وحدت نیوز(کوئٹہ) مجلس وحدت مسلمین کے کونسلر حلقہ نمبر 12 کربلائی رجب علی کی دعوت پر میئر کوئٹہ میٹروپولیٹن کارپوریشن جناب ڈاکٹر کلیم اللہ اپنے خصوصی فنڈ سے کونسلر کربلائی رجب علی کے زیر نگرانی مختلف ترقیاتی اسکیموں کا معائنہ کیا. کونسلر کربلائی رجب علی نے میئر کو کا سی روڈ, رئیسانی اسٹریٹ, لوہاری محلہ, نچاری روڈ اور غلزئی روڈ میں جاری ترقیاتی کاموں کا معائنہ کروایا. علاقے کے لوگوں اورسٹی  میئر نےایم ڈبلیوایم کے کونسلر کربلائی رجب علی کی کارکردگی کو سراہا اور مزید ترقیاتی کاموں کے لیے فنڈ کی فراہمی کا وعدہ کیا۔

وحدت نیوز (ملتان) مجلس وحدت مسلمین پاکستان ملتان کی سیاسی کونسل کا اجلاس ضلعی سیکرٹری سیاسیات انجینیئر مہر سخاوت علی کی صدارت میں منعقد ہوا، اجلاس میں ملتان کی تمام تحصیلوں، ٹائونز اور یونٹس کے سیکرٹری جنرل اور اراکین نے شرکت کی۔ اجلاس کے مہمان خصوصی مجلس وحدت مسلمین پنجاب کے ڈپٹی سیکرٹری جنرل علامہ اقتدار حسین نقوی اور ضلعی سیکرٹری جنرل علامہ قاضی نادر حسین علوی تھے۔ اجلاس میں متفقہ طور پر فیصلہ کیا گیا کہ مجلس وحدت مسلمین ملتان میں بلدیاتی الیکشن میں بھرپور حصہ لے گی، اس حوالے سے اُمیدواروں کے نام بہت جلد فائنل کر لیے جائیں گے۔ اجلاس سے خطاب کرتے ہوئے مہر سخاوت کا کہنا تھا کہ ضلع بھر کی تمام یونین کونسلز میں بلدیاتی الیکشن کی تیاریاں شروع کر دیں، مہر سخاوت نے مزید کہا کہ مجلس وحدت مسلمین انشاء اللہ بلدیاتی الیکشن میں اپنی طاقت کا بھرپور مظاہرے کرے گی اور الیکشن میں کامیابی حاصل کرے، مہر سخاوت نے مزید کہا کہ مجلس وحدت مسلمین ایک سیاسی جماعت ہے اسے کالعدم قرار دینے والے احمقوں کی جنت میں رہتے ہیں۔ اجلاس سے خطاب کرتے ہوئے علامہ اقتدار حسین نقوی نے کہا کہ ضلع بھر کے کارکنان الیکشن کی تیاریاں کریں اور ایم ڈبلیو ایم کے اُمیدواروں کو کامیاب کرانے کے لیے کوشش کریں۔

وحدت نیوز(راولپنڈی) سید مصطفی شیرازی سیکرٹری جنرل مجلس وحدت مسلمین چوہڑہڑپال یونٹ پر نامعلوم افراد کا حملہ اور یرغمال بنایا تشدد کا نشانہ ، زہریلا انجکشن لگایا جس سے ان کی طبیعت کافی بگڑگئی ان کے پاس موجود ایک خطیر رقم بھی ہتھیا لی گئی۔ وہ تا حال قوت گویائی سے محروم ہیں۔ مجلس وحدت مسلمین ضلع راولپنڈی کی رہنماء علامہ سید علی اکبر کاظمی نے انکے گھر جاکر ان سے اظہار یکجہتی کیا اور واقعہ کی بھر پور مذمت کرتے ہوئے مطالبہ کیا کہ ذمہ داران کو گرفتار کیا جائے۔

