The Latest
وحدت نیوز(ہالا) مدرسہ سکینہ بنت الحسینؑ ھالا میں مجلس وحدت مسلمین شعبہ خواتین کی جانب سے دو روزہ تربیتی ورکشاپ کا انعقاد کیا گیا جس میں ھالا سمیت سندھ کے سات اضلاع نے شرکت کی جن میں ٹنڈو محمد خان، ٹنڈو باگو ، ٹنڈو غلام علی، جامشورو ، ٹنڈو الہیار اور ماتلی شامل ھیں ورکشاپ کے تمام تر انتظامی امور محترمہ سیمی نقوی کی زیر نگرانی انجام پاۓ دو روزہ تربیتی ورکشاپ میں جید علمائے کرام نے خطاب کیا
جن میں مجلس وحدت مسلمین سندھ کےمرکزی ڈپٹی سیکریٹری جنرل علامہ مختار امامی ،صوبائی سیکرٹری جنرل علامہ باقر زیدی ، علامہ دوست علی سعیدی ، علامہ محمد جان حیدری ، ایم ڈبلیو ایم کے مرکزی رہنما جناب ظہیر کربلائی، علامہ نقی جوادی ، جناب ڈاکٹر مدثر اور برادر رضوان صاحب نے مختلف اخلاقی اور فکری موضوعات پر شرکاء سے خطاب کیا ۔
ورکشاپ میں نماز باجماعت نیز دعائے عہد اور زیارت عاشورہ کی تلاوت کی گئی ورکشاپ کے اختتام پر محترمہ سیمی نقوی مرکزی سیکرٹری روابط ایم ڈبلیو ایم شعبہ خواتین نے تمام اضلاع سے آنے والی خواتین اور مدیر مدرسہ سکینہ بنت الحسینؑ آقا دوست علی سعیدی کا شکریہ ادا کیا علاوہ ازیں ۱۳ رجب ولادت با سعادت جناب امیر المومنین ع کی مناسبت سے ورکشاپ میں شریک خواتین اور مدرسے کی طالبات میں چوڑیاں بطور تحفہ پیش کیں۔
وحدت نیوز(فیصل آباد) عالمی یوم خواتین کے سلسلے میں فیصل آباد میں ضلع کونسل چوک سے چوک گھنٹہ گھر تک ریلی نکالی گئی جس میں مختلف مکاتب فکر سے تعلق رکھنے والی خواتین اور بچیوں نے شرکت کی۔ ریلی میں ایم ڈبلیو ایم شعبہ خواتین مرکزی سیکرٹری فلاح و بہبود محترمہ فرحانہ گلزیب صاحبہ نے خصوصی شرکت کی اور خواتین سے خطاب کیا ۔
اپنے خطاب میں انھوں نے کہا کہ وطن عزیز اسلامی جمہوری پاکستان میں جو حقوق نسواں آزادی مارچ کے نام پہ لبرل خواتین سڑکوں پر نکلتی ہیں اور یہ بے حیائی اور فحاشی کا کلچر عام کرنا چاہتیں ہیں لبرل ازم کا زہر ہماری پاکیزہ خواتین کے دماغ میں انڈیلنا چاہتی ہے اور انھیں اسلام سے بدظن کر کے مغربی کلچر کا دلدادہ بنانا ان کا اصل مقصد ہے نام نہاد آزادی نے طبقہ نسواں کو تباہی اور بربادی کی دلدل میں لا گھسیٹا خواتین کے حقوق کے نام پر فحاشی ہے۔
انہوں نے مزید کہاکہ خواتین کے حقوق چودہ سو سال پہلے طے کر دیے ہیں اسلام سے پہلے عورت کو زندہ درگور کردیا جاتا تھا اسلام نے زندگی کا حق دیا ھے تحفظ دیا ہے، عزت دی ہے تعلیم کا حق دیا ہے ماں ہو تو قدموں تلے جنت رکھی ہے بیٹی کو رحمت کہا بیوی کو سکون اور محبت قرار دیا حقوق کے نام پر فحاشی پھیلائی جا رہی ہے انہوں نے مزید کہا کہ پاکستان ایک اسلامی ملک ہے جس میں حیا کا کلچر ہے ہم بے حیائی مارچ کو نامنظور کرتے ہیں میرا جسم میری یہ نعرہ یہاں نہیں چلنے دیں گے
