وحدت نیوز (گلگت) مجلس وحدت مسلمین پاکستان نے حکمران جماعت پاکستان مسلم لیگ نون کے خلاف چارج شیٹ جاری کردی ہے۔ گلگت پریس کلب میں نیوز کانفرنس کرتے ہوئے ایم ڈبلیو ایم کے سیکریٹری سیاسیات ناصر عباس شیرازی نے نون لیگ کو کڑی تنقید کا نشانہ بنایا اور چارج شیٹ پیش کی اور کہا ہے کہ لوڈ شیڈنگ کو ختم کرنے اور زرداری کو مال روڈ پر گھسیٹنے کے جھوٹے دعوے کرنے والے آرٹیکل 62- 63 کی روشنی میں صادق اور امین نہیں رہے اور یوں شریف برادران عملاً نا اہل ہو چکے ہیں اور اسی طرح کے جھوٹے نعرے گلگت بلتستان میں لگاکر خطے کے عوام کو دھوکہ دیکر اقتدار تک پہنچنے کی سازشیں کی جارہی ہے، مختلف حلقوں میں دھاندلی کے ثابت ہو جانے، بالخصوص وفاقی وزیر خواجہ سعد رفیق کی اسمبلی سے چھٹی، ایاز صادق کے حلقے میں 40 ہزار ووٹوں کی تصدیق نہ ہونے کے بعد نواز لیگ کی موجودہ حکومت اپنا آئینی جواز کھو چکی ہے جبکہ ملک کے دیگر علاقوں کی طرح گلگت بلتستان میں بھی منظم دھاندلی کے تمام منصوبے نواز لیگی گورنر و صوبائی کابینہ کے زیر نگرانی بنائے جاچکے ہیں جنہیں عوامی حمایت سے ناکام بنائینگے۔

ناصر عباس شیرازی کا کہنا تھا کہ نواز لیگ کے انداز حکمرانی میں اختیارات کی نچلی سطح پر تقسیم نہیں اور موجودہ حکمرانوں کا آئین کی خلاف ورزی کرتے ہوئے بلدیاتی انتخابات کا نہ کروانا دراصل جمہوریت کے لبادے میں خاندان شریفیہ کی شہنشاہیت کو قائم کرنا ہے۔ گلگت بلتستان میں بھی نوازلیگ وائسرائے سسٹم نافذ کرنے کی کوشش کر رہی ہے، مجلس وحدت عوامی حمیت و غیرت کے ساتھ گلگت بلتستان کے عوام کے حقوق کی نچلی سطح پر منتقلی کرکے عوام کو بااختیار بنایا جائیگا اور گلگت بلتستان میں بلدیاتی انتخابات فوراً کروائے جائینگے۔ نواز لیگ کی موجودہ حکومت گلگت بلتستان کو آئینی حقوق دینے سے گریزاں ہے اور اس کے انتخابی منشور میں بھی گلگت بلتستان کے عوام کا یہ بنیادی حق شامل نہیں۔ مجلس وحدت مسلمین نے تمام جماعتوں سے مطالبہ کیا ہے کہ وہ گلگت بلتستان کے آئینی حقوق کو اپنے منشور کا حصہ بنائیں۔ نواز لیگ کی موجودہ حکومت کی خارجہ پالیسی، دفاعی پالیسی ملکی سلامتی کے اداروں کیلئے سیکورٹی رسک بن چکی ہے اور اس کی بڑی دلیل ازلی دشمن انڈیا کے ساتھ شریف خاندان کے تجارتی تعلقات اور واضح جھکاؤ ہے۔

ایم ڈبیلو ایم کے سیکرٹری سیاسیات کا کہنا تھا کہ پاکستان کی خارجہ پالیسی کو ملکی مفاد کے مطابق چلانے کی بجائے ذاتی مفاد کے مطابق چلاکر ملک کی سلامتی کو فروخت کرنے کی سازش کی گئی ہے جس کی واضح مثال آئین کے آرٹیکل 40 کی خلاف ورزی کرتے ہوئے سعودی حکمرانوں کے ایماء پر پاک فوج کے دستوں کو یمن کے خلاف جنگ میں بھیجنے کی سازش ہے۔ آئین پاکستان تقاضا کرتا ہے کہ دو مسلمان ممالک میں جنگ چھڑنے کی صورت میں ثالثی کا کردار ادا کیا جائے گا فریق نہیں بنا جائیگا۔ یاد رہے کہ آل سعود خاندان سے ایک معاہدے کے تحت شریف فیملی کو پاکستا ن میں مجرم ثابت ہونے کے بعد بیرون ملک سعودی عرب لیکر گئے اور وہاں آٹھ سال ان کو اپنے مفادات کیلئے استعمال کیا گیا اور اب بھی شریف خاندان ملکی سلامتی کے بجائے آل سعود کے مفادات کی نگہبانی کرتے نظر آرہے ہیں۔

