وحدت نیوز(اسلام آباد) مجلس وحدت مسلمین پاکستان آزاد کشمیر کے سیکرٹری جنرل علامہ سید تصور حسین نقوی الجوادی و سیکرٹری اطلاعات سید حمید حسین نقوی نے اے آر وائی نیوز چینل پر حملے اور ملک دشمن نعرے لگائے جانے کی سخت مذمت کرتے ہوئے کہا ہے کہ کسی بھی ذمہ دار سیاسی و مذہبی جماعت کی طرف سے اس طرح کے غیر جمہوری طرز عمل کی توقع نہیں کی جا سکتی۔ ارض پاک ہماری شناخت اور ہمارے اسلامی تشخص کا نگہبان ہے ۔پاکستان کے خلاف نعرے ملک دشمن طاقتوں کی تقویت کا باعث ہیں۔ان خیالات کا اظہار انہوں نے ریاستی دفتر سے جاری مذمتی بیان میں کیا ، انہوں نے کہا کہ اس وقت کہ جب پاکستان مقدمہ کشمیر لڑ رہا ہے ، مودی بلوچستان ، گلگت بلتستان اور کشمیر میں مداخلت کا کھلا اعتراف کر چکا ہے ، ایسے وقت میں ایسے اقدامات کس ایجنڈے کے تحت کیئے جارہے ہیں ؟ ایسے اقدامات مودی جیسے دشمن کو تقویت دیتے ہیں ، ملک دشمن عناصر کو لگام دینے کا وقت آ گیا ہے ،۔

انہوں نے مزید کہا کہ سیاسی و مذہبی جماعتوں کے کارکنوں کو کسی شر انگیزی کا حصہ نہیں بننا چاہیے ۔انہوں نے کہا پاکستانی میڈیااپنے فرائض کی ادائیگی پوری دیانتداری کے ساتھ کر رہا ہے ۔ملک کی تمام سیاسی و مذہبی جماعتوں کو چاہیے کہ وہ اپنے مطالبات منوانے کے لیے آئینی و قانونی راستے کا استعمال کریں۔میڈیا کے معاملات میں بے جا مداخلت نامناسب اور صحافیوں کی پیشہ وارانہ فرائض کی ادئیگی میں مداخلت ہے ۔کوئی بھی محب وطن جماعت کسی بھی ایسے اقدام کی قطعاََ حمایت نہیں کرتی جو پاکستان کی نظریاتی سرحدوں سے متصادم ہو۔انہوں نے کہا کہ اپنے حقوق کے لیے پُرامن جدوجہد مجلس وحدت مسلمین کی بنیادی پالیسی کا حصہ ہے ۔