وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل اور معروف عالم دین علامہ سید اقتدار حسین نقوی کے بھائی اور نانی کی رسم سوئم امام بارگاہ لاری اڈہ (شورکوٹ )میں ادا کی گئی، رسم سوئم میں مجلس وحدت مسلمین پاکستان کے مرکزی رہنمائوں سمیت جنوبی پنجاب کے تمام اضلاع کے رہنمائوں نے شرکت کی۔ علاوہ ازیں مقامی سیاسی، سماجی اور مذہبی شخصیات بھی شریک تھیں۔ رسم سوئم سے مجلس وحدت مسلمین کے مرکزی رہنما علامہ سید احمد اقبال رضوی نے خطاب کرتے ہوئے کہا کہ سیرت اہلبیت اور قرآن مجید کے احکامات پر عمل پیرا ہوکر ہی ہم دنیا اور آخرت میں کامیابی حاصل کرسکتے ہیں۔ اُنہوں نے مزید کہا کہ آج مسلمانوں قرآن واہلبیت سے دوری کی وجہ سے زوال اور پستی کا شکار ہیں، دنیا کے جن ممالک میں اہلیبیت کی سیرت اور قرآن مجید کو اپنے آئین حصہ بنایا گیا ہے وہ کامیابی کی جانب گامزن ہیں ، بدقسمتی سے ہمارے حکمران اہلبیت کی سیرت اور قرآن مجید کے احکامات سے نابلد ہیں جن کی وجہ سے ہمیں مشکلات اور پریشانی میں مبتلا ہیں۔ اُنہوں نے کہا کہ اس وقت پاکستان سمیت عالم اسلام کو اتحاد اور یکجہتی کی ضرورت ہے، دشمن اسلام اور پاکستان ایک مخصوص نظریے اور سوچ کے ذریعے ہمیں نشانہ بنارہا ہے۔ پاکستان میں دہشت گردی کے ناسور کو اتحاد اور وحدت کی طاقت سے ختم کیا جاسکتا ہے۔ اس موقع پر مجلس وحدت مسلمین کے مرکزی رہنما سید اسد عباس نقوی، سید عدیل عباس زیدی، مولانا اسد عباس آہیر، علامہ قاضی نادر حسین علوی، سید فرخ مہدی، سید جواد رضا سمیت دیگر رہنمائوں نے شرکت کی۔

وحدت نیوز(اسلام آباد) بلتستان کے معروف عالم دین علامہ شیخ حسن جوہری نے کہا ہے کہ وزیراعلٰی گلگت بلتستان حافظ حفیظ الرحمٰن بلتستان کے پرامن اور اتحاد بین المسلمین کے داعی علمائے کرام کی، تذلیل و توہین کرنا بند کریں اور اس بات کی وضاحت کریں کہ لاشوں اور قبروں کی سیاست کرنے والے علماء کون ہیں؟ اگر انہوں نے امن کے داعی علمائے کرام کے خلاف زبان بند نہ کی تو ان کو سخت ردعمل کا سامنا کرنا پڑے گا۔ میڈیا سے گفتگو کرتے ہوئے انہوں نے کہا کہ تاریخ گواہ ہے کہ بلتستان کے علمائے کرام نے لاشیں اٹھانے کے باوجود امن کا دامن ہاتھ سے نہیں چھوڑا اور ہمیشہ لوگوں کو امن کی تلقین کی۔ لیکن وزیراعلٰی حافظ حفیظ الرحمٰن امن کے قیام میں کردار ادا کرنے والے علمائے کرام کی تضحیک کر رہے ہیں، بتایا جائے کہ کس عالم نے لاشوں اور قبروں پر سیاست کی ہے۔ انہوں نے کہا کہ مسلم لیگ نون دھاندلی کے ذریعے اقتدار میں آئی ہے، یہ غنڈہ گردوں اور انتہاء پسندوں کی جماعت ہے۔ ہم یہ بڑے وثوق سے کہتے ہیں کہ حفیظ الرحمٰن بلتستان کے ساتھ ہرگز مخلص نہیں ہیں۔ وہ سابقہ ادوار کے ترقیاتی منصوبوں پر تختیاں لگانے کیلئے اس وقت اسکردو میں موجود ہیں اور دن میں کم سے کم چار یا پانچ ترقیاتی منصوبوں پر تختیاں لگا رہے ہیں اور سابق حکومتوں کے ترقیاتی منصوبوں کا کریڈیٹ خود لینے کی کوشش کر رہے ہیں۔

