The Latest
وحدت نیوز (اسلام آباد) مرکزی سیکریٹریٹ سے جاری مشترکہ بیان میں مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری، سندھ کے سیکریٹری جنرل علامہ مقصودڈومکی،پنجاب کے سیکرٹری جنرل علامہ مبارک علی موسوی،گلگت بلتستان کے سیکریٹری جنرل علامہ سید علی رضوی، بلوچستان کے سیکریٹری جنرل علامہ برکت مطہری اور خیبر پختونخوا کے سیکریٹری جنرل علامہ اقبال بہشتی نے سہیون شریف میں حضرت لعل شہباز قلندرؒ کی مزار پر خودکش دھماکے کی شدید الفاظ میں مذمت کرتے ہوئے کہا ہے کہ دہشتگردوں نے پاکستانی عوام پر جنگ مسلط کرنے کا اعلان کر دیا ہے، انہوں نے سانحہ سہون کے خلاف کل ملک گیر یوم سوگ اور سندھ بھر میں پرامن ہڑتال کا اعلان کیا ہے۔
اپنے مذمتی بیان میں ایم ڈبلیو ایم کے مرکزی رہنماو ں نے کہا کہ صوفیوں اور اولیااللہ کی سرزمین کو خاک و خون میں نہلانے والے صفاک دہشتگرد کسی رعایت کے مستحق نہیں۔انہوں نے کہا کہ حکمران دہشتگردوں کے سیاسی و مذہبی سرپرستوں کے دباو کو مسترد کرتے ہوئے اس ناسور کیخلاف بے رحمانہ آپریشن کا اعلان کرے، نیشنل ایکشن پلان پر حقیقی معنوں میں عملدرآمد کو یقینی بنایا جائے۔
انہوں نے کہا کہ حکمرانوں کو جاگنے کے لئے مزید کتنے معصوم پاکستانیوں کے خون درکار ہیں، حکمران،افواج پاکستان اور عوام مل کر ان درندہ صفت تکفیری دہشتگردوں کا مقابلہ کرے، ان دہشتگردوں کی سرپرستی سی پیک کے دشمن ممالک کر رہے ہیں، ہمیں اپنی ماضی کی پالیسیوں پر نظرثانی کرتے ہوئے،پاکستان کے مستقبل کا سوچنا ہو گا۔انہوں نے کہا کہ دہشت گردوں کی کاروائیاں ملکی سلامتی و استحکام کے لیے خطرناک صورت اختیار کر چکی ہیں، ان تکفیری دہشتگرد گروہوں کا خاتمہ ملکی سلامتی و امن کے لیے انتہائی ضروری ہے، دہشت گردی کا خاتمہ حکومت کے محض بلند و بانگ دعووں سے نہیں ہو گا اس کے لیے سیاسی مصلحتوں سے بالاتر ہو کر فیصلہ کن اقدامات کرنے ہوں گے۔
انہوں نے کہا کہ کالعدم مذہبی جماعتوں اور سہولت کاروں کے لیے حکمران جماعت کا نرم گوشہ ملک میں دہشت گردی کا ایک واضح سبب ہے۔ انہوں نے کہا کہ دہشت گردی کی حالیہ کارروائی کو اگر عالمی تناظر میں دیکھا جائے تو یہ پاک چائنا اقتصادی راہدری منصوبے کے خلاف بھی سازش ہے، امریکہ ،بھارت اور کچھ خلیجی ریاستیں پاکستان کو مستحکم نہیں دیکھنا چاہتیں اور سی پیک کے خلاف سازشوں میں مصروف ہیں، پاکستان کے امن کو خراب کر کے پاکستان کو ایک غیر محفوظ ریاست ثابت کرنے کی مذموم کوشش کی جا رہی ہے، اس کوشش کو ناکام بنانے کا واحد حل دہشت گرد عناصر اور سہولت کاروں کے خلاف بھرپور کارروائی ہے۔
