The Latest
وحدت نیوز(کراچی ) مجلس وحدت مسلمین پاکستان صوبہ سندھ کے سیکرٹری جنرل علامہ مقصود علی ڈومکی نے کہا ہے کہ نیشنل ایکشن پلان سے مطلوبہ نتائج اور فیصلہ کن اہداف تب ہی حاصل ہو سکیں گے جب اس قانوں کو سیاسی ضرورتوں سے بالاتر ہو کر صرف اور صرف دہشت گرد قوتوں کے خلاف استعمال کیا جائے گا۔اگر اس قانون کو انتقامی حربے کے طور پر استعمال کیا گیا تو بہت جلد اس کی افادیت زائل ہو جائے گی، ایس ایس پی خیر پور کی جانب سے نیاگوٹھ میں جشن عید غدیر ریلی پر پابندی قابل مذمت ہے، وزیر اعلیٰ سندھ اورآئی جی سندھ اس متعصبانہ طرز عمل کا نوٹس لیں، کراچی سمیت ملک کے دیگر صوبوں میں جہاں جہاں فوج کی نگرانی میں آپریشن جاری ہیں وہاں وہاں حوصلہ افزا کامیابیاں ہو رہی ہیں لیکن سند ھ کے مختلف اضلاع میں نیشنل ایکشن پلان پر عمل درآمد کی آڑ میں بیلنس پالیسی زور پکڑتی ہوئی دکھائی دے رہی ہے۔حکومت سندھ دہشت گردوں کے سرپرستوں کو خوش کرنے کے لیے ملت تشیع کے محب وطن گناہ افراد کو گرفتا ر کرنے میں مصروف ہے جو سراسر زیادتی اور سندھ میں دانستہ طور پر فرقہ واریت پھیلانے کی ایک منظم سازش ہے۔محرم سے قبل ملت تشیع کے افراد کو ہراساں کرنے کی کوشش کی جا رہی ہے تا کہ عزاداری کو محدود کیا جا سکے۔انہوں نے کہا کہ عزاداری سید الشہدا کی راہ میں کسی قسم کی رکاوٹ کو برداشت نہیں کیا جائے گا۔ہم ملک میں قانون کی بالادستی چاہتے ہیں لیکن قانون پر عمل درآمد کے نام پر کسی غیر منصفانہ طرز عمل کو قبول نہیں کیا جائے گا۔
وحدت نیوز(مظفرآباد) یوم اعلان ولایت امیر المؤمنین حضرت علی ؑ یوم تکمیل دین ہے۔ یوم غدیر وہ دن ہے کہ جب پیغمبر ؐاسلام نے صحابہ کرام ؓو حجاج ؒاسلام کے مجمع میں خم کے مقام پر حضرت علی ؑ کی ولایت کا اعلان فرمایا۔ پیغمبر اسلام کی یوں ہر بات تابع وحی ہوتی ہے لیکن اس روز خصوصی طور پر ’’اے رسول پہنچا دو وہ پیغام جو آپ ؐ کے رب کی طرف سے آپ پر نازل کیا جا چکا‘‘ سورہ مائدہ کی آیت نازل ہوئی اور پیغمبر اسلام نے ان تمام حجاج کرام جو پیچھے رہ گئے ، ان کے پہنچنے اور جو آگے چلے گئے ان کی واپسی کا انتظار فرمایا۔ اور سب کے جمع ہونے پر آپ نے حضرت علی ؑ کی ولایت کا اعلان ان الفاظ میں فرمایا’’من کنت مولاہ فھذا علی فولاہ‘‘ کہ جس جس کا میں مولا ہوں اس اس کا یہ علی مولا ہے۔ ان خیالات کا اظہار علامہ سید تصور حسین نقوی الجوادی سیکرٹری جنرل مجلس وحدت مسلمین پاکستان آزاد کشمیر نے جشن غدیر کی تقریب سے خطاب کرتے ہوئے کیا ۔
