وحدت نیوز(لاہور)مجلس وحدت مسلمین کے لاہور کےحلقہ 172 کے نامزد امیدوار جناب سید فخر حسنین ضوی کا اپنے وفد کے ہمراہ مجلس وحدت مسلمین کے صوبائی صدر جناب علامہ سید علی اکبر کاظمی سے ملاقات،اس ملاقات میں صوبائی سیکرٹری سیاسیات جناب سید حسین شاہ زیدی، اقبال ٹائون کے صدر جناب سید فیضان نقوی ضلعی صدر لاہور جناب نجم عباس خان صوبائی آفس سیکرٹری ظہیر کربلائی کے علاوہ دیگران مجلس وحدت ضلع لاہور کے عہدیداران اور مختلف ٹائونز کے کارکن بھی موجود تھے ۔

 علامہ سید علی اکبر کاظمی نے ملکی موجودہ سیاسی صورتحال پر پربہترین انداز سےبریف کیا  ۔ مجلس وحدت مسلمین پاکستان کے نامزد امید وار جناب سید فخر حسنین رضوی نے اپنے حلقے کے مسائل اورباقاعدہ الیکشن مہم شروع کرنے پر صوبائی صدر کو آگاہ کیا ۔ صوبائی صدر مجلس وحدت مسلمین پاکستان نے کہا حلقے میں کارنرز میٹنگ اور الیکشن کمپین کا آغاز کردیا جائے صوبائی سیکرٹری سیاسیات جناب سید حسین شاہ زیدی نے کہا کہ مجلس وحدت مسلمین پاکستان نے ملک بھر میں اپنے امیدوارالیکشن کے لئے میدان میں اتارے ہیں ۔ ہمارا منشور واضح ہے ۔ اس لئے لوگ کنونس ہو کر ہماری باتوں کو سنجیدہ لے رہے ہیں ،میں سید فخرحسنین رضوی کو یقین دلاتا ہوں کہ مجلس وحدت آپ کی اخلاقی تعاون جاری رکھے گی ۔

 مجلس وحدت مسلمین پاکستان کی مرکزی سیاسی کونسل دن رات ایک کیے الیکشن 2024 پر فوکس کیے ہوئے ہے ۔ ہم نے نہ پہلے کسی کو ناامید کیا ہے اور نہ ہی اب ناامید کریں گے ۔ ان شاءاللہ لاہور کے حلقہ 172 کے نامزد امید وارجناب سید فخر حسنین رضوی نے بتایا کہ میں حلقے پہلی مرتبہ نہیں جا رہا بلکہ حلقے کے عوام مجھے جانتے ہیں میںنے کونسلر کے انتخابات کے لئے بھی اپنی کمپین چلائی تھی ۔ اس وقت بھی عوامی حمایت دوسرے کے مقابلے میں مجھے حاصل تھی اب ان شاءاللہ عوام کے پا س جاکر میں اپنی انتخابی مہم کا باقاعدہ آغاز کردیا ہے ۔ صوبائی صدر صاحب کا بھی مشکور ہوں کہ انہوں نے بھی مجھے حوصلہ دیا اور مجھے اتخابی مہم کے لئے باقاعدہ گو ہیڈ دیا ہے ۔ میں ان شاءاللہ مرکز اور صوبے کی پالیسی کو اپنی انتخابی اولین ترجیح دونگا ۔ اور عوامی امنگوں پر پورا اترنے کی بھر پور کوشش کرونگا ۔یہ ملاقات واشنگ لائن میں ہوئی جو ایک گھنٹے تک جاری رہی۔

