وحد ت نیوز(کوئٹہ) مجلس وحدت مسلمین ہزارہ ٹاؤن کوئٹہ کے جاری کردہ بیان میں کہا گیا ہے کہ واپڈا کرانی سب ڈویژن کے S.D.Oاہل ہزارہ ٹاؤن ،فیصل ٹاؤن اور گردونواح کے علاقوں سے امتیازی سلوک چھوڈ دیں اور بجلی کی فراہمی کویقینی بنائے۔گزشتہ چند دنوں سے ہزارہ ٹاؤن میں صبح 6 بجے سے شام 5بجے تک اور دیگر اوقات میں غیر اعلانیہ لوڈشیڈنگ جاری ہے ۔نیز وولٹیج کی کمی کی وجہ سے آئے دن لوگوں کا نقصان ہو رہاہے اور ٹیوب ویل نہ چلنے کی وجہ سے عوام پانی کی شدید قلت کا شکار ہیں۔اہل علاقہ نے قانونی طریقے سے اپنی شکایات بھی درج کرائی ہیں لیکن یقین دہانی کے باوجود وولٹیج اور غیر اعلانیہ طویل لوڈشیڈنگ کامسئلہ حل نہ ہو سکا ۔بیان میں کہا گیا کہ علاقہ کے تمام ملز کو بجلی فراہم کی جاتی ہے لیکن مذکورہ علاقہ کو مناسب بجلی فراہم نہ کرنے کی وجہ سے لوگ شدید پریشانی میں مبتلا ہیں۔بیان میں مزید کہا گیا کہ اگر اہل ہزارہ ٹاؤن ،فیصل ٹاؤن اور گردونواح کے علاقوں کو دیگر اہلیان کوئٹہ کی طرح بجلی فراہم نہ کی گئی تو تمام مساجد اور امام بارگاہوں سے بل جمع نہ کرانے کا اعلان کیا جائیگا اور یہ مسئلہ حل نہ ہونے تک S.D.Oکرانی سب ڈویژن اور واپڈا حکام کے خلاف بھر پو ر احتجاج کا سلسلہ شروع کیا جائیگا۔