وحدت نیوز(جیکب آباد ) مجلس وحدت مسلمین پاکستان صوبہ سندہ کے سیکریٹری جنرل علامہ مقصودعلی ڈومکی نے کہا ہے کہ قوم آئین کی دفعہ 62, 63 کے خلاف حکمرانوں کے ناپاک عزائم کو تسلیم نہیں کرے گی۔ چور اور قاتل حکمران ٹولہ آئین کی دفعات میں تبدیلی کے ذریعے کرپشن اور لاقانونیت کا دروازہ کھولنا چاہتے ہیں۔آئین کی دفعات میں تبدیلی کے ذریعہ صاق و امین کی صفات کا حذف کرنا ناقابل قبول ہے۔ عوامی مسائل اور مشکلات سے بے خبر ،بے درد حکمرانوں نے آج تک دھشت گردی کے خاتمے کے لئے تو ملکی قانون میں کوئی بہتری نہیں کی ۔ انہیں بے روزگاری کے خاتمے کی بھی کوئی فکر نہیں۔ انہیں فکر اس بات کی ہے کہ نا اہلی کے باوجود کیسے وزیر اعظم بنا جا سکتا ہے۔

انہوں نے کہا کہ ارباب اقتدار کو یہ بات ذہن نشین رہنی چاہئے کہ یہاں کوئی بھی قانون سے بالاتر نہیں ہے۔ نااہل نواز شریف کی جانب سے اپنے سگے بھائی شہباز شریف کو پارٹی صدارت کے لئے نامزد کرنا اس بات کی دلیل ہے کہ یہاں میرٹ پامال ہو چکی ہے۔ جب منصب اور عہدے صلاحیت کی بجائے رشتہ داریوں پر ملنے لگیں تو یہ معاشرتی زوال کا سبب ہوں گے۔ قوم نواز شریف سے سوال پوچھتی ہے کہ سانحہ ماڈل ٹاؤن کے مبینہ مجرم ، نواز کے سگے بھائی شہبازکے علاوہ نواز لیگ میں پارٹی صدارت اور وزارت عظمیٰ کا اہل کوئی امیدوار موجود نہیں۔

انہوں نے کہا کہ حکومت جان بوجھ کر زائرین کے لئے مشکلات ایجاد کر رہی ہے، اپنی ہی سرزمین پر زائرین کو محصور کیا جاتا ہے، ان سے این او سی طلب کیا جاتا ہے، انہیں حراسان کیا جاتا ہے۔ ملت جعفریہ کے ساتھ امتیازی سلوک ختم ہونا چاہئے۔ حکومت زائرین کی مشکلات حل کرے، زائرین کے سلسلے میں حکومتی رویہ ناقابل برداشت ہوتا جارہا ہے، اس اشو پر پوری قوم متحد ہے۔