وحدت نیوز(راولپنڈی)مجلس وحدت مسلمین پاکستان کے چیئرمین علامہ راجہ ناصرعباس جعفری حفظہ اللہ نے آج اسلام آباد ہائیکورٹ کی اجازت کے بعد چیئرمین پاکستان تحریک انصاف سابق وزیر اعظم عمران خان سے اڈیالہ جیل راولپنڈی میں خصوصی ملاقات کی ہے ۔ واضح رہے کہ 5 اگست کو گرفتاری کے بعد کسی بھی سیاسی ومذہبی قائد کی عمران خان سے یہ پہلی ملاقات ہے۔

ملاقات کے بعد اڈیالہ جیل کے باہر میڈیا سے گفتگو کرتے ہوئے علامہ راجہ ناصرعباس نے کہا کہ میں نے ہائی کورٹ سے اجازت لے کر سابق وزیراعظم عمران خان سے آج ملاقات کی۔ عمران خان اپنے افکار اپنے نظریات میں پہلے سے زیادہ اٹل اور اعصابی لحاظ سے مزید مضبوط نظر آئے۔ خدا پر ایمان اور توکل پر ان کے اندر غیر معمولی اضافہ ہوا ہے۔ان کی شجاعت ،بہادری اور امید ایسے شخص کی طرح ہیں جس کے دل میں سوائے خدا بزرگ وبرتر کے کسی کا ڈر نہیں۔وہ اپنی اس استقامت کو آزادی کی جدوجہد کا نام دیتے ہیں،ان کی خواہش ہے کہ  پارلیمان ،عدلیہ اور تمام دیگر ادارے اپنے آئینی حیثیت اور باوقار مقام رکھتے ہوں۔پارلیمنٹ کے نمائندے عوام کے حقیقی نمائندے ہوں۔ کرپشن، دھونس دھاندلی اور جبر و ظلم کی بنیاد پر وہ اسمبلیوں تک نہ پہنچے ہوں۔ یہ اداروں کی آزادی کی جنگ اقوام عالم میں مادر وطن پاکستان کے باوقار اور خودمختار مقام کے لیے ہے۔عمران خان اس قدر مطمئن ہیں کہ انہیں ڈرانے والے آج خود پریشان ہیں۔

عمران خان نے عوام کے لیے پیغام دیا ہے کہ یہ آزادی کی جنگ ہے جس کے لیے سب کو گھروں سے نکلنا ہو گا اور اسے 8 فروری کو ووٹ کی طاقت سے جیتنا ہو گا۔جیل کی زندگی نے انہیں خدا کے زیادہ نزدیک کر دیا ہے۔ انہوں نے مفاہیم کے ساتھ کلام باری تعالیٰ کا مطالعہ شروع کر رکھا ہے۔ہمیں خوشی ہے کہ ہم جس شخص کے ساتھ کھڑے ہیں وہ دلیر ہے اور وطن عزیز کے ساتھ باوفا ہے۔یہ شخص ہمیں ایک مضبوط اور غیرت مند قوم بنانے کے لیے ڈٹا ہوا ہے۔ اس سے پہلے ہمیں قومی،لسانی، صوبائی، مسلکی اور مختلف عصبیتوں کا شکار کر کے ٹکروں میں تقسیم کیا گیا تاکہ ہم قوم نہ بن سکیں ۔ عمران خان کی دیانت داری اور دلیری کے باعث لوگوں کے دلوں میں ان کی محبت دوڑ رہی ہے۔ساری قوم آزادی و حریت کی جنگ لڑنے والے اس عظیم رہنما کے پیچھے کھڑی ہے۔

ملک کو لاقانونیت، غیر آئینی اقدامات اور اختیارات کے ناجائز استعمال نے یرغمال بنا رکھا ہے۔ ہم قانون اور آئین کی بالادستی دیکھنا چاہتے ہیں۔ماضی کے حکمرانوں نے ملک میں لوٹ کھسوٹ کر کے اسےتباہی کے دہانے پر پہنچا دیا ہے۔ اب انہیں پاکستان کو مزید لوٹنے کی اجازت نہیں دیں گے۔اب پاکستان کے عوام نے اس ملک کے معاملات کو طے کرنا ہے۔استعماری طاقتوں کے طے شدہ فیصلوں پر لبیک کہنا غلامانہ شعار ہے۔ ہماری جدوجہد وطن عزیز کی داخلی خودمختاری کی جدوجہد ہے۔امریکہ و اسرائیل غزہ کے تیس ہزار معصوم بچوں کے قاتل ہیں۔عمران خان کی آوز ان طاغوتی طاقتوں سے آزادی کی آواز ہے اور ہم آزادی کے اس سفر میں عمران خان کے ساتھ کھڑے ہیں۔

