وحدت نیوز(اسلام آباد) ایم ڈبلیو ایم وفد کی سابق وزیر اعلیٰ گلگت بلتستان خالد خورشید سے ملاقات اور اہم امور پر تبادلہ خیال ۔ مجلس وحدت مسلمین گلگت بلتستان کے وفد نے گلگت بلتستان کے سابق وزیر اعلیٰ اور تحریک انصاف کے صوبائی صدر خالد خورشید سے ملاقات کی اور اہم علاقائی اور سیاسی ایشوز پر تبادلہ خیال کیا۔ملاقات میں علاقائی اور سیاسی امور سمیت لینڈ ریفارمز بل، منرلز اینڈ مائینگ بل اور دیگر متعدد امور پر تبادلہ خیال ہوا۔

ایم ڈبلیو ایم وفد کی قیادت سیکرٹری سیاسیات ایم ڈبلیو ایم جی بی و رکن جی بی کونسل شیخ احمد علی نوری کر رہے تھے۔ اس ملاقات میں علاقے کی زمینوں کو لیز پر دینے کے حوالے سے سخت اور اصولی موقف اپنانے اور اس پر ملکر عوامی امنگوں کے مطابق مزاحمت کرنے پر اتفاق ہوا۔سابق وزیر اعلیٰ خالد خورشید نے حجت الاسلام و المسلمین سینیٹر علامہ راجہ ناصر عباس جعفری کو ایک بار پھر سے ایم ڈبلیو ایم پاکستان کے چئیرمن منتخب ہونے پر مبارکباد پیش کیا اور نیک خواہشات کا اظہار کیا۔

وحدت نیوز(اسلام آباد)مجلس وحد ت مسلمین پاکستان کے بقیتہ اللہ کنونشن 2025 کا اسلام آباد میں کامیاب انعقاد اور اختتام، پاکستان میں وحدت، بیداری، اور قومی شعور کی نئی لہر کا آغاز ثابت ہوا۔

اس عظیم الشان اجتماع نے ایک بار پھر یہ ثابت کر دیا کہ قوم اب تفرقے، ظلم اور بےحسی کے خلاف متحد ہو چکی ہے، اور اس وحدت کا سب سے روشن استعارہ قائد وحدت علامہ راجہ ناصر عباس جعفری ہیں۔‏انہوں نے ہمیشہ کی طرح اس کنونشن میں بھی اپنے فہم، تدبر، اور جراتِ اظہار سے دلوں کو گرمایا، اور ایک بار پھر امت کو یاد دلایا کہ نجات کا راستہ وحدت، شعور، اور مزاحمت سے ہو کر گزرتا ہے۔‏

یہ کنونشن نہ صرف ایک نظریاتی محاذ کا مظہر تھا بلکہ مظلوموں، محروموں، اور ملت کے نوجوانوں کے لیے ایک امید کی کرن بن کر اُبھرا۔ ماضی کے زخموں، قربانیوں اور طویل جدوجہد کی یاد بھی تازہ ہوئی، اور آئندہ کے لیے راستہ بھی روشن ہوا۔‏

علامہ راجہ ناصر عباس جعفری نے پھر ثابت کیا کہ وہ صرف ایک مذہبی یا سیاسی رہنما نہیں، بلکہ ایک ایسی آواز ہیں جو پوری ملت کو ایک لڑی میں پرونے کا ہنر جانتے ہیں — وہ سچ کے علمبردار، وحدت کے داعی، اور ظلم کے خلاف مزاحمت کا نشان ہیں۔‏

اب یہ ہم سب کی ذمہ داری ہے کہ اس کنونشن کے پیغام کو گلی گلی، قریہ قریہ پھیلائیں، اور قائد وحدت کے مشن کو اپنی زندگیوں میں عملی صورت دیں۔

وحدت نیوز(اسلام آباد)چیئرمین مجلس وحدت مسلمین پاکستان، سینیٹر علامہ راجہ ناصر عباس جعفری نے استحکام پاکستان کانفرنس سے خطاب کرتے ہوئے کہا ہے کہ استحکام پاکستان اس وقت ممکن ہو گا جب عوام اپنے منتخب نمائندوں، آئین اور اداروں پر مکمل اعتماد کریں گے۔ قانون ایک مقدس امانت ہے، اس کا احترام ہر شہری اور ادارے پر واجب ہے۔ اگر پاکستان فیڈریشن کو مستحکم رکھنا ہے تو آئین کی بالادستی کو یقینی بنانا ہو گا۔ شفاف، بروقت اور آزادانہ انتخابات ہی قوم کو سیاسی استحکام اور جمہوری بالادستی کی جانب لے جا سکتے ہیں۔