ناصر عباس شیرازی نے کہا کہ دہشت گردوں، پاک فوج اور شہریوں اور ملک کے قومی اثاثوں پر حملہ کرنیوالے تکفیری گروہوں کیخلاف ریاستی طاقت کے استعمال کو روک کر مذاکرات کے نام پر ان دہشت گردوں کی حوصلہ افزائی کی کوشش کی گئی اور انہیں حکومتی سربراہی میں فول پروف سیکورٹی کے ساتھ طالبان سے مذاکرات کیلئے وزیرستان بھجوا دیا گیا جس سے دہشت گردوں کی حوصلہ افزائی ہوئی۔ نام نہاد مذاکرات کے نام پر دہشت گردوں کو منظم ہونے کا موقع فراہم کیا گیا جس سے فائدہ اٹھاکر دہشت گردوں نے ہزاروں قیمتی جانوں کو خاک و خون میں نہلا دیا۔ یاد رہے کہ 18 ماہ کی ایم ڈبلیو ایم کی عوامی جدوجہد سے بالآخر ضرب عضب شروع ہوا اور وزیر دفاع خواجہ آصف نے BBC کے پروگرام میں اعتراف کیا کہ ان ہزاروں لوگوں کی شہادت کا ذمہ دار یہی نام نہاد مذاکراتی عمل تھا۔ نواز لیگ گلگت بلتستان کے عوام کے حقوق کو غصب کرنے کا اعلان کرچکی ہے جس کی واضح دلیل اقتصادی کوریڈور کے منصوبے میں گلگت بلتستان میں کسی بھی جگہ اقتصادی زون کو قائم نہ کرنے کا اعلان ہے۔

ایم ڈبلیو ایم کے سیکرٹری سیاسیات کا کہنا تھا کہ شریف برادران اور اس کی وفاقی کابینہ و صوبائی وزراء سانحہ ماڈل ٹاؤن میں 12 افراد کے قتل اور کئی مرد و خواتین کو زخمی کرنے کے ذمہ دار ہیں اور انسداد دہشت گردی کی دفعات کے تحت ان پر ایف آئی آر درج ہوئی ہے اور تاحال ریاستی جبر کے نتیجے میں ان کی گرفتاری عمل میں نہیں آئی اور نہ ہی ان لوگوں نے خود کو قانون کے سامنے پیش کیا ہے۔ سیاسی مخالفین کو کچلنے کیلئے نواز لیگ نے مخالف جماعتوں بالخصوص مجلس وحدت مسلمین کے کارکنوں اور رہنماؤں کے خلاف جھوٹی FIR درج کروائیں جس کی ایک مثال گلگت میں آزادی اظہار رائے کرنے والے اور پاک فوج کی حمایت اور جارح سعودی عرب کی یمن پر حملے کے خلاف نکالی جانیوالی ریلی کو بنیاد بناکر شرکاء ریلی کے خلاف انسداد دہشت گردی کے دفعات شامل کرکے ایف آئی آر درج کرانا ہے۔ نواز لیگ کے وزراء اور شریف خاندان کی کالعدم تکفیری گروہوں کیساتھ تعلقات کی ویڈیوز جاری ہو چکی ہیں یہی وجہ ہے کہ یہ تکفیری گروہ تمام اسلامی مکاتب فکر کے حامل افراد کا قتل عام کرتے پھر رہے ہیں، پنجاب سمیت ملک کے دیگر شہروں میں ان کو مکمل حکومتی حمایت حاصل ہے تاحال کسی بھی کالعدم گروہ کے سربراہ کو نیشنل ایکشن پلان کے تحت گرفتار نہیں کیا گیا اور لال مسجد کے خطیب اور ان کے طلباء طالبات کی جانب سے ریاست کے خلاف اعلانیہ بغاوت کے باوجود انہیں حکومتی سرپرستی حاصل ہے جبکہ ملک بھرمیں طالبان مخالف قوتوں کے خلاف کریک ڈاؤن جاری ہے۔

