وحدت نیوز(حیدرآباد) مجلس وحدت مسلمین پاکستان شعبہ خواتین اور دیگر تنظیموں ، اداروں اور مدارس کے تعاون سے تیسرا سالانہ پروگرام “اسوہ فاطمی” کے عنوان سے ضلع حیدرآباد میں منعقد ہوا،ایم ڈبلیو ایم پاکستان شعبہ خواتین ضلع حیدر آباد کی جانب سے “اسوہ فاطمی” کانفرنس کے لیے مختلف علاقوں سے خواتین کو مدعو کیا گیا۔ اس کانفرنس کے آغاز میں مدرسہ جماران اور مدرسہ فاطمیہ کی بچیوں نے تلاوت قرآن اور مختلف ایکٹیویٹیز پیش کیں،کانفرنس میں پینل ڈسکشن کے لیے مختلف شعبہ ہاے زندگی سے تعلق رکھنے والی خواتین کو دعوت دی گئ جن میں جامعہ زھرا حیدر آباد سے محترمہ سائرہ شاہ،محترمہ کنیز زھرا، زبیری کالج کی پرنسپل محترمہ تہذیب شاہ ، ایم ڈبلیو ایم شعبہ خواتین کی مرکزی سیکرٹری نشر و اشاعت اور بیت زھراؑ حیدر آباد کی چیئر پرسن محترمہ عظمی تقوی اور ایڈووکیٹ شاکرہ نیاز نے خطاب کیا۔
ایم ڈبلیو ایم شعبہ خواتین کی مرکزی مسئول محترمہ عظمی تقوی صاحبہ نے اپنے خطاب میں کہا “ سیدہ زھرا سلام اللہ علیھا سورة کوثر کی عملی تفسیر ہیں آپؑ کی نسل پاک دنیا کے ہر کونے میں موجود ہے لیکن آپ کا دشمن بے نام نشاں ہیں ،خدا نے آپؑ کو وہ مقام عطا کیا ہے جو کسی اور خاتون کو نہیں بخشا آپ سیدة النساء العالمین ہیں ، ہمارے لیے باعث فخر و مباھات ہے کہ خدا نے ہمیں سیدہؑ کے در کا گداگر بنایا ہے ، جو آپ کے در سے متمسک رہا وہ دنیا و آخرت میں فلاح پاگیا،مقررین کے خطاب کے بعد سوالات و جوابات کا سلسلہ شروع ہوا،تقریب کے اختتام میں مہمان معلمات میں شیلڈ بطور انعام پیش کی گئ اور تمام معاون اداروں ، تنظیموں اور مدارس کی مدیروں کو اظہار تشکر کیلئے سرٹیفیکیٹ پیش کیے گئے۔