وحدت نیوز(چمن) ایم ڈبلیوایم کے مرکزی رہنما علامہ ہاشم موسوی کی زیر قیادت شیعہ ہزارہ عمائدین کا ایک وفد جس میں مجلس وحدت مسلمین،ہزارہ قومی جرگہ،شیعہ علماء کونسل اور پیپلز پارٹی(شعبہ علمدارروڈ) کے سربراہان نے چمن شہر میں وفد نے سانحہ کوئٹہ کے شہداء کے لواحقین کے گھروں میں جا کر تعزیت کی۔اے این پی کے صوبائی سربراہ اصغرخان اچکزئی کی رہائشگاہ میں جم غفیر کی موجودگی میں علامہ سید ہاشم موسوی نے اپنے مختصر خطاب میں سانحہ کوئٹہ کے دلخراش واقعہ کی مذمت کرتے ہوئے اتحاد بین المسلمین کی ضرورت پر زور دیا۔انہوں نے مزید کہا کے اب وقت آگیا ہے کہ شیعہ سنی مسلمان اپنے مشترکہ دشمن یعنی تکفیری سوچ رکھنے والے عناصر کو پہچان لیں۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کوئٹہ میں دہشت گردی کے المناک واقعہ کے دوسرے ہی دن بعد ہونے والے بم دھماکہ پر گہری تشویش کا اظہار کرتے ہوئے کہا ہے کہ انتہا پسند عناصر سیکورٹی اداروں کے لیے چیلنج کی شکل اختیار کر تے جا رہے ہیں۔ریاستی اداروں کی یہ بے بسی پوری قوم کے اضطراب کا باعث ہے۔عوام یہ سوچنے پر مجبور ہے کہ دہشت گردی سے نمٹنے اور نیشنل ایکشن پلان پر عملدرآمدکے لیے سیاسی و عسکری قوتیں اگر ایک پیج پر ہیں تو پھرکالعدم جماعتوں کے خلاف فوری آپریشن میں کونسی رکاوٹ حائل ہے۔حکمران اور فوج دہشت گردوں اور ان کے سہولت کاروں کے خلاف کاروائی کرے پوری قوم ان کا ساتھ دے گی۔دہشت گردی کے عفریت کو جڑ سے اکھاڑ پھینک کر ملک کو ترقی و استحکام کی راہ پر گامزن کرنے کا اب وقت آ گیا ہے۔ تاکہ وطن عزیزکو قائد کے خوابوں کے مطابق ایک پُرامن اور عظیم ریاست بنایا جا سکے۔

انہوں نے کہا کہ بلوچستان سمیت ملک بھر میں دہشت گردوں کے خلاف بھرپور آپریشن سے ہی انتہا پسندی کے خلاف حکومت کی غیر سنجیدگی کے تاثر کو زائل کیا جا سکتا ہے ۔اس وقت وطن عزیز اپنے نازک ترین دور سے گزر رہا ہے۔بیرونی خلفشار،داخلی جارحیت اور عدم تحفظ کے بڑھتے ہوئے احساس نے ملک کی سالمیت واستحکام کو شدید خطرات سے دوچار کر رکھا ہے۔ملک کی تمام سیاسی و مذہبی جماعتوں کو انتہا پسندی کے خلاف ایک موقف اختیار کرتے ہوئے فوری اور فیصلہ کن آپریشن کی راہ ہموار کرنا ہو گی۔کسی بھی کالعدم جماعت اورگروہ جو ملکی مفادات کے منافی سرگرمیوں میں مصروف ہے کو انصاف کے کٹہرے میں لایاجائے۔

 انہوں نے کہا کہ حکومت کی جانب سے دہشت گردوں کے خلاف کاروائی کا اظہار جس بھرپور عزم سے کیا گیا ہے اس عزم کے ساتھ اس پر عمل درآمد بھی انتہائی ضروری ہے۔متعدد بارحکومتی سطح پر اس بات کو دھرایا جا چکا ہے کہ بلوچستان میں دہشت گردی کی کارروائیوں میں کالعدم مذہبی جماعتیں ملوث ہیں جنہیں بھارتی خفیہ ایجنسی را اور دیگر ملک دشمن قوتیں وسائل فراہم کر رہی ہیں۔لیکن یہ امرحیران کن ہے کہ اُن غیر ملکی ایجنسیوں اور کالعدم جماعتوں کے خلاف اقدامات کیوں نہیں کیے جاتے۔جن کا اصل ہدف اقتصادی راہدری اور وطن عزیز کی ترقی و خوشحالی کی راہ میں روڑے اٹکانا ہے۔ان ناپاک عزائم کو ناکام بنانے کے لیے انتہاپسندوں کی بیخ کنی حکومت کی اولین ترجیح قرار دی جانی چاہیے۔