وحدت نیوز(لاہور) وجود زن اللہ کی نعمتوں میں سے ایک عظیم نعمت ہے، اللہ نے عورت کو بے پناہ صلاحتیں دے کر کائنات میں خلق کیا۔ 8 مارچ کو عالمی یوم خواتین منایا جاتا ہے، مگر پاکستان میں اس دن کا غلط استعمال کیا جا رہا ہے۔ ان خیالات کا اظہارمجلس وحدت مسلمین پاکستان شعبہ خواتین مرکزی سیکریٹری جنرل اور رکن پنجاب اسمبلی سیدہ زہرا نقوی نے ’’عالمی یوم خواتین‘‘ کے حوالے سے اپنے خصوصی پیغام میں کیا۔
انہوں نے کہا کہ پروردگارعالم نے خاتون کو ایک مقام دے کر کائنات میں بھیجا اور پاکستان میں گزشتہ برس جو کیا گیا وہ تشویشناک تھا۔ انہوں نے کہا کہ ہمارے لئے آئیڈل امہات المومنین ہیں، ہمارے لئے آئیڈل حضرت فاطمہ زہرا سلام اللہ علیہا ہیں۔
زہرا نقوی کا کہنا تھا کہ حضرت فاطمہ زہرا سلام اللہ علیہا ہر میدان میں نمایاں ہیں، وہ بہترین بیٹی، عظیم بیوی، شاندار ماں کے رتبے پر فائز ہیں۔ انہوں نے کہا کہ عورت مارچ کے نام پر سڑکوں پر نکلنے والی عورتوں نے عجیب و غریب نعرے لگائے، مگر وہ یاد رکھیں اس سرزمین کو فاطمہ جناح نے آزاد کروایا، ہم کبھی بھی مغربی پروپیگنڈے کا شکار نہیں ہوں گی۔ ہم ہر میدان میں ہراول دستہ ہیں، سیاست ہو یا مذہب، تدریس ہو یا درس، پاک سرزمین کی مائیں، بیٹیاں سب سے آگے ہیں۔
سیدہ زہر نقوی کا کہنا تھا کہ پاکستانی خواتین اپنی عفت و حیا کا خیال رکھتے ہوئے آگے بڑھ رہی ہیں۔ انہوں نے کہا کہ ہم اس پروپیگنڈے کو ناکام بنا دیں گے جس میں خواتین کی تذلیل کی جا رہی ہے۔ انہوں نے کہا کہ ہم مغربی پروپیگنڈے کا شکار نہیں ہوں گے۔
شیعت نیوز: شہید ڈاکٹر محمد علی نقوی ؒ کی دختر ، مجلس وحدت مسلمین شعبہ خواتین کی مرکزی سیکریٹری جنرل اور رکن پنجاب اسمبلی سیدہ زہرا نقوی نے اپنے بابا کی 25ویں برسی کے موقع پر اپنے پیغام میں کہاکہ شھید ڈاکٹر محمد علی نقویؒ وہ عظیم شخصیت ہیں جو قوم کا درد دل میں سموئےہوئے تھے، جنھوں نے جوانوں کو ایک مرکز و محور دیا ، انھیں دین سے قریب لانے اور معاشرے کا مہذب اور فعال رکن بنانے کے لیے بےشمار جدوجہد کیں ان کے افکار کو زندہ رکھنا ہم سب کا فرض ہے ۔
سیدہ زہرانقوی نے مزید کہاکہ اس عظیم شہیدنے اپنی متحرک اور با مقصد زندگی میں وہ اساسی کام سر انجام دیے ہیں کہ جن کے مثبت نتائج آج تک دیکھائی دیتے ہیں، میں فخر کرتی ہوں کہ میں اس عظیم باپ کی بیٹی ہوں جنھوں نے پاکستان میں ملت تشیع کی نظریاتی اور فکری بنیادوں کو مضبوط کیا اور اسے نکھارا ۔ ان شاء اللہ ہم شھید کے حسینی مشن کو تا دم مرگ جاری و ساری رکھیں گے.
