وحدت نیوز(خانیوال) مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری کی اپیل پر سانحہ ہزار گنجی، سانحہ اوماڑہ، ڈیرہ اسماعیل خان میں جاری شیعہ ٹارگٹ اور کراچی میں جاری جبری گمشدگیوں کے خلاف نماز جمعہ کے بعد مرکزی امام بارگاہ لاہور موڑ خانیوال پر احتجاجی مظاہرہ کیا گیا، احتجاجی مظاہرے کی قیادت ضلعی سیکرٹری جنرل سردار قیصر عباس خان ڈب، مولانا غدیر عباس شیرازی، غلام عباس کھوکھر، مہر انصر عباس اور دیگر نے کی۔ مظاہرین نے پینا فلیکس اور بینرز اُٹھا رکھے تھے، جن پر دہشتگردی کے خلاف نعرے درج تھے، مظاہرین سے خطاب کرتے ہوئے ضلعی سیکرٹری جنرل قیصر عباس خان ڈب نے کہا کہ آج ملک بھر میں ایم ڈبلیو ایم نے مظاہرے کرکے متاثرین سے یکجہتی کا اظہار کیا ہے، حکومت کسی غلط فہمی میں نہ رہے، اگر ہمارے حقوق سلب کیے گئے تو ہمیں سڑکوں پر آنے سے کوئی نہیں روک سکتا۔
اُنہوں نے کہا کہ یہ اقتدار اور کرسی آنی جانی ہے، کل کو دوبارہ یہ سیاستدان ہمارے پاس آئیں گے، عجیب بات ہے کہ ہمارے حکمرانوں کو چھوٹے چھوٹے پروگرام میں جانے کی فرصت ہے لیکن شہداء کے ساتھ اظہار تعزیت کرنے کا وقت نہیں ہے۔ سردار قیصر عباس خان نے مزید کہا کہ اہلیان خانیوال نے آج پھر ثابت کر دیا ہے کہ قوم آج بھی بیدار ہے اور کسی بھی ظلم کے خلاف آواز بلند کرنے کیلئے تیار ہے، اس وقت پاکستان کو کئی محاذوں پر مشکلات کا سامنا ہے، حکومت سنجیدگی سے اس ملک کے مفادات کو ترجیح دے۔
