The Latest
وحدت نیوز(بیروت) فلسطین فاؤنڈیشن پاکستان کا چھ رکنی وفد فلسطین فاؤنڈیشن پاکستان کے مرکزی سیکرٹری جنرل صابر ابو مریم کی قیادت میں عالمی فلسطین کانفرنس ’’الوعد الحق‘‘ (سچا وعدہ) میں شرکت کے لئےبیروت پہنچ گیاہے، وفد میں جماعت اسلامی پاکستان کے رہنما و سابق رکنی قومی اسمبلی محمد حسین محنتی، پاکستان مسلم لیگ نواز کے رہنما اور وفاقی وزیر برائے مذہبی امور کے ترجمان پیرزادہ ازہر علی شاہ ہمدانی، جماعت اہلسنت پاکستان کے مرکزی رہنما علامہ شبیر انجم، مجلس وحدت مسلمین پاکستان کے مرکزی رہنما مولانا باقر زیدی اور معروف سماجی کارکن حیدر زیدی شامل ہیں۔ واضح رہے کہ علمائے مقاومت کے عالمی اتحاد کی جانب سے منعقد ہونے والی دو روزہ عالمی فلسطین کانفرنس کا انعقاد لبنان کے دارالحکومت بیروت میں کیا جا رہا ہے، جہاں مفتی اعظم القدس و فلسطین سمیت مفتی اعظم لبنان، عراق، شام، یمن سمیت عرب اور افریقی ممالک کے جید علمائے کرام، اسکالرز اور تحریک آزادی فلسطین کے لئے سرگرم عمل جماعتوں بشمول حماس، حزب اللہ، جہاد اسلامی، پاپولر فرنٹ، پی ایل او اور دیگر کے اعلٰی سطح کے قائدین شریک ہیں ۔
وحدت نیوز(گلگت) کامیاب ہڑتال سے ثابت ہوتا ہے کہ گلگت بلتستان کے عوام کو نواز لیگ اور پیپلز پارٹی کی عوام کش پالیسیاں منظور نہیں۔گلگت بلتستان کے عوام پر جبری طور پر ٹیکس عائد کرنے کا کوئی جواز نہیں،خطے کے عوام ستر سال سے آئینی تشخص کیلئے جدوجہد کررہے ہیں۔
مجلس وحدت مسلمین گلگت بلتستان شعبہ خواتین کی رہنما ورکن اسمبلی بی بی سلیمہ نے کہا ہے کہ خطے کے آئینی تشخص کے بغیر ٹیکسوں کا نفاذ یہاں کے عوام کے ساتھ بھونڈا مذاق ہے۔گلگت بلتستان کے عوام اپنا آئینی تشخص مانگ رہے ہیں جبکہ حکمرانوں کو کرپشن سے فرصت ہی نہیں ملتی، مختلف اداوار میں حقوق کے نام پر کمیٹیاں تشکیلج پاتی ہیں لیکن آج تک کسی حکومت نے گوارا نہیں کیا کہ گلگت بلتستان کے عوام کے احسانات کا بدلہ چکائیں۔ستم ظریفی یہ کہ کرپٹ حکمران ایک نااہل شخص کو بچانے کیلئے تو راتوں رات آئین تبدیل کرتے ہیں لیکن گلگت بلتستان کے عوام کو ان کا جائز حق دینے کیلئے کوئی تیار نہیں۔
انہوں نے کہا کہ آئینی تناظر میں گلگت بلتستان کے عوام پر جبری طور پر ٹیکس عائد کرنے کا کوئی جواز نہیں اور عوام نے کامیاب ہڑتال کرکے ثابت کردیاہے کہ وہ حقوق دیئے بغیر جبری ٹیکس کو ہرگز قبول نہیں کرینگے۔