وحدت نیوز(اسلام آباد) مجلس وحدت مسلمین پاکستان شعبہ خواتین کی مرکزی سیکریٹری روابط محترمہ سیمی نقوی نے عالمی یوم خواتین کے موقع پر جاری بیان میں کہا کہ اسلامی تہذیب و تعلیمات کے علاوہ تمام تہذیبوں بالخصوص مغربی تہذیب جو آج عورت کی آزادی اور حقوق کا سہرا اپنے سر باندھنا چاہتا ہے اس معاشرے نے ہمیشہ عورت کے حقوق سبوتاژ کیئے ہیںاور اس کو ذلت و رسوائی کے دھانے پر لاکھڑا کیا ہے۔
محترمہ سیمی نقوی نےمزیدکہاکہ پاکستان میں عورت کی آزادی کے نام پر بیہودہ نعرے لگانے والی خواتین اگر دین اسلام کا مطالعہ کریں تو انھیں معلوم ہوگا کہ خدا نے عورت کو ماں ، بیٹی ، بیوی ، اور بہن کے کردار میں کتنا بلند رتبہ عطا کیا اور اسکے حقوق اور تحفظ کا حکم دیاہے۔
وحدت نیوز(خیرپور) مجلس وحدت مسلمین شعبہ خواتین کی مرکزی سیکرٹری سیاسیات محترمہ نرگس سجادجعفری اور مرکزی سیکرٹری تحفظ عزاداری محترمہ شبانہ میرانی نے اندرونی سندھ کا تنظیمی دورہ کیا جس میں تین اضلاع سکھر ، خیرپور اور شکارپور کو مزید مضبوط اور فعال بنانے کے لیے لائحہ عمل طے کیا گیا اور تنظیمی عہدیداران کو اس سلسلے میں ضروری ھدایات کیں۔
علاوہ ازیں ایم ڈبلیوایم شعبہ خواتین کی مرکزی رہنماؤں نے مختلف دینی مدارس کی مسئولین سے ملاقات کی اور ایم ڈبلیو ایم میں شمولیت کی دعوت دی۔ اس موقع پر انھوں نے اصغریہ آرگنائزیشن کی مرکزی نائب صدر سے بھی ملاقات کی اور اہم سیاسی و مذہبی امور پر تبادلہ خیال کیا۔
وحدت نیوز(علی پور) مجلس وحدت مسلمین کے فلاحی ادارے شعبہ خیرالعمل فائونڈیشن کے زیراہتمام علی پور کے علاقے بستی عظیم شاہ (لتی) میں عوام کی فلاح و بہبود کے لیے ''زینب الحورا'' کے نام سے ہسپتال کا افتتاح کر دیا گیا، افتتاحی تقریب میں مجلس وحدت مسلمین کے مرکزی سیکرٹری تنظیم سازی علامہ سید غلام شبیر بخاری، مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی، صوبائی رہنماء زعیم زیدی، ضلعی سیکرٹری جنرل علی پور رضوان حیدر کاظمی اور شاکر حسین کاظمی نے شرکت کی۔ افتتاح کے موقع پر اہل علاقہ کی بڑی تعداد موجود تھی جنہوں نے مجلس وحدت مسلمین کے اس پراجیکٹ کو سراہا اور اسے غریب عوام کے لیے ایک نعمت قرار دیا۔
تقریب سے خطاب کرتے ہوئے علامہ غلام شبیر بخاری کا کہنا تھا کہ مجلس وحدت مسلمین ایک فلاحی سسٹم رکھتی ہے، ایم ڈبلیو ایم نے ملک بھر میں اس حوالے فلاحی پراجیکٹس مکمل کیے ہیں، علی پور جیسے پسماندہ علاقے میں نئے ہسپتال کا قیام خوش آئند ہے، اس ہسپتال سے ماہانہ ہزاروں افراد مستفید ہوں گے۔ تقریب سے خطاب کرتے ہوئے علامہ اقتدار حسین نقوی نے کہا کہ ایک طرف مجلس وحدت مسلمین عوام میں سیاسی شعور بیدار کر رہی ہے تو دوسری جانب مختلف انداز میں عوامی خدمت کا سلسلہ جاری ہے، جنوبی پنجاب کے مختلف اضلاع میں ڈسپنسریوں کا قیام عوامی فلاح کا ایک منصوبہ ہے، خیرالعمل فائونڈیشن جنوبی پنجاب میں کئی پراجیکٹس پر کام کر رہی ہے، جس کا مقصد عوام الناس کو سہولیات پہنچانا ہے۔
