وحدت نیوز (اسلام آباد) مجلس وحدت مسلمین کے ڈپٹی سیکرٹری جنرل اور ملی یکجہتی کونسل کےمرکزی رہنما علامہ محمد امین شہیدی نے کہا ہے کہ دہشت گردی نے ملک کو تباہ و برباد کردیا ہے،دہشت گردوں کے خلاف کارروائی کیلئے برسوں سے مطالبے کرتے آرہے ہیں،لیکن اس پر کوئی عمل نہیں کیا گیا ،سانحہ پشاور کے بعد کچھ آثار ایسے نظر آرہے ہیں کہ حکومت دہشت گردوں کے خلاف کارروائی کے لیے پرعزم ہے،اس سلسلے میں دہشت گردوں کے خلاف جو کارروائی کی جارہی ہے،منجملہ ملٹری کورٹس کا قیام ہم اس کی بھرپوراور مکمل تائید کرتے ہیں تاہم یہ بھی مطالبہ کرتے ہیں کہ ہرقسم کےدہشت گرد،اوردہشت گردوں کے خلاف بلا استثناکاروائی کی جائے اور کسی کو اس سےمستثنیٰ نہ کیا جائے۔

اپنی رہائش گاہ پر منعقدہ ملی یکجہتی کونسل کے اجلاس کے اختتام پر پریس کانفرنس کرتے ہوئے علامہ محمد امین شہیدی نے کہا کہ ان عدالتوں کے قیام کا مقصد فوری اور منصفانہ انصاف ہونا چاہیے اور یہ بھی خیال رکھا جائے کہ کوئی بے گناہ اس کے شکنجے میں نہ آئے،اگر ملک میں موجود عدالتیں انصاف فراہم کرتیں،مجرموں کو کڑی سزائیں دیتیں، قاتلوں کو باعزت بری نہ کرتیں،کوئٹہ،کراچی،تفتان،چلاس،نانگاپربت اور بابوسرکے حادثوں کے مجرموں کو عبرت کا نشان بنائیں تو آج ملٹری کورٹس کی کوئی ضرورت پیش نہ آتی۔وطن ِ عزیز کو دہشت گردی کے بحران سے نکالنے کے لئے ضروری ہے کہ دہشت گردی کے فروغ میں ملوث مدارس کے خلاف بلا استثنا بے رحم آپریشن کیا جائے،تاہم تعمیری کام کرنے والے اداروں کو بے جا تنگ نہ کیا جائے۔

وحدت نیوز (کراچی) جشن ولادت باسعادت حضرت محمد ﷺ و امام جعفر صادقؑ کی خوشی میں صوبائی سیکریٹریٹ  کو برقی قمقموں سے سجایا گیا اہل علاقہ نے بے حد سراہا وحدت ہاؤس سندھ پر جشن کے حوالے سے جشن و شمع روشن و چراغان کیا گیا، اور آلِ ابو طالب یوتھ آرگنائزیشن کی تعاون سے پچیس پاؤنڈ کا کیک کاٹا گیا اور شرکاء محفل میں مٹھائیاں اور کیک تقسیم کیا، اس موقع پر نعت خواں حضرات نے نعت رسول مقبول ﷺ پیش کیا قبل ازین مجلس وحدت مسلمین ضلع جنوبی کے تحت سرکارِ رسالت ﷺ و امام جعفرِ صادق ؑ کی یومِ ولادت کے سلسلے میں وحدت ریلی محفل شاہ خراسان سے نکالی گئی جو کہ مختلف راستوں سے ہوتا ہوا صوبائی سیکریڑیٹ پر اختتام پذیر ہوئی شرکائے محفل سے خطاب کرتے ہوئے علامہ صادق رضا تقوی،مولانا احسان دانش،مولانا شیرعلی ،صوبائی رہنما ناصر الحسینی، ایم ڈبلیو ایم جنوبی کے رضوان پنجوانی ،شبیر حسین اور آل پاکستان سنی تحریک کے چیئرمین مطلوب اعوان نے اپنے خطاب میں تعلیمات رسول خداﷺ وامام جعفر صادق ؑ پر روشنی ڈالی مقرریں نے کہا کہ اسلام امن کا پیغام دیتا ہے اور رسول خدا کی ہیت طیبہ انسانیت سے محبت کا درس دیتی ہے، آج عالم انسانیت کو متحد ہو تکفیری دہشتگردوں کے خلاف علمِ جہاد بلند کرنا چاہیے تاکہ سرزمین پاکستان سے دہشتگردی کا مکمل خاتمہ ہوسکے۔

