وحدت نیوز (اسلام آباد) تحصیل ناظم بنوں ملک احسان کا مجلس وحدت مسلمین پاکستان کے مرکزی ڈپٹی سیکریٹری جنرل سید ناصرعباس شیرازی سے ٹیلیفونک رابطہ ،تحصیل میونسپل ایڈمنسٹریشن کی جانب سے اہل تشیع مکتب فکر کی دل آزاری پر مبنی اخباری اشتہارکی اشاعت پر شرم ساری اور معذرت کا اظہار ، تمام چاروں ذمہ دار افراد کی معطلی کا اعلان ، تفصیلات کے مطابق جمیعت علمائے اسلام سے تعلق رکھنے والے تحصیل ناظم بنوں ملک احسان نے مجلس وحدت مسلمین پاکستان کے مرکزی ڈپٹی سیکریٹری جنرل سید ناصر شیرازی کو ٹیلی فون کرکے تفصیلی بات چیت کی اور گذشتہ دنوں روزنامہ آج میں شائع ہونے والے متنازعہ اشتہار کی اشاعت پر دلی معذرت کا اظہار کیا۔

ملک احسان کا کہنا تھا کہ شیعہ اور سنی اسلام کے دو بازوں ہیں،ایک کے بغیر جسم نامکمل ہے،اسلام کا حقیقی چہرہ شیعہ سنی وحدت کے بغیر کامل نہیں ہوتا، ان کا برادرانہ کردار دنیا بھر میں مطلوب ہے،کسی کو اجازت نہیں دی جاسکتی کے وہ شیعہ وسنی میں تفرقہ ڈالے یا کسی ایک پر بھی تہمت لگائے،ٹی ایم اے کی جانب سے جاری کردہ متنازعہ اور دل آزار اشتہار کی اشاعت انتہائی قابل مذمت ہے اور ہم اسے ہر لحاذ سے ناقابل قبول سمجھتے ہیں ، ہم نے اس واقعے کی تحقیقات کے لئے انکوائری کمیٹی تشکیل دے دی ہے جبکہ اس واقع میں مبینہ طور پر ملوث تحصیل میونسپل ایڈمنسٹریشن کے دو اعلیٰ افسران اور کلریکل اسٹاف دو ممبران کو فوری طور پر معطل کردیا ہے ۔

ملک احسان کا مزید کہنا تھا کہ ہم اتحاد بین المسلمین کے داعی ہیں اور ہمیشہ عزاداری سید الشہداءؑ کے اجتماعات میں بلاتفریق شرکت اور خدمت کو عبادت سمجھتے ہیں، عزادای کے پروگرامات کے تحفظ اور مدیریت کے لئے ہمیشہ کردار ادا کیا ہے اور کرتے رہیں گے،عالم اسلام میں تفرقہ ہمارے نذدیک بھی حرام ہے،ہم سمجھتے ہیں کے نواسہ رسول (ص) امام حسین ؑ سے عشق ومحبت کا ایک انداز جو اہل تشیع نے اپنایا ہے ہم اس کی قدر کرتے ہیں ، انہوں نے مزید کہاکہ آپ ہمارے بڑے ہیں اور اس افسوس ناک واقعے پر معذرت خواہی اور معاملے کو ختم کرنے کیلئے ہم آپ کی خدمت میں  اسلام آباد تک آنے کو تیار ہیں ۔

