وحدت نیوز(اسلام آباد)مجلس وحدت مسلمین پاکستان کے مرکزی جنرل سیکرٹری سید ناصر عباس شیرازی نے اپنے بیان میں کہا ہے کہ ملک کو موسمیاتی تبدیلیوں اور گلوبل وارمنگ کے چیلنجز سے نمٹنے کے لیے جامع منصوبہ بندی کی اشد ضرورت ہے پاکستان دنیا کے ان چند ممالک میں سرفہرست ہے جنہیں موسمیاتی تبدیلیوں سے شدید خطرات لاحق ہیں اس حوالے سے کئی عالمی ادارے متنبہ کر چکے ہیں لیکن ہم خواب غفلت سے بیدار نہیں ہو رہے۔

انہوں نے کہا کہ 75 سال سے وطن عزیز کو سیلاب جیسی قدرتی آفت سے شدید نقصان پہنچ رہا ہے لیکن صوبائی یا وفاقی سطح پر کوئی منظم اور مستحکم منصوبہ بندی نہیں کی گئی ہمارے خطے کے کئی ممالک ایسے ہیں جن میں چین،بنگلہ دیش،ہندوستان اور نیپال شامل ہیں جہاں سالانہ اوسط بارش پاکستان سے کئی گنا زیادہ ہونے کے باوجود وہاں سیلاب سے اس قدر شدید نقصان نہیں ہوتا جتنا ہمارے ملک میں نقصان پہنچتا ہے ان ممالک نے اپنے قومی وسائل کو ملک کے وسیع تر مفادات میں بروقت اور موقع محل کے مطابق استعمال کیا ہے جس میں ہماری حکومتیں اور پالیسی ساز ادارے ناکام رہے ہیں۔

انہوں نے کہا کہ ہمارے حکمران بیرونی قرضوں کی مد میں اربوں ڈالرز لے چکے ہیں جنکا آج تک قوم کو نہیں پتہ کہ یہ بھاری بھرکم قرضہ جات آخر کہاں خرچ ہوئے ہیں۔ موجودہ حکمران بھی اربوں ڈالر امداد سیلاب زدگان کی مدد اور بحالی کے نام پر وصول کر چکے ہیں اور ابھی تک عالمی برادری اور فورمز پر اپنے بھیکاری پن کا اظہار کر رہے ہیں لیکن ملک میں سیلاب سے متاثرہ علاقوں میں لوگ آج بھی حکومتی امداد کے منتظر ہیں سردیوں کا موسم شروع ہو چکا ہے لوگ بے یار مددگار گھروں کے ملبے پر کھلے آسمان تلے دن رات بسر کرنے پر مجبور ہیں۔سندھ کے کئی علاقوں میں سیلاب کا پانی کھڑا ہونے سے گندم کی کاشت نہیں ہو سکی بچے اب تک سکول نہیں جا سکے لیکن انکا کوئی پرسان حال نہیں اور نہ ہی ارباب اختیار ٹس سے مس ہو رہے ہیں۔