ایم ڈبلیو ایم کے رہنماوں کا کہنا تھاکہ یہ بات کھل کر سامنے آگئی ہے کہ الیکشن 2013 میں جس طرح دھاندلی کی گئی بالکل اسی طرح گلگت بلتستان میں بھی دھاندلی کا پروگرام ترتیب دیا گیا ہے جس کیلئے انہوں نے ایک ملازم کو نگران وزیر اعلیٰ بناکر ان کے ساتھ 12 وزراء پر مشتمل فوج ظفر موج کو ترتیب دیکر انتخابی نتائج پر اثر انداز ہونے کی بھرپور کوشش کی گئی۔ یہ سب کچھ کرنے کے باوجود انہیں تسلی نہ ہوئی تو ایک غیر مقامی لیگی متوالے کو گورنر کے عہدے پر تعینات کرکے گلگت بلتستان کے 20 لاکھ عوام کی توہین کی گئی۔ اس کے علاوہ انتخابی عملے کی تعیناتی میں بھی پارٹی وابستگی کا فائدہ اٹھایا جارہا ہے اور سیاسی رشوت کا بازار گرم ہے اور وزیر اعظم کے دور ے کے دوران جھوٹے اعلانات کے ذریعے عوام کو فریب دینے کی کوششیں کی گئی ہیں جو کہ انتخابی ضابطہ اخلاق کی خلاف ورزی اور براہ راست پری پول رگنگ کے زمرے میں آتی ہے، نواز لیگ کے وزراء گلگت بلتستان کو پاکستان کا آئینی حصہ ماننے پر تیار نہیں، اسی جماعت کے وزیر اطلاعات پرویز رشید نے گلگت بلتستان کو متنازعہ قرا ر دیا جس پر پارٹی قیادت کی جانب سے کوئی موقف سامنے نہیں آیا۔

ناصر عباس شیرازی کا کہنا تھا کہ مسلم لیگ کی علاقائی قیادت اور پیپلز پارٹی کی مقامی حکومت نے گندم سبسڈی تحریک کو ناکام بنانے کی ہر ممکن کوشش کی اور عوام کے بنیادی حقوق کو ملیامیٹ کرنے کیلئے کوئی کسر نہیں چھوڑی۔ مسلم لیگ کی مقامی قیادت نے تو گندم سبسڈی تحریک میں شامل گلگت بلتستان کے عوام کی جانب سے گندم کی بحالی اور آئینی حقوق کیلئے آواز بلند کرنے پر ایک خفیہ خط کے ذریعے گلگت بلتستان کے عوام کو انٹی سٹیٹ قرار دیا ہے۔ نواز لیگ نے گلگت بلتستان کیلئے کوئی پانچ سالہ یا طویل المدت منصوبہ نہیں تیار نہیں کیا ہے اور نہ ہی گلگت بلتستان کا خطہ ان کی ترجیحات میں شامل ہے۔ گلگت بلتستان میں موجود قدرتی وسائل کی لیز غیر مقامی افراد کو دیکر گلگت بلتستان کے عوام کے حقوق پر منظم ڈاکہ مارنے کی کوشش کی جارہی ہے اور مقامی کمپنیوں کوان قدرتی وسائل کے استفادے سے محروم رکھا جارہا ہے۔ گلگت بلتستان میں حالیہ الیکشن میں چن چن کر کرپٹ لوگوں کو ٹکٹ دینے کی ن لیگی پالیسی اس بات کی غماز ہے کہ شریف برادران گلگت بلتستان کو رائے ونڈ کی طرز کی سٹیٹ سمجھتے ہیں اور اس کو اپنی ذاتی مرضی کے مطابق چلاکر دہشت گردی اور لوٹ مار کا بازار گرم کرنا چاہ رہے ہیں۔ نون لیگ وفاق کی طرح گلگت بلتستان کے عوام کیلئے شدید خطرہ اور سیکورٹی رسک ہے۔

اپنی پریس کانفرنس میں ناصر عباس شیرازی کا کہنا تھ اکہ یہ چارج شیٹ صرف بنیادی ترین نکات پر مبنی ہے، ورنہ ضیاء الحق کی باقیات کی ملک کو کمزور کرنے کی سازشوں کی داستان بہت طویل ہے۔ ایم ڈبلیو ایم کا سیاسی سفر منفی سیاست کا راستہ روک کر مثبت شروعات شروع کرنے کیلئے ہے، آئندہ چند دنوں میں ایم ڈبلیو ایم کی سیاسی پالیسی، پانچ سالہ پلان کی تفصیلات اور اس خطے کو پاکستان کا مکمل باختیار صوبہ بناکر ترقی کی شاہراہ پر چلانے کیلئے طویل المدت منصوبے کا پلان پیش کیا جائیگا۔