ناصر شیرازی نے ملک احسان سے گفتگو کرتے ہوئے کہا کہ پاکستان اس وقت تاریخ کے مشکل ترین دور سے گذر رہا ہے، عوام کے درمیان محبتوں اور الفتوں کے بجائے نفرتیں اور کدورتیں پروان چڑھ رہی ہیں ، ہر طرف تقسیم ہی تقسیم ہے کہیں لسانی تقسیم، کہیں مذہبی تقسیم، کہیں نسلی تقسیم، کہیں فروعی تقسیم ، ایسے حالات میں ٹی ایم اے بنوں کے اشتہار نے جلتی پر تیل کا کام انجام دیا، جس سے نا فقط پاکستان میں بسنے والے کروڑوں اہل تشیع شہریوں کی بلکہ بانی پاکستان قائد اعظم محمد علی جناح اور تحریک پاکستان کے متعدد اہل تشیع سرمایہ گذاروں کے اولادوں کی بھی دل آزاری ہوئی، اس واقعے کے بعد پوری ملت جعفریہ کا فقط یہی تقاضہ تھا کہ اس گہناونی سازش میں ملوث ذمہ داران کو کیفر کردار تک پہنچایا جائےاور جیسا کے آپ نے بتایا کے چار ممکنہ ذمہ دار افراد کو فوری طور پر معطل کردیا گیا ہے اور آپ نے خود بھی اس افسوس ناک واقعے پر اظہار ندامت اور معذرت کیا ہے جسے ہم کھلے دل سے تسلیم کرتے ہیں اور امید کرتے ہیں کےمقتدر ادارے اور حکام بالا  ریاستی اور انتظامی اداروں سے  مسلکی تعصب کو پروان چڑھانے کی کوشش کرنے والی کالی بھیڑوں کا خاتمہ کریں گے اور    شیعہ سنی مسلمانوں میں محبت الفت اور بھائی چارگی کو پروان چڑھانے کیلئے عملی اقدامات بروئے کار لائیں گے۔

واضح رہے کہ ٹی ایم اے بنوں کی جانب سے جاری اہل تشیع پاکستانی شہریوں کی توہین پر مبنی اخباری اشتہار کی اشاعت پر مجلس وحدت مسلمین نے خیبرپختونخواحکومت اور بنوں کی مقامی حکومت سے پرزور احتجاج کیا تھا اور ذمہ داروں کے خلاف فوری کاروائی کا مطالبہ کیا تھا ، جس پر تحصیل ناظم ملک احسان نے پہلے ایم ڈبلیوایم ضلع بنوں کے سیکریٹری جنرل اور جنرل کونسلر نوروز علی اور صوبائی سیکریٹری جنرل علامہ اقبال بہشتی سے ٹیلیفونک رابطہ کرکے واقعے پر افسوس اور معذرت کا اظہار کرتے ہوئے ملوث افراد کی فوری برطرفی کا وعدہ کیا تھا اور اب ایم ڈبلیوایم کے مرکزی ڈپٹی سیکریٹری جنرل سید ناصرعباس شیرازی کو ملک احسان کا ٹیلی فون اسی سلسلے میں معذرت اور معطل افراد کے بارے میں تفصیلات سے آگاہ کرنا تھا، ملک احسان نے واقعے میں ملوث تمام افراد کی معطلی کی دستاویزات ایم ڈبلیوایم رہنما ناصرشیرازی کی خدمت میں بھی پیش کیں ۔

وحدت نیوز(کوئٹہ) پی پی ایل بلوچستان فٹبال کپ 2017 کی شاندار افتتاحی تقریب مالی باغ فٹبال گراونڈمیں منعقد ہوئی ، تقریب کے مہمان خصوصی گورنر بلوچستان محمد خان اچکزئی تھے دیگر مہمانان گرامی میں مجلس وحدت مسلمین کے رکن بلوچستان اسمبلی سید محمد رضا رضوی(آغا رضا)اور دیگر سول وعسکری حکام شامل تھے ، اس موقع پر خطاب کرتے ہوئے آغا رضا نے اپنے خصوصی فنڈ سے مالی باغ فٹبال گراونڈکی تزین وآرائش کیلئے 60لاکھ روپے امداد کا اعلان کیا۔ آغا رضا کی جانب سے امدادی رقم کے اعلان پر کھلاڑیوں اور گرائونڈ انتظامیہ نے مسرت اورشکریہ کا اظہار کیا ہے۔

