وحدت نیوز(ملتان) قبلہ اول کی آزادی اور مظلوم فلسطینیوں کی حمایت میں عالمی یوم القدس کے موقع پر مرکزی امام بارگاہ چوک کمہارانوالہ سے مجلس وحدت مسلمین ضلع ملتان و جامعہ شہید مطہری ملتان کے زیراہتمام ایک عظیم الشان مرکزی احتجاجی ریلی نکالی گئی۔ جس کی قیادت علامہ قاضی نادر حسین علوی، علامہ غلام مصطفی انصاری، مولانا علامہ وسیم عباس معصومی، سیلم عباس صدیقی، انجئنیر مہر سخاوت، سید اقبال مہدی ایڈووکیٹ نے کی۔ شرکا سے خطاب کرتے ہوئے علامہ قاضی نادر حسین علوی نے کہا کہ فلسطینی ریاست کے قیام اور قبلہ اول کی آزادی تک ہماری جدوجہد جاری رہے گی۔ قبلہ اول پر اسرائیلی ناجائز قبضے کی شدید مذمت کرتے ہیں۔ یوم القدس تمام مظلوموں کی حمایت کا دن ہے۔ اسرائیلی ظلم و زیادتی کی انتہا ہو چکی مگر افسوس اقوام متحدہ نے ہمیشہ دوغلے پن کا مظاہرہ کیا ہے۔ قائداعظم محمد علی جناح بانی پاکستان نے بھی اسرائیل کو ناجائز ریاست قرار دیا تھا۔

رہنمائوں نے مزید کہا کہ مسلمان قبلہ اول پر یہودیوں کے قبضے کو کسی صورت برداشت نہیں کریں گے۔ تمام عالم اسلام یکجا ہو کر اسرائیل سے قبلہ اول اور بیت المقدس کو بحال کرواکر یہودیوں سے آزاد کروائیں۔ ریلی میں مولانا امیر ساقی، مولانا مجاہد جعفری، مولانا غلام جعفر انصاری، حسنین علی انصاری، مظہر کات، ممتاز حسین ساجدی، مولانا صابر حسین، مولانا فرمان، حسن رضا، غدیر شیرازی، علی گیلانی شرکت کی۔ مظاہرین نے اسرائیلی جارحیت کے خلاف پلے کارڈ اٹھا رکھے تھے۔ اس موقع پر اسرائیلی پتلا اور پرچم نذر آتش کیا گیا۔