وحدت نیوز (کراچی) ملیر میں بانی مجلس عزاء صولت حسین کی ٹارگٹ کلنگ کی مذمت کرتے ہیں۔ضلع ملیر کالعدم دہشتگرد جماعتوں کا شہر میں مضبوط گڑھ بنتا جا رہا ہے۔ ملیر میں شیعہ افراد کو دہشتگردی کانشانہ بنانے کا یہ چوتھا واقعہ ہے ۔ ملیرمیں موجود کالعدم دہشتگرد جماعتوں کو قانون نافذ کرنے والے اداروں میں موجود علاقائی افسران کی سر پرستی حاصل ہے ۔ان خیالات کا اظہارمجلس وحدت مسلمین ضلع ملیرکے سیکر ٹری جنرل احسن عباس رضوی نے ٹارگٹ کلنگ کا نشانہ بنے والے بانی مجلس عزاء و جلوس شہید صولت حسین کو دہشتگردی کا نشانہ بنانے کی شدید مذمت کرتے ہوئے اپنے بیان میں کیا، ان کا کہنا تھا کہ ملیرمیں شیعہ افراد کودہشتگردی کا نشانہ بنانے کا یہ چوتھاواقعہ ہے پورے شہر کی طرح ملیر میں بھی کالعدم دہشتگرد جماعتوں کی فعالیت بڑھتی جارہی ہے جس کے خلاف قانون نافذ کرنے والے ادارے پولیس و رینجرز کی جانب سے کوئی ایکشن نہیں لیا جارہا ہے، آپریشن کے باوجود شیعہ عمائدین ڈاکٹرز ،انجینئرز، پروفیسرز ،تاجروں بشمول مساجد امام بارگاہوں کے ٹرسٹیز ،بانیان مجالس و جلوس عزاء، ماتمی انجمنوں کے ذمہ داران کوہدف بنا کر آزادی سے دہشتگردی کا نشانہ بنایا جا رہا ہے۔ قانون نافذ کرنے والے اداروں کی جانب سے دہشتگردی کے ان واقعات کو روکنے اور مجرموں کی گرفتاری کیلئے کوئی پیش رفت نہیں کی گئی اور نہ ہی کسی دہشتگرد کو تاحال گرفتار کیا گیا، انہوں نے حکومت و آئی جی سندھ سے مطالبہ کیا کہ وہ علاقائی سطح پر تھانہ میں موجودچند کرپٹ آفسران کے خلاف کاروائی کریں جو اس علاقے میں موجود کالعدم جماعتوں اور ان کے زیر سر پرستی چلنے والے غیر قانونی مدارس کے خلاف کوئی کاروائی نہیں کررہے ،ملیر کے مختلف علاقوں میں کالعدم جماعتوں کی اشتعال انگیز وال چاکنگ بھی عوام کیلئے باعث تشویش ہے، بارہا پولیس حکام کو نشان دہی کے باوجود وال چاکنگ اور کالعدم جماعتوں کے پرچموں کے خلاف کوئی عملی اقدام نظر نہیں آیا، اعلیٰ حکام ملیر میں کالعدم جماعتوں اور مدارس کے خلاف فوری کاروائی کریں تاکہ علاقے میں فرقہ واریت کا خاتمہ ہو اور عوام کی جان و مال کاتحفظ یقینی بنایا جاسکے۔

وحدت نیوز (پشاور) جامع مسجد حیات آبادمیں ڈاکٹراحمدکے فرزندشہید مرتضی کے جنازے کے موقع پر مجلس وحدت مسلمین خیبر پختونخواکے صوبائی سیکریٹری جنرل علامہ سید سبطین الحسینی نے خطاب کرتے ہوئے کہا کہ پشاورمیں دوشیعہ عمائدین کے قتل کی شدیدمذمت کرتے ہیں،انصاف کی حکومت میں changeیہی ہے کہ دہشتگردوں کو کھلی چھٹی ہے،کسی ایک وعدہ پرعمل نہیں کیاجاتا،خودCMکہتے ہیں کہ میرے آرڈر پرعمل نہیں ہوتا،تحریک انصاف کی حکومت ملتِ تشیع کے جائزحقوق کے پاسداری میں مکمل ناکام ہوچکی ہے،پشاورہماری قتل گاہ بنی ہے اورصوبے کے دیگرعلاقوں میں بھی مسائل جوں کے توں ہیں،پشاورمیں اتنی شہادتوں کے باوجودآج تک کسی ایک قاتل کو نہ پکڑا گیانہ ہی کسی کوسزاہوئی جوکہ نہایت شرمناک ہے،البتہ دشمن کواوردشمنانِ دین ودیس کویہ سمجھناہوگاکہ ہم ہرصورت میں اپنے عقیدے سے محبت اوروطن سے دوستی کاعہدنبھاتے رہیں گے۔