وحدت نیوز (لاہور) ڈاکٹر طاہر القادری کے زیر انتظام منہاج ویلفیئرفاؤنڈیشن کے زیر اہتمام اجتماعی شادیوں کی تقریب میں قائد وحدت علامہ راجہ ناصر عباس جعفری کی شرکت و خطاب ،ایم ڈبلیوایم گلگت بلتستان کےسیکریٹری جنرل علامہ آغا سید علی رضوی ،سیکریٹری امور سیاسیات پنجاب حسن رضا کاظمی اور لاہور کےسیکریٹری جنرل علامہ سید حسن رضا ہمدانی بھی ان کےہمراہ تھے،منہاج سیکریٹریٹ آمد پرتحریک منہاج القرآن کے مرکزی رہنما فرزند ڈاکٹر طاہرالقادری صاحبزادہ حسین محی الدین قادری نے کارکنان کےہمراہ علامہ راجہ ناصرعباس جعفری کاپرتپاک استقبال کیا،اس تقریب میں شیخ رشید احمد سمیت دیگر سیاسی و مذہبی رہنما شریک تھے۔

وحدت نیوز (ملتان) ولادت باسعادت حضرت فاطمۃ الزہراء (س) کی مناسبت سے جامعۃ خدیجۃ الکبریٰ اور جامعہ شہید مطہری ملتان کے باہمی اشتراک سے خواتین کا اجتماع بعنوان مودت صدیقہ الکبریٰ سیمینارمنعقدہوا جس میں جنوبی پنجاب کی 2000 سے زائد خواتین نے شرکت کی اس پروگرام کی میزبانی علامہ قاضی شبیر علوی بانی جامعہ شہید مطہری ؒ اور محترمہ تصدق زہراء پرنسپل جامعہ خدیجۃ الکبریٰ ملتان  کررہے تھے جبکہ پورے اجتماع کے انتظامات قاض نادر علوی پرنسپل جامعہ شہید مطہری ملتان کے ذمے تھے  ،خواتین کے اس اجتماع سے مجلس وحدت مسلمین کی رکن گلگت بلتستان اسمبلی محترمہ بی بی سلیمہ ، ایم ڈبلیوایم کی مرکزی رہنما محترمہ تغزل شاداب اور دیگر مقررین نے خطاب کیا۔

محترمہ بی بی سلیمہ نے خطاب کرتے ہوئے  کہا کہ اگر ہم حضرت سیدہ فاطمہ زہراء (س) کی سیرت پر عمل پیرا ہو جائیں تو اپنی مشکلات پر قابو پا سکتے ہیں اور ہماری خواتین ہر میدان میں کامیاب ہو سکتی ہیں ۔ سیرت اہلبیت ؑ اپنانے سے ہی وطن عزیزکو ہر قسم کے خطرات سے محفوظ کیا جا سکتا ہے ۔ ملک میں بڑھتی ہوئی فرقہ واریت ،دہشت گردی اور ناامنی ،ہماری توجہ کو اس طرف مبذول کرارہی ہے کہ ہم نے سیرت اہلبیت ؑ پر عمل کرنے کہیں کہیں کوتاہی ضرور کی ہے اور سیرت آل محمد ؑ کے ساتھ ساتھ قرآن پاک سے بھی راہنمائی لینی چاہئے تاکہ ہم صحیح معنوں میں فرمان پیغمبر اکرم ﷺ پر عمل کر سکیں جس میں آپ نے فرمایا : میں تمہارے درمیان دو گرانبہا چیزیں چھوڑے جا رہا ہوں ایک قرآن اور دوسری میری اہلبیتؑ ۔حضرت رسول پاک ﷺ اپنی امت کو واضح اور شفاف انداز میں یہ بتا کرگئے ہیں کہ آپ کے پاس نجات کا راستہ صرف صرف قرآن پر صحیح معنوں عمل اور اہلبیت ؑ کی سیرت میں پنہاں ہے۔ آج جس ہستی کی ولادت باسعادت کا دن ہے اس کی سیرت ہم سب کے لئے خصوصا خواتین کے ایک مشعل راہ ہے ۔ ہمیں ان کی سیرت پر عمل کرنا ہوگا تاکہ ہم اپنی اولاد ،خاندان اور معاشرے کی صحیح تربیت کرسکیں ۔

