وحدت نیوز(گلگت)  مجلس وحدت مسلمین پاکستان کے ڈپٹی سیکرٹری جنرل کے اغوا سے پنجاب حکومت کی کھلم کھلا دہشت گردی ہے۔ناصر عباس شیرازی کو پنجاب حکومت نے سیاسی ا نتقام کا نشانہ بنایا ہے،سیکورٹی کے نام پر پرامن سیاسی جماعت کے رہنما کا اغوا جمہوریت کا ڈھول پیٹنے والوں کے منہ پر طمانچہ ہے۔

مجلس وحدت مسلمین گلگت بلتستان کے ترجمان محمد الیاس صدیقی نے کہا کہ بغیر کسی ایف آئی آر کے ناصر عباس شیرازی کا اغوا پنجاب حکومت کے ایماء پر کیا گیا ہے اور انہیں راناثناء اللہ کے خلاف پٹیشن دائر کرنے پر انتقام کا نشانہ بنایاگیا ہے۔پنجاب میں انتظامی ادارے ریاست کی بقا اور عوام کو تحفط فراہم کرنے کی بجائے دہشت کی علامت بن چکے ہیں،اختیارات کا ناجائز استعمال غیر آئینی اور جمہوری اقدار کے منافی اقدام ہے۔انہوں نے کہا کہ ظالمانہ اقدامات کے ذریعے خوف وہراس پھیلانے کا پنجاب حکومت کے منصوبے کو خاک میں ملادیا جائیگا،ظلم کے آگے ہم ہرگز تسلیم خم نہیں ہونگے ۔نفرت اور تعصب کے مقابلے میں ہمیشہ میدان میں رہینگے اور ملک دشمن عناصر کے ایجنڈے کو تکمیل ہونے نہیں دیا جائیگا۔انہوں نے کہا کہ مجلس وحدت مسلمین کے رہنما ناصر عباس شیرازی کو کچھ ہوا تو اس کی تمام تر ذمہ داری پنجاب پولیس پرعائد ہوگی۔

وحدت نیوز(گلگت)  ڈوگرا حکومت کے پنجوں سے خطہ گلگت بلتستان کو آزاد کروانے والے غازیوں، مجاہدوں اور شہداء کو خراج تحسین پیش کرتے ہیں۔ستر سال گزرنے کے باوجودوفاق کا سرزمین گلگت بلتستان کے آئینی تشخص کومعین نہ کرنا لمحہ فکریہ ہے۔گلگت بلتستان کو آئینی تشخص دیئے بغیر پاک چائنہ اقتصادی کوریڈور کے راستے میں بہت سی دشواریاں درپیش ہونگی۔

مجلس وحدت مسلمین گلگت بلتستان کے ترجمان محمد الیاس صدیقی نے جشن آزادی گلگت بلتستان کے موقع پر قوم کے نام اپنے پیغام میںکہا کہ کرنل حسن خان اور بابر خان کی سرکردگی میں خطہ گلگت بلتستان کو ڈوگرا کی غلامی سے آزاد کرانے والے قومی ہیروز کی لازوال قربانیوں کو ہمیشہ یاد رکھا جائیگا جنہوں نے اپنے جان ومال کی پرواہ کئے بغیر زمانے کے طاغوت سے ٹکر لیا اور اٹھائیس ہزار مربع میل پر محیط خطہ گلگت بلتستان کو ڈوگراہ فوجیوں کے تسلط سے آزاد کروایا۔انہوں نے کہا کہ انہی قومی ہیزوز کی قربانیوں کا ثمر ہے کہ آج مملکت خداداد پاکستان کی سرحدیں ہمسائیہ ملک چین کے ساتھ منسلک ہوگئیں اور سی پیک جیسے میگا منصوبے کیلئے راستہ ہموار ہوگیا۔قیام پاکستان کیلئے قوم نے جس قدر قربانیاں دی ہیں گلگت بلتستان کے عوام نے استحکام پاکستان کیلئے اس سے کئی گنا زیادہ قربانیاں دی ہیں۔افسوس کے ساتھ کہنا پڑتا ہے کہ نااہل حکمرانوں نے ہمارے قومی ہیروز کے احسانات اور قربانیوں کو یکسر بھلا دیا ہے اور رفتہ رفتہ ہمارے قومی یادگاروں کو مٹایا جارہا ہے ۔