وحدت نیوز(اسلام آباد) مجلس وحدت مسلمین پاکستان علامہ چیئرمین علامہ راجہ ناصر عباس جعفری نے میڈیا سیل سے جاری اپنے بیان میں کہا ہے کہ پاکستان کے ابتر معاشی حالات کسی بھی نئے تجربے کے متحمل نہیں، ملکی معاشی صورتحال اس بات کی متقاضی ہے کہ بروقت اور شفاف انتخابات کروائے جائیں، نگران حکومت کو چاہیے کہ وہ اپنی تمام تر توجہ آئینی ذمہ داری پر مرکوز رکھے، ایوانِ بالا میں الیکشنز ملتوی کرنے کی قرارداد منظور کرنا قابل مذمت ہے، ملکی قرض سود سمیت ادا کرنے کے لیے اور تجارتی خسارہ پورا کرنے کیلئےہر سال 25 ارب ڈالر کا نیا بیرونی قرض درکار ہے، حکومت اس صورتحال سے آسانی سے نہیں نپٹ سکتی، بہت مشکل اور تلخ فیصلے کرنا ہوں گے، اس کے لیے عوام کو اعتماد میں لینا اشد ضروری ہو گا، اگر ایسی حکومت بنانے یا لانے کی کوشش کی گئی جسے عوام کی تائید و حمایت حاصل نہ ہوئی تو وہ اس بحران سے نمٹنے میں بری طرح ناکام ہو جائے گی اور ملک مشکلات کی گہری کھائی میں جا گرے گا۔

انہوں نے کہا کہ ملک کی معاشی و سیاسی صورتحال تو پہلے ہی ابتر تھی اب لاء اینڈ آرڈر کی صورتحال بھی گھمبیر صورت اختیار کر رہی ہے، خیبرپختونخواہ اور بلوچستان اس ناامنی سے سخت متاثر ہیں ملک میں ماضی کی طرح پھر سے مذہبی شدت پسندی، لسانیت اور قومی تعصبات کو ہوا دی جا رہی ہے، پارہ چنار کے معصوم اور نہتے شہریوں کو آئے روز دوران سفر نشانہ بنایا جا رہا ہے، وفاقی دارالحکومت میں کھڑے ہو کر تکفیری شدت پسند ملکی قوانین کی کھلم کھلا خلاف ورزی کر رہے ہیں، ان مٹھی بھر شدت پسندوں کو لگام دینا کس کی ذمہ داری بنتی ہے، بلوچستان کے دور افتادہ علاقوں سے سفر کر کے آنے والی بہن بیٹیوں پر تشدد کیا گیا، یہ کیا پیغام دیا گیا، ہمارے معاشرے میں تو دشمن کی ماؤں بہنوں کا بھی احترام کیا جاتا ہے، خواتین کا لحاظ رکھنا تو ہماری ثقافت اور تہذیب کا حصہ ہے، مائیں بہنیں بیٹیاں اور بچے تو سب کے سانجھے ہوتے ہیں یہ تو پھر بھی ہمارے اپنے ہیں، دشمن تو یہی چاہتا ہے کہ پاکستان کی عوام ریاست سے ناراض ہوں، ریاستی اقدامات سے عوام میں مزید غم و غصہ پیدا ہو رہا ہے، اپنی انا کے خول سے باہر نکل کر ملک کے وسیع تر مفاد میں فیصلے کرنا ناگزیر ہو چکا ہے۔

وحدت نیوز(اصفہان) مجلس وحدت مسلمین شعبہ اصفہان کے زیر اہتمام عظیم الشان تکریم شہداء کانفرنس کا انعقاد۔تفصیلات کے مطابق بروز جمعہ مورخ 22 جمادی الثانی مطابق 5 جنوری کو مجلس وحدت مسلمین شعبہ اصفہان کے زیر اہتمام جامعہ المصطفی العالمیہ واحد اصفہان میں عظیم الشان تکریم شہداء کانفرنس کا انعقاد کیا گیا۔جس میں طلاب کرام کی کثیر تعداد میں شرکت۔کانفرنس کا باقاعدہ آغاز تلاوت کلام الہی سے ہوا جس کا شرف برادر حافظ سلیم شیخ صاحب کو ہوا۔

انکے بعد برادر محمد سلیم نے منقبت پیش کی بعد از آں برادر عادل حسین نے شہید علامہ ضیاء الدین رضوی قائد گلگت بلتستان کی بابرکت زندگی پر مفصل گفتگو کرتے ہوئے شہید کی ملت گلگت بلتستان پر خدمات کو بیان فرمایا۔جس کے بعد برادر فرقان حیدر نے منقبت خوانی کی۔

