وحدت نیوز (کوئٹہ) کرسمس کے پرمسرت موقع پر حلقہ پی بی 2 میں رہائش پزیر مسیحی برادری کیلئے خیر العمل ویلفیئر ٹرسٹ شعبہ فلاح وبہبود مجلس وحدت مسلمین پاکستان کی جانب سے راشن پیکج کی تقسیم کی گئی، ساد ہ مگر پروقار تقریب سے ایم ڈبلیوایم کے مرکزی رہنما علامہ ہاشم موسوی اور ایم ڈبلیوایم کے رکن بلوچستان اسمبلی آغا محمد رضا نے خطا ب کیا، اس موقع پر بڑی تعداد میں مسیحی برادری اور ایم ڈبلیوایم کے ذمہ داران بھی شرکت تھے، علامہ ہاشم موسوی اور آغا رضا نے اپنے خطاب میں مسیحی برادری کو ولادت حضرت عیسیٰ ؑ کے موقع پرمبارک باد پیش کی اور کہا کہ حضرت عیسیٰ ؑ مسیحی اور مسلم دونوں کے نذدیک قابل احترام ہستی ہیں، آپ پیغمبر خدا ہیں جنہوں نے بشریت کی تبلیغ اور پیغام الہیٰ کی ترویج کی ذمہ داری انجام دی ، انسانیت کی خدمت اسلام اور دیگر مذاہب میں یکساں اہمیت کی حامل ہے، ایم ڈبلیوایم سیرت انبیاء پر عمل کرتے ہوئے انسانیت کی بلاتفریق خدمت پر یقین رکھتی ہے ، آج کی یہ تقریب بھی ایسی جذبے کی عکاس ہے،راشن بیگز کی تقسیم پر  مسیحی برادری کی جانب سےایم ڈبلیوایم کا تہہ دل سے شکریہ ادا کیاگیا۔