انہوں نے کہا کہ اس واقع کو عالم اسلام کے تقریباً تمام آئمہ حدیث و مورخین نے رقم کیا ہے،جسے جھٹلایا نہیں جاسکتا اعلان ولایت کے بعد جملہ صحابہ کرام رضوان اللہ تعالیٰ علیھم نے بحکم رسول ؐ حضرت علی کے خیمہ میں جا کر’’ اے ابوطالب کے بیٹے مبارک ہو مبارک ہو آج سے آپ ہمارے اور ہر مسلم و مسلمہ کے مولا ہوئے‘‘یہ کہہ کر مبارکباد دی۔اس کے بعد آیت نازل ہوئی کہ آج کے دن دین مکمل ہوا ۔ انہوں نے بطور پیغام کہا کہ ولایت حضرت علی علیہ السلام عالم اسلام کے لیے ضابطہ زندگی ہے، نجات کا راستہ ہے ۔ ولایت کی اس رسی کو پکڑتے ہوئے انسان خدا اور اس کے رسول ؐ کا تقرب حاصل کر سکتا ہے۔ عالم اسلام کی مشکلات کا حل ولایت امیر المومنین علیہ السلام کی پیروی میں ہے۔
وحدت نیوز(شکارپور) مجلس وحدت مسلمین پاکستان صوبہ سندہ کے زیر اہتمام کربلا معلیٰ امام بارگاہ شکارپور میں (تحفظ عزاداری و پیغام کربلا کانفرنس) منعقد ہوئی۔ کانفرنس کے مہمان خاص رکن شورائے عالی علامہ محمد امین شہیدی تھے جبکہ کانفرنس کی صدارت صوبائی سیکریٹری جنرل علامہ مقصود علی ڈومکی نے کی۔ کانفرنس میں مدرسہ جوادیہ کے پرنسپل اور شہداء کمیٹی شکارپور کے وائس چئیرمین علامہ عبدالمجید بہشتی، سیاسی کونسل کے رکن مولانا پہلوان علی سنگھڑ، MWM کے رہنماء علامہ احمد علی طاہری، علامہ محمد نقی حیدری، مولانا محمد علی شر، مولانا معشوق علی قمی، مولانا سکندر علی دل، وارثان شہداء قمر دین شیخ ، برادر تنظیموں کے نمائندے، ماتمی انجمنوں کے رہنماء و دیگر شریک تھے۔
اس موقع پر خطاب کرتے ہوئے علامہ مقصودعلی ڈومکی نے کہا کہ دہشت گردوں نے اب سرزمین سندہ کا رخ کیا ہے۔ شکارپور اور جیکب آباد کے سانحات، شہداد کوٹ اور خیرپور سمیت سندہ بھرمیں دھشت گردوں کے تربیتی مراکز اور سہولت کار حکومت اور ریاستی اداروں کی مجرمانہ غفلت کی نشاندہی کرتے ہیں۔ ان حالات میں ملت کی نمائندہ جماعت مجلس وحدت مسلمین نے ملت کی ذمہ دار شخصیات، علمائے کرام، خانوادہ شہداء، قومی تنظیموں کے نمائندگان ،ماتمی انجمنوں اور نوحہ خوانوں سے قومی صورتحال پر مشاورت کے حوالے سے اہم اجلاس بلایا ہے ، صوبائی سطح پر تحفظ عزاداری اور پیغام کربلا کانفرنس ۲۵ستمبر کوحیدر آباد میں منعقد کی جارہی ہے ، جس میں علمائے کرام ، ماتمی انجمنیں اور برادر تنظیمیں شریک ہوں گے۔
وحدت نیوز(لاہور) مجلس وحدت مسلمین یوتھ ونگ ضلع لاہورکے زیر اہتمام یوم دفاع کے مناسبت سے کرکٹ ٹورنامنٹ کا نعقاد کیا گیا جس میں ضلع بھر سے آٹھ ٹاوئنز کی ٹیموں نے حصہ لیا ،باری سٹوڈیو ارینا سپورٹس کمپلکس میں ٹورنامنٹ کا افتتاح مجلس وحدت مسلمین یوتھ کے مرکزی سیکرٹری ڈاکٹر یونس حیدری کیا،بڑی تعداد میں شہری میچیز سے لطف اندوز ہوتے رہے،اس موقع پر ڈاکٹر یونس حیدری سیکرٹری یوتھ مجلس وحدت مسلمین پاکستان کا کہنا تھا کہ نوجوانوں میں غیر نصابی سرگرمیوں کو مثبت انداز میں آگے بڑھانے کے لئے ہم نے ملک بھر میں یوتھ کے لئے مختلف پروگرامز مرتب کئے ہیں ،تاکہ نوجوانوںکو جذبہ حب الوطنی کیساتھ اپنی صلاحیتوں کو اچھے انداز میں اجاگر کرنے کا موقع میسر آسکے،کراچی اور لاہور میں کرکٹ ٹورنامنٹ کا آغاز اسی سلسلے کی ایک کڑی ہے،انشااللہ اسی طرح ہم دیگر قومی دن کے مواقع پر بھی نوجوانوں میںمثبت اور تعمیری سرگرمیوں کو فروغ دینے کے لئے پروگرامز ترتیب دے رہے ہیں،کرکٹ ٹورنامنٹ میں فائل گنج بخش ٹاون کی ٹیم نے جیت فتخ اپنے نام کرلی،اور فاتح ٹیم کو دس ہزار روپے کیش اور ٹرافی اور ٹورنامنٹ میں شریک تمام ٹیموںمیں اسناد اور ٹرافیاں تقسیم کی۔
وحدت نیوز(گلگت) ضلع گلگت کی ستر فیصد پوسٹوں پر دوسروں اضلاع کے افراد قابض ہیں۔محکمہ تعلیم میں گلگت شہر کے مختص پوسٹوں پر دوسروں اضلاع کے آفیسران نے اپنے بیگمات کو دوسرے اضلاع سے گلگت لاکر ان خالی پوسٹوں پر فل کردیا ہے جس سے ضلع گلگت میں بیروزگار نوجوانوں کی تعداد میں اضافہ ہوتا جارہا ہے۔ وزیر اعلیٰ اس صورت حال کا نوٹس لیتے ہوئے تمام ایڈجسٹمنٹ کو کینسل کرکے مقامی لوگوں کیلئے روزگار کے مواقع فراہم کریں۔
مجلس وحدت مسلمین کے رہنما الیاس صدیقی نے کہا ہے کہ ایک عرصے سے اعلیٰ پوسٹوں پر متعین افسران کی جانب سے اپنی بیگمات کو ضلع گلگت کی خالی پوسٹوں پر ایڈجسمٹنٹ کا سلسلہ جاری ہے اور اب تک کئی پوسٹوں پر اپنی بیگمات کی درپردہ تعیناتی کی گئی ہے۔بااثر آفیسران کی جانب سے اپنے عزیزوں کو ایڈجسٹ کرنے کا یہ سلسلہ نہ روکا گیا تو مقامی بیروزگار افراد میں احساس محرومی جنم لے گی اور بیروزگاری میں روز بروز اضافہ ہونے کے ساتھ ساتھ علاقے میں ایک دوسرے کے خلاف نفرت کے جذبات پیدا ہونے کا بھی اندیشہ ہے ۔ انہوں نے کہا کہ علاقے میں بڑھتی ہوئی بیروزگای کے خاتمے کیلئے تمام اضلاع کا مخصوص کوٹہ ہے اور اگر اسی طریقے سے دیگراضلاع کے ساتھ زیادتی کی گئی تو کل پورے علاقے میں انارکی پھیلے گی جس سے علاقے کے عوام میں پائی جانیوالی وحدت پارہ پارہ ہوجائیگی۔لہٰذا وزیر اعلیٰ گلگت بلتستان اس زیادتی کا نوٹس لیتے ہوئے تمام ایڈجسٹمنٹس کو منسوخ کریں تاکہ حق دار کی داد رسی ہوسکے۔
وحدت نیوز(ملتان) مجلس وحدت مسلمین جنوبی پنجاب کی صوبائی شوری کا اجلاس صوبائی سیکرٹری جنرل علامہ اقتدار حسین کی زیرصدارت جامع مسجد الحسین نیو ملتان میں منعقد ہوا، اجلاس میں ایم ڈبلیو ایم کے مرکزی معاون سیکرٹری تنظیم سازی علامہ اصغر عسکری نے خصوصی طور پر شرکت کی۔ اجلاس میں جنوبی پنجاب کے 13اضلاع کے سیکرٹری جنرل نے شرکت کی۔ رحیم یا رخان سے نیاز خان دشتی، بہاولپور سے احسن عباس، لودھراں سے منظور حسین مگسی، بھکر سے مزمل عباس خان،وہاڑی سے علی عابد چوہدری، میانوالی سے الطاف حسین خان،مظفرگڑھ سے شبیر حسین بک،علی پور سے سید اعجاز حسین زیدی، اور ملتان سے نمائندگی مرزاوجاہت علی نے کی۔ اجلاس میں محرم الحرام کے دوران عزاداری کی مجالس اور جلوس ہائے عزا پر حکومت کی جانب سے لگائی جانے والی پابندیوں کی شدید مذمت کی گئی۔ اجلاس سے خطاب کرتے ہوئے مرکزی رہنما علامہ اصغر عسکری کا کہنا تھا کہ محرم الحرام اور کربلا امن، رواداری اور باہمی محبت کا درس دیتی ہے، ان ایام میں حکومت کی ذمہ داری بنتی ہے کہ عزاداری کے پروگراموں کو پُرامن بنانے میں عزاداران اور بانیان مجالس کے ساتھ تعاون کرے، حکومت اپنے من پسند افراد کو امن کمیٹیوں میں نامزد کرنے کی پالیسی پر عمل پیرا ہے یہ روش قابل قبول نہیں، اُنہوں نے کہا کہ آئندہ دو روز میں جنوبی پنجا ب کے تمام اضلاع میں محرم الحرام کے حوالے سے کنٹرول روم کردیے جائیں گے، جو انتظامیہ کے ساتھ مکمل تعاون کریں گے اور حکومت سے بھی مطالبہ کرتے ہیں وہ بھی مجلس وحدت مسلمین کی جانب سے نامزد محرم کمیٹی کے رہنمائوں سے تعاون کریں تاکہ کسی بھی ضلع میں مجلس یا جلوس کا کوئی مسئلہ پیش نہ آئے۔ اُنہوں نے مزید کہا کہ ہم واضح کرتے ہیں عزاداری سیدالشہداء پر عائد کسی بھی پابندی کو برداشت نہیں کریں گے، آئین پاکستان کے مطابق ملک میں موجود تمام مسالک کے افراد کو اپنے عقیدے کے مطابق عبادت کاحق حاصل ہے، پاکستان جیسے اسلامی ملک میں میوزک کنسرٹ کرنے کے لیے حکومت سے کسی قسم کی اجازت لینی کی ضرورت نہیں لیکن محسن اسلام حضرت امام حسین کا ذکر کرنے کے لیے حکومت سے اجازت لینی ضروری قراردیا گیا ہے جسے ہم مکمل طور پر مسترد کرتے ہیں، عزاداری سیدالشہداء ہمارا آئینی اور قانونی حق ہے کسی بھی حکمران یا ظالم کو اسے چھیننے کا حق نہیں دیں گے۔ اُنہوں نے کہا کہ محرم سے قبل انتظامیہ کی طرف سے خواہ مخواہ خوف کی فضاء پیدا کی جاتی ہے جو کہ حکومت کی بوکھلاہٹ کا نتیجہ ہے، اجلاس سے صوبائی سیکرٹری جنرل علامہ اقتدار حسین نقوی نے کہا کہ جنوبی پنجاب کے تمام اضلاع میں مجلس وحدت مسلمین کے وفود مقامی انتظامیہ، ڈی سی اوز اور ڈی پی اوز سے ملاقات کریں گے اور مختلف علاقوں میں درپیش مشکلات سے آگاہ کیا جائے گا۔ اس محرم میں ہم سمجھتے ہیں حکومت عزاداری کے خلاف سازشیں نہیں کرے گی اور اگر حکومت نے عزاداری اور عزاداروں کے خلاف کوئی کاروائی کی گئی تو محرم الحرام پھر امام بارگاہوں میں نہیں بلکہ سڑکوں پر ہوگا۔ اجلاس سے ڈپٹی سیکرٹری جنرل محمد عباس صدیقی،محمد اصغر تقی، سید عدیل عباس زیدی، انجینیئر مہر سخاوت علی،سید فرخ شمسی،علی رضاطوری اور صوبائی ترجمان ثقلین نقوی نے خطاب کیا۔
