وحدت نیوز(مانٹرنگ ڈیسک) ضلع کرم کو دیگر اضلاع سے جوڑنے والی واحد مین شاہراہ ڈھائی ماہ سے بند ہے، جس سے انسانی المیہ نے جنم لے لیا ہے۔

بارہ اکتوبر سے لے کر آج تک پاراچنار ٹل واحد مین شاہراہ ہر قسم آمد و رفت اور ٹریفک کیلئے بند ہے، پاراچنار کا دیگر اضلاع کے ساتھ زمینی رابطہ منقطع ہوچکا ہے، جس کے باعث اپر کرم کو ڈھائی ماہ سے کسی قسم کی سپلائی نہیں ہو رہی۔ اپر کرم کے چار لاکھ نفوس پر مشتمل آبادی علاقے میں محصور ہوکر رہ گئی ہے، تاہم لوئر اور سینٹرل کرم کیلئے راستے کھلے ہیں جس کیلئے ہر قسم کی چیزوں کی ترسیل روزانہ کی بنیادوں پر ہوتی ہے۔

راستوں کی طویل بندش کی وجہ سے پاراچنار میں انسانی المیہ نے جنم لے لیا ہے، اشیائے خوردونوش، میڈیسین، فیول، لکڑی ہر چیز کا ذخیرہ ختم ہوچکا ہے۔ شہری ایک ایک چیز کے پیچھے بھاگ دوڑ کر رہے ہیں لیکن نمک تک نہیں حاصل کر پارہے۔

شہریوں نے پچھلے ڈیڑھ ماہ کسی قسم کا فریش فروٹ اور سبزی نہیں کھائی ہے، اس وقت شہر میں آلو 400 روپے کلو ، ٹماٹر 300 اور پیاز 350 روپے کلو فی کلو کے حساب سے مل رہے ہیں۔

ضلعی صدر مجلس وحدت مسلمین تحصیل چیئرمین اپر کرم مزمل حسین نے بتایا کہ شہریوں کو نظر بند کر رکھا ہے، ہم اپیکس کمیٹی کے فیصلے کو مسترد کرتے ہیں، ہمیں اگر مارنا ہے تو مار دیں۔

ایم این اے اور ایم ڈبلیو ایم کے پارلیمانی لیڈر حمید حسین طوری نے بتایا کہ شہریوں کو شدید مشکلات کا سامنا ہے، انہوں نے مطالبہ کیا کہ حکومت روڈ کو جلد از جلد کھولے۔

انہوں نے مزید کہا کہ کرم کے لوگ دفاع کا حق رکھتے ہیں، ان سے اگر اسلحہ لیا جائے تو وہ دہشگردوں کے خلاف اپنا دفاع کیسے کریں گے۔

صدر سبزی منڈی محسن علی کے مطابق کچھ دنوں میں ٹماٹر کا سیزن اور پیاز کا ذخیرہ بھی ختم ہو جائے گا۔

بینکوں میں پیسہ نہ ہونے کی وجہ سے متعدد بینک اور اے ٹی ایمز مشینز مکمل بند ہیں۔ بینک ملازمین کا کہنا ہے کہ جینریٹر چلانے کیلئے ہمارے پاس تیل نہیں ہے، لوگوں کو کیش دینے کیلئے ہمارے پاس پیسہ نہیں، شہری بینک سے ناامید ہوکر چلے جاتے ہیں۔

راستوں کی طویل بندش اور بدامنی کے خلاف علاقہ مکینوں نے احتجاج دھرنا شروع کر دیا ہے، کرم پریس کلب کے سامنے عوام دھرنے پر بیٹھے ہوئے ہیں، مزدور طبقہ بھی ہاتھ گاڑیوں اور ریڑھیوں کے ہمراہ دھرنے میں شریک ہے۔

دھرنے میں موجود ایک بزرگ نے بتایا کہ میں نے تین دن سے کچھ نہیں کھایا ہے، بھوک سے مر رہے ہیں۔

دھرنے میں موجود ایک اور بچے نے بتایا کہ حکومت کو خوراک کی سپلائی ہوتی ہے ہمیں کیوں نہیں، اس وقت ہم غذائی اشیاء خریدنے کے پیچھے جاتے ہیں ہمیں کچھ نہیں ملتا۔ بغیر نمک کے ابلے ہوئے چاول سے گزارا کر رہے ہیں۔

