وحدت نیوز( ابراہیم زئی ہنگو)  تحریک فقہ جعفریہ کے بانی صدر اور معروف عالم دین علامہ حسین الاصغر مرحوم کی دوسری برسی کی تقریب سے سے خطاب کرتے ہوئے مجلس وحدت مسلمین صوبہ خیبر پختونخوا کے سیکرٹری جنرل علامہ سید سبطین حسینی نے کہا ہے کہ زمین و زمان کی کہنگی اور گزشت لیل و نہار علماء کی یادیں محو نہیں کر سکتی بلکہ وہ آفتا ب عالم کی طرح اُفق عالم پر روشنیوں کو مینار بن کر لوگوں کے دلوں میں زندہ و جاوید رہتے ہیں، اللہ کی راہ میں شہادت بلند ترین مرتبہ ہے اور اس لئے کہ انسان فطرتاً ہر چیز اپنی جان پر فدا کر لیتا ہے، لیکن شہید اپنی جان اپنے عقیدے اور وطن کی راہ میں قرب الی اللہ کی خاطر فدا کر دیتا ہے، لیکن فرامین معصومین (ع) کی روشنی میں علماء کا درجہ بلند اور رفیع ہے، علماء انسانوں کی روح کے محافظ ہیں، اور دوام روح کو ہے جسم کو نہیں، اس لئے علماء لوگوں کے دلوں میں زندہ ہوتے ہیں، مرحوم مولانا حسن الاصغر صاحب بھی علاقہ بنگش کے مومنین کے دلوں میں زندہ رہیں گے، اس لئے کہ انہوں نے اپنی زندگی ملت کی سرخروئی اور ملت کو معارف آل محمد سے روشنائی کے لئے بیش بہا خدمات انجام دیں، جامعۃ البنات رئیسان کا قیام مرحوم کی کاوشوں کا بہترین مظہر و عکاس ہے، کہ جس میں طالبات علوم آل محمد سے سیراب ہو کر لوگوں کو دین سے روشنا س کرانے کے لئے ہمہ تن گوش ہیں۔ ملت پاکستان بالعموم اور علاقہ بنگش کے عوام بالخصوص علامہ صاحب کو ہمیشہ یاد رکھیں گے۔

علاوہ ازیں لودی خیل ہنگو میں شہید قائد علامہ عارف حسین الحسینی کی برسی کی تقریب سے خطاب میں مجلس وحدت مسلمین صوبہ خیبر پختونخوا کے سیکرٹری جنرل علامہ سید سبطین حسینی کا کہنا تھا کہ قائد شہید علامہ عارف حسین الحسینی رضوان اللہ علیہ ستائیس سال گزرنے کے باوجود آج بھی ہمارے دلوں پر حکمرانی کر رہے ہیں، شہید کی یاد و فکر زندہ ہے، شہید قائد نہ صرف ایک شہید تھے بلکہ وہ ایک عظیم عالم دین بھی تھے، شہید نے اپنی مجاہدانہ اور عالمانہ زندگی میں قوم کو سرخروئی اور سرفرازی سے نوازا، ایک سوئی قوم کو بیدار کیا اور اسے اعلیٰ مقام دیا، ملت تشیع پاکستان کو ایک شناخت دی، اور اقوام عالم میں تشیع کا نام روشن کیا، شہید قائد کی بابصیرت قیادت نے ملک میں تشیع کو ایک سیاسی پلیٹ فام دیا، شہید کی یہ ہی چاہت تھی کہ پارلیمنٹ میں بھی ہمارے نمائندے موجود ہوں، جو تشیع کی ترجمانی کریں، جو تشیع کو موقف اور ان کا عقیدتی موقف اور ان کا نظریاتی و سیاسی موقف پارلیمنٹ اور باقی اداروں میں اجاگر کریں۔

وحدت نیوز (اسلام آباد) مجلس وحدت مسلمین کے مرکزی ڈپٹی سیکریٹری جنرل علامہ امین شہیدی مفتی امان اللہ قتل کیس کے جھوٹے مقدمے کی سماعت کیلئے انسداد دہشت  گردی عدالت پہنچے ، اس موقع پر ان کے وکلا ء اور ایم ڈبلیوایم کے مرکزی رہنما علامہ اعجاز بہشتی،علامہ اقبال بہشتی اور اقرار حسین ملک بھی موجود تھے، فاضل عدالت نےجراح کے بعد اگلی سماعت 27اگست تک کیلئے ملتوی کردی ہے۔

