وحدت نیوز(کوئٹہ) مجلس وحدت مسلمین اور پاکستان پیپلز پارٹی کوئٹہ کے رہنماؤں نے انتخابات کے دوران رواداری قائم رکھنے اور مثبت کردار ادا کرنے پر زور دیا ہے۔ دونوں جماعتوں کے رہنماؤں نے مجلس وحدت مسلمین بلوچستان کے صوبائی سیکرٹریٹ میں ایک ملاقات کے موقع پر ان خیالات کا اظہار کیا۔ مجلس وحدت مسلمین کے رہنماء اور پی بی 42 کے امیدوار علامہ علی حسنین حسینی، این اے 263 کے امیدوار ارباب لیاقت علی ہزارہ اور دیگر سے پاکستان پیپلز پارٹی کے رہنماء اور حلقہ پی بی 42 کے امیدوار سید داود آغا کی سربراہی میں پیپلز پارٹی کے وفد نے ملاقات کی۔

اس موقع پر دونوں جماعتوں کے رہنماؤں نے موجودہ سیاسی صورتحال پر گفت و شنید کی اور الیکشن کے دوران اخلاق کے دائرے میں رہ کر سیاسی جدوجہد کرنے، رواداری کا مظاہرہ کرنے اور سیاسی عمل میں مثبت کردار ادا کرنے پر زور دیا۔ رہنماؤں نے اس بات پر اتفاق کیا کہ حلقے کے امیدواروں کے درمیان ملاقاتوں کا سلسلہ خوش آئیند ہے، جسے جاری رہنا چاہئے۔