وحدت نیوز(کوئٹہ) آل بلوچستان ووشو مقابلہ زیر اہتمام ووشو ایسوسی ایشن بلوچستان شروع کیا گیا اس میچ کے مہمان خصوصی مجلس وحدت مسلمین کے مرکزی شوریٰ عالی اور امام جمعہ علامہ سید ہاشم موسوی تھے۔ علامہ سید ہاشم موسوی نے کھلاڑیوں سے خطاب کرتے ہوئے کہا کہ ورزش انسانی جسم کو صحت مند رکھتے ہوئے انسانی روح کو پروان چڑھاتا ہے ان جیسے مقابلوں میں نہ صرف کھلاڑیوں کو اپنی کارکردگی دکھانا پڑتا ہے بلکہ برادر اقوام اور مختلف مذاہب کے پیروکاروں کے درمیان دوستانہ تعلقات کو فروغ بھی ملتا ہے علامہ سید ہاشم موسوی نے مذکورہ ٹورنامنٹ کے انعقاد کو خوش آئند قرار دیتے ہوئے خواہش ظاہر کی کہ کاش پاکستان کے دیگر علاقوں کے لوگ بھی ان جیسے مقابلوں کا انعقاد کریں جس سے اتحاد بین المسلمین کو تقویت ملے اور نوجوان نسل دشمنان اسلام کے ثقافتی یلغار کے منفی اثرات سے بچ سکتے ہیں۔ ورزش کرنے والے اسپورٹس مین افراد کھیل پر توجہ دیتے ہوئے مختلف منفی سرگرمیوں مثلاً نشہ ، فحاشی اور جنسی بے راہ روی سے محفوظ رہ سکتے ہیں۔

وحدت نیوز (ملتان) مجلس وحدت مسلمین ملتان کے شعبہ عزاداری کا اجلاس سیکرٹری عزادری سید دلاور عباس زیدی کی صدارت میں منعقد ہوا، علامہ قاضی نادر حسین علوی، محمد عباس صدیقی نے اجلاس میں خصوصی طور پر شرکت کی، اجلاس میں تحصیل شجاع آباد، جلالپور، سورج میانی، سوتری وٹ، حسن آباد، شوک کمہاراں، غازی آباد، گلگشت کالونی، ٹاٹے پور، قادرپور راں، پیراں غائب، ممتازآباد یونٹ کے سیکرٹری جنرل اور دیگر عمائدین نے شرکت کی۔ اجلاس میں ضلعی حکومت سے مطالبہ کیا گیا کہ ضلع بھر کے جلوس ہائے عزاء اور مجالس عزاء کے حوالے خصوصی انتطامات کیے جائیں، سیکرٹری شعبہ عزادری دلاور عباس زیدی نے کہا کہ حکومت جلوس ہائے کے روٹس کی مرمت، سیوریج نظام کی بہتری، تجاوزات کے خاتمے اور سیکیورٹی انتظامات کے حوالے خصوصی اقدامات کرے، اجلا س میں متفقہ طور پر فیصلہ کیا گیا کہ ملتان کی تمام تحصیلوں اور یونٹس کے سیکرٹری جنرل متعلقہ انتظامیہ سے بھرپور تعاون کریں گے، اجلاس میں محرم کے انتظامات اور مسائل کے حوالے سے ضلعی کابینہ، تحصیلوں کی کابینہ اور ٹائونز کی کابینہ پر مشتمل ایک کمیٹی تشکیل دی گئی جو آمدہ محرم الحرام کے حوالے سے انتظامیہ اور دیگر اداروں سے ملاقات کریں گے اور عزاداروں کے مسائل کو حل کریں گے۔ اجلاس میں سید علی رضا بخاری، ثقلین نقوی، وسیم عباس زیدی، عون رضا جام، عون نقوی، سخاوت علی، الطاف حسین، فخر نسیم، اقبال قریشی، اسماعیل جعفری اور حسنین کربلائی نے شرکت کی۔

