وحدت نیوز (کراچی) ملت تشیع کے لاپتہ افراد کی عدم بازیابی کے خلاف احتجاجاََ گرفتار پیش کرنے والے بزرگ شیعہ عالم دین اور مجلس وحدت مسلمین پاکستان کے مرکزی ڈپٹی سیکرٹری جنرل علامہ سید حسن ظفر نقوی نے کہا ہے کہ ہمارے پُرامن احتجاج کے آئینی انداز پر حکومت کی طرف سے مسلسل بے حسی کا مظاہرہ ایک غیر جمہوری طرز عمل ہے، حکمران ملت تشیع کے اضطراب میں دانستہ طور پر اضافہ کر رہے ہیں، گذشتہ دو ہفتوں سے جاری احتجاج اور بھوک ہرتال اس وقت تک جاری رہے گی، جب تک ہمارے نوجوانوں کو بازیاب نہیں کیا جاتا، حکومت ہمارے اعصاب کو آزمانے سے گریز کرے، ملت تشیع کی استقامت سے حکمران اچھی طرح واقف ہیں، ہمیں اپنے اصولی اور آئینی موقف سے ایک انچ پیچھے نہیں ہٹایا جا سکتا۔ کراچی کے بغدادی تھانے میں پریس کانفرنس کرتے ہوئے علامہ حسن ظفر نقوی نے کہا کہ ملت تشیع کے نوجوانوں کی بازیابی ایک آئینی اور قانونی مطالبہ ہے، جس کو منوانے کیلئے تمام آئینی آپشنز زیر غور ہیں، مسلم لیگ (ن) کے دو افراد کو گذشتہ روز اداروں نے اٹھایا، جس پر سابق وزیراعظم نواز شریف سمیت دیگر رہنماؤں نے واویلا مچا رکھا ہے، ہمارے سینکڑوں نوجوانوں کو سابق وزیراعظم کے دور حکومت میں لاپتہ کیا گیا، جن کے بارے میں ان کے اہل خانہ کو آج تک کوئی اطلاع نہیں۔

علامہ حسن ظفر نقوی نے کہا کہ اگر ملت تشیع کے نوجوانوں پر الزامات ہیں، تو انھیں عدالتوں میں پیش کیا جائے، ان کے والدین اور بیوی بچوں سے ملاقات کا حق دیا جائے، کیا ہمارا یہ مطالبہ آئین اور قانون کے خلاف ہے۔ انہوں نے کہا کہ ہمارے علماء امن و امان برقرار رکھتے ہوئے گرفتاریاں پیش کر رہے ہیں، یہ محب وطن علماء کرام مستقل عوام کو امن و امان قائم رکھنے کی تلقین کر رہے ہیں، مجھ سمیت دیگر شیعہ رہنماء بھوک ہرتال پر ہیں، ان علماء کے ساتھ ملت کی جذباتی وابستگی ہے، اگر بھوک ہرتال کے باعث کسی عالم دین کی زندگی کو کوئی خطرہ درپیش ہوا، تو پھر ملک بھر میں سے مشتعل نوجوانوں کو کنٹرول کرنا مشکل ہو جائے گا۔ علامہ حسن ظفر نقوی نے کہا کہ چیف جسٹس آف پاکستان اور چیف آف آرمی اسٹاف سے مطالبہ کرتے ہیں کہ وہ ذاتی دلچسپی لے کر لاپتہ افراد کے مسئلے کو فوری حل کریں۔ قبل ازیں پاکستان عوامی تحریک کے اعلٰی سطح کے وفد نے مرکزی رہنماء ڈاکٹر ظفر اقبال کی سربراہی میں بغدادی تھانے میں مولانا حسن ظفر نقوی سے ملاقات کی اور انہیں ہر طرح کے تعاون کا یقین دلایا اور کہا کہ لاپتہ افراد کے مسئلے میں ملت تشیع کے بزرگ رہنماؤں کے مطالبات کی حمایت کرتے ہیں۔ وفد نے بھوک ہڑتال کے سبب علامہ حسن ظفر نقوی کی صحت کے بارے میں تشویش کا اظہار کیا۔