وحدت نیوز(کراچی/بدین) قائد وحدت ناصر ملت علامہ راجہ ناصرعباس جعفری کے فرزند ارجمند مولانا راجہ مصطفیٰ حیدرجعفری کی پہلی مرتبہ تنظیمی دورے پرسندھ آمد، اس موقع پر پہلے مرحلے میں انہوں نے کراچی کے ضلع غربی میں جامع مسجد حیدر ی اورنگی ٹاون میں مجلس عزا سے خطاب کیا، ایم ڈبلیوایم کے رہنما برادر سبط اصغر اور مولانا صادق جعفری نے انہیں خوش آمد ید کہا،بعد ازاں مولانا راجہ مصطفیٰ حیدر جعفری نے  ضلعی سیکریٹریٹ ملیر میں عہدیداران اور کارکنان سے ملاقات اور حالات حاضرہ پر گفتگو، اس موقع پر ضلعی سیکریٹری جنرل احسن عباس اور ضلعی کابینہ اور یونٹس کے مسئولین بھی بڑی تعداد میں موجود تھے۔دیگر ازیں مولانا راجہ مصطفیٰ حیدر نے ضلع بدین  کی تحصیل مراد چھلگری میں عوامی اجتما ع سے خطاب کیا، بدین آمد پر کارکنان کی بڑی تعداد نے ان کا شاندار استقبال کیا، مولانا راجہ مصطفیٰ حیدر نے پر آشوب دور میں وسائل کی قلت کے باوجود تن دہی سے تنظیمی فعالیت پر خراج تحسین پیش کیا۔

وحدت نیوز (لاہور) پنجاب حکومت دہشت گردی کیخلاف آپریشن کو متاثر کرنے کے لئے ملت جعفریہ کے خلاف کریک ڈاوُن کر رہی ہے،ملک میں دہشت گردی کے سب سے زیادہ متاثر فریق کیخلاف کی جانے والی کاروائیاں ایک منظم سازش کا حصہ ہے،ہمارے تین ہزار سے زائد شہداء کے قاتلوں کی سرپرستی اب بھی پنجاب حکومت کے صوبائی وزیر ہی کر رہا ہے،جنوبی پنجاب میں عالمی دہشت گرد داعش کیخلاف کاروائی سے پنجاب حکومت گریزاں ہے،شہید شجاع خانزادہ کو اصل دہشت گردوں اور دہشت گردی کے مراکز کیخلاف کاروائی پر راستے سے ہٹایا گیا،ہمارے خلاف کاروائی دہشت گردوں کی خوشنودی کے لئے کیا جا رہا ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی کابینہ کے ہنگامی اجلاس سے خطاب میں کیا،انہوں نے کہا کہ پنجاب سے کئی اضلاع سے ہمارے بے گناہ محب وطن سینکڑوں کارکنوں کو گرفتار کیا گیا ہے،چادر اور چار دیواری کے تقدس کو پامال کیا جا رہا ہے،ہم پنجاب حکومت کی اس ریاستی ظلم کیخلاف خاموش نہیں رہیں گے،کرنل شجاع خانزادہ کی شہادت کے بعد پنجاب کابینہ میں شامل دہشت گردوں کے سیاسی سرپرست وزیر ملت جعفریہ کیخلاف ایک دفعہ پھر انتقامی کاروائی پر اتر آیا ہے،پنجاب بھر سے بانیاں مجالس ،عزادار،علمائے کرام،ذاکرین عظام اور عمائدین کا ہنگامی اجلاس طلب کر لیا ہے ،آج (26 اگست )کی اہم پریس کانفرنس میں ہم اپنے لائحہ عمل کا اعلان کریں گے۔

وحدت نیوز (اسلام آباد) حکومت دہشت گرد عناصر اور محب وطن افراد کو ترازو کے ایک ہی پڑلے میں تولنے کا سلسلہ بند کرے، تکفیری ہمنواوں کی خوشنودی کے لیے ملت تشیع کے بے گناہ افراد کے خلاف پنجاب میں جاری کریک ڈاون دراصل کالعدم تنظیموں کے ان دہشت گرد عناصر سے توجہ ہٹانے کی ایک سازش ہے جو ماضی میں حکومت کے حمایت یافتہ رہے ہیں ۔اتحاد بین المسلمین مجلس وحدت مسلمین کا بنیادی منشور ہے۔ نون لیگ کے کچھ عناصر فرقہ وارنہ تقسیم سے اپنے مذموم مقاصد حاصل کرنا چاہتے ہیں۔ جنہیں ہم نے فکری ہم آہنگی اور مذہبی رواداری سے شکست دینی ہیں۔ان خیالات کا اظہارمجلس وحدت مسلمین پاکستان کے مرکزی ڈپٹی جنرل سیکرٹری علامہ امین شہیدی اور دیگر مرکزی رہنماوں نے مرکزی سیکرٹریٹ میں ایک پریس کانفرنس کے خطاب کے دوران کیا۔