وحدت نیوز(رحیم یارخان) دور حاضر میں انسان نے مادیت میں بہت ترقی حاصل کر لی ھے اور مادی ضروریات پوری کرنے کی اس دوڑ میں وہ معنویت سے دور ہوتا جارہا ہے اپنی خلقت کے مقصد کو فراموش کر رہا ہے خدا اور عبد کے خوبصورت تعلق کو بھلا بیٹھا ہے ایسے میں اھلبیت علیھم السلام کے ذکر کی محافل منعقد کرنا اور ان کے کردار اور اسوہ کو بیان کرنا اندھیروں اور نا امیدی کی دنیا میں روشنی اور امید کی کرن کی مانند ھے کہ جن کی پیروی کر کے انسان مادیت سے نکل کر معنوی و روحانی سفر کرتا ھے اور اپنے جسم کے ساتھ ساتھ روح کے تکامل کے لیے پرواز کرتا ھے۔
ان خیالات کا اظہار مرکزی سیکرٹری ایم ڈبلیو ایم شعبہ خواتین محترمہ فرحانہ گلزیب نے مجلس وحدت مسلمین شعبہ خواتین رحیم یار خان کے زیر اہتمام منعقدہ تیسری سیدة النساء العالمین کانفرنس سے کیا کانفرنس میں ضلع رحیم یار خان شعبہ خواتین نے کثیر تعداد میں شرکت کی اس موقع پر محترمہ فرحانہ گلزیب اور محترمہ کنیز فاطمہ نے بطور مہمان خصوصی شرکت کی اور خطاب کیا جس میں جناب سیدہ سلام اللہ علیھا کہ کردار کی روشنی میں خواتین کے معاشرے میں مثبت کردار اور ذمہ داریوں کے حوالے سے گفتگو کی گئی، کانفرنس میں سیرت زھرا ع کے عنوان سے کوئز مقابلہ بھی رکھا گیا جس میں پہلی تین پوزیشنز حاصل کرنے والی بچیوں میں انعامات تقسیم کیے گئے کانفرنس کے اختتام پر ضلعی سیکرٹری جنرل ایم ڈبلیو ایم شعبہ خواتین ضلع رحیم یار خان محترمہ تنویر فاطمہ نے اختتامی کلمات میں تمام شرکاۓ کانفرنس اور مہمانان کا شکریہ ادا کیا۔
وحدت نیوز(لاہور) یکم رجب اِمام محمد باقر(ع) کی ولادت با سعادت کے موقع پر امامبارگاہ احمد ہاؤس کیولری گراؤنڈ لاہور میں جشنِ ولادت اِمام (ع) منعقد کیا گیا۔ جشن کی تقریب سے سیکرٹری جنرل مجلس وحدت مسلمین شعبہ خواتین لاہور محترمہ حنا تقوی نے خطاب کیا۔ امام محمد باقر (ع) کا قول نقل کرتے ہوئے انہوں نے کہا کہ صلہ رحمی (رشتہ داروں سے حسنِ سلوک) اعمال کو پاکیزہ کرتی ہے، مال کو بڑھاتی ہے، بلاؤں کو دُور کرتی ہے، عمر کو دراز کرتی ہے۔
