی کی۔
وحدت نیوز(لاہور) مجلس وحدت مسلمین پنجاب کے عزاداری سیل کا پہلا اجلاس صوبائی سیکرٹریٹ لاہور میں منعقد کیا گیا۔ اجلاس کی صدارت مرکزی سیکرٹری سیاسیات و مرکزی مسول "عزاداری سیل" سید اسد عباس نقوی و صوبائی سیکرٹری جنرل پنجاب علامہ سید مبارک علی موسوی نے کی۔ اجلاس میں کوئٹہ اور حسن ابدال میں بیگناہ ملت تشیع کے افراد کی شہادت کو حکمرانوں کی ناکامی قرار دیتے ہوئے اس بربریت کی شدید مذمت کی گئی۔ علامہ مبارک موسوی نے اپنے خطاب میں کہا کہ نیشنل ایکشن پلان کے نام پر عوام کو بیووقوف بنایا جا رہا ہے، دہشتگردوں کے سرپرست اور سہولت کار اب بھی آزاد ہیں، کوئٹہ میں خواتین کی ٹارگٹ کلنک کا واقعہ حکمرانوں اور قانون نافذ کرنیوالے اداروں کے ماتھے پر کلنک کا ٹیکہ ہے، بزدل دہشتگردوں نے اپنی سفاکیت کا ثبوت دے کر حکومتی دعووں کی قلعی کھول دی ہے، بلوچستان میں 15 برسوں میں ملت تشیع پر 14 سو حملے ہوئے لیکن ہماری نسل کشی کے باوجود قاتلوں کو تحفظ ملا اور ہمیں دیوار سے لگایا گیا، کیا پاکستانی عدالتیں اس ملت مظلوم کو انصاف فراہم کرنے میں ناکام ہو چکی ہیں؟ آیا ہم انصاف لینے کیلئے عالمی عدالتوں کا رخ کریں؟ پاکستان میں ملت تشیع دہشتگردی کیساتھ ساتھ حکومتی انتقام کا بھی شکار ہے، بدقسمتی سے یہاں ظالم اور مظلوم کو ایک ہی لاٹھی سے ہانکنے کا عمل جاری ہے، یاد رکھیں حکومتیں کفر سے تو باقی رہ سکتیں ہیں مگر ظلم سے نہیں۔
اجلاس سے خطاب کرتے ہوئے سید اسد عباس نقوی نے کہا کہ عزاداری سیدالشہدا ہمارا آئینی و قانونی حق ہے، ہم اس حق سے ایک انچ بھی پیچھے ہٹنے کو تیار نہیں، ریاست اس عمل کے پابند ہے کہ وہ اپنے عوام کے آئینی و قانونی حقوق کا تحفظ کرے، پنجاب کے مختلف اضلاع سے موصول ہونیوالی شکایات سے اس بات کا اندازہ لگایا جا سکتا ہے کہ انتظامیہ اپنی ذمہ داریاں نبھانے کے بجائے عزاداران امام حسین کو ہراساں کرنے میں مصروف ہیں۔ سید اسد عباس نقوی نے محرم الحرام میں پنجاب کے مختلف اضلاع خصوصاً سرگودھا، خانیوال، گجرات اور دیگر اضلاع کی جیلوں میں مجالس عزاء کے انعقاد پر انتظامیہ کی جانب سے رکاوٹوں پر تشویش کا اظہار کرتے ہوئے کہا کہ انتظامیہ اپنی ذمہ داری ادا کرے اور ہمارے آئینی و بنیادی حقوق پر قدغن لگانے کی بجائے اپنی کارکردگی درست کرے۔ اجلاس میں صوبائی ممبران عزاداری سیل سید حسن رضا کاظمی، رائے ناصر علی، رانا ماجد علی، سید نیاز ہمدانی، علامہ حسن ہمدانی و دیگر نے شرکت کی۔