اپوزیشن لیڈر عمر ایوب خان نے کہا: “کاش آج ملک میں حقیقی استحکام ہوتا تو میرے قائد عمران خان اور دیگر سیاسی رہنما و کارکنان جیلوں میں نہ ہوتے۔ ایک مضبوط پاکستان کے لیے طاقتور معیشت، پائیدار امن، مستحکم دفاع اور قومی ہم آہنگی ناگزیر ہیں۔ افسوس کی بات ہے کہ اظہار رائے کی آزادی سلب کر لی گئی ہے، میڈیا موجود ہے مگر نشریات پر قدغن ہے۔ آج میڈیا ہاؤسز ذاتی مفادات، خاص طور پر پراپرٹی بزنس، میں الجھ چکے ہیں۔”انہوں نے مزید کہا کہ نگران حکومت کے دوران سندھ کے پانی کو فروخت کر دیا گیا، اب خود چور دوسروں کو چور کہہ رہے ہیں۔ جعفر ایکسپریس جیسا سانحہ سیکورٹی کی مکمل ناکامی ہے، کیونکہ ریاستی ادارے سیاسی کارکنوں کے تعاقب میں مصروف ہیں، اصل ذمہ داریوں سے غفلت برتی جا رہی ہے۔

تحریک تحفظ آئین پاکستان کے سربراہ، محمود خان اچکزئی نے کہا کہ “اگر ہم اس ملک کو بچانا چاہتے ہیں تو ہمیں آئین پاکستان، جو کہ ایک سماجی معاہدے کی صورت ہے، پر عملدرآمد کو یقینی بنانا ہوگا۔

” انہوں نے کہا کہ خفیہ ایجنسیوں کو بھی آئین کے سامنے جواب دہ ہونا پڑے گا۔ “جو حکومت دھونس اور دھاندلی سے وجود میں آئے اور عوام کو ان کے حقوق نہ دے، اسے تسلیم نہیں کیا جا سکتا۔ اسپیکر کے خلاف تحریکِ عدم اعتماد لائی جائے، جعلی کمیٹیوں کا بائیکاٹ کر کے عوامی نمائندوں کو متحد ہو کر اصل حقائق عالمی برادری کے سامنے رکھنا ہوں گے۔”

مرکزی جنرل سیکرٹری تحریک انصاف، سلمان اکرم راجہ نے علامہ راجہ ناصر عباس اور محمود خان اچکزئی کو سچائی کی آواز بلند کرنے پر خراج تحسین پیش کیا۔ انہوں نے کہا کہ ہم ایک جھوٹے، منافقانہ نظام میں سانس لے رہے ہیں۔ “ہمیں فخر ہے کہ مجلس وحدت مسلمین، تحریک انصاف اور تحریک تحفظ آئین پاکستان، ایک نظریاتی اتحاد کی صورت میں ظلم کے خلاف صف آراء ہیں۔ آئین کا اصل مقصد انصاف، احترام اور معاشرتی ہم آہنگی کا فروغ ہے۔”

سابق سینیٹر مصطفیٰ نواز کھوکھر نے علامہ راجہ ناصر عباس کو ایم ڈبلیو ایم کا چیئرمین منتخب ہونے پر مبارکباد دیتے ہوئے کہا کہ ملک اس وقت شدید بحرانی کیفیت سے گزر رہا ہے۔ “آزادی اظہار پر قدغن، پارا چنار، بلوچستان، کے پی اور جنوبی پاکستان میں ناامنی اور سندھ میں نہری پانی کی بندش جیسے اقدامات، خطرناک رجحانات کی عکاسی کرتے ہیں۔ اگر ہم نے آئین سے انحراف جاری رکھا تو حالات سنبھالنے سے باہر ہو جائیں گے۔

”سابق وزیر مذہبی امور، ڈاکٹر نور الحق قادری نے کہا کہ یہ قافلہ حسینی ہے، جو ہر حال میں ظلم کے خلاف آواز بلند کرے گا۔ “میرا وطن عدل کے بغیر نہیں چل سکتا۔ عدل خدا کے صفاتی ناموں میں سے ایک ہے، اور اس کا فقدان معاشرتی زوال کی علامت ہے۔”