وحدت نیوز (کراچی) پاکستان پیپلز پارٹی پی ایس127-کے صدراورزکواۃ وعشرکمیٹی ضلع ملیر کے چیئرمین نعمان عبداللہ مرادکی مجلس وحدت مسلمین کی دعوت پر وحدت ہاوس جعفرطیار سوسائٹی آمد، ایم ڈبلیوایم ضلع ملیرکے سیکریٹری جنرل سید احسن عباس رضوی سے ملاقات،دونوں رہنماؤں کے درمیان علاقائی مسائل، واٹرسپلائی پروجیکٹ اور بلدیاتی انتخابات میں سیٹ ایڈجسٹمنٹ کے حوالے سے تفصیلی گفتگو ہوئی، ملاقات کے بعد دونوں رہنماوں نے جعفرطیارواٹرسپلائی پروجیکٹ پر جاری ترقیاتی کام کا جائزہ بھی لیا، اس موقع پر پاکستان پیپلز پارٹی کے وفد میں محمد علی گلگتی ، حبیب شاکر، کیپٹن عارف اور ایم ڈبلیوایم کی جانب سے ضلعی سیکریٹری امورسیاسیات حسن عباس، سیکریٹری روابط سعید رضا، رضاعلی، عارف رضا زیدی، حامد حسین اور کاظم نقوی موجود تھے۔

اس موقع پرپی پی پی رہنما نعمان عبداللہ مراد کا کہنا تھا کہ علاقہ میں صفائی ستھرائی اور سیوریج کی صور ت حال انتہائی مخدوش ہے، عوام کو آمد ورفت میں سنگین دشواریاں لاحق ہیں ، اس صورت حال سے نپٹنے کیلئے ہنگامی بنیادوں پر اقدامات کی ضرورت ہے، ہماری خواہش ہے کہ آئندہ بلدیاتی انتخابات میں پی پی پی اور ایم ڈبلیوایم پی ایس127-سمیت ضلع ملیر کے دیگر یونین کونسلز میں سیٹ ایڈجسٹمنٹ کیلئے مشترکہ فارمولہ مرتب کریں ،اس حوالے سے یونین کونسل جعفرطیار ، یونین کونسل غریب آباد اور دیگر میں مشترکہ امیدوار میدان میں اتاریں گے، انہوں نے کہا کہ پی پی پی عوامی خدمت پر مکمل یقین رکھتی ہے، جعفرطیار سوسائٹی کیلئے واٹر سپلائی پروجیکٹ بھی اسی خدمت کا تسلسل ہے ہمارے والد شہید عبداللہ مراد کی خواہش تھی کے اہلیان جعفرطیار کو میٹھے پانی کی فراہمی کا منصوبہ تحفہ کریں ، لیکن عوام دشمن قوتوں نے انہیں ہم سے چھین لیا ،لیکن آج ہمیں خوشی ہے کہ مجلس وحدت مسلمین کے تعاون سے ہم اپنے شہید بابا عبد اللہ مراد کا خواب مکمل کررہے ہیں ۔

سیکریٹری جنرل مجلس وحدت مسلمین ضلع ملیر احسن عباس رضوی کا نعمان عبداللہ مراد سے گفتگو کرتے ہوئے کہنا تھا کہ مجلس وحدت مسلمین نے انتہائی سنگین حالات میں سیاسی میدان میں قدم رکھا، ہم نے پر آشوب ماحول میں عوام کی خدمت کا بیڑا اٹھایا، الحمد اللہ اپنے محدود وسائل سے مسلسل عوامی مشکلات کے حل اور انکی خدمت میں دن رات کوشاں ہیں، آئندہ بلدیاتی انتخابات کے سلسلے میں مختلف سیاسی ومذہبی جماعتیں ایم ڈبلیوایم کے ساتھ سیٹ ایڈجسٹمنٹ اور انتخابی اتحاد کی خواہش مند ہیں، البتہ ابھی کسی بھی جماعت کے ساتھ بات چیت کو حتمی شکل نہیں دی گئی ، ایم ڈبلیوایم ضلع ملیر پی ایس127-کے حلقے میں پی پی پی کے ساتھ مختلف یونین کونسلز میں سیٹ ایڈجسٹمنٹ کے لئے آمادہ ہے، جس پر آئندہ میٹنگ میں حتمی فیصلہ جات کیئے جائیں گے، انہوں نے نعمان مراد سے کہا کہ جعفرطیار واٹر سپلائی پروجیکٹ تکمیل کے آخری مراحل میں ہے ، اس منصوبے کی مشترکہ افتتاحی تقریب آئندہ ماہ منعقد کی جائے گی جس میں ایم ڈبلیوایم اور پی پی پی کی اعلیٰ قیادت شرکت کرے گی، ملاقات کے اختتام پر دونوں رہنما ؤں نے جعفرطیار واٹر سپلائی پروجیکٹ پر جاری کام کا معائنہ کیا۔