The Latest
وحدت نیوز(اسلام آباد) مقبوضہ کشمیر ، فلسیطین اور یمن میں معصوم انسانی جانوں کے قتل عام پرخاموشی قابل مذمت ہے دنیا بھر میں انسانی حقوق کاعالمی دن منایا گیا کہ جسکے منشور کے تحت تمام ممالک میں ہر قسم کے علاقا ئی ، مذہبی، سیاسی امتیاز کے بغیر ہر انسان کی ذاتی عزت اور حرمت اور انسانوں کے مساوی اور ناقابلِ انتقال حقوق کو تسلیم کرنا دنیا میں آزادی، انصاف اور امن کی بنیاد ہے لیکن ہم مشاھدہ کر رہے ہیں کہ اس وقت دنیا میں ، بالخصوص یمن ، کشمیر اور فلسطین میں انسانی حقوق کی بدترین پامالی ہو رہی ہے جس سے معلوم ہوتا ہے کہ “انسانی حقوق کا عالمی” دن سوائے زبانی جمع خرچ کے ا ور کچھ نہیں ہے۔ ان خیالات کا اظہارمرکزی سیکرٹری جنرل ایم ڈبلیوایم شعبہ خواتین و رکن پنجاب اسمبلی محترمہ سیدہ زھرا نقوی نے میڈیا سیل سے جاری بیان میں کیا۔
انسانی حقوق کے عالمی دن کے موقع پر مسنگ پرسنز کے حوالے سے ان کا کہنا تھا کہ پاکستان میں ملت جعفریہ کے بیگناہ جبری گمشدہ افراد سالوں سے لا پتہ ہیں جن میں سے کئی کے والدین اپنے بچوں کے انتظار میں دنیا سے رخصت ہوگئے ان کے اہل خانہ اپنے پیاروں کی جدائی میں ہرپل تکلیف اور کرب کی کیفیت سے دوچار اپنے ناکردہ جرم کی سزا کاٹ رہے ہیں۔ حکومت پاکستان کو مسنگ پرسنز کی بازیابی کے لئے سنجیدہ اقدامات کرنے چاہیے اور اگر ان میں سے کوئی قصور وار ہے تو ان کے خلاف عدالتی کاروائی کی جائے۔
انہوں نے عالمی برادری کی مجرمانہ خاموشی پر کڑی تنقید کرتے ہوے کہا کہ مقبوضہ کشمیر میں ایک سو اٹھائیس دن کرفیو کے گزر چکے ہیں بھارت کی جانب سے انسانی حقوق کی بڑے پیمانے پر سنگین خلاف ورزی کی جارہی ہے اور عالمی برادری ان مظالم کی روک تھام کے لیے کوئی سد باب کرتی دکھائی نہیں دے رہی۔ عالمی انسانی حقوق کے علمبردار مقبوضہ کشمیر ، فلسطین اور یمن میں معصوم انسانی جانوں کے قتل عام کا نوٹس لیں اور اس منافقانہ رویے سے اجتناب کریں۔
وحدت نیوز(اسلام آباد) مجلس وحدت مسلمین کی وحدت یوتھ پاکستان کی مرکزی ایک روزہ مالک اشترتربیتی ورکشاپ کا انعقاد اسلام آباد میں ہوا جس میں نوجوانوں کی کثیر تعداد نے شرکت کی۔ورکشاپ سے ایم ڈبلیو ایم کے مرکزی رہنماؤں سمیت دیگر مقررین نے خطاب کیا۔اس موقع پر مجلس وحدت مسلمین شعبہ تعلیم کے مرکزی سیکرٹری نثار فیضی نے کہا کہ نوجوانوں کی تمام تر توجہ تعلیم پر مرکوز رہنی چاہیے۔ملکی و سماجی ترقی حصول تعلیم کے بغیر ممکن نہیں۔انہوں نے کہاتیزی سے بدلتے ہوئے عالمی رجحانات کا مقابلہ کرنے کے لیے آج کے نوجوان کو اپنی تعلیمی وفکری شعور کو بلند کرنا ہو گا۔دنیا میں جن قوموں نے تعلیم کو ترقی کا زینہ بنا لیا آج وہ بااعتماد انداز سے کامیابی کی طرف گامزن ہیں۔ملک وقوم کی ترقی اور عالمی طاقتوں کا سامنا کرنے کے لیے علم کی قوت کا درک اولین شرط ہے۔