انکے بعد کانفرنس کے مھمان خصوصی علامہ سید احمد میر مرشدی صاحب(سابق مسئول حوزہ و نمائندہ ولی فقیہ در نیروی ھوایی سپاہ) نے خطاب کرتے ہوئے شہداء کی خدمات و شہید قاسم سلیمانی کی شخصیت پر روشنی ڈالی۔

انکا کہنا تھا ہم اپنے آپ میں بصیرت و فرقان پیدا کریں اور یہ حاج قاسم سلیمانی کی بصیرت اور حکمت عملی کا نتیجہ ہے کہ داعش جیسے دہشت گرد نابود ہوئے،حاج قاسم سلیمانی نے جبہ مقاومت کو قوت بخشی ہے۔

آپ نے فرمایا کہ رجیم اسرائیل کی جنایت اور فلسطین پر مظالم کے خلاف طوفان الاقصیٰ ایک انقلابی تحریک تھی اور یہ طوفان الاقصی کے ثمرات ہیں کہ جس کی وجہ سے دنیا کے ہر طبقے سے تعلق رکھنے والے افراد بیدار ہوئے۔آج ہم پہلے سے بہت زیادہ طاقتور ہیں۔

انہوں نے اپنے گفتگو میں شہید قائد علامہ عارف حسین الحسینی اور شہید مظلوم آغا ضیاء الدین رضوی کا تذکرہ کیا اور انہیں خراج تحسین پیش کیا۔بعد از آں برادر ساجد علی مھدوی نے ترانہ شہداء پیش کیا۔

یاد رہے کانفرنس میں مزید جامعہ المصطفی العالمیہ واحد اصفہان کے تشکل ھای فرھنگی کے صدور جناب سید جعفر شمسی مسئول تشکل شہید عارف الحسینی،مسئول تشکل سلمان فارسی محسن رضا نقوی، سید حسن امام نمائندہ تشکل المھدی ھندوستان ، محمد ھاشم مبلغی مسئول تشکل مجمع انوار بلتستان ، محمد ذیشان نمائندہ تشکل عماریوں نے خطاب کرتے ہوئے شہداء اسلام شہداء مقاومت کو خراج تحسین پیش کیا۔

پروگرام کے آخر میں مسئول مجلس وحدت مسلمین شعبہ اصفہان برادر سید محسن نقوی صاحب نے عظمت شھداء کو بیان کرنے کہ بعد مھمانان و شرکت کنندگان کا شکریہ ادا کیا اور دعائیہ کلمات سے پروگرام کا اختتام کیا۔ نظامت کے فرائض برادر حافظ ملک وسیم سجاد صاحب انجام دے رہے تھے ۔

وحدت نیوز(کراچی) چیئرمین مجلس وحدت مسلمین پاکستان  علامہ راجا ناصر عباس جعفری نے ایم ڈبلیوایم کراچی ڈویژن کے زیر اہتمام بارگاہ شہدائے کربلا انچولی سوسائٹی کراچی میں منعقدہ مرکزی مجلس عزا بیاد شہدائے ملت جعفریہ و شہدائے راہ قدس سے خطاب کرتے ہوئے کہا کہ پاکستان کی سرزمین ہمارے قیمتی شہداءکے پاکیزہ خون سے سیراب ہوئی ہے، ہم نےمکتب کربلا وعاشورا کی پیروی کرتے ہوئے اس عصر کی کربلا میں عظیم شہداء کی قربانیاں پیش کی ہیں، وطن عزیز کو ایک سوچے سمجھے منصوبے کے تحت تکفیری کی آگ میں جھونکا گیا ۔