انہوں نے کہا کہ جس والہانہ عقیدت اور محبت کے ساتھ یہاں کے عوام نے ریاست پاکستان کا ساتھ دیا اور استحکام پاکستان کیلئے آج بھی پے درپے قربانیاں دے رہے ہیں اس کا صلہ آج تک نہیں ملا ہے ۔انہوں نے ریاستی مشینری اور حکومت وقت سے مطالبہ کیا کہ وقت ضائع کئے بغیر خطہ گلگت بلتستان کی آئینی حیثیت کا تعین کیا جائے اور علاقے کے عوام میں پائی جانیوالی بے چینی کاازالہ کیا جائے۔

وحدت نیوز(گلگت) پیپلز پارٹی اپوزیشن لیڈر تبدیل کرنے کا شوق ضرور پورا کرے لیکن علاقائی تعصب اور فرقہ وارانہ رنگ دینے کی مذموم کوشش سے باز رہے۔مجلس وحدت مسلمین نے اپوزیشن لیڈر کو تبدیل کرنے کا کوئی اصولی فیصلہ نہیں کیا ہے اور پیپلز پارٹی یہ خواب دیکھنا چھوڑ دے کہ مجلس وحدت مسلمین کے اراکین اپوزیشن لیڈر کی تبدیلی کیلئے انہیں ووٹ دینگے۔مجلس وحدت مسلمین گلگت  بلتستان کے ترجمان محمد الیاس صدیقی نے کہا ہے خود کو سیکولر کہنے والی جماعت اپوزیشن لیڈر کو تبدیل کرنے کیلئے علاقائی تعصب اور فرقہ وارانہ جذبات کا سہارا لے رہی ہے۔پیپلز پارٹی کی چور دروازوں سے مجلس وحدت کے اراکین کی حمایت حاصل کرنے کی کوشش کو ہر صورت ناکام بنائیں گے۔انہوں نے کہا کہ پانچ جماعتوں کے باہمی مشورے سے موجودہ قائد حزب اختلاف کا انتخاب ہوا ہے جس میں خود پیپلز پارٹی کے اس وقت کا اکلوتا رکن اسمبلی بھی شامل ہے اور ہم نے اس وقت جو عہد و پیمان باندھا تھا اسی پر آج تک قائم ہیں۔انہوں نے کہا کہ مذہبی جماعتوں کے خلاف ناشائستہ زبان استعمال کرنے والی جماعت کس منہ سے ہم سے حمایت کی امید لگائے بیٹھی ہے اور ہماری جماعت اس وقت تک پیپلز پارٹی کے ساتھ بیٹھنے کو تیار نہیں جب تک پیپلز پارٹی کا صوبائی صدر جنرل الیکشن اور حلقہ 4 کے ضمنی الیکشن  کے بعد علمائے کرام کی شان میں کی جانیوالی گستاخیوں پر بلامشروط معافی نہیں مانگتے۔پیپلز پارٹی کی تاریخ گواہ ہے کہ انہوں آج تک کبھی بھی اصولوں کی سیاست نہیں کی ہے حتی ٰ کہ بے نظیر بھٹو کی شہادت کے بعد جس جماعت کو زرداری نے قاتل لیگ کہا تھا ان کو صرف اپنے اقتدار کو دوام دینے کیلئے نہ صرف گلے سے لگایا بلکہ نائب وزیر اعظم کا عہدہ بھی اسی قاتل لیگ کو سونپ دیا تھا۔

وحدت نیوز(گلگت) کربلا ظلم کے خلاف ایک ابدی جنگ ہے اور عاشورہ باطل پر حق کی فتح کا دن ہے۔امام عالی مقام نے حق اور باطل کے درمیان ایک ایسی لکیر کھینچ دی ہے کہ قیامت تک آنیوالی والی نسلیں اس راہ پر چلتے ہوئے ابدی سعادت سے سرفراز ہوسکتی ہیں۔کربلا والوں کی یاد دلوں میں ایک ایسی حرارت پیدا کرتی ہے جسے زمانے کے تندوتیز طوفان بھی ٹھنڈا کرنے کی صلاحیت نہیں رکھتے۔