ایم ڈبلیو ایم ایمپلائز ونگ کے سیکرٹری ملک اقرا ر حسین نے کہا کہ پڑھے لکھے نوجوانواں کو ملازمتوں کی فراہمی ریاست کی ذمہ داری ہے۔ ملک میں بڑھتی ہوئی بے روزگاری کی صورتحال تشویش ناک ہے۔ حکومت کو چاہیے کہ وہ نوجوانوں سے ملازمتوں کے حوالے سے کیے گئے وعدے پورے کرے۔انہوں نے کہا کہ پڑھے لکھے طبقے کو برسر روزگار بنا کر، بے چینی، معاشرتی ناہمواریوں اور غربت کا خاتمہ کیا جا سکتا ہے۔
ایم ڈبلیو ایم کے مرکزی رہنما علامہ اقبال بہشتی نے کہا کہ نوجوان کسی بھی قوم کا قیمتی اثاثہ ہوتے ہیں۔ ان کی فکری و علمی کاوشیں قومی ترقی کو بنیاد فراہم کرتی ہیں۔ جو طبقات اپنے نوجوانوں کی تربیت پر توجہ نہیں دیتے وہ تنزلی و ذلت کا شکار رہتے ہیں۔ کامیابی کی منازل طے کرنے کے لیے نوجوانوں کی فکری بلوغت اور اعلی تربیت انتہائی ضروری ہے۔نوجوانوں کی تربیت کے حوالے سے مجلس وحدت مسلمین کے فعال اور مثبت کردار کو ہر سطح پر سراہا جا رہا ہے۔
ایم ڈبلیو ایم شعبہ تربیت کے مرکزی سیکرٹری ڈاکٹر یونس حیدری نے کہا ہے نوجوانوں کی تربیت پر توجہ دور عصر کی سب سے اہم ضرورت ہے۔ اسلام دشمنوں قوتوں کا اولین ہدف عالم اسلام کے نوجوان ہیں۔ جن کے اخلاق و کردار کو تباہ کرنے کے لیے ہر طرح کے وسائل استعمال کیے جا رہے ہیں۔ثقافتی یلغار، غیر ملکی این جی اوز، سوشل میڈیا اور اخلاق باختہ مواد دشمن کے وہ مضبوط ہتھیار ہیں جن کے ذریعے نوجوانوں کو گمراہ کرنے کی بھرپور کوشش کی جا رہی ہے۔
انہوں نے مزید کہاکہ اس گمراہی کے سیلاب کے آگے بند باندھنے کا کام صرف باکردار و با عمل نوجوان ہی کر سکتے ہیں۔ہمیں اپنی اسلامی تشخص کی بقا کے لیے نوجوانوں کی تربیت مذہبی اصولوں کے مطابق کرنا ہو گی۔ اس کے لیے ضروری ہے کہ نوجوان کسی ایسی مذہبی جماعت سے مربوط رہیں جو رسول صلی اللہ علیہ وآلہ وسلم و آل رسول ص کی تعلیمات پر کاربند رہتے ہوئے وحدت و اخوت اور اقلیتوں کی مذہبی آزادی پریقین رکھتی ہو۔مجلس وحدت مسلمین اسی ایجنڈے پر پوری طرح کاربند ہے۔
