وحدت نیوز(گلگت) مجلس وحدت مسلمین پاکستان صوبہ گلگت بلتستان کے سیکرٹری جنرل مولانا شیخ نیئرعباس مصطفوی نے اپنے ایک بیان میں کہا ہے کہ ملت جعفریہ پاکستان عزاداری سید الشہداء پر کوئی سمجھوتہ کرنے کیلئے تیار نہیں اور سکیورٹی وجوہات کا بہانہ بنا کر ملک کے مختلف علاقوں بالخصوص پنجاب میں عزاداری کے اجتماعات کو محدود کرنے کی شازشوں کو ناکام بنا دیا جائیگا۔ حسینیت کا پلیٹ فارم انسانیت کیلئے درسگاہ ہے اور حکمران طبقہ درحقیقت اس پلیٹ فارم سے خوفزدہ ہے، کیونکہ یہ انسانوں میں حریت فکر اور بیداری کو فروغ دیتا ہے۔ انکا مزید کہنا ہے کہ عزاداری سید الشہداء کے اجتماعات میں کسی بھی قسم کی کوئی رکاوٹ برداشت نہیں کی جائیگی اور یہ ہمارا شہری و آئینی حق بھی ہے۔

لاہور (وحدت نیوز) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے مرکزی ڈپٹی سیکرٹری جنرل علامہ شفقت شیرازی، مرکزی مسئول شعبہ خواتین علامہ ابوذر مہدوی اور سیکرٹری امور نوجوانان پنجاب علامہ حسن ہمدانی کے ہمراہ میو ہسپتال لاہور میں مجلس عزا پر فائرنگ کے زخمی عزادارن کی عیادت کے بعد  میڈیا سے گفتگو کرتے ہوئے کہا  ہے کہ لاہور میں نہتے عزاداران نواسہ رسول (ع) پر تکفیری دہشت گردوں کا حملہ انتظامیہ کی ناکامی کا منہ بولتا ثبوت ہے، پنجاب انتظامیہ  دہشت گردوں کو کھلی چھٹی دے کر عزاداران امام حسین کو ہراساں کرنے اور عزاداری کو محدود کرنے کی سازشوں میں مصروف ہے۔ اُن کا کہنا تھا کہ عزاداری امام مظلوم ہمارا آئینی و قانونی حق ہے اور اس سے ہمیں کوئی محروم نہیں کر سکتا، پنجاب حکومت ہوش کے ناخن لے اور واقعہ میں ملوث شرپسندوں کو فی الفور گرفتار کرکے قرار وقعی سزا دے۔ علامہ راجہ ناصر عباس جعفری کا مزید کہنا تھا کہ آج سندھ میں بھی یزیدی صفت تکفیری دہشت گردوں نے عزاداروں کو دہشت گردی کا نشانہ بنایا اور ایک عزادار کو شہید کر دیا، ان واقعات کو دیکھتے ہوئے پتہ چلتا ہے کہ ریاست میں عملا ًدہشت گردوں کا راج ہے، ہسپتال میں زخمی عزاداروں کا پرسان حال نہیں، کافی وقت گذرنے کے باوجود زخمیوں کے علاج کے لئے کچھ نہیں کیا گیا، اُلٹا زخمیوں کو ڈرا دھمکا کر ہسپتال سے فارغ کیا جا رہا ہے، ہم ایسے اوچھے ہتھکنڈوں کی شدید مذمت کرتے ہیں۔

لاہور (وحدت نیوز) میو ہسپتال لاہور میں مجلس وحدت مسلمین کے  مرکزی سیکریٹری جنرل علامہ راجہ ناصر عباس جعفری کے زخمی عزاداروں کی عیادت پر آنے کی اطلاع پر پنجاب کے صوبائی مشیر صحت ممبر صوبائی اسمبلی خواجہ سلمان رفیق ایم ایس میو ہسپتال دیگر ڈاکٹروں کے ہمراہ موقع پر پہنچ گئے۔ اس موقع پر خواجہ سلمان رفیق سے گفتگو کرتے ہوئے علامہ راجہ ناصر عباس کا کہنا تھا کہ اب تک کے زخمیوں کے حالات دیکھ کر میں یہ کہنے پر مجبور ہوں کہ ہسپتال انتظامیہ اور حکومتی اقدامات شرمناک اورقابل مذمت ہیں، ریاست کی ذمہ داری ہے کہ وہ اپنے شہریوں کے ایسے ہنگامی حالات میں بر وقت علاج معالجہ کے انتظامات کرے، زخمیوں کا یہاں کوئی پرسان حال نہیں جس پر مشیر صحت پنجاب نے ناصر ملت علامہ راجہ ناصر عباس جعفری کو یقین دہانی کراتے ہوئے کہا کہ زخمیوں کے علاج معالجہ میں کوئی کسر باقی نہ رکھی جائے گی۔ ان کا کہنا تھا کہ میں نے ایم ایس صاحب کی نگرانی میں بورڈ تشکیل دیا ہے جو مکمل طور پر ان زخمیوں کا مکمل علاج کریں گے اور ہر قسم کے اخراجات پنجاب گورنمنٹ برداشت کریگی۔