مجلس وحدت مسلمین گلگت بلتستان کے ترجمان محمد الیاس صدیقی نے عاشورا کے حوالے سے اپنے پیغام میں کہاہے کہ آج کے دور میں عاشورا کی اہمیت پہلے سے کہیںزیادہ بڑھ گئی ہے۔ملک کو امن وآشتی کی طرف لیجانے کیلئے کربلا کے پیغام کو عام کرنے ضرورت ہے اس لئے کہ کربلا کسی ایک مکتب فکر کیلئے نہیں بلکہ بنی نوع انسان کیلئے کربلا ایک مکمل ضابطہ حیات ہے۔انہوں نے کہا کہ کربلا کو مشعل راہ بناکر ہی ملک سے فتنوںکا قلع قمع کیا جاسکتا ہے اور آج دشمنان اسلام امریکہ ،اسرائیل اور ان کے حواریوں نے یزیدی فکر کو پروان چڑھاکر دنیا کے کونے کونے میں کشت وخون کی ہولی کھیلی ہے جس کا مقابلہ صرف اور صرف کربلائی فکر سے ہی ممکن ہے۔

انہوں نے کہا کہ ملک عزیز کو آج جس قدر تکفیری فکر سے خطرہ ہے کسی دشمن ملک سے اتنا خطرہ نہیں جہاں ہمارے سپہ سالار اور جوان ملک کے سرحدات کی حفاظت پر اپنی توانائیاں صرف کررہے ہیں وہی پر قوم کے دانشور اور سیاستدانوں کو چاہئے کہ وہ اس یزیدی فکر کی بیخ کنی کیلئے جامع پالیسیاں مرتب کریں اور تاکہ ملک وقوم کا مستقبل روشن ہو۔انہوں نے کہا کہ عاشوراظالموں کے ظلم کے خلاف صدائے احتجاج ہے اور عصر حاضر میں سنی شیعہ ملکر وقت کے یزیدی لشکر کے ارادوں کو ملیامیٹ کرسکتے ہیں۔یزید ایک شخص کا نام نہیں بلکہ ایک فکر کا نام ہے اور ہماری جنگ اسی یزیدی فکر سے ہے۔ان باطل نظریات کا مقابلہ وہی کرسکتے ہیں جو حق شناس ہوں اور دشمن کی سازشوں کا بخوبی علم رکھتے ہوں۔انہوں نے کہا کہ باطل قوتوں کیلئے میدان خالی رکھنا بھی ظلم کے زمرے میں آتا ہے اور تمام مسلمان ہر سال نواسہ رسول حضرت امام حسین علیہ السلام کے ذکر سے باطل قوتوں کا مردانہ وار مقابلہ کرنے کیلئے قوت و طاقت لیتے ہیں۔

وحدت نیوز(گلگت) محرم الحرام کے دوران حکومت جان بوجھ کر خوف وہراس پیدا کررہی ہے حالانکہ تمام مسلمان نواسہ رسول کا ذکر اپنے مخصوص انداز میں بجا لاتے ہیں اور امام عالی مقام کی بے مثال قربانی کو خراج تحسین پیش کرتے ہیں۔ایک عرصے سے حکومت محرم کے دنوں میں ایسا ماحول پیدا کررہی ہے جیسا کہ ملک دشمن افواج چڑھائی کرنیوالی ہے۔

مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ تمام مسلمان نواسہ رسول کی محبت کو ایمان کا حصہ سمجھتے ہیں اور ایام عزا کے دنوں میں ہرایک اپنے مخصوص انداز میں نواسہ رسول کو پرسہ دیتے ہیں۔انہوں نے کہا کہ یہ حکمرانوںکی نااہلی ہے کہ وہ ان ایام کے دوران ہونے والے اجتماعات سے فائدہ نہیں اٹھاتی اور ایسا خوفناک ماحول پیدا کرتی ہے کہ دیکھنے والے کو ایسا محسوس ہورہا ہے کہ ابھی کچھ ہونے والا ہے۔حکومت عقل سے کام لے تو عزاداری کے ان اجتماعات کے ذریعے ملک کو دہشت گردی کی لعنت سے نجات دلاسکتی ہے۔محرم ظالم پر مظلوم کی فتح کا مہینہ ہے ،ایثار و فداکاری اور امن و آشتی کا مہینہ ہے اور علمائے کرام اور ذاکرین مجالس عزا میں لوگوں کو امن و آشتی کی طرف دعوت دیتے ہیں۔ظلم سے نفرت اور مظلوم سے ہمدردی کی نصیحت کی جاتی ہے ۔حق تو یہ ہے کہ حکومت خود ایسے اجتماعات کا انتظام کرتی جس میں تمام مکاتب فکر کے علماء و دانشور حضرات کودعوت دیکر امن و محبت کے پیغام کو عام کرکے سیکورٹی پر اٹھنے والے کروڑوں اخراجات کو بچالیتے لیکن بدقسمتی سے ملک پر نااہل حکمرانوں کا قبضہ ہے عوام کو سہولت پہنچانے سے زیادہ عوام کو تکلیف پہنچانے کی فکر ہے۔

