وحدت نیوز(ملتان)مجلس وحدت مسلمین پاکستان عزاداری ونگ جنوبی پنجاب کے وفد نے صوبائی صدر عزاداری ونگ و ممبر ڈویژنل امن کمیٹی ملتان ڈویژن انجینئر سخاوت علی سیال کی قیادت میں ریجنل پولیس آفیسر ملتان ریجن سہیل چودھری سے ملاقات کی، ملاقات میں علمائے مکتب اہلیبیت جنوبی پنجاب کے صوبائی صدر علامہ قاضی نادر حسین علوی، ایم ڈبلیو ایم کے رہنما علامہ وسیم عباس معصومی، تحفظ عزاداری امام حسین علیہ السلام کے صدر خاور شفقت بھٹہ، ایم ڈبلیو ایم جنوبی پنجاب عزاداری ونگ کے جنرل سیکرٹری سردار عون رضا انجم گوپانگ اور سید آفتاب کریم گردیزی موجود تھے۔ وفد نے آر پی او ملتان کو ریجن بھر کے مسائل کی نشاندہی کی اور ان کے حل کے لیے تجاویز پیش کیں۔ آر پی او ملتان نے وفد کی تجاویز کا خیرمقدم کیا اور ان مسائل کو حل کرنے کی یقین دہانی کرائی۔

صوبائی صدر عزاداری ونگ انجینئر مہر سخاوت علی سیال نے مسائل کی جانب سے توجہ مبذول کراتے ہوئے کہا کہ ملتان، خانیوال، لودھراں اور وہاڑی میں جو عزاداروں کو مشکلات درپیش ہیں انہیں فی الفور حل کیا جائے، جلوس ہائے عزا کے روٹس پر تمام محکموں کی کارکردگی کو تیز کیا جائے اور عزاداروں کو پولیس کی جانب سے بلاوجہ تنگ نہ کیا جائے۔