وحدت نیوز(مانٹرنگ ڈیسک) رہبر معظم انقلاب اسلامی آیت اللہ العظمٰی سید علی خامنہ ای نے لبنان میں دوسری عالمی علماء کانفرنس کے نام اپنے پیغام میں غاصب صیہونی حکومت کے خلاف جدوجہد جاری رکھنے پر تاکید کی ہے۔ رہبر انقلاب اسلامی نے مزاحمتی تحریک کی عالمی علماء یونین کے سربراہ شیخ ماہر حمود کے نام اپنے پیغام میں اسرائیل کے خلاف جدوجہد اور جہاد پر تاکید کرتے ہوئے کہا کہ فلسطین کی آزادی اور نجات کے مقدس جہاد کے سلسلے میں اللہ تعالٰی کا وعدہ قطعی اور یقینی ہے۔ رہبر معظم انقلاب اسلامی نے اپنے پیغام میں کہا ہے کہ فلسطین کی آزادی اور نجات کے سلسلے میں اسلامی ممالک کے علماء، دانشوروں اور سیاستدانوں پر اہم ذمہ داری عائد ہوتی ہے۔ اس مقدس جہاد میں اسلام اور مسلمانوں کی فتح یقینی ہے اور آج علماء اور دانشوروں کی کانفرنس اس سلسلے کی اہم کڑی ہے۔ لبنان میں دوسری عالمی علماء کانفرنس بیروت میں فلسطین کے عنوان سے آج شروع ہوئی، جو کل تک جاری رہے گی۔ شیخ ماہر حمود نے کہا ہے کہ مزاحمتی تحریک کی عالمی علماء یونین کی کانفرنس بالفور اعلامیے کے سو سال پورے ہونے کے موقع پر منعقد ہو رہی ہے اور اس کا مقصد یہ بتانا ہے کہ فلسطین علاقے کا اہم ترین مسئلہ ہے۔ واضح رہے کہ بالفور اعلامیہ یا ڈکلیریشن 1917ء میں اس وقت کے برطانوی وزیر خارجہ آرٹر جیمز بالفور نے صیہونی سیاستدان اور برطانوی رکن پارلیمنٹ والٹرروٹشیلڈ کو خطاب کرتے ہوئے جاری کیا تھا۔ جس میں سرزمین فلسطین میں اسرائیلیوں کو بسانے کی بات کی گئی تھی اور یہ اعلامیہ قدس کی غاصب اور جابر صیہونی حکومت کی تشکیل کا نقطہ آغاز شمار ہوتا ہے۔
وحدت نیوز(گلگت) ڈوگرا حکومت کے پنجوں سے خطہ گلگت بلتستان کو آزاد کروانے والے غازیوں، مجاہدوں اور شہداء کو خراج تحسین پیش کرتے ہیں۔ستر سال گزرنے کے باوجودوفاق کا سرزمین گلگت بلتستان کے آئینی تشخص کومعین نہ کرنا لمحہ فکریہ ہے۔گلگت بلتستان کو آئینی تشخص دیئے بغیر پاک چائنہ اقتصادی کوریڈور کے راستے میں بہت سی دشواریاں درپیش ہونگی۔
مجلس وحدت مسلمین گلگت بلتستان کے ترجمان محمد الیاس صدیقی نے جشن آزادی گلگت بلتستان کے موقع پر قوم کے نام اپنے پیغام میںکہا کہ کرنل حسن خان اور بابر خان کی سرکردگی میں خطہ گلگت بلتستان کو ڈوگرا کی غلامی سے آزاد کرانے والے قومی ہیروز کی لازوال قربانیوں کو ہمیشہ یاد رکھا جائیگا جنہوں نے اپنے جان ومال کی پرواہ کئے بغیر زمانے کے طاغوت سے ٹکر لیا اور اٹھائیس ہزار مربع میل پر محیط خطہ گلگت بلتستان کو ڈوگراہ فوجیوں کے تسلط سے آزاد کروایا۔انہوں نے کہا کہ انہی قومی ہیزوز کی قربانیوں کا ثمر ہے کہ آج مملکت خداداد پاکستان کی سرحدیں ہمسائیہ ملک چین کے ساتھ منسلک ہوگئیں اور سی پیک جیسے میگا منصوبے کیلئے راستہ ہموار ہوگیا۔قیام پاکستان کیلئے قوم نے جس قدر قربانیاں دی ہیں گلگت بلتستان کے عوام نے استحکام پاکستان کیلئے اس سے کئی گنا زیادہ قربانیاں دی ہیں۔افسوس کے ساتھ کہنا پڑتا ہے کہ نااہل حکمرانوں نے ہمارے قومی ہیروز کے احسانات اور قربانیوں کو یکسر بھلا دیا ہے اور رفتہ رفتہ ہمارے قومی یادگاروں کو مٹایا جارہا ہے ۔