محترمہ حنا تقوی کا کہنا تھا کہ ہماری خوش قسمتی ہے کہ ہم ایسے رہبروں کیساتھ وابستہ ہیں جو خدا کے پسندیدہ ترین بندے ہیں۔ انہوں نے کہا کہ ہم سیرت آئمہ پر عمل پیرا ہو کر اپنی زندگیاں بھی کامیاب کر سکتے ہیں اور اپنی آخروی نجات کا سامان بھی پیدا کر سکتے ہیں۔
حنا تقوی کا کہنا تھا کہ یوم مادر کی تقریب میں گورنر پنجاب کی اہلیہ سمیت اہم خواتین نے شرکت کی اور تقریب میں سیرت زہرا سلام اللہ علیہا کے پہلو اجاگر کرنے کا موقع ملا۔ انہوں نے کہا کہ مجلس وحدت مسلمین خواتین کی تربیت کیلئے کوشاں رہے گی۔
اپنے خطاب میں انہوں نے امام محمد باقر علیہ سلام کی سیرت اور ماہ رجب کی فضیلت پر روشنی ڈالی۔ اس دوران سامعین و شرکائے جشن نے اُنہیں "یومِ مادر" کے کامیاب انعقاد پر مبارکباد پیش کی اور مجلس وحدتِ مسلمین شعبہ خواتین کی کاوشوں کو سراہا۔
وحدت نیوز(لاہور) مجلس وحدت مسلمین شعبہ خواتین کی جانب لاہور ایوان صنعت و تجارت میں یوم مادر کے سلسلے میں سیرت حضرت فاطمہ زہرا سلام اللہ علیہا کی مناسبت سے سیمینار کا انعقاد کیا گیا۔ سیمنار میں گورنر پنجاب چودھری محمد سرور کی اہلیہ پروین سرور نے بطور مہمانِ خصوصی شرکت کی۔
لاہور ایوان صنعت و تجارت میں سیرت حضرت فاطمہ زہرا سلام اللہ علیہا کے موضوع پر ہونیوالے سیمینار میں مجلس وحدت مسلمین پاکستان شعبہ خواتین کی مرکزی سیکریٹری جنرل اور رکن پنجاب اسمبلی سیدہ زہر انقوی ،معروف اینکر عروج ناصر، سرور شجاع، سیکریٹری جنرل مجلس وحدت مسلمین شعبہ خواتین ضلع لاہورمحترمہ حنا تقوی، ڈپٹی جنرل سیکرٹری محترمہ عظمٰی نقوی، شفا زہرا، عذرا بتول، زاہدہ طارق، دعا زہرا، سیدہ کوکب حنا، جبیں زہرا، سیدہ صباحت مشہدی، سمیعہ رضوی، لاہور چیمبر کی سابق ایگزیکٹو کمیٹی ممبر نبیلہ انتظار سمیت دیگر نے شرکت کی۔
سیکریٹری جنرل مجلس وحدت مسلمین شعبہ خواتین ضلع لاہورمحترمہ حنا تقوی کا کہنا تھا کہ سیرت حضرت فاطمہ زہرا سلام اللہ علیہا کو ملاحظہ کرنے کے بعد صنف نازک سے تعلق رکھنے والی تمام ماؤں اور بہنوں کو چاہیئے کہ وہ خود کو نہ صرف زبانی کلامی حد تک سیرت زہراء سلام اللہ علیہا کا پیروکار نہ بنائیں بلکہ عملی میدان میں بھی سیرت حضرت فاطمہ سلام اللہ علیہا پر عمل پیرا ہونے کا ثبوت دیں۔
اس موقع پر بیگم پروین سرور کا کہنا تھا کہ دین ہمارے گھر سے شروع ہوتا ہے اور اس کی بہترین مثال رسول اللہ (ص) اور ان کی پیاری بیٹی حضرت فاطمہ سلام اللہ علیہا ہیں۔ انہوں نے کہا کہ سب خواتین کو ان کی سیرت پر عمل کرنا چاہیئے تاکہ دنیا اور آخرت میں کامیاب ہو سکیں۔ ان کا کہنا تھا کہ آج وہ اپنی ماں کی دعاؤں سے یہاں تک پہنچی ہیں اور ماں باپ کی دعائیں انسان کو بہت اوپر لے جاتی ہیں اس لئے ہمیں ان کی دعائیں لینی چاہئیں۔