انہوں نے مطالبہ کیا کہ ملک بھر میں کالعدم مذہبی جماعتوں کے خلاف فوری آپریشن کیا جائے، رکاوٹ بننے والے عناصر کے خلاف بھی کاروائی کی جائے۔ مرکزی ترجمان علامہ مختار امامی نے تین روزہ ملک گیر یوم سوگ اور کل سندھ بھر میں پرامن ہڑتال کا اعلان کیا ہے، جمعیت علمائے پاکستان، آل پاکستان سنی تحریک، پاکستان عوامی تحریک و دیگر سیاسی و مذہبی جماعتوں نے ایم ڈبلیو ایم کی پرامن ہڑتال کی حمایت کا اعلان کر دیا ہے۔
وحدت نیوز (لاہور) مجلس وحدت مسلمین پنجاب کے سیکرٹری جنرل علامہ مبارک موسوی نے آج بعد از نماز جمعہ پنجاب بھر میں لاہور،کوئٹہ،پشاور میں دہشتگردوں کی بربریت اور آزادکشمیر میں ایم ڈبلیوایم کے سیکرٹری جنرل علامہ تصور جوادی اور ان کی اہلیہ پر قاتلانہ حملے کیخلاف احتجاج کا اعلان کیا ہے،لاہور میں اسلام پورہ جامع مسجد سے چوک نیلی بار تک احتجاجی ریلی نکالی جائے گی،علامہ مبارک موسوی نے صوبائی سیکرٹریٹ میں ہنگامی اجلاس سے خطاب کرتے ہوئے کہا کہ بدنام زمانہ داعشی تکفیری دہشتگردوں کیخلاف بے رحمانہ کاروائی کے بغیر ملک میں امن کا قیام ممکن نہیں،پاکستان میں داعش کے وجود سے انکار کرنے والے لوگ دراصل عوام کے آنکھوں میں دھول جھونک رہے ہیں،دہشتگردوں کے ہمدرد فوجی عدالتوں کو متنازعہ بنانے کی سازش کر رہے ہیں ،حکمران فوجی عدالتوں سے سزا یافتہ دہشتگردوں کو سزائیں دینے میں کیوں تاخیری حربے استعمال کر رہے ہیں،مزید کتنے معصوم انسانوں کے ان درندوں کے ہاتھوںخون سے ہولی کھیلنے کے منتظر ہیں؟علامہ تصور جوادی پر حملہ کرنے والے دہشتگردوں کو گرفتار کرنے میں آزاد کشمیر کی انتظامیہ ناکام ہو چکی ہے،آزاد کشمیر کے پرامن وادی پر وار کرنے والے دہشتگردوں کی گرفتار تک ہم اپنا احتجاجی تحریک جاری رکھیں گے۔
وحدت نیوز (مظفرآباد) مجلس وحدت مسلمین پاکستان کے سربراہ علامہ راجہ ناصرعباس جعفری سیکرٹری جنرل ایم ڈبلیو ایم آزاد کشمیر علامہ تصور جوادی اور ان کی اہلیہ کی عیادت کے لئے آزاد کشمیر سی ایم ایچ پہنچے ان کے ہمراہ مرکزی سیکرٹری سیاسیات سید اسد عباس نقوی و دیگر رہنما بھی موجود تھے،انہوں نے سی ایم ایچ میں علامہ تصور جوادی اور ان کی اہلیہ کی عیادت کے بعد برہان وانی شہید چوک پر جاری احتجاجی دھرنے سے خطاب کرتے ہوئے کہا کہ علامہ تصور جوادی پر حملہ ریاست آزاد جموں و کشمیر پر حملہ ہے ،بھارت کے پے رول پر کام کرنے والے کالعدم دہشتگردوں کیخلاف حکمرانوں کی خاموشی لمحہ فکریہ ہے،کل بروز جمعہ ملک بھر میں علامہ تصور جوادی پر قاتلانہ حملہ لاہور کوئٹہ اورپشاور میں دہشتگردی کیخلاف احتجاجی مظاہرے ہونگے،آزاد کشمیر میں علامہ تصور جوادی اتحاد امت کے داعی اور تحریک آزادی کشمیر کے مخلص رہنما ہیں،حکومت اس المناک واقعے کا سنجیدگی سے نوٹس لیں اور ان ملک دشمن تکفیری دہشتگردوں کیخلاف کاروائی کریں،پاکستانی مظلوم عوام ہمارے نااہل حکمرانوں اور ریاستی اداروں کے گذشتہ ادوار کے غلط پالیسیوں کا خمیازہ بھگت رہی ہیں،ملکی سلامتی و بقا کو مستحکم بنانے کے لئے ہمیں ماضی کے غلط فیصلوں پر نظر ثانی کرنا ہوگا۔ہم جناح اور اقبال کے پر امن پاکستان کو مٹھی بھر تکفیری شرپسندوں کے ہاتھوں یرغمال نہیں بننے دینگے۔دہشتگردی کیخلاف جنگ کو منطقی انجام تک پہنچانے اور نیشنل ایکشن پلان پر عملدرآمد کو یقینی بنانے میں حکمران دہشتگردوں کے سیاسیاسی سرپرستوں کے دباو میں ہے۔دھرنے سے سرینگرمقبوضہ ریاست جموں و کشمیرسے حریت رہنما جناب سلیم گیلانی نے بھی ٹیلی فونک خطاب کیا ۔
