وحدت نیوز(لاہور) رکن پنجاب اسمبلی اور مجلس وحدت مسلمین شعبہ خواتین کی مرکزی سیکرٹری جنرل سیدہ زہرا نقوی نے یوم یکجتی کشمیر کے موقع پر اپنے پیغام میں کہا کہ نہتے مظلومین کشمیر سات دہائیوں سے اپنی آزادی کی جنگ لڑ رہے ہیں اورآئے دن بھارتی ظلم و  بربریت اور تشدد کے واقعات میں اضافہ ہوتا جارہا ہے۔بھارت اپنی تمام تر کوششوں  کے باوجود ابھی تک اپنے مذموم عزائم میں کامیاب نہ ہو سکا اور نہ ہی کشمیری عوام نے بھارتی دباو کا کوئی اثر قبول کیا ہے بلکہ حریت پسندوں کی آزادی کی جدو جہد میں مزید تیزی آتی جا رہی ۔

انھوں نے کہا بھارتی فوجیوں نے وادی میں کشت و خوں کا بازار گرم کر رکھا ہے کاروبار حیات بند ہے ، گھر گھر تلاشی کا سلسلہ جاری ہے ، چادر اور چاردیواری کا تقدس پامال کیا جا رہا ہے 2021 کا سال مقبوضہ کشمیر میں مردم شماری کا سال تھا لیکن مسلم اکثریت کو اقلیت میں بدلنے کے ناپاک منصوبے پر عمل درآمد کے لیے بھارتی ہتھکنڈے شروع ہو چکے ہیں۔

 انھوں نے کہا ڈیموگرافی تبدیل کرنے کا مقصد کسی بھی عددی برتری میں رد وبدل کر کے راۓ شماری کے نتائج کو سبوتاژ کرنا ہے۔  مودی سرکار کے غیر قانونی، ظالمانہ اور وحشیانہ اقدام پر عالمی امن و سلامتی کے اداروں کی عدم توجہی اور خاموشی قابل مذمت ہے ان کا کہنا تھا پاکستان کے ہر شہری کا دل اپنے کشمیری بہن بھائی کی تکلیف سے مضطرب ہے کشمیرکی آزادی کے لیے اور عالمی اداروں کی آنکھوں سے مجرمانہ غفلت کے پردے ہٹانے کے لیے پاکستان ہر فورم پر آواز بلند کرتا رہے گا ۔

ان کا مزید کہنا تھا کشمیر کی ماوں بہنوں کو ان کی لازوال قربانیوں پر خراج عقیدت پیش کرتے ہیں ان شاء اللہ  ایک دن  ضرور آئے گا جب ان بیش بہا قربانیوں کے صلے میں بھارتی تسلط سے آزاد ہو کر کشمیر کے مظلومین آزاد فضاوں میں سانس لیں گے اور اپنی مرضی کے مطابق زندگی گزار سکیں گے ۔

وحدت نیوز(لاہور)روز ولادت با سعادت سیدۃ النساء العالمین ، اسوہ کاملہ ، دختر رسول خداؐ سیدہ فاطمۃ الزہرا سلام اللہ علیھا کے پر مسرت موقع پر مجلس وحدت مسلمین شعبہ خواتین کی مرکزی سیکرٹری جنرل و رکن پنجاب اسمبلی سیدہ زہرا نقوی نے اپنے تہنیتی پیغام میں کہا کہ سیدہ کونین جناب فاطمۃ الزہرا سلام اللہ علیھا نہ فقط خواتین بلکہ تمام انسانیت کے لیے اسوہ کاملہ ہیں آپ سلام اللہ علیھا کی ذات گرامی وجہ تخلیق کائنات ہے آپؑ کی عظمت و عصمت ،مقام و منزلت کو درک کرنا عام انسان کے اختیار میں نہیں ۔

انہوں نے کہا کہ حضرت فاطمہ زہرا (س) عالم اسلام کی ایسی باعظمت خاتون ہیں جن کی فضیلت زندگی کے ہر شعبے میں آشکار ہے خواتین کے لیے زندگی کے تمام پہلوؤں میں آپؑ کی سیرت کاملہ مشعل راہ ہے۔

 ان کا کہنا تھا کہ اسلام نے بحثیت ماں بہن و بیوی عورت کوچودہ سو سال پہلے وہ حقوق عطا کئے،جس کا مغرب تصور بھی نہیں کرسکتا کیونکہ مغرب نے ہمیشہ عورت کی تذلیل کرکے اس کو ایک کاروباری شو پیس کی طرح پیش کیا جبکہ اسلام ایک مکمل ضابطہ حیات ہے جو عورت کو عزت و احترام اور شرف و وقار بخشتا ہے۔

 انھوں نے کہا اسلامی مملکت پاکستان میں پیغمبر اکرم صل اللہ علی و آلہ وسلم کی دختر اور عالمین کی عورتوں کی سردار خاتون کامل کے یوم ولادت کو ہی یوم خواتین کے طور پر منانا چاہیے اور مغربی ثقافت سے آلودہ نعروں کی حوصلہ شکنی کرتے ہوۓ اسلامی تعلیمات کے مطابق عورت کے حقوق پر بات کرنی چاہیے۔ انھوں نے مزید کہا جناب سیدہ سلام اللہ علیھا سے محبت اور عقیدت رکھنے والی خواتین کے لیے زندگی کے ہر شعبے میں جناب سیدہ س کی تعلیمات و کردار پر عمل پیرا ہونا ضروری ہے۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹریٹ اسلام آباد میں آفس مسئولین سے گفتگو کرتے ہوئے ایم ڈبلیو ایم یوتھ کے مرکزی سیکرٹری علامہ اعجاز حسین بہشتی کا کہنا تھا کہ شعبہ جوان نے روز ولادت باسعات شبیہ پیغمبر شہزادہ علی اکبر ؑ کی مناسبت سے 27 مارچ کو ’یوم جوان‘ منانے کا فیصلہ کیا ہے۔

علامہ اعجاز بہشتی کا کہنا تھا کہ یوم جوان کا مرکزی پروگرام لاہور میں ہوگا جس میں ہزاروں باغیرت اور باہمت جوان شریک ہوں گے اور ایک دفعہ پھر لبیک یا حسین کی فلک شگاف نعروں کے ساتھ قائد وحدت علامہ راجہ ناصر عباس جعفری کی شجاع قیادت اور بے مثال استقامت کے ساتھ تجدید عہد کریں گے۔

علامہ اعجاز بہشتی کا مزید کہنا تھا کہ ملکی سالمیت اور ترقی میں جوانوں کا کردار نہایت ہی اہم ہے اور جب تک جوانوں کی فکری اور اخلاقی تربیت نہیں ہوتی کوئی بھی ملک اور معاشرہ ترقی نہیں کرسکتا۔ لہذا ہم اپنے بابصیرت قائد کی رہبری میں وطن عزیز پاکستان کے جوانوں کی تربیت کریں گے اور جوانوں کے خلاف دشمنوں کے ہر سازش کو ناکام بنائیں گے۔