سنی اتحاد کونسل کے سربراہ، صاحبزادہ حامد رضا نےعلامہ راجہ ناصرعباس جعفری کو دوبارہ ایم ڈبلیوایم کا چیئرمین منتخب ہونے پر مبارک باد پیش کی اور کہا کہ ان کا انتخاب کرنے والے بھی خراج تحسین کے مستحق ہیں جنہوں نے ایک مرد حر مرد قلندر کا انتخاب کیا۔

 موجودہ حکمرانوں کی بے حسی پر شدید تنقید کرتے ہوئے کہا: “پروردگار ان حکمرانوں کو برباد کرے جو غزہ کی بربادی پر خاموش ہیں۔ قیام پاکستان کے وقت فلسطین کے حق میں ہمارا واضح مؤقف تھا، مگر آج ڈی چوک میں فلسطینی پرچم دفن کیے جا رہے ہیں۔ کیا ہمارے میزائل خاموش ہو گئے؟ کیا لانچنگ پیڈ ناکارہ ہو چکے ہیں؟”انہوں نے مزید کہا کہ ہم نے عمران خان کا ساتھ اس لیے دیا کیونکہ اس نے قوم کو تمام تعصبات سے بلند ہو کر ایک نظریے پر جمع کیا۔ “ہم واضح کر دینا چاہتے ہیں کہ جو افواج پاکستان سے ٹکرائے، وہ دہشتگرد ہے۔ بلوچستان حکومت کی جانب سے کوئٹہ سے دیگر شہروں کی ٹرانسپورٹ بند کرنے کا نوٹس خطرناک اشارہ ہے۔ اس کا جوابدہ کون ہے؟”

وحدت نیوز(کوئٹہ)مجلس وحدت مسلمین بلوچستان کے صوبائی رہنماء علامہ علی حسنین حسینی نے سینیٹر علامہ راجہ ناصر عباس جعفری کو دوبارہ ایم ڈبلیو ایم کے چیئرمین منتخب ہونے پر مبارکباد پیش کرتے ہوئے کہا ہے کہ علامہ راجہ ناصر عباس جعفری قوم کے مخلص اور بہادر رہنماء ہیں۔ پوری جماعت کو ان کی صلاحیت اور قیادت پر مکمل اعتماد ہے۔ ان کی قیادت میں پورے پاکستان میں مجلس وحدت مسلمین ایک منظم اور مضبوط جماعت بن چکی ہے۔ ایم ڈبلیو ایم بلوچستان کے صوبائی نائب صدر علامہ علی حسنین حسینی نے اپنے جاری کردہ بیان میں ایم ڈبلیو ایم کے سہ روزہ کنونشن اور پارٹی الیکشنز سے متعلق کہا کہ ہماری جماعت نے جمہوریت کی بہترین مثال پیش کی ہے۔ پارٹی رہنماؤں اور کارکنوں نے انٹرا پارٹی انتخابات میں بھرپور حصہ لے کر مثال قائم کی ہے۔

انہوں نے شوریٰ عالی کے نومنتخب اراکین کو بھی مبارکباد پیش کرتے ہوئے کہا کہ نئی قیادت سے قوم کی امیدیں وابستہ ہیں۔ پارٹی کی کارکردگی کو آئیندہ سالوں میں مزید بہتر بنائیں گے۔ علامہ علی حسنین نے کہا کہ سینیٹر علامہ راجہ ناصر عباس جعفری نے ہمیشہ پوری قوم کے حقوق کی بات کی ہے۔ انہوں نے پاراچنار سے لیکر کوئٹہ کے مظلومین، اور کراچی سے لیکر کشمیر تک ہر مسئلے پر پوری قوم کو اکھٹا کیا۔ بلوچستان اور پاراچنار میں جاری مظالم پر علامہ راجہ ناصر عباس جعفری نے اپنا بھرپور کردار ادا کیا اور ہر ظلم کے خلاف آواز اٹھائی۔ ہمیں قائد وحدت علامہ راجہ ناصر عباس جعفری کی قیادت پر مکمل اعتماد ہے، اور یقین ہے کہ وہ مظلوموں کے حقوق کیلئے جدوجہد ہمیشہ جاری رکھیں گے۔