وحدت نیوز(شیخوپورہ) مجلس وحدت مسلمین کے سربراہ علامہ ناصرعباس جعفری نے پاک فوج کی جانب سے شمالی وزیرستان میں دہشتگردوں کے خلاف فوجی آپریشن کے اعلان کا خیر مقدم کرتے ہوئے اسے قومی خواہشات کا ترجمان اور آئینہ دار قرار دیا ہے،ان کا کہنا ہے کہ  وزیر ستان میں ہونے والا پاک فوج کا آپریشن ضرب عضب عوام پاکستان کی دل کی آرزو تھی،ساٹھ ہزار پاکستانیوں کے قاتل کسی رعایت کے مستحق نہیں۔ ہم اس اعلان کی مکمل حمایت کرتے ہیں اور اپنی فوج کو مکمل یقین دہانی کراتے ہیں کہ ملک کا بچہ بچہ وطن دشمنوں کے خلاف پاک فوج کے ساتھ کندھے سے کندھا ملائے گا۔ اگر ضرورت پڑی تو ملت تشیع کے ایک لاکھ نوجوان فوج کے ساتھ ملکر دہشتگردوں کے خلاف لڑنے کیلئے تیار ہیں۔ان خیالات کا اظہار انہوں نے ضلع کچہری شیخوپورہ میں بار ایسوسی ایشن سے خطاب کرتے ہوئے کیا ، اس موقع پر صوبائی سیکریٹری جنرل علامہ عبدالخالق اسدی ،علامہ حسن رضا ہمدانی اور دیگر رہنما بھی موجود تھے۔

علامہ ناصر عباس جعفری کا کہنا تھا کہ   ہمارا شروع دن سے ہی یہی مطالبہ تھا کہ خارجیوں سے امن کی بھیک نہ مانگی جائے، یہ لوگ دین اور وطن دونوں کے دشمن ہیں، جن سے مذاکرات ریاست کے ساتھ مذاق تھا۔ علامہ ناصر عباس جعفری کا کہنا تھا کہ اب پتہ چلے گا کون سی جماعتیں پاک فوج کے ساتھ ہیں اور کونسی جماعتیں طالبان کے ساتھ کھڑی ہیں، انہوں نے کہا کہ آپریشن فقط وزیرستان تک محدود نہ رکھا جائے بلکہ ملک کے تمام گوش و کنار جہاں جہاں دہشتگردوں کے ہمدرد آباد ہیں اور انہیں لاجسٹک سپورٹ فراہم کرتے ہیں، ان کے خلاف بھی آپریشن شروع کیا جائے۔ وہ مدارس جو ان دہشتگردوں کو پروان چڑھاتے ہیں اور تعاون کرتے ہیں، انہیں بھی بند کیا جائے۔ نہ فقط ملکی و غیر ملکی طالبان بلکے ایوانوں میں بیٹھے ان کے اسٹریجیٹک پارٹنرز کے خلاف بھی فوری کاروائی کی جائے،انسانوں کے قاتلوں اور ان کے ہمدردوں کو کسی صورت معاف نہیں کیا جاسکتا۔

وحدت نیوز(اسلام آباد) مجلس وحدت مسلمین نےروز اول سے  اصولوں کی سیاسیات کی ہے۔ ہم نے گیارہ مئی2014کو ہی   کہا تھا کہ تاریخ کے بدترین الیکشن ہوئے ہیں، جس میں دھاندلی کی داستانیں رقم کی گئیں۔ ہم نے اس حوالے سے الیکشن کے اگلے روز ہی وائٹ پیپر شائع کیا تھا۔ اس وقت ہم تنہاتھے، لیکن آج دیگر جماعتیں بھی ہمارے موقف سے ہم آہنگ ہوکر آگے آگئی ہیں۔ ہمارا کل بھی وہی موقف تھا اور آج بھی یہی موقف ہے۔ اسی طریقہ سے دہشتگردوں اور مذاکرات کے حوالے سے ہمارا موقف بڑا واضح تھا۔ ہم نے ان مذاکرات کی مخالفت کی تھی، اب کئی سیاسی جماعتوں نے اپنے اس ابتدائی فیصلے پر نظرثانی کی اور اب وہ بھی مخالفت کر رہے ہیں۔ان خیالات کا اظہار مجلس وحدت مسلمین پاکستان کے مرکزی سیکریٹری سیاسیات ناصر شیرازی ایڈووکیٹ نے اسلام ٹائمز کو انٹرویو دیتے ہو ئے کیا ۔