وحدت نیوز(پاراچنار) ایم ڈبلیو ایم شعبہ خواتین کی مرکزی صدر نے اپنے دورہ پارا چنار کے دوران شہادت امام موسی کاظم علیہ سلام کی مناسبت سے مجلس عزا سے خطاب کیا جس میں انہوں نے امام ہفتم کی سیرت اور ان کی سیاسی بصیرت و مجاہدانہ کردار پر گفتگو کی ان کا کہنا تھا کہ امام موسی کاظم علیہ سلام نے مشکل ترین حالات میں باطل اور ستمگاروں کے ظلم ستم کا سامنا کیا اور پیچیدہ ترین حالات میں بھی دین اسلام اور ھدایت کا پیغام اپنے چاہنے والوں تک پہنچایا یہ وہ عظیم کردار ہے جو آج کے جبر و استبداد کے دور میں ہماری رہنمائی کرتاھے۔

 اپنے خطاب کے دوران محترمہ معصومہ نقوی نے ملک میں ہونے والے عام انتخابات کے حوالے سے کہا کہ یہ ہمارا سیاسی ، معاشرتی اور آئینی فریضہ ہے کہ اپنے ووٹ کا استعمال کر کے صالح اور محب وطن افراد کو اسمبلیوں تک پہنچائیں۔ ان شاء اللہ تمام مومنات 8 فروری کی تاریخ میں گھروں سے نکلیں اور ایم ڈبلیوایم نامزد امیدواروں کو خیمے کے نشان پرمہر لگا کر کامیاب بنائیں ۔ مجلس کے اختتام پر شھیدہ ڈاکٹر رقیہ کی والدہ سے ملاقات کی اور شھیدہ کی روح کو فاتحہ ھدیہ کیا۔

وحدت نیوز(آرٹیکل)علامہ راجا ناصر عباس صاحب کا عدت کیس میں شرعی قواعد کی پائمالی کے حوالے سے ٹھوس اور مدلل موقف نظر سے گزرا۔ علما شریعت کے محافظ ہیں انہیں کسی کی پسند ناپسند کی بجائے شریعت کا موقف بیان کرنا اور قوم کی رہنمائی کرنی چاہیے۔ اس موقع پر سکوت معاشرے کی رہنمائی جیسی سنگین ذمہ داری سے فرار کے مترادف ہے۔ زندہ باد راجا ناصر!

علامہ راجا ناصر صاحب سے ہمارا پہلا براہ راست رابطہ 2017 کے آس پاس ہوا۔ ہم ان کے وژن سے کافی متاثر ہوئے۔ گزشتہ 10 سے 15 سال کے دوران قوم شیعہ کو من حیث قوم جو چند بڑے بحران پیش آئے ان میں کوئٹہ میں شیعہ نسل کشی کی بدترین لہر، پارہ چنار جیسے محب وطن خطے کا دہشتگردوں کے ذریعے طویل محاصرہ، عزاداری سید الشہداء کے خلاف خصوصا راولپنڈی میں جلوس عزا کو روکنے کی بڑی منصوبہ بندی، دو عدد متنازعہ ترین قانون سازیوں کی کوشش جن کے ذریعے قوم شیعہ کے مذہبی حقوق خصوصا عقیدے کے اختیار اور اظہار کے بنیادی آئینی حق پر قدغن ایجاد کرنا مقصود تھا، تعلیمی نصاب میں شیعہ طلبہ کو ان کے عقیدے و تعلیمات کے برخلاف عقائد و تعلیمات پڑھانے پر مجبور کرنے کی کوشش وغیرہ نمایاں بحران ہیں۔ ان تمام بحرانوں میں علامہ راجا ناصر عباس کو ہر وقت میدان میں پایا۔ کوئٹہ میں جاری نسل کشی کے خلاف علامہ صاحب کی جماعت کے ملک گیر احتجاج اور پارہ چنار کے محاصرے کے خلاف علامہ صاحب کی طرف سے بھوک ہڑتال جیسے اقدامات نے ان مسائل کے حل میں خاطر خواہ کردار ادا کیا۔

تعلیمی نصاب کے مسئلے میں مجھے وہ دن اچھی طرح یاد ہے جب ہم سرکاری نصاب کمیٹی میں شامل ایک شیعہ رہنما کے پاس پہنچے تو وہ حتمی دستخط کرنے جانے کے لیے تیار بیٹھے تھے۔ عرض کیا قبلہ! تحفظات تو اپنی جگہ موجود ہیں آپ کیونکر دستخط کرنے جارہے ہیں؟ ان کی بے چینی دیکھ کر معلوم ہوا وہ شدید دباو میں ہیں؛ میں نے فوری طور پر علامہ ناصر عباس صاحب کو فون کیا انہوں نے اس شیعہ رہنما سے بات کی اور کہا اپنے آئینی حقوق پر ڈٹ جائیں۔ ساری قوم بھی آپ کو چھوڑ جائے میں  راجا ناصر تمہارے ساتھ کھڑا ہوں گا۔ اگلے دن جب ہم علامہ صاحب سے ملے تو بہت پریشان تھے کہ ہماری قوم کے بچوں پر یہ جبر کیوں مسلط کیا جا رہا ہے؟ جائیں میری طرف سے قوم کے ہر رہنما اور دانشور کو کہیں آواز اٹھاو راجا ناصر کو اس جدوجہد میں پیچھے نہیں پاو گے لیکن افسوس ہم بطور قوم اس موقع پر اکھٹے نہ ہوسکے۔ راجا ناصر اکیلا لڑتا رہا کوئی ساتھ کھڑا ہونے کو تیار نہیں تھا۔ جن کے پاس حکومتی کمیٹیوں میں نمائندگی تھی وہ جان کو خطرہ کا بہانہ بنا کر پتلی گلی سے نکل گئے۔