اس کے علاوہ شیعہ علماء کرام کے ایک وفد نے بھی علامہ حسن ظفر نقوی سے ملاقات کی۔ وفد میں علامہ مرزا یوسف حسین، مولانا نعیم الحسن، مولانا شیخ سلیم، مولانا حسن علی، مولانا کاظم جواد، مولانا علی انور اور مولانا صادق جعفری و دیگر شامل تھے۔ شیعہ علمائے کرام نے کہا کہ ملت کو اپنے بزرگ رہنماء کے عزم و حوصلے پر فخر ہے، لاپتہ افراد کی بازیابی کیلئے جاری جیل بھرو تحریک کی مکمل حمایت کرتے ہیں۔ مولانا نعیم الحسن نے کہا کہ علامہ حسن ظفر نقوی کے تحریک کے ثمرات سامنے آنا شروع ہوگئے ہیں اور گذشتہ کئی سالوں سے لاپتہ 6 افراد کو بازیاب کرا لیا گیا ہے۔ انہوں نے بزرگ رہنماء کی خرابی صحت کے پیش نظر ان سے بھوک ہرتال کے خاتمے کی درخواست بھی کی۔ انہوں نے کہا کہ لاپتہ افراد کے اہل خانہ اور مسنگ پرسن ریلیز کمیٹی کے مشورے کے بعد اگلے لائحہ عمل کا اعلان کیا جا سکتا ہے۔

وحدت نیوز(آرٹیکل) موت سب کو آنی ہے، موت کا دکھ بھی سب سہتے ہیں، لیکن خدا نہ کرے کہ کسی کے عزیزو اقارب میں سے کوئی لاپتہ ہو جائے،  اس وقت یہ دکھ اور بھی بڑھ جاتا ہے جب لاپتہ ہونے والوں کو محض شک و شبہے کی بنیاد پر اغوا کر لیا جائے۔ شنید یہ ہے کہ بعض لوگوں کو محض اپنی نوکری کی دھاک بٹھانے کے لئے بھی اغوا کر لیا گیا ہے۔

کہا جاتا ہے کہ کسی کم فکر کو کسی طریقے سے حکومت مل گئی ، اس نے برسر اقتدار آتے ہیں اپنے آبائی علاقے میں کرفیو نافذ کروادیا، کرفیو کی وجہ سے لوگ بھوک، پیاس اور بیماریوں سے مرنے لگے ، جب کافی لوگ مر کھپ گئے تو اس نے کرفیو ہٹانے کا حکم دیا، کسی نے ظلِّ الٰہی سے سوال کیا کہ سرکار کرفیو لگانے کی وجہ کیا تھی؟

ظلِّ الٰہی نے مونچھوں کو تاو دیتے ہوئے کہا کہ یہ لوگ مجھے کچھ سمجھتے ہی نہیں تھے۔

ابھی یہی حال ہمارے ہاں عوام کا ہو رہا ہے، ایجنسیوں کے چھوٹے موٹے اہلکار کسی کو گھر سے، کسی کو دکان سے، کسی کو گاڑی سے، کسی کو مدرسے سے، کسی کو راستے سے پکڑ کر لے جاتے ہیں، کسی پر فیس بک چلانے کا، کسی پر تقریر کرنے کا ، کسی پر فون کرنے کا ، کسی پر فون اٹینڈ کرنے کا ، کسی پر نعرہ لگانے کا اور کسی پر رات گئے گھر سے نکلنے کا الزام ہے ، ان ملزموں کے بارے میں  اعلی افسران کو یہ رپورٹ دی گئی ہے کہ یہ سب  ملک دشمن عناصر اور را کے ایجنٹ ہیں۔

جب ان بے چاروں کو دھر لیا جاتا ہے اور ان کےبارے میں مزید  کوئی ملک دشمنی کا ثبوت بھی نہیں ملتا تو انہیں مستقل طور پر گم ہی کردیا جاتا ہے۔

یوں اعلی حکام سمجھتے ہیں کہ ملک دشمنوں پر گرفت ڈالی جارہی ہے جبکہ نچلا طبقہ لوگوں پر اپنا رعب جمانے میں مصروف رہتا ہے۔

یہ ٹھیک ہے کہ بلوچوں میں کچھ علیحدگی پسند دھڑے بھی ہیں لیکن کیا یہ بات بھی ٹھیک نہیں کہ  بلوچوں کی اکثریت، محبِّ وطن اور ملک و ملت کی وفادار ہے ، پھر کیوں بلوچوں میں بحیثیت ِقوم، خوف پیدا کیا جا رہا ہے۔۔۔!؟

برجستہ ملک دشمنوں پر ہاتھ ڈالنے کے بجائے ، عام بلوچوں کو اغوا کر لیا جاتا ہے اور عام بلوچوں میں پاکستان کے خلاف نفرت پھیلائی جا رہی ہے۔

