وحدت نیوز(اٹک) مجلس وحدت مسلمین شعبہ خواتین اٹک کی جانب سے جشن میلاد رسولؐ خدا و امام جعفر صادق علیہ سلام کا انعقاد بیت زھرا میں کیا گیا ۔جشن سے خطاب کرتے ہوے محترمہ رفعت بتول کا کہنا تھا کہ نبی کریم صل اللہ علیہ و آلہ وسلم اور ان کی آل پاک پر درود بھیجنے کا ثواب انسان شمار نہیں کر سکتا ایک صلوا ت ہدیہ کرنے پر فرش سے عرش تک فرشتے اس بندہ خدا کی عبادت اور ثواب تحریر کرنے میں مشغول ہو جاتے ہیں۔

 انھوں نے کہا کہ اس میں کوئ شک نہیں رسول کریم (ص) کی ذات گرامی ہمارے لیے باعث رحمت ہے اور ہماری بخشش و شفاعت کی امید ہے لیکن ہماری گفتار و کردار بھی ایسا ہونا چاہیے کہ روز محشر محمد و آل محمد (ص) کے حضور شرمندگی کا سامنا نہ ہو۔

 ان کا مزید کہنا تھا ماہ ربیع الاول اتحاد بھائی چارے اور رواداری کا مہینہ ھے شیعہ سنی مسلمان اپنے نبیؐ کے نقش قدم پر چلتے ہوے وحدت امت کی ترویج کریں اور ملک دشمن تکفیری عناصر کی سازشوں کو ناکام بنا دیں۔

 جشن میلاد میں ایم ڈبلیو ایم شعبہ خواتین کی مرکزی سیکرٹری شماریات محترمہ فرح دیبا ، مرکزی سیکرٹری فنانس محترمہ قراۃ العین اور معاون مرکزی سیکرٹری اطلاعات محترمہ زینب بنت الھدی نے بھی شرکت کی۔

وحدت نیوز(لاہور)مجلس وحدت مسلمین شعبہ خواتین لاہور کی جانب سے محمدی مسجد آڈیٹوریم ہال میں عظیم الشان جشن میلاد صادقینؑ کا اہتمام کیا گیامیلاد میں ضلع لاہور کی تمام کابینہ اور یونٹس سے خواتین اور بچوں کی کثیر تعداد نے شرکت کی اس پر مسرت محفل میں لاہور بھر سے عالمات و ذاکرات نے بھی بھرپور شرکت کی ۔تقریب میں لاہور کے مختلف کالجز اور یونیورسٹیز کے اسٹوڈنٹس کے درمیان اسلامی اشعار ، کوئز اور اسلامی آرٹ کے عنوان سے مقابلہ جات کرواے گیے جن میں نمایاں پوزیشنز حاصل کرنے والی طالبات میں انعامات تقسیم کیے گئے ۔

علاوہ ازیں لاک ڈاون کے ایام میں ایم ڈبلیو ایم شعبہ خواتین لاہور کی جانب سے آن لائن اسلامک کلاسز میں حصہ لینے والی خواتین کے نتائج کا بھی اعلان کیا گیا ننھی بچیوں نے ٹیبلو پیش کر کے محفل کو مزید رونق بخشی۔ اس موقع پر مجلس وحدت مسلمین پاکستان کے سینیئر رہنما اور رکن شوری عالی علامہ سید مبارک علی موسوی صاحب نے شرکاء محفل سے خصوصی خطاب کیا ۔

ان کا کہنا تھا کہ امت مسلمہ کی تمام تر درپیش مشکلات کا حل سیرت طیبہ کی پیروی میں مضمر میں ہے انھوں نے کہا کہ ہمارے لیے یہ باعث فخر ہے خدا نے ہمیں یہ عظیم سعادت بخشی ہے کہ ہم ختمی مرتبت سرور کائنات صل اللہ علیہ و آلہ وسلم کے امتی ہیں۔

 ان کا مزید کہنا تھا کہ مرسل اعظم (ص) کے کردار و تعلیمات سے دوری مسلمانان عالم کے لیے باعث ذلت بن رہی ہے ضرورت اس امر کی ہے کہ ہم  رحمت اللعالمینؑ کی سنت و سیرت پر عمل پیرا ہوں تاکہ دنیا و آخرت میں سرخرو ہو سکیں۔

