وحدت نیوز(لاہور) مجلس وحدت مسلمین کے زیراہتمام بابائے قوم، فخر ملت تشیع، قائداعظم محمد علی جناح کے یوم وفات پر قرآن خوانی و مجلس عزا کا اہتمام کیا گیا۔ لاہور صوبائی سیکرٹریٹ شادمان میں قرآن خوانی کے بعد مجلس عزاء سے خطاب کرتے ہوئے مجلس وحدت مسلمین لاہور کے سیکرٹری جنرل علامہ حسن ہمدانی نے کہا کہ مملکت خداداد پاکستان کیلئے جو جدوجہد بابائے قوم قائداعظم محمد علی جناح نے کی، اسے رہتی دنیا تک کوئی فراموش نہیں کرسکے گا، قائد کے پاکستان کو ہم مٹھی بھر انتہا پسندوں کے ہاتھوں یرغمال نہیں بننے دیں گے، دہشتگردی کے ناسور کو جڑ سے ختم ہونے تک ہم اپنی جدوجہد جاری رکھیں گے۔ انہوں نے کہا کہ کرپشن، اقرباء پروری، رشوت ستانی اور شاہانہ طرز زندگی گزارنے والوں کا قائد کے افکار سے کوئی تعلق نہیں، آج ہمیں وہ قائد کا پاکستان نظر نہیں آرہا، جس مقصد کیلئے بابائے قوم نے مسلمانوں کی اس عظیم مادر وطن کو برصغیر کے مسلمانوں کیلئے بنایا، آج پاکستان کی بنیادوں کو کھوکھلا کرنے کیلئے کرپشن عروج پر ہے، قومی خزانے سے حکمرانوں کی عیاشیوں پر خرچ ہو رہے ہیں، غریب غریب سے غریب تر ہوتا جا رہا ہے، کرپشن ہی دہشتگردی کی اصل وجہ ہے، آج پاکستانی قوم کو اپنے محسن بابائے قوم سے یہ عہد کرنا ہوگا کہ اس مملکت خداداد سے ہم کرپشن، دہشتگردی، انتہاپسندی کے خاتمے تک میدان عمل میں رہیں گے اور قوم کے خائنوں کو انجام تک پہنچانے کیلئے کسی قربانی سے دریغ نہیں کریں گے۔ مجلس عزا میں بڑی تعداد میں ضلع لاہور کے کارکنوں اور صوبائی و ضلعی رہنماوں نے شرکت کی۔

وحدت نیوز(کراچی) مجلس وحدت مسلمین پاکستان کراچی ڈویژن کے رہنماؤں علامہ علی انور جعفری اور علامہ مبشر حسن نے کہا ہے کہ سندھ بھر میں تکفیری دہشت گردوں کیخلاف فوجی آپریشن ناگزیر ہوچکا ہے، شکار پور امام بارگاہ میں خودکش حملہ آوروں کے سہولت کاروں کیخلاف بھی کارروائی کی جائے۔ ان خیالات کا اظہار انہوں نے میڈیا کو جاری کردہ اپنے بیان میں کیا۔ رہنماؤں کا کہنا تھا کہ سندھ حکومت ماضی میں بھی شکار پور میں بھی ہونے والے خودکش حملوں کو فراموش کرچکی ہے، اگر گذشتہ دھماکوں کا نوٹس لے کر سندھ بھر میں فوجی آپریشن کیا جاتا تو آج دہشت گردوں کو یہ ہمت نہ ہوتی۔ رہنماؤں نے مزید کہا کہ سندھ کی سرزمین اولیاء کی سرزمین ہے، قلندر کی سرزمین کو دہشت گردوں کے لئے آسان ہدف بنانے والے سیاسی سہولت کاروں کو بھی قانون کی گرفت میں لایا جائے۔

وحدت نیوز(شکارپور) مجلس وحدت مسلمین پاکستان صوبہ سندہ کے سیکریٹری جنرل علامہ مقصود علی ڈومکی نے ضلع شکارپور کے شہر مدیجی، لکھی غلام شاہ، ترائی اور جاگیر شیخ کا تنظیمی دورا کیا۔ اس موقع پرانہوں نے مدیجی اور ترائی میں عوامی اجتماعات سے خطاب کیا۔

اس موقع پر خطاب کرتے ہوئے انہوں نے کہا کہ ملت جعفریہ اس وقت ایک مشکل دور سے گذر رہی ہے،  دہشت گردوں نے اب سرزمین سندہ کا رخ کیا ہے۔ شکارپور اور جیکب آباد کے سانحات، شہداد کوٹ اور خیرپور سمیت سندہ بھرمیں دھشت گردوں کے تربیتی مراکز اور سہولت کار حکومت اور ریاستی اداروں کی مجرمانہ غفلت کی نشاندہی کرتے ہیں۔ ان حالات میں ملت کی نمائندہ جماعت مجلس وحدت مسلمین نے ملت کی ذمہ دار شخصیات، علمائے کرام، خانوادہ شہداء، قومی تنظیموں کے نمائندگان ،ماتمی انجمنوں اور نوحہ خوانوں سے قومی صورتحال پر مشاورت کے حوالے سے اہم اجلاس بلایا ہے ،  صوبائی سطح پر تحفظ عزاداری اور پیغام کربلا کانفرنس ۱۸ ستمبر کو منعقد کی جارہی ہے ، جس میں علمائے کرام ، ماتمی انجمنیں اور برادر تنظیمیں شریک ہوں گے۔    
 