وحدت نیوز (سکردو) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے گلگت بلتستان کے انتخابات کے سلسلے میں شگر بھر کا تفصیلی دورہ کیا۔ اس دورہ کے موقع پر ایم ڈبلیو ایم بلتستان شگر کے امیدوار فدا علی شگری اور دیگر علمائے کرام موجود تھے ۔اپنے دورہ کے دوران و ہ شگر کے علماء ، عمائدین، زعماء اور جوانوں سے ملاقات کی۔ ملاقات کے دوران آغا علی رضوی نے مجلس وحدت مسلمین کے انتخابات میں حصہ لینے کی وجوہات اورتنظیمی منشور پر گفتگو کرتے ہوئے کہا کہ مجلس وحدت پورے ملک میں مظلوموں کی حامی اور ظالموں کے مخالف جماعت ہے ۔ ہم نے ہمیشہ ہر ظلم کے خلاف صدائے حق بلند کرتے رہے ہیں اور عوامی حقوق کے لیے جدوجہد ہمارے لیے طرہ امتیاز ہے ۔ انہوں نے کہا کہ ملک بھر میں فرقہ واریت کو دفن کرکے اتحادو وحدت کی فضا قائم کرنے اور دہشتگردوں کے خلاف قیام کرنے میں مجلس وحدت سب سے آگے ہے۔ہم پاکستان کی نظریاتی سرحدوں کی حفاظت کرنے والی جماعت ہے اور دینی بنیادوں پر سیاست کرنے کے قائل ہیں۔ہم سیاست میں آکے میرٹ کو بحال کریں گے، عوامی مسائل کو ترجیحی بنیادون پر حل کریں گے، کسی کے ساتھ انصافی ہونے نہیں دیں گے۔

آغا علی رضوی کے دورہ شگر کے دوران ہر گاوں میں انکا پرتپاک اور پرجوش استقبال کیااور جگہ جگہ عوامی اجتماعات کا انعقاد بھی ہوا۔ اس موقع پر عوام نے آغا علی رضوی کا شکریہ بھی ادا کیا اور کہا کہ اگربلتستان میں کوئی ظلم کے خلاف حقیقی معنوں میں آواز بلند کرتا ہے تو وہ مجلس وحدت ہے اور عوامی حقوق کی باتیں مجلس وحدت مسلمین کے رہنماوں کی شایان شان ہیں ۔ وہ جماعتیں جنہوں نے گندم سبسڈی تحریک کے دوران عوام سے منہ سے آخری لقمہ چھینے کے لیے حکومت کے ساتھ دیں انہیں ووٹ مانگنے کا کوئی حق نہیں ہے۔انہوں نے آغا علی رضوی کو یقین دہانی کرائی کہ شگر میں جس طرح کا ایماندار اور دیانتدار امیدوار کو مجلس وحدت نے سامنے لایا ہے اس سے معلوم ہوتا ہے کہ یہ عملی کام کرنے والی جماعت ہے۔ انہوں نے کہا کہ جس طرح مجلس وحدت کی قیادت نے مشکل وقت میں عوام کا ساتھ اور عوام کے سڑکوں پر عوام کے درمیان سوتے رہے اور عوام سے وفا کی اس احسان کا سلسلہ انتخابات میں فتح کی صورت میں دیا جا ئے گا۔ ہم آغا علی رضوی اور اسکی جماعت کو کسی صورت مایوس نہیں کریں گے اور انکو ووٹ دینا ہم پر اخلاقی فرض ہے ۔ کوئی اور جماعت اب سونے کا لقمہ کھلانے کی بھی بات کریں ہم اپنے محسنوں کو کبھی نہیں بھولیں گے۔