وحدت نیوز(فیصل آباد) قرآن کریم کی حرمت اور تقدس کا خیال رکھنا ہر مسلمان پر واجب ہے ، حکومت اسلامی جمہوریہ پاکستان کو حکومتی سطح پر قرآن کریم کی بے حرمتی کے خلاف احتجاج کرنا چاہئے۔ ان خیالات کا اظہار مجلس وحدت مسلمین شعبہ خواتین کی مرکزی سیکرٹری فلاح و بہبود محترمہ فرحانہ گلزیب نے ایم ڈبلیو ایم کی جانب سے قائم کردہ قرآن سنٹر فیصل آباد میں منعقدہ تلاوت کلام مجید کی محفل سے کیا۔
حالیہ دنوں میں ناروے میں اسلام دشمن عناصر کی جانب سے قرآن مجید کی بے حرمتی کے خلاف اور تقدس کتاب الہی میں قرآن سنٹر میں خواتین نے تلاوت کلام پاک کی اور بعد ازاں محترمہ فرحانہ گلزیب نے خطاب کیا۔ ان کا کہنا تھا کہ اگرچہ قرآن مجید جو کہ مسلمانوں کی آخری الہامی کتاب ہے کی حفاظت کا ذمہ خود خداوند عالم نے اپنے ذمہ لیا ہے لیکن بحیثیت مسلمان قرآن کا تقدس اور احترام ہمارے ایمان کا حصہ ہے۔
اہمیت قرآن پر گفتگو کرتے ہوے انھوں نے کہا اہل اسلام کا المیہ ہی یہی ہے کہ وہ قرآن کی تعلیمات سے دور ہوگئے ہیں اور دشمن اسی دوری کا فائدہ اٹھا کر ہمارے مقدسات کی تحقیر کر رہا ہے ۔انھوں نے مزید کہا کہ اگر امت محمدی اپنے نبی صل اللہ علیہ وآلہ وسلم کی دختر کا دروازہ اور خیام حسینی جلنے سے بچا لیتی تو آج قرآن جلانے کی بھی کوی جرات نہ کرتا۔
وحدت نیوز(لاہور)مجلس وحدت مسلمین شعبہ خواتین لاہور کا اجلاس وحدت ہاوس شادمان لاہور میں منعقد ہوا۔ اجلاس کی صدارت سیکرٹری جنرل ایم ڈبلیو ایم لاہور حنا تقوی نے کی۔ اس موقع پر ڈپٹی سیکرٹری جنرل عظمیٰ نقوی، ساجدہ، افشین، حمیرا، فریحہ، نجبہ، بشریٰ، عذرا، رباب، عندلیب اور رضوان نے بھی شرکت کی۔ اجلاس میں ماہ دسمبر میں منعقد ہونیوالے پروگرامز کا جائزہ لیا گیا۔
اجلاس سے خطاب کرتے ہوئے حنا تقوی کا کہنا تھا کہ ہم نے ذمہ داری ملتے ہوئے امام زمان علیہ السلام سے عہد کیا تھا کہ اپنی ذمہ داریوں کو ایمانداری اور خلوص سے نبھائیں گے۔ انہوں نے کہا کہ اسی حلف کی پاسداری کرتے ہوئے ہمیں میدان عمل میں سرگرم رہنا ہوگا۔ حنا تقوی کا کہنا تھا کہ موجودہ پُرآشوب دور میں استعمار کا نشانہ مسلمان خواتین اور بچے ہیں، جن کو وہ اسلام سے دور کرنے کیلئے اربوں روپے کا سرمایہ خرچ کر رہا ہے۔
انہوں نے کہا کہ ہمیں خواتین کی اسلامی خطوط پر تربیت کرنا ہوگی اور انہیں دینی اقدار سے روشناس کروانا ہوگا تاکہ خواتین جہاں معاشرے میں اپنا مثبت کردار ادا کر سکیں گی وہیں اپنے بچوں کی تربیت بھی بہتر انداز میں کر پائیں گی۔ حنا تقوی کاکہنا تھا کہ ایم ڈبلیو ایم شعبہ خواتین اس حوالے سے دسمبر میں خصوصی پروگرامز کا انعقاد کرے گا جس میں خواتین کی تربیت کے حوالے سے خصوصی اہتمام کیا جائے گا۔