وحدت نیوز (کراچی ) سندھ حکومت شیعہ مسلمانوں کے قاتلوں کو فوری گرفتار کرے، کراچی گزشتہ 4روز میں 6شیعہ افراد کو ٹارگٹ کلنگ دہشتگردہ کا نشانہ بنایا گیا،سندھ حکومت دہشتگردوں کی پشت پناہی کررہی ہے سلمان رضوی کے قاتلوں کو فوری گرفتار کیا جائے ۔گزشتہ برس دہشتگری میں شہید سلمان رضوی کے بھائی عظیم رضوی کو بھی ٹارگٹ کلنگ کا نشانہ بنایا جا چکا ہے ، شہر قائد شیعہ نشل کشی میں ایک ہی گھر سے کئی جنازے اُٹھے سندھ حکومت و قانون نافذ کرنے والے ادارے پولیس او رینجرز دہشتگردی روکنے میں ناکام ہوگئے ہیں اور خاموش خاموش تماشی کا کردار ادا کررہے ۔ ان خیالات کا اظہار مجلس و حدت مسلمین کے رہنماؤں بشمول علامہ مختار امامی ،علی احمر،علامہ علی انور،علامہ مبشر حسن ،علی حسین نقوی،ناصرحسینی،آصف صفوی سمیت دیگر رہنماؤں نے کراچی ٹارگٹ کلنگ میں شہید ہونے والے سلمان رضوی کے قتل پر اہل خانہ سے اظہار تعزیت کرتے ہوئے و حدت ہاؤس کراچی سے جاری اپنے مذمتی بیان میں کیا جبکہ رہنماؤں نے شہید ہونے والے سلمان رضوی کے اہل خانہ سے ملاقات کی اور اظہار تعزیت کیا اور مرحوم کے بلندی درجات کی دعا کی ۔

اس موقع پر ایم ڈبلیو ایم سندھ کے صوبائی سیکر ٹری جنرل علامہ مختار امامی کا کہنا تھا کہ کراچی دہشت گردوں کی آماجگاہ بن چکا ہے،سندھ حکومت و قانون نافذ کرنے والے ادارے دہشتگردی روکنے میں ناکام ہوگئے ہیں، دہشتگردوں کے خلاف ٹارگٹڈ آپریشن کے با جودبے گناہ شہریوں کی ٹارگٹ کلنگ کا سلسلہ جاری ہے اور نئے سال کے آغاز سے ہی ایسا لگ رہا ہے کے شہر میں ٹارگٹ کلرز کو فری ہینڈ دی دیاگیا ہے اور ریاستی ادارے خاموش تما شائی بنے ہوئے ہیں شہر کے مضافات میں واقع خیمہ بستیاں ، کچی آبادیاں دہشت گردوں کی محفوظ پناہ گاہیں ہیں، پولیس انتظامیہ اور سندھ حکومت نے نشاندہی کے باوجود اب تک نو گو ایریاز میں آپریشن کلین اپ نہیں کیا،شہر میں پہلے سے موجود دہشت گرد وبال جان تھے ، کہ اب آئی ڈی پیز کی آڑ میں وزیر ستان سے خطرناک دہشت گرد کراچی سمیت ملک بھر میں پھیلنا شروع ہو چکے ہیں ، جن کی کڑی نگرانی کی ضرورت ہے، ہم ایک مرتبہ پھر واضح کر رہے ہیں کہ طالبان کے ساتھ ساتھ ملک بھر میں پہلے ہوئے ان کے ہمدردوں ، غم خواروں اور مددگار کالعدم جماعتوں کے خلاف بھی جلد فوری کاروائی کا آغاز کیا جائے، وگرنہ پورا ملک وزیرستان بن جائے گا، کراچی ٹارگٹ کلنگ میں بھی تکفیری دہشت گرد عناصر ملوث ہیں جنہیں قانون کے شکنجے میں لینا ضروری ہے، رہنماؤں نے کراچی میں جاری ٹارگٹ کلنگ کے خاتمے کیلئے چیف جسٹس آف پاکستان ،آرمی چیف جنرل راحیل شریف، وفاقی و صوبائی حکومت گورنر سندھ ، وزیر اعلیٰ سندھ ، آئی جی پولیس اور ڈی جی رینجرز سے مطالبہ کیا کہ بے گناہ شہریوں کے قتل عام میں ملوث دہشتگردوں کو فوری کی گرفتاری عمل میں لائی جائے اور ایسی شہر قائد کی موجودہ صورت حال میں قیام امن کیلئے کراچی شہر کو فوری فوج کے حوالے کیا جائے تاکہ بے گناہ افراد کے قتل میں ملوث دہشتگردوں کو کیفر کردار تک پہنجایا جاسکے۔