وحدت نیوز(اسلام آباد) حکومت اور اپوزیشن اتحاد کے درمیان مذاکرات کا باقائدہ آغاز ہوگیا ہے ۔ تفصیلات کے مطابق اسپیکر قومی اسمبلی ایاز صادق کی سربراہی میں حکومت اور اپوزیشن کے درمیان مذاکرات کا آغاز۔

حکومت اور اپوزیشن کے درمیان مذاکرات پارلیمنٹ ہاؤس میں ہورہے ہیں جس کی سربراہی اسپیکر قومی اسمبلی ایاز صادق کررہے ہیں۔

مذاکرات میں اپوزیشن اتحاد کی طرف سےمرکزی رہنما پاکستان تحریک انصاف اسد قیصر،سربراہ مجلس وحدت مسلمین پاکستان سینیٹر علامہ راجہ ناصرعباس جعفری، چیئرمین سنی اتحاد کونسل صاحبزادہ حامد رضا  مذاکراتی کمیٹی کا حصہ ہیں۔

 اس کے علاوہ حکومتی اتحاد کی جانب سے نائب وزیر اعظم اسحاق ڈار ، عرفان صدیقی ، رانا ثناءاللہ، علیم خان ،نوید قمر ، راجا پرویز اشرف ، خالدمقبول صدیقی اورفاروق ستار شامل ہیں۔

ذرائع کے مطابق حکومت اور اپوزیشن اتحاد کے درمیان مذاکرات دعائے خیر سے شروع ہوئے۔حکومت اور اپوزیشن مذاکراتی کمیٹی نے مذاکرات جاری رکھنے پر اتفاق کیا اور کمیٹی کا آئندہ اجلاس 2 جنوری کو بلانے پر اتفاق ہوا ۔ آئندہ اجلاس میں اپوزیشن مطالبات کی فہرست پیش کرےگی۔

مجلس وحدت مسلمین (ایم ڈبلیو ایم) پاکستان کے سربراہ سینیٹر علامہ راجہ ناصر عباس نے اسلام آباد میں میڈیا سے گفتگو کرتے ہوئے کہا کہ اسٹیبلشمنٹ کا پورا رول ہے، سب کو پاکستان کا سوچنا چاہیئے۔

علامہ راجہ ناصر عباس کا کہنا ہے کہ عمران خان آئین اور قانون کی بالادستی چاہتے ہیں، وہ کبھی نہیں کہے گا کہ مجھے رہا کرو۔ انہوں نے کہا کہ حکومت کے پاس آخری موقع ہے، حالات ٹھیک کریں، مذاکرات کی میز پر بیٹھیں گے تو معلوم ہوگا کہ حکومت کی نیت کیا ہے۔

وحدت نیوز(اسلام آباد) جے ڈی سی اور گورنر سندھ کی جانب سے ادویات اور راشن کی بڑی کھیپ اسلام آباد سے پشاور روانہ کردی گئی جہاں سے ہیلی کاپٹر کے ذریعے کرم ایجنسی پہنچائی جائے گی۔ اس موقع پر گورنر سندھ کامران خان ٹیسوری، سربراہ جے ڈی سی ظفر عباس، سربراہ ایم کیو ایم پاکستان ڈاکٹر خالد مقبول صدیقی، ڈاکٹر فاروق ستار، مجلس وحدت مسلمین پاکستان کے رکن قومی اسمبلی انجینئر حمید حسین بھی موجود تھے۔ قبل ازیں رہنماؤں نے میڈیا سے گفتگو کی اور کرم ایجنسی کے مسئلے کے مستقل حل کے لئے ہر ممکن تعاون کی یقین دہانی کرائی۔

گورنر سندھ کامران خان ٹیسوری نے کہا ہے کہ پاراچنار میں قیام امن کی ذمہ داری صوبائی حکومت کی ہے، اس ضمن میں اسٹیک ہولڈرز سے مل کر اس معاملہ کے حل کے لئے کردار ادا کررہے ہیں اور مزید بھی ادا کرنے کو تیار ہیں، پاراچنار میں حالات بہت خراب ہیں اس لئے کڑوروں روپے کی اشیائے خورد ونوش، سرجیکل آئٹمز اور ادویات وہاں پہنچا رہے ہیں۔

ان خیالات کا اظہار انہوں نے اسلام آباد میں پریس کانفرنس سے خطاب کرتے ہوئے کیا۔ اس موقع پر متحدہ قومی موومنٹ پاکستان کے چیئرمین اور وفاقی وزیر ڈاکٹر خالد مقبول صدیقی، ڈاکٹر فاروق ستار، ایم ڈبلیو ایم کے رکن قومی اسمبلی انجینئر حمید حسین اور سربراہ جے ڈی سی ظفر عباس بھی موجود تھے۔