انہوں نے کہا کہ حکومت صوبے میں موجود دھشت گردی کے مراکز اور ٹریننگ کیمپس کے خلاف آپریشن کلین اپ کا آغاز کرے۔وزیر اعلیٰ سندہ متاثرین کو انصاف کی فراہمی یقینی بنائیں۔ اس موقع پر سابق ضلع نائب ناظم تقی عباس خان کماریو نے علامہ ڈومکی سے ملاقات کی۔

وحدت نیوز(کوئٹہ) مجلس وحدت مسلمین پاکستان کے سربراہ علامہ راجہ ناصر عباس جعفری کوئٹہ پہنچ گئے جہاں انہوں نے8اگست سانحہ کوئٹہ میں شہید ہونے والے وکلاء اور دیگر شہدا کے خانوادوں سے ملاقاتیں کیں۔علامہ ناصر عباس جعفری نے کہا کہ شہیدوں کا خون رائیگاں نہیں جائے گا۔اس ملک میں دہشت گردوں کے مکمل خاتمے تک ہم اپنی جدوجہد جاری رکھیں گے۔انہوں نے کہا اس وطن کو ہم نے امن کا گہوارہ بنانا ہے۔دشمنوں کو ان کی سازشوں میں کامیاب نہیں ہو نے دیا جائے گا۔علامہ ناصر عباس کوئٹہ میں قیام کے دوران مختلف حکومتی شخصیات سے بھی ملاقاتیں کریں گے۔ کوئٹہ سے تفتان قافلوں کی روانگی میں غیر ضروری تاخیر اور تفتان بارڈر پر درپیش مسائل کا حل ان کے ایجنڈے میں سرفہرست ہے۔یہاں یہ یاد رہا کہ پاکستان سے ہر سال مشہد اور کربلا زیارات پر جانے کے لیے بذریعہ سڑک سفر کرنے والے ہزاروں افراد کوئٹہ سے تفتان شاہراہ کو استعمال کرتے ہیں۔ گزشتہ کچھ عرصہ سے زیارات پر جانے والے زائرین کو تفتان میں مختلف مشکلات میں دانستہ طور پر الجھایا جاتا ہے جو بزرگوں ،بچوں اور خواتین کے لیے بالخصوص اذیت کا باعث بنتا ہے۔اس سلسلے میں وفاقی وزیر داخلہ چوہدری نثار سے علامہ ناصر عباس جعفری کی ملاقات بھی ہوئی جس میں انہوں نے انہوں نے اس مسئلے کے حل کرنے کے لیے مکمل تعاون کی یقین دہانی کرائی تھی۔مجلس وحدت مسلمین کے سربراہ کے دورہ کوئٹہ اسی سلسلے کی کڑی بھی ہے۔