انہوں نے کہا کہ ایک مرد کی تربیت ایک فرد کی تربیت ہے جبکہ ایک عورت کی تربیت ایک خاندان کی تربیت ہے، اس لئے خواتین کی تربیت پر خصوصی توجہ دینا ہوگی۔ انہوں نے کہا کہ فیشن کی چکاچوند نے آج کی عورت کو بہت زیادہ متاثر کیا ہے، یہی وجہ ہے کہ میڈیا کی اس یلغار میں عورت اپنا تقدس کھو کر شمع محفل بن چکی ہے،ہمیں اس عورت کو اس کا تقدس واپس دلانا ہے۔
وحدت نیوز(حیدرآباد) مجلس وحدت مسلمین حیدرآباد کی جانب سے حرمت قرآن کے حوالے سے ایک احتجاجی ریلی حسینی مشن امام بارگاہ یونٹ نمبر9 سے نکالی گئی جو عام شاہراہ سے ہوتی ہوئی واپس اسی امام بارگاہ پر اختتام پذیر ہوئی۔ ریلی میں لطیف آباد کے مومنین و مومنات خصوصاََ بچوں نے کثیر تعداد میں شرکت کی۔ ریلی میں موجود شرکاء سے مولانا گل حسن مرتضوی، مولانا عمران دستی اور مجلس وحدت مسلمین شعبہ خواتین کی مرکزی سیکرٹری نشرواشاعت محترمہ عظمیٰ تقوی نے خطاب کیا۔
شرکاء سے خطاب کرتے ہوے محترمہ عظمی تقوی کا کہنا تھا کہ رسولِ اکرم صلی اللّٰہ علیہ وآلہ وسلّم نے فرمایا کہ میں تمہارے درمیان دو گرانقدر چیزیں چھوڑ کر جارہا ہوں ایک کتاب اللہ قرآن اور دوسرے میری عترت اہل بیت جو ان دونوں سے متمسک رہے گا میرے بعد گمراہ نہیں ہوگا اور یہ دونوں ایک دوسرے سے کبھی متفرق نہیں ہوں گے یہاں تک کہ میرے پاس حوض کوثر پر وارد ہوں گے۔ پس ہماری فلاح، نجات اور کامیابی اسی میں ہے کہ قرآن اور اہل بیت علیہم السّلام سے وابستہ رہیں۔
انھوں نے کہا کہ قرآن کی حفاظت کا ذمہ اگرچہ خداوند متعال نے خود لیا ہے مگر ہمارا بھی بطور مسلم فرض بنتا ہےکہ ہم اس کتاب الٰہی کی حرمت اور تقدس کی خاطر ہر طرح کی قربانی دینے کے لیے تیار رہیں۔ان کا کہنا تھا قرآن پاک کی بے حرمتی کی کوشش جہاں کہیں بھی کی گئی ہے ہم اس کی پرزور مذمت کرتے ہیں اور حکومت وقت سے اپیل کرتے ہیں کہ وہ اسلام و قرآن کے دشمنوں کا بائیکاٹ کرے اور قرآن کریم کی بےحرمتی کے خلاف بین الاقوامی سطح پر آواز اٹھائے۔
وحدت نیوز(حیدرآباد) مجلس وحدت مسلمین شعبہ خواتین کے فلاحی پروجیکٹ مدرسہ ام ابیھا و تعیلم بالغاں سکول میں ہفتہ وار باجماعت نماز فجر اور محفل دعاے ندبہ کا انعقاد ھوا ۔اس موقع پر مدرسہ کی معلمہ اور ایم ڈبلیو ایم شعبہ خواتین کی مرکزی رابطہ سیکرٹری نے روز جمعہ کی اھمیت پر خواتین اور طالبات سے خطاب کیا ۔