لاہور (وحدت نیوز) مجلس وحدت مسلمین کے مرکزی سیکریٹری جنرل علامہ راجہ ناصر عباس جعفری، ڈپٹی سیکرٹری جنرل علامہ شفقت شیرازی، مرکزی سیکرٹری شعبہ خواتین علامہ ابوذر مہدوی اور سیکرٹری امور نوجوانان پنجاب علامہ حسن ہمدانی نے میو ہسپتال لاہور میں مجلس عزا پر ہونے والی فائرنگ کے نتیجے میں  زخمی عزاداروں کی عیادت  کی۔ اس موقع پر علامہ راجہ ناصر عباس جعفری نے زخمیوں کی جلد صحت یابی کے لئے دعا کی اور ایم ڈبلیو ایم لاہور کے ذمہ داروں شیخ عمران علی، سید فصاحت بخاری اور دیگر کو حکم دیا کہ زخمیوں کی علاج میں کوئی کسر باقی نہ رکھا جائے اور ادویات سمیت ہر قسم کی مدد بر وقت کی جائے۔

وحدت نیوز(کوٹری) پولیس کا مؤقف ہے کہ جلوس عزا کو فی الفور بند کیا جائے، اب تک کی اطلاعات کے مطابق مجلس وحدت مسلمین پاکستان صوبہ سندھ کے سیکریٹری تنظیم سازی یعقوب حسینی و دیگر رہنما بھی کوٹری پہنچ چکے ہیں۔پاکستان کے دوسرے بڑے صوبے سندھ کے ضلع جامشورو کے علاقے کوٹری میں کالعدم تنظیم کے پریشر پر پولیس نے بانی مجلس عزا سید محبوب شاہ کو گرفتار کرلیا، جھوٹا مقدمہ درج، 8 محرم الحرام کا مرکزی جلوس نہ نکالنے کے لئے دباؤ دیا جا رہا ہے۔ تفصیلات کے مطابق کوٹری میں پولیس کی جانب سے کالعدم تنظیم کے پریشر کے بعد اہل علاقہ باالخصوص بانیان مجلس عزا کو دھمکیاں دینے کا سلسلہ جاری ہے، اس سلسلے میں پولیس نے آج صبح 8 محرم الحرام کے جلوس عزا کے بانی سید محبوب شاہ کو ان کی رہائش گاہ سے گرفتار کرلیا ہے، پولیس کا مؤقف ہے کہ جلوس عزا کو فی الفور بند کیا جائے۔

پولیس کے اس بیان کے بعد اہل علاقہ کی جانب سے شدید رد عمل ظاہر کیا جارہا ہے۔ اب تک کی اطلاعات کے مطابق مجلس وحدت مسلمین پاکستان صوبہ سندھ کے سیکریٹری تنظیم سازی یعقوب حسینی و دیگر رہنما بھی کوٹری پہنچ چکے ہیں۔ اس موقع پر موجود اہل علاقہ سے گفتگو میں یعقوب حسینی کا کہنا ہے کہ عزاداری ہماری شہ رگ حیات ہے اور ہم اپنی شہ رگ کی حفاظت کریں گے، جلوس عزا کی راہ میں رکاوٹ ڈالنے والے سن لیں کہ یہ جلوس عزا کسی بھی صورت نہیں رکیں گے۔

وحدت نیوز(دینہ) مجلس وحدت مسلمین پاکستان کے مرکزی رہنماعلامہ اعجاز حسین بہشتی نے کہا ہے کہ محرم الحرام جہان عشق امام حسین (ع)کی معراج تک پہنچنے کا زریعہ ہے وہیں یذیدی قوتوں سے نفرت کی معراج تک پہنچنے ک بھی وسیلہ ہے ، ان ایام عزاء ملت کے تمام مرد،خواتین بچے اور خصوصا جوانوں کو کسی بھی ناخوشگوار حادثہ سے نمٹنے کے لئے تیار رہنا ہوگا ۔ ان خیالات کا اظہار انہوں دینہ میں عشرہ محرم الحرام کی مجلس عزا ء سے خطاب کے دوران کیا۔ انہوں نے کہا کہ دہشت گردوں نے ایک سازش کے تحت محرم کے شروع ہونے سے پہلے ہی ملک کے حالات کو خراب کر نا شروع کیا جن کا اصل مقصد اس مقدس ماہ کی حرمت کو پامال کرنا اور عزاداری کو نقصان پہنچانا ہے۔

علامہ اعجاز بہشتی کا کہناتھا پنجاب حکومت کی سر پرستی میں گجرانوالہ میں مسجد پر فائرنگ کر کے مومنین کو شہید کیا گیا اور حکومت نے دہشت گردوں کو گرفتار کرنے کے بجائے ان کی سرپرستی شروع کر دی رانا ثناء اللہ جو خود دہشت گردوں کے سرپرست ہے کا کہنا تھا کہ فائرنگ اور خودکش دھماکوں کو روکنا ہمارے بس میں نہیں ہے۔ ان کا مزید کہنا تھا کہ ملت تشیع اپنی حفاظت کر نا جانتی ہے ہم کسی کے دھمکی سے خوف کھانے والے نہیں ہیں، ہم عاشقان امام زمان ؑ ہیں اور شہادت ہمارے لیے باعث فخر ہے ہم ہر حالت میں عزادی جاری رکھیں گے اور خطرہ سے نمٹنے کے لئے تیار ہیں۔