وحدت نیوز(کوئٹہ) مجلس وحدت مسلمین بلوچستان کے سیکریٹری جنرل علامہ مقصود ڈومکی نے کہا ہے کہ عوامی سیلاب کے سامنے اب یہ حکومت زیادہ عرصہ قائم نہیں رہ سکے گی۔ ماڈل ٹاؤن کے شہداء کا خون رائیگاں نہیں جائے گا۔ افسوس کی بات ہے کہ اب تلک ورثاء شہداء کی جانب سے سانحہ ماڈل ٹاؤن کی ایف آئی آر تک درج نہیں کی گئی اور اس سانحے کے ذمہ داران کے خلاف کوئی کاروائی نہیں کی گئی۔ شہدائے ماڈل ٹاؤن کا خون حکومت پر قرض ہے۔ انہوں نے حکومتی رکاوٹوں اور جبر و تشدد کے باوجود ماڈل ٹاؤن میں یوم شہداء کے انعقاد پر تمام رکن جماعتوں کو مبارک باد دیتے ہوئے کہا کہ ریاستی ہتھکنڈے ان کارکنوں کو نہ روک سکے۔ جو عزم انقلاب لے کر میدان میں آئے ہیں۔ انہوں نے پنجاب بھر میں ایم ڈبلیو ایم کارکنوں اور ایم ڈبلیو ایم پنجاب کے رہنماء علامہ حسن رضا ہمدانی کی گرفتاری کی مذمت کرتے ہوئے ان کی فوری رہائی کا مطالبہ کیا۔ نواز حکومت کا جانا ٹھہر گیا ہے، حکومت بوکھلاہٹ کا شکار ہو کر سنگین غلطیوں کی مرتکب ہونے جا رہی ہے۔ اب وقت آ چکا ہے کہ حزب اختلاف متفق ہو کر مشترکہ جدوجہد کا لائحہ عمل تیار کرے۔ عوامی سیلاب کے سامنے اب یہ حکومت زیادہ عرصہ مقاومت نہیں کر پائے گی۔