وحدت نیوز (پشاور) مجلس وحدت مسلمین صوبہ خیبر پختونخوا کے سیکرٹری جنرل علامہ سبطین حسینی نے کہا ہے کہ ایک منظم انداز میں پرامن اور محب وطن باسیوں کی سرزمین اورکزئی ایجنسی کلایہ کو ناامن بنانے کی کوششیں ہو رہی ہیں۔ معصوم بچوں اور جوانوں کو جو معاشرتی بے راہ رویوں کی بجائے ایک سالم و توانا و صحت مند کھیل میں مصروف ہوں ، نشانہ بنانا درندگی اور بزدلی کا شاخسانہ ہے۔ علاقہ مکینوں نے ہمیشہ سیکیورٹی فورسز کا ساتھ دیا، آپریشن کے دوران آئی ڈی پیز کو پناہ دی وہاں ان کی خدمت کی اور راستہ دیا لیکن اس کے باوجود کچھ عرصہ سے ہمارے پرامن علاقوں سے نامرئی ہاتھ راکٹ فائر کرکے علاقے کے امن کو سبوتاژ کرنے کی کوششیں کررہے ہیں، ہر ایک کو سمجھنا چاہیےکہ ہم امن اور سکون کو بھی علاقے کی زینت بنائیں گےاور دشمن کو کبھی اپنے ناپاک عزائم میں کامیاب نہیں ہونے دیں گے۔

رہنما ایم ڈبلیو ایم نے کور کمانڈر پشاور سے پرزور مطالبہ کرتے ہیں کہ وہ وہاں کے حالات کی نزاکت کو سمجھیں اور ان عناصر کی بیخ کنی کی جائے جو ان گھناونی کارروائیوں میں ملوث ہیں، اور اس طرح کے واقعات سے مذموم مقاصد کے حصول کے متمنی ہیں، ہم پر امن لوگ ہیں ، ہم نے طول تاریخ میں از قوت بازو اپنے وطن کا دفاع کیاہےاور کرتے رہیں گے لیکن اپنے خون سے کسی کو بھی کھیلنے کی اجازت نہیں دیں گے۔ ایسے حالات میں جب عسکری و سیاسی قیادت ملک سے دہشت گردی کے ناسور کو مٹانے کی کوششوں میں مصروف ہےاور اکیسویں آئینی ترمیم کی منظوری ہوچکی ہے۔ کڈہ بازار جیسے سانحات کا رونما ہونا اور معصوم بچوں کو درندگی اور دہشت کا نشانہ بنانا سیاسی و عسکری قوتوں کے لئے لمحہ فکریہ ہے، ملک کی مقتدر قوتوں یہ سمجھنا ہوگاکہ آخر کیوں گزشتہ کچھ عرصہ سے بے گناہوں کو نشانہ بنانے کی کوششیں ہو رہی ہیں، جنہوں نے ہمیشہ حکومت پاکستان کا ساتھ دیا۔ ایجنسی کے دیگر علاقوں کے برعکس وہاں اسلحہ اور منشیات کا کاروبار نہیں ہوتا، اغواء برائے تاوان کی وارداتیں نہیں ہوتیں، علاقے کی پسماندگی کے باوجود لوگوں کا تعلیم کی طرف رجحان ہے، پبلک سکولز موجود ہیں، لہذا ملک کے ان کٹھن اور ناگفتہ بہ حالات میں جب ہر سو امن کے قیام کی کوششیں ہورہی ہیں، ایک پرامن علاقے کے امن کو سبوتاژ کرنے کے مذموم اقدامات کسی طور پر بھی قابل قبول نہیں ہیں۔