متنازعہ بل سامنے آیا تو پہلی آواز راجا ناصر نے ہی اٹھائی کہ یہ میری قوم کے عقیدے کے اظہار پر پابندی کی سازش ہے یہ دشمنان رسول کے چہروں پر نقاب ڈالنے کی کوشش ہے، قوم اٹھ کھڑی ہوئی لیکن راجا ناصر نے طاقت ہونے کے باوجود موومنٹ کو لیڈ کرنے کا موقع قوم کے بزرگ رہنماؤں کو دیا۔ ہم نے اس موقع پر علامہ صاحب کی شجاعت درایت اور خصوصا صبر دیکھا وہ بلا کی شخصیت پائے گئے۔ اس تحریک کے دوران کئی مواقع ایسے آئے کہ وہ اپنوں کی زیادتیاں برداشت نہ کرتے اور اکیلے تحریک کو لیڈ کرتے تو قابل توجیہ تھا لیکن انہوں نے صبر کیا اور قوم کا اتحاد و اتفاق سبوتاژ نہیں ہونے دیا۔

حکومت کی تبدیلی کے بعد انتخابات کا ماحول بنا تو جب دیگر مذہبی جماعتیں اور شخصیات سیاسی جماعتوں کے ساتھ اپنے اپنے حصے طے کررہی تھیں اس وقت راجا ناصر نے تحریک انصاف کے چیرمین کے ساتھ قومی خودمختاری، پائیدار جمہوریت کے قیام اور آزادانہ پالیسیوں جیسے بنیادی اصولوں پر اتحاد کیا۔ یہ خود میں ایک غیر معمولی اقدام ہے اور یہی ایک حقیقی نظریاتی شخصیت سے توقع بھی کی جاسکتی ہے۔ مجھے یاد ہے اس دوران کئی بار ان سے بات ہوئی کہ علامہ صاحب انتخابات آرہے ہیں سیٹ ایڈجسٹمنٹ اور ان جیسے ذیلی امور پر مطالبات ت انصاف کے سامنے رکھے جائیں تو علامہ صاحب ہر بار کہتے دوستو ہم جس مکتب سے تعلق رکھتے ہیں وہاں دوست جب مشکل میں ہوتو اس سے مطالبے نہیں کیے جاتے اس کے ساتھ کھڑا ہوا جاتا ہے اور یہ ہماری اپنی نسلوں کی بہتری کی جنگ ہے اس میں ہم مطالبے کرکے تحریک کو متاثر نہیں کرنا چاہتے۔

میں نے علامہ شہید عارف حسین الحسینی کو نہیں دیکھا ہوا وہ ہمارے بچپن میں شہید ہوئے ؛ ہم نے شہید کو ان کے آثار سے پہچانا اور درک کیا ہے مجھے علامہ راجا ناصر عباس میں شہید عارف حسین رح جیسا ملی درد، شجاعت، قومی غیرت اور جذبہ نظر آتا ہے۔

تمام تر دباؤ، سازشوں اور ان کو توڑنے کی کوششوں کے باوجود علامہ راجا ناصر اپنی جماعت سمیت ان انتخابات میں تحریک انصاف کے ساتھ کھڑے ہیں آپ بطور شیعہ راجا ناصر صاحب کی جماعت کے رکن ہیں یا نہیں؟ انہیں پسند کرتے ہیں یا نہیں؟ لیکن ایک بات ضرور مانتے ہوں گے ان حالات میں وہ شخص آپ کی مکتبی غیرت، حمیت اور اصول کا سب سے بڑا علمبردار ہے۔

علامہ راجا ناصر وفا، شجاعت اور صبر و استقامت کی علامت بنتا جا رہا ہے۔ ممکن ہے ہم میں سے کوئی راجا ناصر کی سیاسی حکمت عملی اور جدوجہد کے نتائج جانچنے کے لیے انتخابات کے نتائج کا انتظار کررہا ہو لیکن ہم سمجھتے ہیں راجا ناصر انتخابات سے پہلے ہی کامیاب ہو چکا ہے اس نے اپنے مکتب اور نظریے کے لیے قبولیت پیدا کرلی ہے، ہر ملی اور قومی بحران میں میدان میں حاضر رہنے سے وہ ایک معتمد اور قابل اعتماد شخصیت بن کر ابھرے ہیں۔ ایک نطریاتی شخص کے لیے اس سے بڑی کامیابی کیا ہوسکتی ہے؟۔