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے شکارپور میں خود کش حملہ آور کو گرفت میں لینے پر جرات مند افراد کو خراج تحسین پیش کیا ہے ۔انہوں نے کہا کہ گرفتار ہونے والے بمبار نے جن مدارس اور شخصیات سے رابطے کا اعتراف کیا ہے حکومت ان کے خلاف فوری طور پر کاروائی کرے۔دہشت گردی کا خاتمہ میں حکومتی نیک نیتی تب ہی واضح ہو گی جب نیشنل ایکشن پلان پر اس کی روح کے مطابق عمل ہو گا۔وطن عزیز میں دیرپا امن کے قیام کے لیے اس قانون مکمل طور پر عمل درآمد کیا جائے۔اس سے قبل متعدد بار حکومت سے مطالبہ کیا جا چکا ہے کہ سانحہ جیکب آباد اور سانحہ شکار پور کے ذمہ داران کو گرفتار کیا جائے لیکن حکومت کی طرف سے عدم توجہی کا مظاہرہ کیا گیا جو ایک نئے سانحہ کا سبب بننے لگا تھا۔ ہمارا اول روز سے مطالبہ رہا ہے کہ جب تک بلوچستان اوملک کے مختلف علاقوں میں دہشت گردوں کے خلاف بھرپور فوجی آپریشن نہیں کیا جاتا تب تک امن کا قیام محض خواب و خیال ہے۔انہوں نے کہا کہ ملک میں بسنے والے ہر فرد کی جان انتہائی قیمتی ہے۔اس ملک کے باسیوں کو دہشت گردوں کی بھینٹ نہ چڑھایا جائے۔اب کھوکلے نعروں کی بجائے عملی اقدامات کا وقت آ گیا ہے۔دہشت گردوں کی کمین گاہوں کامکمل تدارک ہی دہشت گردی سے نجات کا واحد حل ہے۔ دہشت گردی کے خلاف حکومت اور عسکری اداروں کو ایک پیج پر آکرایسی موثر اور ٹھوس حکمت عملی مرتب کرنا ہو گی جس پر بلاتاخیر عمل ہو،بلوچستان، پنجاب اور اندرون سندھ میں فوجی آپریشن کے ذریعے دہشت گردوں کے خلاف بھرپور کاروائی کی جائے ۔ملٹری کورٹ میں جن لوگوں کو سزا سنائی گئی ہے اس پر فوری عمل درآمد کیا جائے ۔انہوں نے کہا کہ پوری قوم دہشت گردی کے خاتمے کی خواہاں ہے اور اس عفریت سے چھٹکارے کے لیے وطن عزیز کا ایک ایک فرد حکومت اور فوج کے شانہ بشانہ کھڑا ہو گا۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری کی ہدایات پر فخر ملت تشیع،بانی پاکستان قائد اعظم محمد علی جناح کے 68واں یوم وفات کو ایم ڈبلیو ایم نےملک بھر میں پورے عقیدت و احترام کے ساتھ منایا ۔جماعت کے مختلف صوبائی و ضلعی دفاتر میں قرآن خوانی اور مجالس کا بھی اہتمام کیا گیا۔ مجلس وحدت مسلمین سندھ کے رہنماوں علامہ مقصود ڈومکی اور علامہ مختار امامی کی قیادت میں اعلی سطح وفد نے مزار قائد پر حاضری دی اور فاتحہ خوانی کی۔اس موقعہ پربرصغیر پاک و ہند کے اس عظیم رہنما کو خراج عقیدت بھی پیش کیا گیا۔مرکزی سیکرٹریٹ اسلام آباد سمیت جماعت کے دیگر صوبائی و ضلعی دفاتر میں اس عظیم قائد کو خراج تحسین پیش کرنے کے لیے تقاریب بھی منعقد کی گئیں جہاں قائد اعظم کی زندگی کے مختلف پہلووں پر روشنی ڈالی گئی۔

اس موقعہ پر علامہ ناصر عباس جعفری نے اپنے پیغام میں کہا کہ پاکستان قائد اعظم محمد علی جناح کے حقیقی پاکستان کی تکمیل ہی ساری مشکلات سے نجات کا واحد ذریعہ ہے۔قائد نے جس پاکستان کے قیام کے لیے ایک طویل جدوجہد کی ہمارا مطالبہ بھی اسی پاکستان کا قیام ہے۔ قائد کے پر بصیرت افکار اور دانشمندانہ فرمودات پر اگر آج عمل کیا جاتا تو ملک اس طرح ان گنت بحرانوں میں نہ جھکڑا ہوتا۔ہر طرح کے خارجی اثرات سے آزاد ایسی ریاست قائد اعظم کا خواب تھا جہاں مسلمانوں کو اسلام کے اصولوں کے مطابق آزادنہ زندگی گزارنے کے مواقع میسر ہوں۔جہاں اقلیتوں کو ہر طرح کا تحفظ ملے۔ گزشتہ تین عشروں سے جاری دہشت گردی کے واقعات قائد کے نظریاتی و فکری پاکستان کو تباہ کرنے کی کوشش ہے۔جس کسی صورت کامیاب نہیں ہونے دیا جائے گا۔اس ارض پاک کوان تکفیری گروہوں سے چھٹکارا دلانا ہو گا جو اس ملک کو مخصوص مسلک کی سٹیٹ بنا کر باقی سب کو لادین ثابت کرنا چاہتے ہیں۔

انہوں نے کہا کہ قائد اعظم ایک مخلص اور قوم کا حقیقی درد رکھنے والے رہنما تھے۔ برصغیر کے مسلمانوں کی علحیدہ ریاست کے لیے انہوں نے ایک طویل جنگ لڑی اور اپنے اصولوں کی پاسداری کرتے ہوئے برصغیر کے مسلمانوں کے لیے الگ وطن حاصل کیا۔ ہمارا یہ وطن قائد کی عظیم جدوجہد اور لاکھوں قربانیوں کے نتیجے میں معرض وجود میں آیا۔ہمیں اس کی حفاظت کرنے کے لیے اسی درد اور اخلاص کے ساتھ تگ و دو کرنے کی ضرورت ہے۔قائد اعظم کے بتائے ہوئے رہنما اصولوں پر کاربند رہنے سے ہم معاشرے میں باوقار مقام حاصل کر سکتے ہیں۔انہوں نے کہا کہ ہمیں مل کر تجدید عہد کرنا ہو گا کہ اس مٹی سے ہمارا عشق مرتے دم تک قائم رہے گا ۔