وحدت نیوز (اسلام آباد) مجلس وحدت مسلمین صوبہ خیبر پختونخواکی شوریٰ کا اہم اجلاس مرکزی سیکریٹریٹ اسلام آباد میں مرکزی سیکریٹری امور تنظیم سازی سید مہدی عابدی کی زیر صدارت منعقد ہواجس میں صوبہ بھر سے ضلعی تنظیمی عہدیداران نے شرکت کی اور حق رائے دہی کے استعمال سے آئندہ تین سال کیلئے کثرت رائے سے علامہ محمد اقبال بہشتی کو مجلس وحدت مسلمین صوبہ خیبرپختونخوا کاسیکریٹری جنرل منتخب کرلیا،نو منتخب صوبائی سیکریٹری جنرل سے مرکزی سیکریٹری امور دفترعلامہ عبدالخالق اسدی نے انکے عہدے کا حلف لیا، علامہ اقبال بہشتی کے انتخاب پر مرکزی سیکریٹری امور تعلیم نثار علی فیضی اور دیگر رہنمائوں نے انہیں مبارک باد پیش کی،اس موقع پر گفتگو کرتے ہوئے علامہ اقبال بہشتی کا کہنا تھا کہ اراکین شوریٰ نے مجھ پر جس اعتماد کا اظہار کیا ہے میں خداکی مددسے اس پر پورا اترنے کی بھرپور کوشش کروں گا ، انشاءاللہ خیبرپختونخوا کے تمام اضلاع میں مجلس وحدت مسلمین کا پیغام عام کریں گے اور جلد از جلد صوبے بھر میں مضبوط تنظیمی ڈھانچے کی تشکیل کی کوشش کی جائے گے۔
وحدت نیوز (کراچی) شیعہ و سنی مل کر تکفیریت کی جڑوں کو اکھاڑ پھنکیں گے، غدیر کادن امت کے اتحاد کا مظہر ہے، نیشنل ایکشن پلان کے نام پر محب وطن اہل تشیع عوام کو ہراساں کرنے کا راستہ روکیں گے، عزاداری امام حسین ہماری شہ رگ حیات ہے اس پر کوئی پابندی قبول نہیں۔ ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے ایم ڈبلیو ایم کراچی کی جانب سے۔ کانفرنس میں علامہ صادق جعفری، علامہ احسان دانش، انجینئر رضا نقوی، میر تقی ظفر و دیگر علمائے کرام، خواتین، بچوں اور ایم ڈبلیو ایم کارکنان کی بڑی تعداد موجود تھی۔
کانفرنس سے خطاب کر تے ہوئے علامہ راجہ ناصر عباس جعفری کا کہنا تھا کہ ہمارا اصلی دشمن عالمی استکبار ہے اور اس کے ایجنٹ پاکستان کی سلامتی کے دشمن ہیں، امت مسلمہ کے اتحاد کے دشمن ہیں، عالمی استکبار نے لبرل ڈیموکریسی کے نظام کے ذریعے دنیا کو اپنے شکنجے میں جکڑ رکھا ہے، پاکستان میں دہشت گردی کے خاتمہ کیلئے نیشنل ایکشن پلان کے اصل اہداف پر عمل کرنا ہوگا، افسوس کے ساتھ کہنا پڑتا ہے کہ نیشنل ایکشن پلان کا رخ ملت جعفریہ کی جانب موڑ دیا گیا ہے، کراچی سمیت پنجاب بھرسے ہمارے بے گناہ افراد کو اغوا کیا جارہا ہے، ہم اس کی بھرپور مذمت کرتے ہیں اور نیشنل ایکشن پلان کے نام پر محب وطن اہل تشیع عوام کو ہراساں کرنے کا راستہ روکیں گے، شکار پور سے گرفتار خودکش بمبار کی تحقیقات کو منظر عام پر لایا جائے، عزاداری امام حسین ہماری شہ رگ حیات ہے اس پر کوئی پابندی قبول نہیں۔ انہوں نے کہا کہ سی پیک منصوبہ پاکستان میں اقتصادی و معاشی ترقی کے راستہ کھول دے گا۔
