وحدت نیوز(گلگت ) ملکی سالمیت و استحکام کیلئے دی جانیوالی قربانیاں ہرگز رائیگاں جانے نہیں دینگے۔شہید عارف حسیں الحسینی اتحاد بین المسلمین کے حقیقی داعی تھے جنہوں نے ملک کو اندرونی و بیرونی خطرات سے بچانے کیلئے تمام مذاہب و مسالک کے ماننے والوں کو ایک لڑی میں پرودیا تھا۔ مجلس وحدت مسلمین گلگت بلتستان شعبہ خواتین کے زیر اہتمام علامہ عارف حسین الحسین شہید کی 29 ویں برسی کی مناسبت سے منعقدہ مہدی برحق کانفرنس میں مقررین نے کہا کہ شہید عارف حسین الحسینی نے استحکام پاکستان کیلئے اپنی جان کی قربانی دی ،انکی پوری زندگی فرقہ واریت، لسانیت اور علاقائیت جیسے منفی نظریات کیخلاف جدوجہد میں گزری اور قائد شہید کے قتل میں حقیقت میںوہ طاقتیں ملوث تھیں جو پاکستان کو کسی صورت مضبوط دیکھنا نہیں چاہتی تھیں۔

مقررین نے اپنے خطاب میں قیام پاکستان کے موقع پر اپنی قیمتی جانوں کا نذرانہ پیش کرنے والوں کو خراج تحسین پیش کیا اور عہد لیا کہ مملکت خداداد پاکستان کے استحکام و سالمیت کیلئے کسی قربانی سے دریغ نہیں کرینگے۔ملک کو درپیش خطرات سے آگاہ کرتے ہوئے مقررین نے کہا کہ ارض پاکستان کی بنیادوں کو مستحکم کرنے کیلئے افواج پاکستان کے شانہ بشانہ اندرونی و بیرونی دشمنوں کا مردانہ وار مقابلہ کیا جائیگا۔انہوں نے کہا کہ آج ہمارا سر فخر سے بلند ہے کہ گلگت بلتستان میں رہنے والی مائوں کی کوکھ سے جنم لینے والے جوان ملک عزیز پاکستان کی نظریاتی و جغرافیائی سرحدوں کی حفاظت میں اپنے جانوں کا نذرانہ پیش کررہے ہیں۔اس شاندار پروگرام میں ان مائوںنے خصوصی شرکت کی جن کے دلیر فرزندوں نے کارگل اور وانا وزیرستان میں قربانیاں دیکر دشمنوں کو ناکوں چنے چبوائے۔

اس موقع پر صوبائی و وفاقی حکومتوں کے تعصب پر مبنی اقدامات پر سخت برہمی کا اظہار کرتے ہوئے مطالبہ کیا کہ گلگت بلتستان کے عوام کے بنیادی حقوق کو سلب کرنے والوں کا احتساب کیا جائے اور گلگت بلتستان میں جاری بیلنس پالیسی کو فی الفور ختم کرکے میرٹ کو بحال کیا جائے تاکہ عوام میں پائی جانیوالی احساس محرومی کی تلافی ہوسکے۔پاک چائنہ اقتصادی کوریڈور میں گلگت بلتستان کے عوام کو محروم کرنا حکومت کی اس علاقے کیساتھ امتیازی سلوک کے مترادف ہے ۔عوامی ملکیتی اراضی پر جبری قبضہ کسی طور پر قابل قبول نہیں حکومت ہمارے جائز حقوق کو پامال نہ کرے ۔ پروگرام کے آخر میں وطن عزیز کی حفاظت کیلئے دن رات چوکس رہنے والے افواج پاکستان کے جوانوں کی حفاظت کیلئے دعائیں مانگی گئیں۔