وحدت نیوز(لاہور) مجلس وحدت مسلمین لاہور کے سیکرٹری جنرل علامہ حسن ہمدانی نے لاہور ڈویژن کے اجلاس سے خطاب کرتے ہوئے کہا کہ 2 ستمبر کو وزیراعلیٰ ہاوس کے سامنے ہر حال میں دھرنا ہوگا، پنجاب میں ہمارے کیخلاف انتقامی کارروائیاں اب بھی جاری ہیں، ہماری جدوجہد مظلومین کے حقوق کیلئے ہے، ہمارے مطالبات کی حمایت تمام سیاسی و مذہبی جماعتیں کر چکی ہیں، حکمران جماعت پنجاب کو ریاست آل شریف سمجھتی ہے، ہم پنجاب کے بادشاہوں کیخلاف مظلومین پنجاب کی آواز بن کر نکلیں گے، ہماری پرامن اور جمہوری جدوجہد کو سبوتاژ کرنے کی کوشش کرنیوالے خود ذمہ دار ہونگے۔ علامہ حسن ہمدانی نے اپنے خطاب میں کہا کہ دہشتگردی کیخلاف جنگ کو جیتنے کیلئے ہمیں ان دہشتگردوں کے سہولت کار، ہمدرد اور سیاسی سرپرستوں پر ہاتھ ڈالنا ہوگا، پنجاب میں اب بھی کالعدم انتہا پسندوں کو مکمل آزادی حاصل ہے، حکومت کالعدم جماعتوں کیخلاف بلاتفریق کارروائی کرے، کوئٹہ میں کالعدم جماعتوں کے اخبارات میں آئے روز دھمکی آمیز اور نفرت سے بھری خبریں پڑھ کر لوگ حیران ہوتے ہیں، کیا یہ پاکستان کا حصہ نہیں؟ ان نفرت کے پجاریوں کیخلاف کارروائی کیلئے ہمیں مزید کتنے ہزار پاکستانیوں کا خون درکار ہوگا؟ ریاست مصلحت پسندی چھوڑ کر پاکستان کی سلامتی اور بقا کی جنگ کو لڑے قوم ساتھ دے گی۔ اجلاس میں سید حسین زیدی، سید زین زیدی، رانا ماجد علی، نجم الحسن، محمد رضا، نقی مہدی سمیت دیگر رہنما شریک تھے۔

وحدت نیوز(اسلام آباد) مجلس وحدت مسلمین پاکستان کے سربراہ علامہ راجہ ناصر عباس جعفری نے کہا ہے کہ نیشنل ایکشن پلان کے تمام نکات پر جب تک عمل نہیں کیا جاتا تب تک دہشت گردی کے عفریت سے چھٹکارا ممکن نہیں۔وفاقی دارالحکومت سمیت ملک بھر میں دہشت گردوں کے سہولت کار داعش و طالبان کی سرعام حمایت کر رہے ہیں۔ملک کے مختلف علاقوں میں کالعدم جماعتوں کی سرگرمیاں بلا روک ٹوک جاری ہیں۔ جب تک انہیں نکیل نہیں ڈالی جائے گی حکومت دعوے محض طفل تسلی ہی ثابت ہوں گے۔نیشنل ایکشن پلان کے حوالے سے وزیر اعظم کی سربراہی میں ہونے والے اجلاس پر تبصرہ کرتے ہوئے انہوں نے کہا کہ دہشت گردی کے خلاف وزیر اعظم کا بیان خوش آئند تب ہی قرار دیا جا سکتا ہے جب اس پر عمل درآمد ہو گا۔

انہوں نے کہا کہ سانحہ کوئٹہ کے بعد دہشت گردی کے خلاف حکومت کے عزم نو کا عملی اظہار ہو تو پھر دہشت گردی کے خلاف جنگ یقیناً جیتی جا سکتی ہے۔دہشت گردی کے خلاف مجلس وحدت مسلمین کا موقف ہمیشہ شفاف اور واضح رہا ہے۔دہشت گرد قوتوں سے ملک کو درپیش خطرات کے حوالے سے ہم نے جن خدشات کا اظہار کیا تھا وہ درست ثابت ہو رہے ہیں۔انتہا پسند تکفیری گروہوں کے خلاف حکومت کو عوام کی مکمل تائید حاصل رہے گی۔اگر حکومت ضرب عضب کو کامیاب بنانے میں سنجیدہ ہے تو پھر ملکی مفاد کے منافی سرگرمیوں میں ملوث مسلح گروہوں کے خلاف بھرپور کاروائی کے ساتھ مذہب کے لبادے میں چھپے ہوئے ان انتہا پسند تکفیری گروہوں سے بھی آہنی ہاتھوں سے نمٹا جانا چاہیے جو دہشت گرد ساز فیکٹریوں کے مالک ہیں۔انہوں نے کہا کہ آج کا دن قوم کے لیے یوم سوگ ہے۔ ایک ہی دن میں کوئٹہ جیسے شہر میں 70 سے زائد جنازے اٹھناکوئی معمولی سانحہ نہیں۔