انہوں نے علامہ تصور جوادی سیکرٹری جنرل ایم ڈبلیوایم پر قاتلانہ حملے کی شدید الفاظ میں مذمت کرتے ہوئے کہا کہ علامہ تصوری جوادی اور مجلس وحدت مسلمین نے ہمیشہ اتحاد امت اور پاکستان میں مظلومین کا ساتھ دیا،آزادی کشمیر میں مظلوم کشمیریوں کی حق میں علامہ جوادی ہمیشہ آواز بلند کرتے رہے،ہم مقبوضہ کشمیر سری نگر کے عوام کا مطالبہ ہے کہ علامہ جوادی اور انکی اہلیہ پر حملہ کرنے والے دہشتگردوں کو کیفر کردارتک پہنچایا جائے۔علامہ تصور جوادی کووزیر اعظم آزاد کشمیر کی ہدایت پر گزشتہ روز ہیلی کاپٹر کے ذریعے مظفرآباد سے سی ایم ایچ راولپنڈ ی میں منتقل کیا گیا ہے جہاں وہ انتہائی نگہداشت وارڈ میں زیر علاج ہیں۔
وحدت نیوز(مظفرآباد) مجلس وحدت مسلمین آزاد جموں وکشمیر کے سیکریٹری جنرل داعی اتحاد بین المسلمین علامہ سید تصور حسین نقوی الجوادی کو ایئرایمبولینس کے ذریعے سی ایم ایچ مظفر آباد سے سی ایم ایچ راولپنڈی منتقل کردیا گیا ہے، ایم ڈبلیوایم آزاد جموں وکشمیر کے ترجمان مولانا حمید نقوی نے ’’وحدت نیوز‘‘سے ٹیلیفونک گفتگو کرتے ہوئےکہا کہ علامہ تصور جوادی کو میڈیکل بورڈ کے متفقہ فیصلے کے بعد آزاد جموں کشمیر حکومت کی جانب سے فراہم کردہ ایئرایمبولینس کے ذریعے سی ایم ایچ راولپنڈی منتقل کردیا گیا ہے ،جہاں ڈاکٹرزنے ان کا خصوصی معائنہ بھی کیا ہے اور ان کی حالت کوخطرےسے باہر قرار دیا ہے ، گوکہ علامہ تصورجوادی تاحال بے ہوش ہیں ، علامہ تصور جوادی کے ہمراہ ایم ڈبلیوایم آزاد جموں وکشمیر کے ڈپٹی سیکریٹری جنرل طالب ہمدانی ، لواحقین اور چند تنظیمی احباب بھی راولپنڈی پہنچے ہیں ، حمید نقوی نے مطابق علامہ تصور حسین جوادی کی اہلیہ محترمہ سی ایم ایچ مظفر آباد میں ہی زیر علاج ہیں جبکہ ان کی حالت بھی الحمد اللہ خطرے سے مکمل باہر ہے ۔
وحدت نیوز (امریکہ) علامہ تصور جوادی پر قاتلانہ حملہ پاکستان کو فرقہ واریت کی دلدل میں دھکیلنے اور جہاد کشمیر کے خلاف سازش کا نتیجہ ہے،حکومت و سیکیورٹی ایجنسیاں دہشت گردوں کو گرفتار کر کے کیفر کردار تک پہنچائیں،ان خیالات کا اظہار مجلس وحدت مسلمین کے ڈپٹی سیکرٹری خارجہ امور و چیئر مین المصطفے فاونڈیشن نارتھ امریکہ علامہ سید ظہیر الحسن نقوی نے اپنے خصوصی پیغام میں کیا ،علامہ سید ظہیر الحسن نے مزید کہا کہ اس وقت پوری دنیا مسئلہ کشمیر کی طرف متوجہ ہے ،آزاد کشمیر میں تکفیری عناصر کا گھسنا اور فرقہ واریت و دہشت گردی کا جن بوتل سے باہر نکالنا پاکستان کی جڑوں کو کھوکھلا کرنے اور پاکستان دشمن قوتوں کی خدمت کے مترادف ہے،حکومت و ایجنسیاں تمام تر وسائل کو بروئے کار لائیں اور اس سازش کے پس پردہ عناصر کو بے نقاب کریں اور عبرتناک انجام تک پہنچائیں،ورنہ حالات ان کے کنٹرول سے باہر ہو جائیں گے جو ملکی سلامتی کیلئے خطرناک ثابت ہو سکتا ہے۔