انہوں نے کہا کہ جس والہانہ عقیدت اور محبت کے ساتھ یہاں کے عوام نے ریاست پاکستان کا ساتھ دیا اور استحکام پاکستان کیلئے آج بھی پے درپے قربانیاں دے رہے ہیں اس کا صلہ آج تک نہیں ملا ہے ۔انہوں نے ریاستی مشینری اور حکومت وقت سے مطالبہ کیا کہ وقت ضائع کئے بغیر خطہ گلگت بلتستان کی آئینی حیثیت کا تعین کیا جائے اور علاقے کے عوام میں پائی جانیوالی بے چینی کاازالہ کیا جائے۔
وحدت نیوز(کوئٹہ) مجلس وحدت مسلمین پاکستان صوبہ بلوچستان کے ڈپٹی سکریٹری جنرل کیپٹن حسرت اللہ چنگیزی، صوبائی رہنما علامہ ولایت حسین جعفری، کوئٹہ ڈویژن کے سکریٹری جنرل سید عباس علی، ڈیٹی سکریٹری جنرل رجب علی، حاجی عمران علی ہزارہ، رشید علی طوری، کامران حسین ہزارہ، ضلعی سکریٹری جنرل جعفر علی جعفری، ضلعی ڈپٹی سکریٹری جنرل فدا حسین ہزارہ، ودیگر زمہ داران نے اپنے مشترکہ بیان میں حکومت اور انتظامیہ پر زور دیتے ہوئے کہا کہ کوئٹہ میں پھنسے ہوئے زائرین کی تفتان روانگی کا جلد از جلد انتظام کیا جائے۔ زائرین وطن عزیز کے گوشہ و کنار سے نواسہ رسولﷺ کی زیارات کیلئے اس وقت کوئٹہ شہر میں مشکلات کے شکار ہیں۔ حکومت اور انتظامیہ کی طرف سے ہر سال جان بوجھ کر زائرین کیلئے مسائل پیدا کئے جاتے ہیں۔ عراق میں داعش کا خطرہ ہونے کے باوجود بھی زائرین کو ایسی مشکلات درپیش نہیں آتی۔ لیکن کوئٹہ سے تفتان کا سفر زائرین کیلئے عذاب بن چکی ہے۔ کیا ہمارے سیکیورٹی ادارے اور حکومت عراقی سیکیورٹی اداروں سے بھی پیچھے رہ گئی ہے۔ سیکیورٹی کا مسئلہ پوری دنیا میں ہے لیکن کوئی بھی ملک اپنی ہی عوام کو اس طرح سے تنگ نہیں کرتی اس وقت تقریباً 400 بسیں اور ہزاروں زائرین کوئٹہ میں پھنسے ہوئے ہیں۔ لیکن حکومت نے صرف 140 بسوں کو اس سال لے جانے کا شرط لگائی ہے۔ جو ایک غیر منطقی اور غیر آئینی شرط ہے۔ حکومت اور انتظامیہ جلد از جلد تمام زائرین کی تفتان روانگی کا بندوبست کریں۔
وحدت نیوز(لاہور) نوازشریف سمیت تمام کرپٹ عناصر کا بے رحمانہ احتساب کیا جائے،ن لیگ اپنے لیڈورں کی چوری چھپانے کے لئے اداروں کیخلاف ہرزہ سرائی کر رہی ہے،پنجاب میں سیاسی میدان خالی نہیں چھوڑیں گے،کرپٹ سیاستدانوں کو انتخابات میں حصہ لینے پر پابندی لگا دی جائے،ان خیالات کا اظہار مجلس وحدت مسلمین پنجاب کے سیکرٹری سیاسات سید حسن کاظمی نے لاہور ڈویژن کے سیاسی کونسل کے اراکین کے اجلاس سے خطاب کرتے ہوئے کیا انہوں نے کہا کہ ہم خیال جماعتوں سے رابطے میں ہیں،کارکنان الیکشن 2018کی تیاری چلینج سمجھ کر کام جاری رکھیں،کرپشن کیخلاف ہماری عملی جدوجہد جاری ہے،ہم جناح اور اقبال کے پاکستان کو کرپٹ مافیا اور شدت پسندوں کے ہاتھوں یرغمال نہیں بننے دینگے،حصول پاکستان سے لے کر اب تک ہم نے مادر وطن کے خاطر جانی مالی قربانیاں دیں ہیں ،انشااللہ آئندہ بھی