انھوں نے کہا کہ خدا نے تمام ایام میں روز جمعہ کو فضیلت عطا کی اور اسے دعا و عبادات کے لیے مخصوص کیا ہے اور اس دن دنیاوی امور ترک کرکے خالصتاً بارگاہ الہی میں عبادت انجام دینے کی تاکید اور بے پناہ اجر کا وعدہ کیا ہے محتر۔
مہ سیمی نقوی نے کہا کہ جمعہ کا دن امام زمانہ عج سے منسوب ہے لھذا اس دن اپنے امام عج سے رابطہ مضبوط کیا جاے اور ان کے ظھور کی دعا کثرت سے کی جاے انھوں نے کہا کہ ہم پنجگانہ نماز کے پابند ہوجائیں اور اپنے پروردگار سے عبادات کے ذریعے رابطہ مضبوط کر لیں تو دینی و دنیاوی خسارے سے محفوظ رہیں گے۔
وحدت نیوز(لاہور) مجلس وحدت مسلمین پاکستان شعبہ خواتین کی مرکزی سیکریٹری جنرل اور رکن پنجاب اسمبلی محترمہ سیدہ زہر انقوی الحمد اللہ روباصحت ہوکر دوبارہ پنجاب اسمبلی پہنچ گئی ہیں ۔
ایم پی اے سیدہ زہرا نقوی نے پنجاب اسمبلی کے سیشن میں شرکت کی اور دوران سیشن سڑکوں کی مرمت اور لائبریری ٹیسٹ سے متعلق سوالات کیئے۔
محترمہ سیدہ زھرا نقو ی نے اپنی صحتیابی کے لیے کی گئی دعاؤں اور نیک خواہشات پر اراکین اسمبلی کا شکریہ ادا کیا۔
وحدت نیوز(لاہور) امامیہ سٹوڈنٹس آرگنائزیشن طالبات کے سہ روزہ سالانہ کنونشن کے موقع پر دختر بانی آئی ایس اوشھید ڈاکٹر محمد علی نقوی ، مجلس وحدت مسلمین شعبہ خواتین کی مرکزی سیکرٹری جنرل اور ایم پی اے پنجاب اسمبلی محترمہ سیدہ زھرا نقوی اور مجلس وحدت مسلمین شعبہ خواتین کی مرکزی سیکرٹری تنظیم سازی محترمہ سیدہ معصومہ نقوی جو کہ آئی ایس او طالبات کی نظارتی کمیٹی کی رکن بھی ہیں، نے خصوصی شرکت کی ۔
تین روزہ سالانہ کنونشن میں شب شھداء کے موقع پر محترمہ سیدہ زھرا نقوی نے ملک بھر سے آئی ہوئیں طالبات کے نمائندہ تنظیمی اجتماع سے خطاب بھی کیا کنونشن سے خطاب کرتے ہوئے ان کا کہنا تھا کہ دین اسلام کی حفاظت اور پرچار کے لیے شھداۓ اسلام نے اپنے جانوں کے نذرانے پیش کیے اور دین مبین کی آبیاری اپنے لہو سے کی۔
ان کا کہنا تھا کہ ہمیں ملت جعفریہ پاکستان کے شھداء پر فخر ہے جنھوں نے خط ولایت پر چلتے جام شہادت نوش کیا شھداء ہمارا افتخار ہیں اور ان کے راستے کو زندہ رکھتے ہوے اس پر چلنا ہماری اولین ذمہ داری ہے۔ شھید ڈاکٹر محمد علی نقوی کی شخصیت پر اظہار خیال کرتے ہوئے ان کا کہنا تھا کہ شھید ان اہم شخصیات میں سے تھے جنھوں نے نوجوانان ملت پر بھرپور کام کیا ، ان کے نفوس کو زمانے کی آلودگیوں سے پاک کیا ان کی اخلاقی و روحانی تربیت کی اور باطل کے سامنے پرچم حق بلند کرنے کی جرات پیدا کی آپ نے جوانوں کو اپنے حقیقی دشمن کی پہچان کروائی اور نظریہ ولایت فقیہ سے روشناس کروایا۔