ان کا مذید کہنا تھا کہ  ایسی تمام سیاسی جماعتیں جو ہمارے موقف کے قریب ہیں، ان سے رابطے تھے اور ہیں، کیونکہ مجلس وحدت مسلمین تیزی سے مقبول مذہبی سیاسی جماعت کے طور پر سامنے آئی ہے۔ ایسی تمام جماعتیں جو پاکستان میں سیاسی منظرنامے میں کوئی اہم کردار ادا کرنا چاہتی ہیں، وہ مجلس کی طرف دیکھتی ہیں۔گذشتہ چند ہفتوں میں کئی سیاسی جماعتوں کی لیڈرشپ نے ہم سے رابطے کئے ہیں اور ملاقاتیں کی ہیں، اسی سلسلے میں مسلم لیگ ق کی قیادت نے علامہ ناصر عباس جعفری اور ان کی ٹیم سے ملاقات کی ہے، جس میں انہوں نے دس نکاتی ایجنڈا جو انہوں نے لندن میں ڈاکٹر طاہرالقادری کے ساتھ ملکر ترتیب دیا ہے، وہ پیش کیا ہے۔ ساتھ یہ بھی کہا ہے کہ یہ ایجنڈا حتمی نہیں ہے، اس میں آپ کے نکات بھی شامل کئے جاسکتے ہیں۔ ظاہر ہے وہ ہمارے پاس آئے، ہمارے مہمان تھے، دوسرا یہ وہ چیزیں تھیں جن پر ہم اسٹینڈ لے چکے ہیں۔ اس اسٹینڈ کو آگے بڑھانا بھی بنتا تھا۔

وحدت نیوز(کراچی) اٹھارہ کروڑعوام دہشت گردوں کا آسان ہدف بنے رہے، پورا پاکستان چلا چلا کر فوج کو بلاتا رہا ،حکمرانوں نے چپ سادھ رکھی تھی، جب عوام فوج کی آمد کا مطالبہ کریں ان پر جمہوریت دشمن کا لیبل لگا دیا جایا ہے، فوج بلانے کو خلاف جمہوریت قرار دینے والوں نے  آج اپنی حفاظت کے لئے اسلام آباد میں فوج بلالی، نواز لیگ کی منافقانہ پالیسی آج عوام کے سامنے واضح ہو گئی ، ان خیالات کا اظہار مجلس وحدت مسلمین پاکستان کے مرکزی ڈپٹی سیکریٹری جنرل علامہ سید حسن ظفر نقوی نے مسجد وحدت مسلمین گلستان جوہر کراچی میں تنظیمی کارکنان کی نشست سے خطاب کرتےہوئے کیا۔

ان کا کہنا تھا کہ آج اسلام آباد میں پاک فوج کی تعیناتی نے مسلم لیگ ن کی منافقانہ طرز سیاست کا بھانڈا پھوڑ دیا، جب عوام سڑکوں پر بے دردی سے مر رہے تھے، بسوں میں شناختی کارڈ دیکھ دیکھ کر قتل کیئے جارہے تھے،  کبھی بازاروں میں مر رہے تھے، کبھی درباروں میں ، کبھی ٹارگٹ کلنگ کا نشانہ بن رہے تھے، جب جب نااہل حکمرانوں سے مایوس ہو کر عوام نے فوج کو مدد کے لئے پکارا ہمیشہ ان خائن حکمرانوں ، زرد صحافت اور نام نہاد سول سوسائٹی کی جانب سے جمہوریت مخالف اور جمہوریت دشمن ہونے کے تمغے دیئے گئے، کل تک جو جماعت فوج کےخلاف سیسہ پلائی دیواربنی کھڑی تھی آج وہی جماعت اپنی جانوں کے لالے پڑنے پر پاک  فوج کو اسلام آباد کی سڑکوں پر دعوت دے رہی ہے۔ ان کا مذید کہنا تھا کہ آج وقت نے ثابت کر دیا کہ ملک دشمن تکفیری دہشت گرد گروہ طالبان سے مذاکرات کی ایم ڈبلیوایم کی مخالفت درست فیصلہ تھا اور ملکی سلامتی کے لئےپاک فوج کی مدد سے ملک دشمنوں کا صفایا واحد حل ۔