وحدت نیوز (لاہور) ہم اسلام کے نام پر اسلام اور پاکستان کو قتل نہیں ہونے دینگے سیرت پیغمبر کی روشنی میں اسلام کے روشن چہرے اور پاکستان کی سلامتی و استحکام کی جدوجہد جاری رکھیں گے ان خیالات کا اظہار مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی نے صوبائی سیکرٹریٹ مجلس وحدت مسلمین پنجاب میں ایک خصوصی پریس کانفرنس میں کیا انہوں نے کہا کہ موجودہ ملکی صورت حال، دہشت گردی ،آپریشن ضرب عضب کو کامیابی سے ہمکنار کرنے اور قومی یکجہتی کو فروغ دینے کے لئے مجلس وحدت مسلمین 11جنوری کو ایوان اقبال لاہور میں عظیم الشان پیغمبر اعظم امن کانفرنس کاانعقاد کریگی جس میں ملکی سطح کی تمام پڑی سیاسی جماعتوں کے مرکزی رہنماوں ،مشائخ عظام،گدی نشینوں اور مدارس دینیہ سے وابستہ شخصیات شرکت کریں گی جو دہشت گردی اور انتہا پسندی کے خلاف سنگ میل ثابت ہو گی انہوں نے کہا کہ ہم دہشت گردی کو کسی بھی روپ میں برداشت نہیں کریں گے جو لوگ مدارس کی اوٹ میں اکیسویں آئینی ترمیم کی مخالفت کر رہے ہیں ان کا ہدف دہشت گردوں کو مدد فراہم کرنا اور قومی یکجہتی کو سبوتاژ کرنے کی  کو شش ہے یہ گروہ بے نقاب ہو چکے ہیں ہم دہشت گردوں اور اُن کے سیاسی سرپرستوں کے خلاف معتدل اور محب وطن شخصیات اور جماعتوں کو متحد کر کے اسلام کے روشن اور چمکتے چہرے کو سامنے لائیں گے اور امن و سلامتی کے پیغام کو پورے پاکستان میں پھیلائیں گے ۔انہوں نے اس عزم کا اظہا کیا کہ اسلام کے خوب صرت چہرے اور ہزاروں شہداء کی قربانیوں کو رائیگاں نہیں جانے دیا جائے گا پریس کانفرنس میں مجلس وحدت مسلمین کے دیگر رہنماوں علامہ امتیاز حسین کاظمی،سید اسد عباس نقوی،سید حسین زیدی،شیخ عمران علی ،رائے ناصر علی اور راناماجد علی بھی شریک تھے۔