 سیکرٹری جنرل ایم ڈبلیو ایم شعبہ خواتین لاہور محترمہ حنا تقوی کا کہنا تھا کہ عید میلاد النبی ص کے موقع پر شہر شہر قریہ قریہ جشن ولادت سرکارؐ مناکر شیعہ سنی مسلمانوں نے اپنے پیارے رسول ؐ سے عشق و عقیدت کا اظہار اور امن و بھائ چارے کا پیغام دیا ہے۔

 فرانسیسی صدر کے اسلام مخالف رویے پر ان کا کہنا تھا فرانسیسی صدر کا ہمارے پیارے رسول ؐ کی شان میں کی گئی گستاخی کا دفاع ایک افسوسناک اور اور گھٹیا فعل ہے اور یہ دانستہ طور پر اسلام اوراسلامی شعائر پر حملہ ہے جو کہ ناقابل معافی ہے امت مسلمہ کو  ہر اسلام دشمن سازش کا منہ توڑ جواب دینا ہوگا اور اس کے لیے ابتدائی طورپر فرانسیسی مصنوعات کا مکمل بائیکاٹ کرنا ہوگا۔

 تقریب کے اختتامی مراحل میں شرکاء نے فرانس میں پیغمبر  اسلام (ص) کے خاکوں کی اشاعت کے خلاف پلے کارڈز اٹھا کر شدید احتجاج کیا  آخر میں محترمہ حنا تقوی نے تمام شرکاء کا شکریہ ادا کیا۔

وحدت نیوز(نگر)آج تک کسی حکومت یا سیاسی پارٹی نے گلگت بلتستان کے آئینی حق کے لیے بات نہیں کی صوبہ تو دور کی بات ایک بہترین ہسپتال تک میسر نہیں گزشتہ حکومتوں کی کارکردگی کا اندازہ اس بات سے لگایا جا سکتا ہے کہ گلگت کے اندر صرف ایک بڑا سرکاری ہسپتال موجود ہے جو کہ جدید سہولتوں سے محروم ہے۔ ان خیالات کا اظہار ایم ڈبلیو ایم شعبہ خواتین کی مرکزی سیکرٹری سیاسیات محترمہ نرگس سجاد نے گلگت کے علاقے نگر میں خواتین سے ملاقات کے دوران کیا۔ اس موقع پر سیکرٹری جنرل گلگت محترمہ سائرہ ابراہیم بھی ان کے ہمراہ موجود تھیں ۔

محترمہ نرگس سجاد کا کہنا تھا کہ گلگت بلتستان کی عوام کو آج تک محکوم بنا کر آئینی حقوق اور اسکے مفہوم و اہمیت سے دور رکھا گیا ،انھوں نے کہا مجلس وحدت مسلمین وہ واحد جماعت ہے جس نے گلگت بلتستان کی عوام میں اپنے آئینی حقوق اور صوبے کے حصول کے لیے جدوجہد کرنے کا شعور پیدا کیا اور قائد وحدت علامہ راجا ناصر عباس جعفری حفظ اللہ کی قیادت میں تمام مسائل کے حل کے لیے خطے کی عوام کے شانہ بشانہ کھڑی رہے گی ۔

اس موقع پر سیکرٹری جنرل گلگت محترمہ سائرہ ابراہیم کا کہنا تھا کہ اب وقت آگیا ہے کہ عوام جھوٹے اور کھوکھلے نعرے لگانے والی سیاسی جماعتوں اور ہر مشکل وقت میں میدان عمل میں رہنے والی جماعت مجلس وحدت مسلمین پاکستان کے درمیان فرق کو پہچانیں ۔انھوں نے کہا کہ یہ بات واضح ہے کہ ایم ڈبلیو ایم اپنی جماعت کے مفاد کے لئے نہیں بلکہ گلگت بلتستان کی عوام کے لیے کھڑی ہوئی ہے ضرورت اس امر کی ہے کہ ہم ایم ڈبلیو ایم کے وژن کو سمجھتے ہوے قائدین کے کیے گئے فیصلہ جات پر من و عن عمل درآمد کریں تاکہ محرومین و مظلومین گلگت بلتستان کو بھی وہ ہی اختیار اور مقام حاصل ہو جو ملک کے دیگر صوبوں اور عوام کوحاصل ہیں۔