انہوں نے وفاقی حکومت سے مطالبہ کیا کہ بلوچستان تافتان روڈ پر زائرین کی سہولیات کیلئے فوری اقدامات کرے، قائد اعظم محمد علی جناح کے پاکستان کی بحالی کیلئے ہماری تحریک جاری رہے گی، شیعہ و سنی مل کر تکفیریت کی جڑوں کو اکھاڑ پھنکیں گے، غدیر کادن امت کے اتحاد کا مظہر ہے، رسول اکرم (ص) نے 18 ذالحج کو غدیر کے مقام پر علی علیہ السلام کی ولایت کا اعلان کر کے اتمام حجت کر دیا، آج ہماری ذمہ داری ہے کہ ولی فقیہہ کے دامن کو تھامیں، اللہ تعالیٰ نے آیت اللہ خامنہ ای کی صورت میں ہمیں عظیم نعمت سے نوازا ہے، یہ وہ شخصیت ہے کہ جس نے عالم اسلام کی آبرو بچائی ہے ورنہ عالمی استکبار نے اپنے ایجنٹ داعش، القاعدہ و دیگر تکفیری دہشت گردوں کے ذریعے اسلام کا چہرہ مسخ کرنے کی کوشش کی تھی، ہمیں چاہیئے کہ ولی فقیہہ آیت اللہ خامنہ ای کی قیادت میں متحد ہوکر عالمی استکبار کی امت مسلمہ کے خلاف سازشوں کو ناکام بنائیں۔ کانفرنس کے اختتام پر ایم ڈبلیو ایم کی جانب سے شاندار آتش بازی کی گئی اور جشن غدیر کی مناسبت کیک کاٹا گیا۔
وحدت نیوز(سکردو) گزشتہ سال منیٰ مقدس میں آل سعود کی مجرمانہ غفلت کے نتیجے میں جو اندوہناک سانحہ پیش آیا اور سینکڑوں حجاج شہید ہوئے۔ اس افسوناک سانحے میں جہاں دنیا ئے اسلام کی عظیم شخصیات شہید ہوئیں وہیں پاکستان کے نامور عالم دین ،محقق،مدافع ولایت، اتحاد امت کے داعی علامہ ڈاکٹر غلام محمد فخرالدین بھی شہید ہوئے۔شہدائے سانحہ منیٰ کی مظلومانہ اور جانگداز شہادت کی پہلی برسی کی مناسبت سے نیز شہید ڈاکٹر غلام محمد فخرالدین کی علمی ،تحقیقی،تنظیمی،سیاسی اور اجتماعی خدمات کو خراج تحسین پیش کرنے کے لیے ایک عظیم الشان تعزیتی پروگرام کا انعقاد شہید مرحوم کے آبائی گاوں قمراہ میں کیا گیا جس میں علماء ، زعماء اور دانشوروں نے شہید کی ثمر بخش زندگی کے گوشوں کو اجاگر کیاگیا۔ برسی کا آغا ز تلاوت کلام مجید سے ہوا اور نعت خوانوں و منقبت خوانوں نے عقیدت کے پھول نچھاو ر کیے۔ شعرائے کرام نے بھی شہید منیٰ پر کلام پیش کیے۔
اس موقع پر علاقہ قمراہ کی نمائندگی کرتے ہوئے شیخ مختار علی اور اخوند مہدی نے کہا کہ شہید غلام محمد فخرالدین کی کا شمار ان عظیم شخصیات میں ہوتا ہے جنہوں نے نہ صرف اپنی زندگی کو تبدیل کی بلکہ پورے خطے کو تبدیل کرنے کی جدوجہد کی۔ شہید نے اپنی زندگی میں خط ولایت کی ترویج کے لیے جو خدمات سرانجام دی ہیں انہیں ہمیشہ یاد رکھا جائے گا۔ تعزیتی ریفرنس سے فرزند شہید کے علاوہ علمائے کرام نے شہید کی زندگی پر تفصیلی گفتگو کی۔
فرزند شہید عباس فخرالدین نے کہا کہ مجھے فخر ہے کہ میں شہید کا فرزند ہو ں اور میرے والد محترم نے عظیم ترین اور پاکیزہ ترین موت کو گلے سے لگا لیے، انہوں نے علمی، فرہنگی، سیاسی ، سماجی ،دینی اور دیگر میدانوں میں جو نقوش چھوڑے ہیں انہیں زندہ رکھا جائے گا اور انکے مشن کو جاری و ساری رکھیں گے۔ تعزیتی ریفرنس سے افضل روش، اطہر موسوی،رکن اسمبلی حاجی رضوان،ماسٹر تبسم، ڈاکٹر علی گوہر،مولوی غلام رضا، آغا علی رضوی اور شیخ نیئر عباس مصطفوی نے خطاب کرتے ہوئے کہا کہ شیخ غلام محمد فخرالدین کی شہادت کوئی حادثہ نہیں بلکہ ایک منظم سازش کا نتیجہ ہے۔ انہوں نے کہا کہ ایک سال قبل آل سعود کی حکومت نے انہیں دوران حج ہی گرفتار کرنے کی کوشش کی تھی لیکن سعودی حکومت کامیاب نہیں ہوسکی تھی۔
