وحدت نیوز(کراچی)مجلس وحدت مسلمین نے ضلع شرقی کے مزید چار حلقوں میں پاکستان تحریک انصاف اور عمران خان کے نامزد امیدواروں کی حمایت کا اعلان کردیا۔تفصیلات کے مطابق مسجد وحدت مُسلمین چشتی نگر میں ایک کارنر میٹنگ کا انعقاد کیا گیا جس میں مجلس وحدت مُسلمین کراچی کے صدر علامہ صادق جعفری نے خصوصی شرکت کی اور خطاب کیا،اس موقع پر چشتی نگر کے عوام کثیر تعداد میں شریک تھے۔

ایم ڈبلیوایم نے قائد وحدت علامہ راجہ ناصر عباس جعفری کے حکم پر پاکستان تحریک انصاف کی جانب سے حلقہ NA-236 سے نامزد اُمیدوار عالمگیر خان ، PS-99 سے نامزد اُمیدوار زین پرویز، PS-100 سے نامزد اُمیدوار محمد طحہ اور PS-101 سے نامزد اُمیدوار آغا ارسلان خان کی مکمل حمایت کا اعلان کیا۔اس موقع پر پی ٹی آئی اور عمران خان کی جانب سے نامزد اُمیدواروں نے اعتماد کے بھرپور اظہار پر مجلس وحدت مُسلمین کی قیادت اور اہلیان چشتی نگر کا تہہ دل سے شُکریہ ادا کیا۔