وحدت نیوز (کوئٹہ)  پی بی 26 کے عوام کی مجلس وحدت مسلمین سے بھر پور تعاون اور حمایت کا اظہار ہی ہماری کامیابی ہے، مجلس وحدت مسلمین پاکستان کے شوری عالی کے رکن اور سابق وزیر قانون  سید محمد رضا (آغا رضا) نے یہ بات پارٹی عہدیداروں اور ورکرزسے الیکشن کے بعد پیدا ہونے والی صورت حال پر اظہار خیال کرتے ھوئے کہی،انہوں نے کہا کہ ہم ان تمام بزرگوں،بھائیوں، ماوں، بہنوں اور بیٹیوں کا تہہ دل سے مشکور ہیں جنہوں نے ہم پر اعتماد کا اظہار کیا اور اپنا قمیتی ووٹ دیکر ھمیں عزت بخشی۔

انہوں نے کہا کہ ایک ماہ کی قلیل مدت میں شوری بزرگان یونٹ، صوبائی ڈویژنل ضلعی یونٹس اور مخلص پارٹی ورکرز کی محنت اور بطور خاص ہزارہ ٹاون کے باشعور عوام کی حمایت کا نتیجہ ھے کہ ہماری ایک جیتنے والی حیثیت بن گئی ہے اور فاشسٹ نسل پرست مافیا بوکھلاہٹ کا شکار ہے اور پہ در پہ غلطی پر غلطی کئے جارہی ہے اور اپنے ساتھ ساتھ قوم کے لیے مشکلات کھڑی کررہی ہے۔

انہوں نے کہا کہ بد ترین دھاندلی کے با وجود پی بی 26 میں تیسری اور ہزارہ ٹاون میں دوسری پوزیشن لینا انتہائی خوش آئند ہے ،انہوں نے مزید کہا کہ سیٹ ہو یا نہ ہو ہم اپنے ملی تشخص اور نظریات کا دفاع کرتے رہیں گے اور ھر اس سازش کے سامنے سینہ سپر ھونگے جس سے ملت پر آنچ آتی ھو۔