انہوں نے کہا کہ  ہم ملکی سطح پر بھی معاشرے کی فلاح و بہبود اور بچوں کی نشوونما اور تربیت کے لئے این جی اوز کی طرف دیکھ رہے ہوتے ہیں ۔لیکن اصل مسئلہ ہمار غفلت ہے ۔ آج بھی ہم سمجھ جائیں اور تعصبات سے بالا تر ہو کر سیرت اہلبیت ؑ پر عمل کر لیں تو ہمیں کسی این جی اوز یا خیراتی اداروں کی ضرورت نہیں رہے گی کہ وہ آئیں اور ہمارے وطن عزیز میں کبھی صفائی ۔تو کھبی صحت اور کبھی تعلیم کے لئے فنڈ زخرچ کریں ۔ اسلام ہمیں گھر سے ہی پاکیزگی ، طہارت ، صحت کے اصولوں پر عمل کرنا اور اپنے ماحول کو صاف کرنے کا درس دیتا ہے اور یہ سب کچھ سیرت آل محمد ؑ اور آج جس شخصیت کا یوم میلاد ہے انہیں طفیل ہم تک پہنچا ہے ۔ صرف عمل کرنے کی ضرورت ۔ سرزمین ملتان پاکستانی ثقافت کا علاقہ سمھجاجاتا جس میں پاکستان کی رچ اور غنی ثقافت اپنے عروج پر رہی ۔آج بھی اس علاقےکو اسی میدان میں برتری حاصل ہے ۔ لہذا ہمیں چاہیے کہ ہم اپنی اسلامی روایات اور ثقافت سے ہم آہنگ رہیں ورنہ دشمن تو ہمیں اپنی فرہنگ سے دور کرتا جارہا ہے ۔

انہوں نے مذید کہا کہ  آج آپ خواتین کی ذمہ داری دوسرے مکتب فکر کے مقابلےمیں بہت زیادہ ہے اور اپنے آ پ کومحدود نہ کریں ۔ کوشش کریں سچائی ،ایمانداری ، اخلاص اور محبت کے ساتھ اپنے کاموں کو انجام دیں ۔آج آپ کے پاس الحمدللہ مجلس وحدت مسلمین کی صورت میں ایک پلیٹ فارم موجود ہے۔ جس کی سربراہی ایک بہترین مدبر اور عالم باعمل کے ہاتھ میں ہے  آئیں میدان آپ کے لئے موجود ہے ۔کام کرنے کے مواقع بھی ہیں ،مجھے دیکھیں میں بھی آپ کی طرح اسی معاشرے کا حصہ ہوں ، میں نے ہمت کی اور مجلس وحدت مسلمین کی محنت اور کوشش سے آج آپ بہنوں کی آواز بن کر ریاست کے اعلیٰ فورم پر ترجمانی کررہی ہوں ۔ آپ میں سے بھی کئی بہنوں میں یہ ساری صلاحیتیں موجود ہیں آگے بڑھیں اور اپنا وظیفہ احسن طریقے سے نبھائیں تاآپ بھی اس ملک کی سالمیت ،فرقہ واریت ،دہشت گردی اور ناامنی سے نجات میں مثبت رول ادا کرتے ہوئےاپنا حصہ ڈال سکیں ۔

وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری سید ناصر شیرازی نے مختلف وفود سے بات چیت کرتے ہوئے کہا ہے کہ سرکاری محکموں میں موجود متعصبانہ سوچ رکھنے والے عناصرمذہبی منافرت کے فروغ کا باعث اور نیشنل ایکشن پلان پر عمل درآمدکی راہ میں رکاوٹ ہیں، کراچی کے مختلف علاقوں میں مردم شماری کے دوران مسلک پوچھنے پر اصرار کیا جانا غیر آئینی اور شماریات کے فارم میں درج نکات کے برعکس ہے۔اعلی حکام کی طرف سے سروے ٹیم کو اس بات کا پابند کیا جائے کہ مسلک کے بارے میں تحقیق کا شماریات سے کوئی تعلق نہیں اس سے اجتناب برتا جائے۔انہوں نے کہا کہ فرقہ واریت کی راہ ہموار کرنے کی کوششیں نقصان دہ ثابت ہوں گی۔ مذہب یا مسلک کی بنیاد پرکسی بھی شہری کی تضحیک کا اختیار کسی کے پاس نہیں۔