علامہ امین شہیدی نے کہا یہ سب جانتے ہیں کہ دہشت گردی کے خلاف جاری آپریشن میں موجودہ حکومت کوبادل نخواستہ شریک کار بننا پڑا حالانکہ حکومت روز اول سے ہی ان ملک دشمن عناصر کے خلاف آپریشن کی مخالف تھی۔ افواج پاک وطن عزیز کو ان دشمن طاقتوں سے چھٹکارا دلانے میں پوری نیک نیتی اور تندہی سے مصروف ہے جبکہ حکومتی اقدامات اس کے برعکس ہے۔ پنجاب حکومت اکیسویں ترمیم اور نیشنل ایکشن پلان کو دہشت گردی کے خاتمے کی بجائے اپنے انتقامی مقاصد کے حصول کے لیے استعمال کر رہی ہے۔پنجاب گلگت بلتستان میں نون لیگ کی حکومت ہے اور ان دونوں علاقوں میں مجلس وحدت مسلمین کو دانستہ طور پر انتقام کا نشانہ بنایا جا رہا ہے۔ گزشتہ دو دن میں ہمارے چالیس سے زائد افراد کو گرفتار کر لیا گیا ہے جن میں ڈاکٹرز ،وکلا، اساتذہ، بینکرز اور علما بھی موجود ہیں۔جمہوری روایات کی پاسداری کے بلند و بانگ دعوے کرنے والی نون لیگ حکومت ڈکٹیٹر شپ پر اتر آئی ہے۔ہمیں اس قسم کے اوچھے ہتھکنڈوں سے ڈرایا دھمکایا نہیں جا سکتا۔ ہم شہدا کی عظمتوں کے گن گانے والی قوم ہیں ہماری بنیاد مزاحمت پر ہے۔ہم پُرامن اور محب وطن ہیں۔ہمارا پنجاب حکومت سے مطالبہ ہے کہ ہمارے کارکنوں کی گرفتاریوں کا یہ سلسلہ فوری بند کیا جائے اور ہمارے بے گناہ کارکنوں کو رہا کیا جائے۔پریس کانفرنس میں مرکزی رہنما علامہ اصغر عسکری، علامہ اعجاز حسین بہشتی، علامہ شیر علی انصاری اور علی حسین بھی ہمراہ تھے۔

وحدت نیوز (اسلام آباد) مسلم لیگ نواز نے ہمیشہ عوامی مینڈیٹ پرشب خون مارا، این اے 122سے متعلق کمیشن کےفیصلے نے ن لیگی دھاندلی کا بھانڈا پھوڑ ڈالاہے، ایاز صادق کی صداقت خیانت میں تبدیل ہو چکی ہے،موقف میں شاندار کامیابی پر پاکستان تحریک انصاف اور عمران خان کو مبارک باد پیش کرتے ہیں ، گلگت بلتستان میں بھی نواز لیگ نے عوامی مینڈیٹ  کاکھلم کھلا قتل عام کیا، ان خیالات کا اظہار مجلس وحدت مسلمین کے مرکزی سیکریٹری امور سیاسیات سید ناصرعباس شیرازی نے حلقہ این اے122میں ن لیگ کے رکن قومی اسمبلی اور اسپیکر پارلیمنٹ ایاز صادق کے انتخاب کو کالعدم قرار دینے کے فیصلے کے بعد مرکزی سیکریٹریٹ سے جاری اپنے بیان میں کیا۔

ان کا کہنا تھا کہ پاکستان تحریک انصاف کا انتخابی دھاندلی کے حوالے سے چار حلقوں کی تحقیق کا مطالبہ وقت گذرنے کے ساتھ ساتھ سچ ثابت ہوا، این اے 122میں الیکشن کمیشن اور ن لیگ کی مشترکہ دھاندلی مہم کےنتیجے میں کامیاب قرار پانے والے اسپیکر قومی اسمبلی ایاز صادق کا جعلی مینڈیٹ آج عوام کے سامنے آشکار ہوگیا ، ن لیگ اور پیپلز پارٹی دھاندلی کنگ ہیں ، جو چوری کرکے ثبوت  مٹانے کے ماہر ہیں، گذشتہ برس ن لیگی حکومت کے جعلی مینڈیٹ اور ماڈل ٹاون سانحے کے خلاف عوامی درعمل نے ثابت کردیا تھا کہ عوام اب کسی قسم کی حکومتی جعل سازی کو قبول نہیں کریں گے، انہوں نے پاکستان تحریک انصاف کے کارکنان اور عمران خان کو اصولی موقف میں فتح پر مبارک پیش کی اور اس امید کا اظہار کیا کہ پی ٹی آئی عوامی امنگوں پر پورا ترنے کیلئے اپنے تمام وسائل بروئے کار لائے گی۔