وحدت نیوز (گنداواہ) مجلس وحدت مسلمین بلوچستان کے صوبائی جنرل سیکرٹری علامہ سہیل اکبر شیرازی نے کہا ہے کہ نواسہ پیامبر اکرم امام حسین علیہ السلام نے اسلام کو بچانے کے لئے اپنے خاندان اور اصحاب و انصار کے ہمراہ کربلا کے مقام پر عظیم قربانی دی۔ یہ بات انہوں نے حسین زندہ باد ٹرسٹ گنداواہ کیجانب سے مسجد اقصیٰ حسینی محلہ میں عشرہ محرم کی مجالس کے حوالے سے اہم میٹنگ کے موقع پر گفتگو کرتے ہوئے کہی۔ علامہ سہیل اکبر شیرازی نے محرم الحرام کے تقدس کا تذکرہ کرتے ہوئے کہا کہ یہ اسلامی تقویم کا پہلا مہینہ ہے۔ محرم الحرام کو اسلام سے پہلے بھی انتہائی قابل احترام سمجھا جاتا تھا۔ اسلام نے یہ احترام جاری رکھا۔ اس مہینے میں جنگ و جدل ممنوع ہے۔ اسی حرمت کی وجہ سے اسے محرم کہتے ہیں۔
انہوں نے کہا کہ نواسہ پیامبر اکرم امام حسین علیہ السلام کی اسلام کو بچانے کے لئے اپنے خاندان اور اصحاب و انصار کے ہمراہ کربلا کے مقام پر شہادت اسی مہینے میں ہوئی ہے۔ ہمارے لئے محرم کا مہینہ غم و حزن اور عزاداری کا مہینہ ہے۔ میٹنگ میں صوبائی رابطہ سیکرٹری و انجمن درگاہ سید ایوب شاہ بخاری کے متولی سید گلزار شاہ بخاری، انجمن حسینی کے مولانا امجد علی محسنی، انجمن امام زمان عجل کے مولانا اللہ ڈنہ عرفانی، انجمن گلشن زہرا کے میر حسن سپرہ، انجمن علمدار کے استاد جاوید احمد ابڑو، انجمن نہرالقمہ کے عابد حسین دھکڑ، انجمن امام بارگاہ امام مہدی عج کے غلام محمد حسنین شیرازی اور دیگر انجمنوں کے متولی حضرات نے شرکت کی۔ اس موقع پر عشرہ محرم الحرام میں شام اور صبح کی مجالس عزاء کے سلسلہ میں اہم گفتگو ہوئی۔