وحدت نیوز (کراچی) مجلس وحدت مسلمین صوبہ سندھ کے رہنماعلامہ مختار امامی عالم کربلائی ،مولانا نشان حیدر ساجدی ،عبداللہ مطہری ،امتیاز علی بخاری ،نے کہا کہ گذشتہ روز سعودی عرب کے علاقے قطیف کی مسجد امام علی میں ہونے والی دہشت گردانہ کاروئی کی شدید مذمت کرتے ہیں اور سعودی حکمرانوں کو اس دہشت گردی کا ذمہ دار سمجھتے ہیں ، سعودی عرب کے اندر قطیف اور الاحساء سمیت عوامیہ کے شہریوں کو سعودی حکومت کی جانب سے بم دھماکے کا تحفہ صرف اس لئے دیا گیا کہ انہوں نے سعودی حکومت کی جانب سے بلا جواز گرفتار کئے گئے آیت اللہ باقر النمر کی رہائی کے لئے احتجاج کیا تھا ، تو کیا احتجاج کرنا جرم ہے؟ یا اس جرم کی سزا یہ ہے کہ مسجد میں خود کش دھماکہ ہی کروا دیا جائے۔ ہم تمام مسلم ممالک سے اپیل کرتے ہیں کہ سعودی حکومت جو اپنے ملک میں ایک چھوٹی سے مسجد کی سیکورٹی کرنے میں ناکام رہی ہے وہ اس سال حج کے انتظامات کس طرح فول پروف کر سکتی ہے تاہم حج کے انتظامات کے لئے تمام مسلم ممالک کو مشترکہ طور پر انتظامات کرنے دینے چاہئیں۔واضح رہے کہ گذشتہ روز سعود ی عرب میں مسجد امام علی میں ہونے والی دہشت گردانہ کاروائی اور پاکستان کی مساجد اور امام بارگاہوں میں ہونے والی دہشت گردانہ کاروائیوں میں مماثلت پائی جاتی ہے اور گذشتہ روز ہی پشاور میں دو شیعہ مسلمانوں کو بھی ٹارگٹ کلنگ کا نشانہ بنا کر شہید کیا گیا جو کہ واضح طور پر سعودی حمایت یافتہ دہشت گردوں کی کھلی کاروائی ہے۔

وحدت نیوز ( اسلام آباد) مجلس وحدت مسلمین کے مرکزی جنرل سیکریٹری علامہ راجہ ناصرعباس جعفری نے سعودی عرب کی مسجد امام علی ؑ میں خود کش بم حملے کی شدید مذمت کی جس میں پینتیس سے زائد نمازی جمعہ کی نماز کے دوران شہید کر دیے گئے۔انہوں نے کہا مساجد اور عبادت گاہوں کو نشانہ بنانے والے عناصرکے ہاتھ ہزاروں بے گناہ مسلمانوں کے خون سے تر ہیں،سعودیہ عرب میں بھی اہل تشیع نمازیوں پر پاکستانی طرز کے خودکش حملے باعث تشویش ہیں،سعودی حکومت نے اپنے سیاسی و اقتصادی مفادات کے حصول کے لیے عالم اسلام کو شدید خطرات سے دوچار کررکھا ہے۔ تکفیری گروہوں کی سعودی پشت پناہی ان کے حوصلے بلند کرنے میں لگی ہوئی ہے جو دنیا بھر میں دہشت کی علامت بن چکے ہیں۔

انہوں نے کہا کہ دہشت گردی کے خاتمے کی اولین شرط تکفیری سوچ کو شکست دینا ہے جس کی جڑوں کی آبیاری سعودیہ میں ہو رہی ہے اور شاخیں ساری دنیا میں پھیلی ہوئی ہیں۔ آج یمن کی مسجد میں بم دھماکہ اور پشاور میں جمعہ کی نماز پڑھ کر واپس آتے ہوئے شیعہ نوجوانوں کو شہید کر دینے کے المناک واقعہ کے پس پردہ تکفیری سوچ ہی کارفرما ہے۔ جب تک سعودی حکومت ان عناصر کی سرپرستی ترک نہیں کرتی تھی تب تک دنیا میں امن کا قیام ممکن نہیں۔انہوں نے اقوام عالم سے بالعموم اور امت مسلمہ سے بالخصوص  مطالبہ کیا کہ وہ عالمی امن وامان کے قیام اور دنیا بھر کے مسلمانوں کی جان و مال کے تحفظ کو یقینی بنانے کے لیے سعودی حکومت پر دباو ڈالے کہ وہ ان عناصر کی معاونت ترک کرے جو اسلام کے نام پر قتل و غارت کے مرتکب ہو کر دنیا بھر میں مسلمانوں کی بدنامی کا باعث بن رہے ہیں۔