وحدت نیوز (اسلام آباد)  قومی سیاسی صورتحال کے تناظر میں دینی جماعتوں کے غیر سیاسی اتحاد ملی یکجہتی کونسل کی مجلس عاملہ کا اہم اجلاس مجلس وحدت مسلمین پاکستان کے مرکزی ڈپٹی سیکریٹری جنرل اور ملی یکجہتی کونسل کے مرکزی سیکریٹری مالیات علامہ محمد امین شہیدی کی رہائشگاہ پر منعقد ہوا،ملی یکجہتی کونسل کے سربراہ ڈاکٹر صاحبزادہ ابوالخیر محمد زبیر نےاجلاس سے خطاب کرتے ہوئےکہ اکہ سانحہ پشاور کے بعد کچھ آثار ایسے نظر آرہے ہیں کہ حکومت دہشت گردوں کے خلاف کارروائی کے لئے پرعزم ہے۔ اس سلسلے میں دہشت گردوں کے خلاف جو کارروائی کی جا رہی ہے، منجملہ ملٹری کورٹس کا قیام، ہم اس کی تائید کرتے ہیں، تاہم یہ بھی مطالبہ کرتے ہیں کہ دہشت گرد، دہشت گرد ہوتا ہے خواہ وہ مذہبی دہشت گرد ہو، لسانی دہشت گرد ہو، فرقہ وارانہ دہشتگرد ہو یا قبائلی دہشت گرد۔ لہذا ہر قسم کے دہشت گردوں کے خلاف بلااستثناء کارروائی کی جائے اور کسی کو اس سے مستثنٰی نہ کیا جائے۔ انھوں نے کہا کہ کسی ایک قسم کے دہشت گرد پر فوکس کرکے پورے عمل کو مشکوک نہ بنایا جائے۔

مجلس عاملہ کے اجلاس میں ملی یکجہتی کونسل کے دستور کی منظوری دی گئی اور مرکزی سطح پر تمام دینی جماعتوں کے قائدین پر مشتمل سپریم کونسل کے قیام کا اعلان کیا گیا۔ ملی یکجہتی کونسل کی مجلس عاملہ کے اجلاس میں مجلس وحدت مسلمین کےمرکزی رہنما علامہ امین شہیدی ، علامہ شفقت شیرازی ،لیاقت بلوچ، پیر عبدالرحیم نقشبندی، پیر سید محفوظ مشہدی، ثاقب اکبر، علامہ عارف حسین واحدی، سلطان احمد علی، میاں محمد اسلم، پیر ناصر جمیل ہاشمی، عبدالرشید ترابی،  ڈاکٹر عابد روﺅف اورکزئی، عبدالمتین اخونزادہ، حکیم عبدالوحید، پیر عاشق حسین بخاری، مولانا عامر صدیق، مفتی محمد عامر شہزاد، خالد محمود عباسی، محمد خطیب مصطفائی، محمد نصیر احمد اویسی، پیر سید ذاولفقار علی، حاجی ابو شریف اور کونسل کے دیگر قائدین نے شرکت کی۔

بعد میں پریس کانفرنس سے خطاب میں ابولخیر محمد زبیر نے کہا ہے کہ ملی یکجہتی کونسل دہشتگردی کی کھل کر مخالفت اور فوجی عدالتوں کے حق میں ہے، تاہم دہشتگردوں کیخلاف بلاتفریق کارروائی کی جائے۔ اسلام آباد میں ملی یکجہتی کونسل کے اجلاس کے بعد پریس کانفرنس کرتے ہوئے ابولخیر زبیر کا کہنا تھا کہ ہم ملٹری کورٹس کے حق میں ہیں اور حکومت سے مطالبہ کرتے ہیں کہ دہشت گردوں کے خلاف بلاتخصیص کارروائی کرنی چاہیئے۔ انہوں نے کہا کہ دہشتگرد خواہ لسانی ہو یا فرقہ وارانہ ان کے درمیان امتیاز روا نہ رکھا جائے اور کسی کو مستثنٰی نہ ٹھہرایا جائے۔ سانحہ پشاور کی آڑ میں مدارس کیخلاف کارروائی نہ کی جائے، ثبوت کی روشنی میں کسی مدرسے کیخلاف کارروائی سے پہلے اتحاد تنظیم المدارس کو اعتماد میں لیا جائے۔