وحدت نیوز(کراچی) دہشت گرد اپنی مضموم سازشوں کے زریعے اسلام و پاکستان کو عالمی سطح پر داغ دار کر نے کی کوشش کر رہے ہیں ، دہشت گردی کسی صورت میں بھی ہوقابل مذمت ہے، کراچی ایئر پورٹ حملہ پاکستان کے دفاع پر حملہ تھا،موجودہ حکومت نے بلوچستان کے رئیسانی کا انجام بھول چکی ہے، سانحہ تفتان زائرین کے راستے کی رکاوٹ نہیں بن سکتا، ریاست نہ فقط طالبان بلکے ان کے خیر خواہوں کے خلاف بھی آپریشن کلین اپ کرے، ان خیالات کا اظہار مجلس وحدت مسلمین کراچی، ضلع ملیر کے سیکریٹری جنرل سید احسن عباس رضوی نے اسٹار گیٹ شاہراہ فیصل پر سانحہ کراچی ایئر پورٹ اور سانحہ تفتان کے شہداء سے تجدید عہد کے لئے کیئے گئے چراغاں کے موقع پر شرکاء سے خطاب کرتے ہوئے کیا۔

ان کا کہنا تھا کہ دنیا بھر خصوصاًپاکستان میں دہشت گردی سیاسی پشت پناہی میں جاری ہے، کراچی میں ٹارگٹ کلنگ ہویا اسلام آباد، لاہور،پشاور ،، فاٹا، گلگت ، کوئٹہ تفتان، مستونگ ، ڈیرہ اسماعیل خان اور دیگر شہروں میں خودکش حملے تمام کے پیچھے کوئی نہ کوئی سیاسی یا مذہبی قوت پشت پناہ نظر آئی ہے، پاکستان کے عوام کی آنکھوں میں نام نہاد مذہبی و سیاسی راہ زن دھول جھونک کر گمراہ کر تے ہیں ، بے گناہ شہریوں کے قتل عام میں کوئی خفیہ ہاتھ نہیں ، بلکہ بہت سارے جانے پہنچانے ہاتھ ملوث ہیں ، ریاستی اداروں کی ذمہ داری ہے کہ ٹریک رکارٹ چیک کریں اور دہشت گرد وں کے ساتھ ساتھ ان کے اسٹریجٹک پارٹنرز کے خلاف بھی فیصلہ کن کاروائی عمل میں لائیں ، ان کا مذید کہنا تھا کہ کراچی ایئر پورٹ سانحہ سکیورٹی اداروں کی نا اہلی سے زیادہ دہشت گردوں کے سیاسی و مذہبی پشت پناہوں کی منافقانہ سیاست کا نتیجہ ہے۔انہوں نے کہا کہ ہماری چودہ سو سالہ تاریخ ہماری شجاعت اور استقامت کی گواہ ہے، ہم دیواروں میں زندہ چنے گئے، اعضاء کاٹے گئے، پس زندان گئے لیکن زیارات آئمہ اطہار علیہ السلام سے دستبردار نہیں ہوئے ، ایک سانحہ تفتان کیا ہزار سانحہ تفتان اور ہو جائیں ہم در اہل بیت علیہ السلام سے کنارہ کش نہیں ہو سکتے ۔

اس موقع پر ایم ڈبلیوایم کراچی کے رہنما حسن ، ہاشمی ، علامہ علی انور،سید علی حسین نقوی اورانجینئررضا نقوی سمیت ثمر عباس زیدی، حسن عباس،ناظم حسین ،زمان رضوی ، پولیس اور رینجرز کے حکام بالخصوص شہدائے کراچی ایئر پورٹ کے ورثاء بھی موجود تھے۔ شرکاء نے شہداء کی یاد میں چراغ روشن کیئے اور شہداء کی عظیم قربانیوں پر انہیں خراج تحسین پیش کیا۔ اس موقع پر اسٹار گیٹ کو چاروں اطراف سے پولیس نے مکمل حصار میں لیا ہوا تھا جبکہ دونوں اطراف کی سڑکیں ٹریفک کے لئے مکمل طور پر بند تھیں ۔