وحدت نیوز (کھرمنگ) مجلس وحدت مسلمین ضلع کھرمنگ کے رہنما علامہ شیخ اکبر رجائی نے کہا کہ علامہ تصور حسین جوادی پر حملہ بزدل دہشت گرد عناصر کی ذلیل کاروائیوں کا تسلسل ہے جس کی جتنی بھی مذمت کی جائے کم ہے۔ سکیورٹی اداروں کی کارکردگی اور دہشت گردوں کے خلاف آپریشن ڈرامے ثابت ہوگئے۔ روز روشن میں ایک مبلغ دین اور داعی امن عالم پر حملہ کئی شکوک و شبہات کو جنم دے رہی ہے۔ ملکی میڈیا کا اس بارے میں شرمناک کردار ہے۔ پشاور میں ایک ڈرائیور پر حملے پر بار بار بریکنگ نیوز دینے والے ایک عالم دین اور اتحاد بین المسلمین کیلئے زندگی صرف کرنے والے پر حملے پر مجرمانہ خاموشی اختیار کئے ہوئے ہیں۔ ہم ملکی اداروں کی ناکامی و نا اہلی پر انکو ملامت اور سرزنش کرتے ہیں اور مطالبہ کرتے ہیں کہ بار بار دہشت گردوں کی کمر توڑ دینے کے دعوئے اب ہوائی ثابت ہونے کے بعد ملک کی بقا چاہتے ہیں تو مستقل بنیادوں پر راہ حل کا تعین کریں۔شیخ اکبر رجائی نے مزید کہا کہ افسوس کا مقام ہے ہمارے حکمران اپنی کرپشن چھپانے کیلئے اخبارات کے صفحے کالے کرکے سمجھتے ہیں کہ وہ اچھی حکمرانی کا حق ادا کر رہے ہیں،لیکن یہ یاد نہیں رکھتے کہ انکی ذمہ داری ملک کے شہریوں کی جان و مال کی حفاظت بھی ہے، جس سے حکمران بری طرح ناکام رہے ہیں۔
وحدت نیوز (خیرپور) ایم ڈبلیو ایم خیرپور کی طرف سے عظمت سیدہ فاطمۃ الزہراء ؑ کانفرنس کے حوالے سے ضلع خیرپور میں مختلف یونٹس کے دورہ جات اور ضلعی کابینہ کا اجلاس ہوا۔ اس موقع پر مجلس وحدت مسلمین صوبہ سندہ کے سیکریٹری جنرل علامہ مقصود علی ڈومکی نے خیرپور میں ضلعی کابینہ سے میٹنگ کی۔خیرپور میں ایم ڈبلیو ایم کی ضلعی کابینہ کا اہم اجلاس ضلعی سیکریٹری جنرل علامہ احمد علی طاہری کی زیر صدارت منعقد ہوا ۔
اجلاس سے خطاب کرتے ہوئے علامہ مقصود علی ڈومکی نے کہا کہ کشمیر کے مجاہد عالم دین علامہ سید تصور جوادی اور ان کی اہلیہ محترمہ پر قاتلانہ حملہ انتہائی قابل مذمت اور شرمناک عمل ہے ،پورا ملک دہشت گردی کی آگ میں جل رہا ہے جبکہ حکمران دہشت گردی کے خاتمہ کے لیے سنجیدہ کوششوں کی بجائے انہیں تحفظ دینے کے لئے مصروف عمل ہیں ۔ انہوں نے سندہ کے عوام سے اپیل کی کہ وہ اتحاد بین المسلمین کے داعی مبارز عالم دین علامہ سید تصور جوادی کی صحتیابی کے لئے جمعرات 16 فروری کو یوم دعا کے طور پر منائیں۔