انہوں نے مزید کہا کہ اشتعال انگیز تقاریرکرنے والوں اور شرپسندی اور مسلکی اختلافات کو ہوادیکر امن خراب کرنے والوں کے خلاف فوری کاروائی کرکے سخت سے سخت سزا دلوائی جائے تو محرم الحرام کا مہینہ حکمرانوں کے اقتدار کو دوام بخشنے موجب ہوگا۔انہوں نے کہا عزاداری پر بیجا قسم کی پابندیاں عائد کرکے حکومت عوام کو مشتعل کرنے کی بجائے عزاداری کے راستے میں حائل رکاوٹوں کو دور کرے۔

وحدت نیوز(اسکردو) مجلس وحدت مسلمین پاکستان گلگت بلتستان کے سیکرٹری جنرل علامہ آغا علی رضوی نے کراچی میں آئی ایس او کراچی ڈویژن کے زیراہتمام امریکہ مردہ باد ریلی کے خلاف پولیس انتظامیہ کی کارروائیوں اور گرفتاریوں کی شدید الفاظ میں مذمت کرتے ہوئے کہا ہے کہ امریکہ کے خلاف احتجاجی ریلی پر کراچی پولیس کا تشدد انتہائی افسوسناک اور شرمناک عمل ہے۔ پاکستان کے خلاف امریکی سربراہ کی ہرزہ سرائیوں کے بعد بھی پاکستانی حکام بلخصوص اداروں کی امریکہ نوازی قومی حمیت کے خلاف عمل ہے۔

 انہوں نے کہا کہ پاکستان کی موجودہ تمام تر مشکلات اور پریشانیاں امریکہ کے سامنے غلامی کا طوق پہن کر جی حضوری کرنے کا نتیجہ ہے۔ امریکہ نے پاکستان کو معاشی طور پر سود اور قرضوں کے دلدل میں پھنسانے کے بعد دہشتگردی تخفے میں دئیے ہیں تاکہ اپنی بالادستی قائم و دائم رہے۔ ہمارے حکمرانوں کی ذہنیت غلامانہ ہونے کی وجہ سے کبھی بھی ملکی خارجہ پالیسی ملکی مفادات کے مطابق بننے کی بجائے امریکی مفادات کے تابع رہی ہے۔ طالبان کے وجود سے لے کر آج تک کے مسائل میں براہ راست امریکہ ملوث ہے۔ ریاستی اداروں کو ستر سالہ امریکی دھوکے کے بعد اس ہوش میں آنا چاہیے اور ایک باوقار، غیرت مند قوم بن کر پاکستان کی خارجہ پالیسی پر نظر ثانی کر کے ملکی مفادات کو ملحوظ خاطر رکھ کر نئی خارجہ پالیسی مرتب کرنی چاہیے۔

آغا علی رضوی نے کہا کہ پاکستان کو مضبوط اور مستحکم بنانے کے لیے ضروری ہے کہ ہمارے فیصلے وائٹ ہاوس اور واشنگٹن کی بجائے پارلیمنٹ اور ریاستی اداروں کے اندر ہو۔ پاکستان کو ہر طرح کی امریکی غلامی سے نکل آنا چاہیے۔ کراچی میں آئی ایس او کے طلباء کی امریکہ مخالف ریلی پر تشدد ریاستی اداروں کی غلامی کا ثبوت ہے۔ کراچی پولیس گرفتار شدگان کو رہا کر ے اور امریکی ایماء پر جمہوری اقدار پر شب خون مارنے سے گریز کرے۔