ممکن ہے اس ظالمانہ رویے سے  بلوچستان جیسے پسماندہ صوبے میں کچھ لوگوں کا رعب تو جم جائے لیکن یہ رویہ ملک و قوم کے حق میں نہیں ہے۔ ہماری ملکی سلامتی کے ذمہ داروں کو اعلی سطح پر بیٹھ کر اس رویےّے کو تبدیل کرنے کے بارے میں سوچنا چاہیے۔

اس سے کسی کو انکار نہیں کہ دہشت گردی کے ٹریننگ حاصل کرنے والے لوگ ملک کے لئے خطرہ ہیں لیکن کیا یہ ایک حقیقت نہیں کہ خود ہماری حکومتوں نے جہاد کے نام پر دہشت گردی کے مراکز قائم کئے اور  بعض دینی مدرسوں کو اسلحے سے لیس کیا۔ اب اسی دہشت گردی کا بہانہ بنا کر لوگوں کو لا پتہ کیا جارہا ہے کہ فلاں کو فلاں نے فون کیا تھا اور فلاں کی فلاں کو کال آئی تھی۔

لوگوں کو لاپتہ کرنے کے بجائے حکومت کو چاہیے کہ اپنی پالیسی واضح کرے  اور دہشت گردی کے مراکز کو سیل کر دے چونکہ  سارے  جہادی مراکز ہماری حکومت کی سرپرستی میں ہی چل رہے ہیں۔ماضی میں دہشت گردوں کی تربیت کرنے والے ایک مرکزی مدرسے کو تیس کروڑ کی گرانٹ تک دی گئی ہے۔

لہذا اگر حکومت دہشت گردی کے خاتمے میں مخلص ہے تو عوام کو اغوا کرنے کے بجائے ، دہشت گردوں کے مراکز کو سیل کرنے میں سنجیدگی دکھائے۔ابھی حالیہ دنوں میں ہی قومی اسمبلی کےاراکین کےدہشت گردوں سے تعلقات پر مبینہ آئی بی فہرست کیخلاف وزراء اور حکومتی ارکان واک آوٹ بھی کر چکے ہیں۔ ہم اس فہرست کے بارے میں صرف اتنا تبصرہ کریں گے کہ جب کہیں سے دھواں اٹھتا ہے تو آگ بھی لگی ہوتی ہے۔

کہا جاتا ہے کہ کتنے ہی لوگوں کو اس بہانے سے مختلف مقامات سے اٹھا لیا گیا ہے کہ ان میں سے فلاں عراق میں اور فلاں شام میں جنگ لڑنے کے لئے گیا تھا، ہم اپنے ملک کی سلامتی کے ذمہ دار اعلیٰ حکام سے دست بستہ عرض کرتے ہیں کہ ہمارے جوانوں کو ملک سے باہر جا کر لڑنے کا راستہ کس نے دکھا یا ہے۔۔۔!؟

جن لوگوں نے پاکستانی جوانوں کو جہاد کے نام پر مسلح کیا ہے اور انہیں پاکستان سے باہر جاکر لڑنے اور پاکستان کے اندر ایک ریاست تشکیل دینے پر ابھارا ہے ، وہ کسی سے بھی پوشیدہ نہیں ہیں، لہذا یہ انتہائی مذموم فعل ہے کہ اصلی مجرموں کی تو دست بوسی کی جاتی ہے اور انہیں اسمبلیوں تک پہنچانے کے لئے راہیں ہموار کی جاتی ہیں اور غریب لوگوں کے بچوں کو اغوا  کرلیا جاتا ہے۔

یہ غریبوں کی اولاد ، یہ بے کسوں کے بچے ، یہ سالہا سال سے لاپتہ  جوان،  چاہے سندھی ہوں، پنجابی ہوں، پٹھان ہوں، بلوچ ہوں، شیعہ ہوں یا سنی ہوں ، یہ سب ہمارا سرمایہ اور مستقبل ہیں۔

ہمارے اداروں کو چاہیے کہ انہیں اغوا اور لاپتہ کرکے پیشہ ور مجرم بنانے کے بجائے انہیں دہشت گردی کے بحران  سےنکالنے میں ان کی مدد کریں اور ان کے اخلاق و کردار کی تعمیرِ نو کریں۔  

ہم ارباب علم و دانش اور صاحبانِ اقتدار کی خدمت میں عرض کرنا چاہتے ہیں کہ دہشت گردی کا علاج دہشت گردی سے نہیں ہو سکتا، لوگوں کو اغوا اور لاپتہ کرنا یہ خود ایک طرح کی دہشت گردی ہے۔