ملکی سلامتی و بقا کے لئے بھی کسی بھی قسم کی قربانی سے دریغ نہیں کرینگے،لاہور ڈویژن میں یوسی سطح پر تنظیم سازی جاری ہیں،اس عمل کو آنے والے دنوں میں مزید تیز کرینگے،ن لیگی حکومت نے عوام کو مایوسی کے سوا کچھ نہیں دیا،وقت آگیا ہے کہ ہم ووٹ کے طاقت سے کرپٹ عناصر کو سود سمیت حساب چکا دیں،انشااللہ ہم اپنی قربانیوں کو ضائع نہیں جانے دینگے،اجلاس میں سید حسین زیدی،آغا نقی مہدی،رانا ماجد علی ،رائے ناصر علی،زاہد مہدوی،سید سجاد نقوی،سمیت دیگر رہنماوں نے شرکت کی۔
وحدت نیوز(مظفرآباد) وزیر اعظم آزاد حکومت ریاست جموں و کشمیرراجہ فاروق حیدر خان کی علامہ سید تصور حسین نقوی سیکرٹری جنرل مجلس وحدت مسلمین آزاد کشمیرکی رہائش گاہ پر آمد اور علامہ تصور کی عیادت ۔ وزیر حکومت آزاد کشمیر چوہدری محمد سعید ، ڈپٹی کمشنر مظفرآباد مسعود الرحمن اور ایس ایس پی مظفرآباد راجہ اکمل خان بھی وزیراعظم کے ہمراہ تھے۔اس موقع پر کوآرڈینیٹر انسداد دہشت گردی پبلک ایکشن کمیٹی سید شجاعت علی کاظمی ، ڈپٹی کوآرڈینیٹر سید تصور عباس موسوی ، مجلس وحدت مسلمین آزاد کشمیر کے مرکزی رہنما سید حسین سبزواری اور سید بنیاد علی کاظمی بھی موجود تھے۔ علامہ سید تصور حسین نقوی نے وزیراعظم آزاد کشمیر سے علاج معالجے سمیت دیگر معاملات پر عدم توجہی پر شدید تشویش کا اظہار کرتے ہوئے کہا کہ 9ماہ کے بعد آپ عیادت کے لیے تشریف لائے ۔وزیر اعظم راجہ فاروق حیدر نے علامہ تصور جوادی کی خدمات کو سراہا۔انہوں نے کہا کہ علامہ تصور جوادی آزادکشمیر میں وحدت بین المسلمین کے علمبردار ہیں۔ دشمن نے آزاد خطہ کے امن پر حملہ کر نیکی مذموم کوشش کی ہے۔ وزیراعظم نے اس بات کی یقین دہانی کروائی کہ ملزمان کا تعاقب جاری رکھیں گے اور جلد کیفرکردار تک پہنچائیں گے۔ انہوں نے کہا کہ قانون نافذ کرنے والے ادارے دن رات اس کیس کو منطقی انجام تک پہنچانے میں مصروف ہیں اور میں خود سارے معاملات کی نگرانی کر رہا ہوں۔ وزیر اعظم آزاد حکومت جناب راجا فاروق حیدر خان نے اس بات کی یقین دہانی کروائی ہے کہ آزاد حکومت مشکل کی اس گھڑی میں ساتھ کھڑی رہے گی ، میں جلد خود علامہ تصور جوادی سے دوبارہ ملاقات کروں گا۔
وحدت نیوز (کراچی) مجلس وحدت مسلمین پاکستان سندہ کے سیکریٹری جنرل علامہ مقصودعلی ڈومکی نے کہا ہے کہ نون لیگ کی وفاقی اور صوبائی حکومت کی جانب سے زائرین کے لئے جان بوجھ کر مشکلات کھڑی کی گئی ہیں، کئی کئی روز تک مرد، خواتین ، بزرگ اور بچوں کو کوئٹہ اور تفتان بارڈر پر روکا جاتا ہے، آخر کیوں؟ ہزاروں زائرین خواتین ، معصوم بچے اور بزرگ گذشتہ کئی روز سے پریشان ہیں۔ زائرین اپنے ہی ملک میں محصور اور قیدی بنائے جاتے ہیں۔ محکمہ حج و اوقاف کا شعبہ زائرین ، کیوں زائرین کے مسائل سے لا تعلق اور غیر فعال ہے۔ سکھ زائرین کے لئے سہولتوں کا اعلان کرنے والے آخر کربلامعلیٰ و مشہد مقدس کے زائرین کے لئے کیوں مشکلات میں اضافہ کر رہے ہیں۔ اغیارکی خوشنودی حاصل کرنے کے لئے اپنے ہی ہم وطنوں کو دربدر کرنا کہاں کا انصاف ہے۔ آخر کس قانون کے تحت ، بلوچستان بارڈر پر زائرین کو روک کر این او سی طلب کیا جاتا ہے۔؟ انہوں نے مطالبہ کیا کہ وفاقی وزیر داخلہ زائرین کے مسائل کو ترجیحی بنیادوں پر حل کرے، نوازلیگ کی وفاقی اور صوبائی حکومت زائرین کے مسائل فی الفور حل کرے۔ ایف سی کو عوام کا خادم اور محافظ ہونا چاہئے۔ انہوں نے کہا کہ مجلس وحدت مسلمین قوم کی نمائندہ جماعت کی حیثیت سے قومی دکھ درد کو اپنا درد سمجھتی ہے اور ہم ہر سطح پر اس ظلم و زیادتی کے خلاف صدائے احتجاج بلند کریں گے۔ ہماری ماؤں ، بہنوں اور بیٹیوں کو کبھی سندہ بلوچستان بارڈر پر تو کبھی ژوب کے راستے میں روک کر این او سی طلب کیا جاتا ہے جو کہ امتیازی سلوک ہے، ہم اس ملک میں دوسرے درجے کے شہری نہیں۔ امتیازی سلوک قبول نہیں کریں گے۔
وحدت نیوز (ملتان) مجلس وحدت مسلمین جنوبی پنجاب کی صوبائی پولیٹیکل کونسل کا اجلاس صوبائی سیکرٹری جنرل علامہ اقتدار حسین نقوی کی زیرصدارت جامع مسجد الحسین نیو ملتان میں منعقد ہوا۔ اجلاس میں خصوصی طور پر معاون مرکزی سیکرٹری سیاسیات سید محسن شہریار نے شرکت کی، علاوہ ازیں اجلاس میں صوبائی سیکرٹری سیاسیات مہر سخاوت علی، ڈپٹی سیکرٹری جنرل سلیم عباس صدیقی، غلام اصغر تقی، وسیم عباس زیدی، زعیم حیدر زیدی، رکن پولیٹیکل کونسل یافث نوید ہاشمی، علامہ قاضی نادر حسین علوی، سید نعیم حیدر کاظمی، رحمت علی کھوسہ، صفدر خان، سید ظہیر الحسن نقوی اور ثقلین نقوی موجود تھے۔ اجلاس میں جنوبی پنجاب بھر کی سیاسی صورتحال کا جائزہ لیا گیا، تمام اراکین کونسل نے اپنے اپنے اضلاع کے اہم موثر حلقوں کے حوالے سے رپورٹ پیش کی، بعدازں اجلاس سے خطاب کرتے ہوئے معاون سیکرٹری سیاسیات سید محسن شہریار نے کہا کہ انشاء اللہ باقی اضلاع کی طرح جنوبی پنجاب میں بھی منتخب حلقوں میں اپنے نمائندے کھڑے کریں گے، انہوں نے کہا کہ اس وقت مختلف جماعتیں مجلس وحدت مسلمین کے ساتھ الائنس کی خواہشمند ہیں اور مسلسل مجلس کے ساتھ رابطے میں ہیں۔ انہوں نے کہا کہ بہت جلد الیکشن کی تیاریوں کے حوالے سے ورکرز کی ٹریننگ کا آغاز کیا جائے گا۔
وحدت نیوز(لاہور) مجلس وحدت مسلمین پنجاب شعبہ تنظیم سازی کے زیر اہتمام پیام کربلا ورکشاپ کا صوبائی سیکریٹریٹ میں انعقاد کیا گیا، جس میں16 اضلاع کے مسئولین نے شرکت کی، ورکشاپ میں مرکزی سیکریٹری وحدت یوتھ پاکستان ڈاکٹر یونس حیدری،کوآرڈینیٹر مرکزی سیاسی سیل آصف رضا ایڈوکیٹ اور صوبائی سیکریٹری امور تنظیم سازی مولانا نیاز بخاری نے مختلف موضوعات پر شرکاءسے خطاب کیا۔