انہوں نے کہا کہ عظمت سیدہ فاطمہ الزہراء ؑ کانفرنس سندہ کی تاریخ کا عظیم الشان اجتماع ہوگا ۔ریاست خیرپور عاشقان اہلبیت ؑ اور حسینیوں ؑ کے لئے مرکزیت کی حامل رہی ہے جہاں ایک سازش کے تحت دہشت گرد تکفیری گروہ کو لانے کی ناپاک کوشش کی گئی۔ انہوں نے کہا کہ حالیہ دنوں میں سندہ کے مختلف اضلاع سے دھشت گردوں کا جو گروہ گرفتار ہوا ہے ان کے سنسنی خیز انکشافات کی روشنی میں دہشت گردوں کے خلاف آپریشن کیا جائے۔
وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری بیان میں علامہ تصور جوادی مجلس وحدت مسلمین آزاد کشمیر کے سیکریٹری جنرل پر قاتلانہ حملے کی شدید الفاظ میں مذمت کی گئی ہے، مجلس وحدت مسلمین کے رکن بلوچستان اسمبلی آغا رضانے اپنے بیان میں کہا ہے کہ پاراچنار،پنجاب،سندھ اور آزاد کشمیر کی پرامن وادی میں دہشتگردی کی حالیہ لہر کا سبب ریاستی اداروں کی جانب سے تکفیری دہشتگردوں کیخلاف نرم رویہ کا روا رکھنا ہے،را کے ایجنٹس ملک میں بدامنی پھیلا کر دنیا میں پاکستان کو جنگ زدہ ریاست کے طور پر متعارف کرانے کی سازش کر رہے ہیں،نیشنل ایکشن پلان کو متنازعہ بنانے میں دہشتگردوں کے سیاسی سرپرست کامیاب ہو چکے ہیں،علامہ تصور جواد ی آزاد کشمیر میں اتحاد امت کے داعی اور ملک دشمنوں کیخلاف متحرک رہنما تھے،ان پر حملہ آزادی کشمیر کے جدو جہد پر حملہ ہے،اور اس حملے میں وہی کالعدم دہشتگرد ملوث ہیں جن کو را کی سرپرستی حاصل ہے۔
انہوں نے کہا کہ فوجی عدالتوں سے سزا یافتہ دہشتگردوں کی سزاوں پر عملدر آمد روک کر نا اہل حکمرانوں نے دہشتگردوں کی حوصلہ افزائی کی ہے،دہشتگردی کیخلاف جنگ کو سیاسی قیادتوں نے مصلحت پسندی کی نذر کرکے ملک و قوم کیساتھ سنگین خیانت کی ہے،ملک بھر میں دہشگردوں کی نرسری کالعدم جماعت کے لوگ ان کے سہولت کار اور سیاسی سرپرست آزاد ہیں،نیشنل ایکشن پلان کے نام پر دہشتگرد مخالف قوتوں کو ملک کے طول وعرض میں نشانہ بنایا جا رہا ہے،پاک چائنہ اقتصادی راہ داری کو اسلام کیخلاف سازش قرار دینے والے ملاؤں کیخلاف حکومتی و ریاستی اداروں کی خاموشی اس بات کی غمازی ہے کہ دہشتگردوں کے سیاسی سرپرستوں کے سامنے تمام ادارے بے بس ہیں،عوام کی جان ومال کے تحفظ میں حکمران ناکام ہو چکے ہیں،حکمران اور ریاستی ادارے ہوش کے ناخن لیں اور غیرریاستی عناصر کیخلاف فوری بے رحمانہ آپریشن کا اعلان کرے بصورت دیگر یہ دہشتگردی کا ناسور سب کچھ ختم کر کے رکھ دے گا،بیان میں مزید کہا گیاکہ علامہ تصور جوادی اور انکی اہلیہ پر قاتلانہ، لاہور مال روڈ خودکش حملہ، ساہیوال میں ڈاکٹرقاسم علی تنویر کی شہادت، حیات آباد پشاور میں ہونے والی بربریت،کراچی و کوئٹہ میں آئے روز شیعہ ٹارگٹ کلنگ اورملک میں سیکیورٹی اداروں کی واضح ناکامی کے خلاف بعداز نماز جمعہ یوم احتجاج کا اعلان کرتے ہیں۔