دہشت گردی کو روکنے کے لئے ضروری ہے کہ دہشت گردی  کے مقابلے میں دہشت گردی کرنے کے بجائے، مناسب حکمتِ عملی کے اعتبار سےسابقہ حکومتوں کی غلطیوں کا ازالہ  کیا جائے اور اصلی دہشت گردوں اور ان کے سہولت کاروں پر ہاتھ ڈال کرعوام کو خوشحالی، امن  اور سکون   کا پیغام  دیا جائے۔

 ہم یہ نہیں کہتے کہ اغوا اور لاپتہ ہونے والے لوگوں سے غلطیاں نہیں ہوئیں لیکن بحیثیت پاکستانی  ہم یہ گلہ کرنے کا تو حق رکھتے ہیں کہ سرکاری ایجنسیاں بھی وہی غلطیاں  دہرا رہی ہیں۔اگر کچھ لوگ قانون کے ساتھ عدم تعاون کے مرتکب ہیں تو  سرکاری ادارے تو قانون کی پابندی کریں  اور   لوگوں کو قانونی کارروائی کے لئے عدالتوں میں پیش کریں۔

اس وقت گم شدہ لوگوں کے لواحقین کی طرف سے جیلیں بھرو تحریک ہمارے اندر اس احساس کو بیدار کرنے کے لئے ہے کہ  موت کا دکھ   تو سبھی سہہ لیتے ہیں، لیکن خدا نہ کرے کہ کسی کے عزیزو اقارب میں سے کوئی لاپتہ ہو جائے،  کاش یہ احساس ہمارے ریاستی اداروں  کے اعلیٰ حکام   میں بھی  بیدار ہوجائے۔

 
تحریر۔۔۔نذر حافی

This email address is being protected from spambots. You need JavaScript enabled to view it.

وحدت نیوز(لاہور) انسانیت دشمن دہشتگردوں کیساتھ ساتھ معاشی دہشتگردوں کو بھی منطقی انجام تک پہنچانا ہوگا،ملک میں انارکی پھیلانے والے کسی رعایت کے مستحق نہیں،نوازشریف اعلیٰ عدلیہ اور ریاستی اداروں کیخلاف ہرزہ سرائی کرنے والوں کی وکالت کی بجائے اپنے دور میں بے گناہ لاپتہ شیعہ علماء و جوانوں کے بارے میں بتائے ،یہ بے گناہ افراد کہا ں ہیں؟،ن لیگی حکومت اپنی آخری سانسیں لے رہی ہے،قوم کو جلد لیٹروں اورظالم و جابر حکمرانوں سے نجات ملنے والی ہے،ان خیالات کا اظہار مجلس وحدت مسلمین سنٹرل پنجاب کے سیکرٹری جنرل علامہ مبارک علی موسوی نے ضلع اٹک،راولپنڈی،جہلم اور چکوال کے پارٹی ورکرز سے صوبائی سیکرٹریٹ میں ملاقات کے دوران گفتگو کرتے ہوئے کیا۔

 انہوں نے کہا کہ سنٹرل پنجاب میں الیکشن 2018 کے حوالے سے کارکنان تیاریوں میں تیزی لائیں،ہم میدان خالی نہیں چھوڑیں گے،ن لیگ کے انتقامی کاروائیوں کا بدلہ ووٹ کی طاقت کے ذریعے انشااللہ سود سمیت چکا دینگے،نوازشریف نے عوام کو مایوسی کے سوا کچھ نہیں دیا،مہنگائی اوربے روزگاری کے سبب لوگ خود کشی کرنے پر مجبور ہیں،پنجاب میں سیاسی مخالفین کو بدترین انتقامی کاروائیوں کا نشانہ بنایا گیا،ملت جعفریہ کیخلاف ن لیگ حکومت کی متعصبانہ کاروائیاں کبھی نہیں بھولیں گے،ہم آئین اورقانون کے اندر رہتے ہوئے ان ظالم قوتوں کامقابلہ کرینگے،جناح اور علامہ اقبال کے پاکستان کو مفادپرستوں اور دہشتگردوں کے سیاسی سہولت کاروں کے ہاتھوں یرغمال نہیں بننے دینگے،اس موقع پر مجلس وحدت مسلمین سنٹرل پنجاب کے سیکرٹری سیاسیات سید حسن کاظمی و دیگر رہنما بھی ملاقات میں شریک تھے۔