انہوں نے کہا کہ قاسم سلیمانی کا سب سے بڑا کارنامہ مقاومت کو طاقتور بنانا ہے۔شہید قاسم سلیمانی نے گریٹر اسرائیل کے منصوبے، ڈیل آف سینچری اور نارملائزیشن ود اسرائیل کے منصوبے سمیت داعش کو ناکام بنایا ،وہ کسی خاص ملک کے نہیں ہم سب کے محسن ہیںپوری امت مسلمہ کے محسن ہیں، اس عظیم شہید نے عراق و شام میں داعش کا سر کچل کر پوری دنیا کو اس بدترین فتنے سے آزادی دی۔ قاسم سلیمانی نے غزہ کے مظلوموں کو مچھلی پکڑکر نہیں دی بلکہ جال بننا سکھایا۔

ان کا کہنا تھا کہ آج امام زمانہؑ کے ظہور کی رکاوٹیں ختم ہورہی ہیں ، آپریشن طوفان الاقصی'  اسرائیل پر فلسطینیوں کا 75 سالہ تاریخ میں سب سے زیادہ کاری وار ہے،فلسطین نے اسرائیل کے غبارے سے ہوانکال دی ۔اسرائیل دنیا بھر میں میڈیا وارہارچکا ہے۔اسرائیل کا مکروہ چہرہ پوری دنیا پر آشکار ہوگیا ۔اسرائیل کھلی جنگ نہیں کرسکتا،جنگی جرائم کرسکتا ہے ۔اسرائیل جنگ کوہمیشہ باہر لڑتا رہا ہے،مزاحمتی قوت نے جنگ کو اسرائیل کے اندر تک پہنچا دیا ہے۔اسرائیل اسٹریجیٹکل طور پر شکست کھاچکا ہے۔آج کا زمانہ تشیع کی طاقت وسربلندی کا زمانہ ہے ، امام خمینی نے فرمایا تھا کہ جس قوم کے پاس شہادت ہو وہ کبھی غلامی قبول نہیں کرتی۔ہمارے سیاسی پیشواا غیبت کبری' میں ولی فقیہ ہیں۔ہمیں رہبر معظم آیت اللہ خامنہ ای پرفخر ہے۔ہمیں رہبر معظم آیت اللہ سید علی خامنہ ای کے پرچم کے نیچے جمع ہونا ہوگاجیسے ملت ایران، عراق، شام ، لبنان اور یمن اکھٹا ہوئے اور عالمی سامراج کو شکست فاش دی۔

علامہ راجہ ناصرعباس نے کہا کہ پاکستان کے تشیع میدان میں رہ کر امریکی سازشوں کو ناکام بنائیں گے۔پاکستان کو حسینیوںؑ نے بچانا ہے۔ہم جتنے باشعور و بیدار ہوئے ،اتنے طاقتور ہوں گے ۔پاکستان میں تکفیری ٹولے کے ذریعے تشیع کو الجھایا گیا ہے ۔استعماری طاقتیں اور ان کے مقامی ایجنٹ یہ نہیں چاہتے کہ ہم مین اسٹریم پولیٹکس میں اپنا قومی کردار ادا کریں۔

انہوں نے مزید کہا کہ شہید قاسم سلیمانی نے کہا تھا کہ پاکستان کی کسی غیر اسلامی ملک سے جنگ ہوئی تو ہم پاکستان کے لئے اپنا خون پیش کریں گے۔ہم پاکستان کے دشمنوں سے دوستی نہیں کرسکتے ہیں۔ہمیں چاہیے کہ ہم بیدار ہوں،دنیا میں طاقت کا توازن بدل رہا ہے۔شہید قائد کی کمی کو ایک دوسرے کے ہاتھوں میں ہاتھ ڈال کر کسی حد تک کم کیا جاسکتا ہے۔ہم نے سیاست کو طہارت دینی ہے،اس ملک کے تمام اداروں کو پاک بنانا ہے۔پاکستان کے ایٹمی اثاثے ملت کے اثاثے ہیں۔ہم پاکستان کو توڑنے والوں کے ہاتھ توڑدیں گے۔آپ کا ووٹ اسرائیلی پسندوں کو شکست دینے کے لئے استعمال ہونا چاہیے۔