انہوں نے کہا کہ باقاعدہ سازش کے تحت شیخ غلام محمد فخرالدین سمیت دنیائے اسلام کے قیمتی افراد کو شہید کر دئیے گئے۔سانحہ منیٰ کے جرم میں ملوث سعودی حکمرانوں کی حکومتی کی غرق ہونے کے قریب ہے۔ آل سعود کی بادشاہت جو سعودی عرب کے مظلوم عوام پر عرصہ دراز سے مظالم ڈھانے میں مصروف ہے بدترین خلفشار کا شکار ہے اور بہت جلد اس بادشاہت کی بت کو پاش پاش ہوتے ہوئے دیکھیں گے۔ مقررین نے کہا کہ پاکستان اور گلگت بلتستان میں اتحاد امت کی خاطر کام کرنے والوں کو دیوار سے لگایا جا رہا ہے اور عرصہ حیات تنگ کیا جا رہا ہے جبکہ تکفیری عناصر کی پشت پناہی کی جا رہی ہے۔ گلگت بلتستان کے امن کو خراب کرنے کی سازشیں افسوسناک ہیں۔ خطے میں حکومت کی جانب حقوق کے لیے اٹھنے والی آوازوں کو دبانے کی کوشش بلخصوص قومی ایکشن پلان کے رخ کو موڑنے کی کوشش قابل مذمت ہے۔ مقررین نے کہا کہ موجودہ حکومت بلتستان کے ساتھ سوتیلانا سلوک بند کرے اور بلتستان کی ترقی پر توجہ دے بلخصوص اسکردو روڈ کی تعمیر میں مزید غفلت برداشت نہیں کی جائے گی۔
وحدت نیوز(سکردو) شہید منیٰ شیخ غلام محمد فخرالدین کی برسی کی مناسبت سے اسکردو میں منعقدہ تعزیتی ریفرنس سے خطاب کرتے ہوئے مجلس وحدت مسلمین کے قانون ساز اسمبلی گلگت بلتستان کے رکن حاجی رضوان علی کا کہنا تھا کہ صوبائی حکومت وقت گزاری میں مصروف ہے اور عوامی حقوق کے لیے اٹھنے والی آوازوں پر کان نہیں دھر رہی ہے۔ گلگت اسکردو روڈ کی تعمیر میں سستی اور تعطلی اہلیان بلتستان کے ساتھ توہین اور مذاق ہے۔ انکا کہنا تھا کہ اسمبلی سیشن میں جب بھی اسکردو روڈ کی تعمیر کی بات چلتی ہے تو نئی تاریخ کا اعلان کر کے سر سے ٹال دیتے ہیں حقیقت یہ ہے یہ صوبائی حکومت اسکردو روڈ بنانے میں سنجیدہ نظر نہیں آتی ۔ حکومت چاہے تو اسکردو روڈ کی تعمیر کوئی ایسا مسئلہ نہیں جسے الجھایا جائے۔ حاجی رضوان نے کہا کہ سی پیک میں حقوق کے لیے صوبائی حکومت کو کردار ادا کرنا ہوگا ۔ حکومت سی پیک میں عوام کو حقوق دلانے کی بجائے اور عوامی تحفظات کو دور کرنے کی بجائے آواز کو دبانے کی کوشش ہو رہی ہے۔رکن اسمبلی کا مزید کہنا تھا کہ شہید غلام محمد فخرالدین صرف گلگت بلتستان کا نہیں بلکہ پوری ملت اسلامیہ کا سرمایہ تھے انکی شہاد ت سے جو خلا پیدا ہوا ہے اسے کبھی پر نہیں کیا جا سکتا ۔انکی خدمات کو ہمیشہ یاد رکھی جائے گی۔