گورنر سندھ نے مزید کہا کہ اس مشکل وقت میں پاراچنار کے بھائیوں کے ساتھ کھڑے ہیں، وہاں کے حالات اس قدر خراب ہیں کہ ادویات اور غذائی قلت کے باعث کئی بچے جان کی بازی ہار گئے ہیں۔ انہوں نے کہا کہ ہم سب پاراچنار جا کر وہاں جرگہ کے ساتھ بیٹھ کر اس معاملہ کو حل کرانے کے لئے تیار تھے، جب یہاں سے کراچی گیا تو سب سے پہلے علامہ شہنشاہ نقوی، مفتی عبد الرحیم، علامہ راجہ ناصر عباس سمیت دیگر سے بات کی، ہمارا مقصد اس معاملہ کو جلد سے جلد حل کرانا ہے، دونوں فریقین کے درمیان صلح کراکر ہی راستہ کھولے اور وہاں پر نظام زندگی بحال کیا جا سکتا ہے۔

انہوں نے کہا کہ ہمارے ساتھ دیگر اسٹیک ہولڈرز بھی اسلام آباد پہنچ چکے ہیں تاہم مجھے رکن قومی اسمبلی انجینئر حمید حسین نے بتایا کہ پاراچنار میں دونوں فریقین کے درمیان معاہدہ پر دستخط ہو جائیں گے۔

 انہوں نے کہا کہ ادویات اور اشیائے خوردونوش کے بھرے ٹرک پشاور روانہ کررہے ہیں، وہاں سے یہ سامان جہاز اور ہیلی کاپٹرز کے ذریعہ پاراچنار پہنچایا جائے گا کیونکہ پاراچنارکے لوگوں کو ادویات کی فراہمی ہمارا فرض ہے، پاراچنار میں غذائی قلت کے مسائل سے فوری نمٹنا ہوگا، پاراچنار کے عوام کی مدد کے لئے ہر ممکن کردار ادا کریں گے۔

وحدت نیوز(دادو) مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ ہم پاراچنار کے مظلوم عوام کے ساتھ ہیں۔ ایم ڈبلیو ایم نے ملک گیر احتجاج کرکے پیغام دیا کہ پورے پاکستان کے عوام مظلوم پاراچنار کے ساتھ ہیں۔ یہ بات انہوں نے سندھ کے شہر دادو کے مختلف علاقوں کے دورے کے موقع پر گفتگو کرتے ہوئے کیا۔

علامہ مقصود علی ڈومکی نے اٹھیں شاخ میں زیر تعمیر امام بارگاہ اور مسجد کا دورہ اور عوام سے ملاقات کی، جبکہ گوٹھ غلام حسین گاڈھی میں شیعہ علماء کونسل کے تعلقہ صدر مولانا ظفر علی لغاری کے والد محترم کی وفات پر ورثاء سے تعزیت کی۔ اس موقع پر ضلعی رہنماء اصغر حسینی، ایم ڈبلیو ایم رہنماء مولانا اعجاز علی لغاری، استاد عابد لغاری و دیگر بھی ان کے ہمراہ تھے۔

امام بارگاہ میں عوام سے خطاب کرتے ہوئے علامہ مقصود علی ڈومکی نے کہا ہے کہ اس وقت عالم اسلام اور مقاومتی بلاک عالم کفر اور عالمی استکبار کے خلاف نبرد آزما ہے۔ ولی خدا نائب امام کی قیادت میں دنیا بھر کے صالح انسان خدا کی زمین پر عادلانہ نظام اور دین خدا کے نفاذ کے لئے مصروف عمل ہیں۔ حق و باطل کی اس جنگ میں ہم اہل حق کے ساتھ کھڑے ہیں اور شیطان بزرگ امریکا، اسرائیل اور دیگر شیطانی قوتوں کے خلاف کھڑے ہیں۔

انہوں نے کہا کہ اتحاد بین المومنین قرآنی حکم اور وقت کی ضرورت ہے۔ ہم پاراچنار کے مظلوم عوام کے ساتھ کھڑے ہیں۔ مجلس وحدت مسلمین نے ملک گیر احتجاج کرکے یہ پیغام دیا کہ پورے پاکستان کے عوام مظلوم پاراچنار کے ساتھ ہیں۔