وحدت نیوز(سکردو) مجلس وحدت مسلمین کے رہنماوٗں مولانا فدا علی ذیشان اور مولانا ذولفقار عزیزی نے گزشتہ روز لاھور اور کوئٹہ میں ہونے والی بدترین دہشتگردی کے واقعات اور ایم ڈبلیوایم آزاد جموں کشمیر کے سیکریٹری جنرل علامہ تصور حسین جوادی اور ان کی اہلیہ پر قاتلانہ حملے کی پرزور مذمت کرتے ہوئے کہا کہ ان بزدلانہ حرکتوں کی تکرار سے ثابت ہوا کہ حکومت ملک میں امن و امان قائم کرنے اور پر امن شہریوں کی حفاظت میں بری طرح ناکام ہوچکے ہیں۔ آپریشن ضرب عضب کی کامیابیوں کے دعوئے بھی غلط ثابت ہوئے ، کیونکہ حکمرانوں نے بارہا دعویٰ کیا کہ اب دہشت گردوں کی کمر ہی توڑ دی ہے۔ لیکن ملک کے طول وعرض میں یہی نابکار گروہ مختلف ناموں سے نہتے شہریوں کو خاک و خون میں غلطاں کرکے ثابت کررہے ہیں کہ وہ ریاست کے اندر ٹوٹی کمر کیساتھ بھی جب چاہے جہاں چاہے اپنی بزدلانہ حرکتیں کرنے میں کوئی مانع محسوس نہیں کرتے۔ انہوں نے پولیس افسران اور شہریوں کی شہادت پر افسوس کا اظہار ک کیا اور زخمیوں کی جلد صحت یابی کیلئے دعا کی۔
مجلس وحدت کے رہنماوٗں نے مزید کہا کہ ان سب مجرمانہ حرکتوں کی وجوہات ، مجرموں کو قرار واقعی سزا دینے کی بجائے مختلف حربوں کے ذریعے گروہ در گروہ انکو چھوٹ دینا،کالعدم جماعتوں کے دہشت گردوں کو جیلوں سے بھاگنے دینا،کئی مقدمات اور پابندیوں کے باوجود وفاقی وزیر داخلہ تک کا انکو پروٹوکول دیکر ملاقاتیں کرنا، اور انکے برخلاف پر امن اور ملک کیلئے قربانیاں دینے والوں کو شیڈول فورمیں ڈال کر اور ریاستی ایجنسیوں کیطرفسے باربار تنگ کرکے انکو بدنام کرنے کی روش ہے۔ لہٰذا حکمرانوں کو چاہئے کہ ملک عزیز کی سلامتی اورپر امن شہریوں کے جان و مال کی حفاظت کیلئے تمام مجرمانہ سرگرمیوں میں ملوث تنظیموں اور انکی پشت پناہی کرنیوالے مدارس، اداروں اور شخصیات کو لگام دینے میںقانون نافذ کرنیوالے اداروں کو پابند کریں۔ قتل و دہشت گردی میں ملوث افراد کو پھانسی پر چڑھائیں اور ان کو چھوٹ دینے میں کسی قسم کی دباوٗ کو رد کریں۔
وحدت نیوز (ميرپورخاص) مجلس وحدت مسلمین کے ضلعی رہنما سید بشیر شاہ نقوی نے آزاد کشمیر مجلس وحدت مسلمین کے رہنما علامہ تصور جواد پر قاتلانہ حملے،لاہور، کوئٹہ اور پشار خودکش حملوں کی شدید الفاظ میں مذمت کی ہے اور کہا ہے کہ دھشت گرد پاکستان میں امن پسند قوتوں کو اپنے بارود سے ختم کرنے پر تلے ہوئے ہیں۔ مجلس وحدت مسلمین اور اہل تشیع کمیونٹی دھشت گردی کا شکار تھی ہمارے بار بار توجہ دلانے کے باوجود اداروں نے کاروائی نہیں کی جسکاخمیازہ لاہور، کوئٹہ اور پشاور میں معصوم جانوں کو بھگتنا پڑا۔ دھشت گردی اپنا انتہاپسندانہ نظریہ بارود کی طاقت سے نافذ کرنا چاہتے ہیں اور پاکستان کی گلیوں میں خون کی ہولی کھیلنا چاہتے ہیں۔ مجلس وحدت مسلمین دھشت گردوں کے خلاف پوری قوم کو متحد ہونے کی دعوت دیتی ہے۔ اداروں کو اب کالعدم تنظیموں اور دھشت گردوں کے سہولت کاروں کے خلاف حتمی فیصلہ کرنا ہوگا۔