وحدت نیوز (لاہور) مجلس وحدت مسلمین شعبہ خواتین لاھور کی سیکرٹری جنرل محترمہ حنا تقوی اور ڈپٹی سیکرٹری جنرل محترمہ عظمی نقوی نے وفد کے ہمراہ گورنر ہاؤس میں مسز پروین سرور سے ملاقات کی اور ایم ڈبلیو ایم کی جانب سے منعقدہ وحدت کانفرنس میں شرکت کرنے پر ان کا شکریہ ادا کیا۔
اس موقع پر محترمہ حنا تقوی اور محترمہ عظمی نقوی نے بیگم پروین سرور کو تحائف پیش کیئے۔ملاقات میں باہمی دلچسپی کے امور اور مختلف ایشوز کے حوالے سے گفتگو ہوئی۔بیگم پروین سرورنے ایم ڈبلیوایم کی خواتین رہنماؤں کا گورنرہاؤس آمد پر شکریہ اداکیا۔ انہوں نے کہاکہ کامیاب وحدت کانفرنس کے انعقاد پر ایم ڈبلیوایم کو خراج تحسین پیش کرتی ہوں۔
انہوں نے مزیدکہاکہ پاکیزہ معاشرے کی تشکیل میں خواتین کا بنیادی کرادر ہےجسے فراموش نہیں کیا جاسکتا۔ دوران گفتگو محترمہ حنا تقوی کا کہنا تھا کہ ملک کو ترقی کی راہ پر گامزن کرنے کے لیے قوم کو اتحاد و اخوت کی راہ پر چل کر کام کرنا ہوگا ۔اس موقع پر محترمہ ثروت شجاعت اور محترمہ فرحت نور صاحبہ بھی موجود تھیں۔
وحدت نیوز(لاہور) مجلس وحدت مسلمین پاکستان کے زیر اہتمام ایوان اقبال لاہور میں وحدت کانفرنس کا فقید المثال انعقاد کیا گیا جس سے خطاب کرتے ہوئےایم ڈبلیوایم شعبہ خواتین کی مرکزی سیکریٹری جنرل اور رکن پنجاب اسمبلی سیدہ زہرہ نقوی نے اپنے خطاب میں کہا کہ پروردگار نے ہمیں رحمت العالمین کا امتی بنایا، آج سب کا یہاں جمع ہونے کا مقصد یہ ہے کہ ہم جسد واحد ہیں۔
انہوںنے کہاکہ ہمیں اپنے مشترک دشمن کو پہچانتے ہوئے اپنی تمام صلاحیتوں کو بروئے کار لاتے ہوئے اپنا کردار ادا کرنا ہے، اگر آج ہم ایوانوں میں ہیں تو ہم اپنے ملک کو اس سطح پر لانا چاہتے ہیں جہاں پروردگار چاہتا ہے، وہ ملک جس کی بنیاد اسلام کے نام پر رکھی گئی تھی، صرف نعرہ ہی نہیں واقعی ریاست مدینہ کی طرح ہو۔
امت مسلمہ کےدرمیان اتحاد اور بھائی چارہ قائم کرکے ہی ہم دشمن دین و دشمن ملک و قوم سے نبرد آزما ہو سکتے ہیں ۔ خدا ہمیں توفیق عنایت کرے کہ رسالتمآب صل اللہ علیہ وآلہ وسلم کی تعلیمات پر عمل پیرا ہو کر ہم امت واحدہ کی صورت میں مضبوط طاقت بن کر ابھریں اور اپنا حقیقی مقامِ عزت و سربلندی حاصل کریں آخر میں انھوں نے وحدت کانفرنس کے حوالے سے مجلس وحدت مسلمین شعبہ خواتین لاہور کی کاوشوں کو سراہا ۔