انہوں نے کہا کہ عوام کے منتخب نمائندے مسلکی تعصب کا شکار ہوئے بغیر کام کر کے ہی ملک و قوم کی حقیقی خدمت کر سکتے ہیں۔پاکستان میں بسنے والے ہر فرد کو مساوی حقوق حاصل ہیں۔مسلک یا مذہب کو بنیاد بنا کر کسی کی بھی توہین کو شرپسندی کے سوا کوئی دوسرا نام نہیں دیا جا سکتا۔انہوں نے کہا رد الفساد کے نتائج ملنا شروع ہو گئے ہیں۔ ملک میں دہشت گردی کے واقعات کی کمی پاک فوج کی کامیابی کا ثبوت ہے۔انہوں نے کہا کہ خطے میں پاکستان کی مضبوطی اور سالمیت و استحکام دہشت گردی اور کرپشن کا خاتمے سے مشروط ہے۔کرپٹ حکمرانوں اوردہشت گردوں کے سہولت کار وزراء کی موجودگی میں امن و امان کا قیام اور ملکی ترقی محض خواب و خیال ہے۔پاناما کیس کا فیصلہ آنے کے بعد ملک میں بڑی سیاسی تبدیلیاں آئیں گی۔

وحدت نیوز(لاہور) مجلس وحدت مسلمین کے مرکزی سیکریٹری جنرل علامہ راجہ ناصرعباس جعفری نے ایم ڈبلیوایم کے صوبائی شوریٰ کے اجلاس سے خطاب کے بعد پریس کانفرنس سے خطاب کرتے ہوئے کہا ہے کہ پنجاب میں نیشنل ایکشن پلان کے نام پر پرامن لوگوں کو اغوا کیا جا رہا ہے،پنجاب ہی واحد صوبہ ہے جہاں ملت جعفریہ کو سیاسی انتقام کا نشانہ بنایا جا رہا ہے،داعش جو اصل خطرہ ہے اس پورے ریجن کے لئے اس سے حکمران اور قانون نافذ کرنے والے ادارے غافل نظر آتے ہیں،داعش کے سہولت کار اب بھی معاشرے میں آزاد ہیں،عالمی طاقتیں عراق اور شام سے داعش کے درندوں کو افغانستان منتقل کر رہے ہیں،اور افغانستان میں داعش کی سرپرستی امریکہ اور بھارت کر رہا ہے،یہ وہ ظالم گروہ ہے جو اپنے مظالم میں طالبان اور القاعدہ کو بھی پیچھے چھوڑ چکے ہیں،امریکہ،بھارت ،اسرائیل اور استکباری قوتوں کو بتادیا جائے کہ ہم داعش جیسے درندوں کو اس ریجن میں ہرگز قبول نہیں کرینگے،جب تک ہم اس جہادی پالیسی کو دفن نہیں کردیتے جو افغان وار میں اپنائی گئی تھی پاکستان میں امن نہیں آسکتا،اس ریجن میں پاکستان کی مفادات کیخلاف سب سے بڑا جاسوسی کا اڈہ امریکن ایمبیسی اسلام آباد بنا ہوا ہے،سینکڑوں امریکن کو یہاں بلا روک ٹوک آنے کی اجازت کس نے دی ہے۔

علامہ راجہ ناصر عباس جعفری نے سی پیک کے حوالے سے بات کرتے ہوئے کہا کہ مغربی روٹ کو ترجیحی بنیادوں پر مکمل کیا جائے اور اس اقتصادی راہ داری کے گیٹ وے گلگت بلتستان کے عوام کی محرومیت کو دور کر کے انہیں یہ احساس دلایا جائے کہ ان کے  حقوق  بھی ریاست کواتنے  عزیز ہیں جتنے دیگر صوبوں کے ہیں،انہوں نے کہا کہ پنجاب میں سرائیکی صوبے کے ہم حامی ہے اس سے پنجاب کی محرومیاں ختم ہو جائیگی،پانامہ کیس کا فیصلہ جلد آجانا چاہیئے تاکہ ملک سے بحرانی کیفیت کا خاتمہ ہو،اگر غریب آدمی بجلی بل یا بنک کا قرض جمع کرنے میں تاخیر کرے تو فوری کاروائی عمل لائی جاتی ہے جبکہ اتنے بڑے سکینڈل پر مقتدر حلقوں کی خاموشی لمحہ فکریہ ہے۔