وحدت نیوز (قم المقدسہ) مجلس وحدت مسلمین پاکستان شعبہ قم کے دفتر میں "پاکستان کے موجودہ حالات، داعش، تکفیریت اور تشیع کی نظر سے" کے عنوان سے ایک اہم فکری نشست کا اہتمام کیا گیا۔ اس فکری نشست سے ڈپٹی سیکرٹری جنرل شعبہ قم حجت الاسلام والمسلمین میثم ہمدانی اور مہمان خصوصی ایم ڈبلیو ایم پاکستان کے مرکزی ڈپٹی سیکرٹری جنرل حجت الاسلام والمسلمین امین شہیدی نے خطاب کیا۔ حجت الاسلام سید میثم ہمدانی نے اپنے خطاب میں رسول خدا (ص) کی مشہور حدیث "من اصبح و لم یھتم بامور المسلمین فلیس بمسلم" سے استناد کرتے ہوئے حالات سے آگاھی، درپیش مشکلات کی چارہ جوئی اور انکے راہ حل کی شناخت کی اہمیت کے حوالے سے بات کی۔ انہوں نے ایم ڈبلیو ایم پاکستان کے  مرکزی ڈپٹی سیکرٹری جنرل علامہ امین شہیدی کو شہر مقدس قم میں تشریف آوری پر خوش آمدید کہا اور طلاب دینی کے اس فکری پروگرام میں تشریف لانے پر شکریہ ادا کیا۔

اس فکری نشست سے اپنے خطاب میں حجت الاسلام والمسلمین امین شہیدی نے پاکستان کے حالات کا مفصل جائزہ لیا۔ انہوں نے کہا کہ آج جو کچھ بھی ہمارے ملک میں ہو ریا ہے، وہ اس بین الاقوامی کھیل کا حصہ کا ہے جو پوری دنیا میں جاری ہے اور اس کے ذریعے استعمار اپنے مخصوص اہداف تک پہنچنا چاہتا ہے۔ امریکہ اور سعودی عرب شدت پسند گروہوں کی حمایت میں متحد ہیں اور پاکستانی حکومت بھی اس سلسلے میں ان کا ساتھ دے رہی ہے۔ انہوں نے تحریک جعفریہ پاکستان سے پابندی ہٹائے جانے کو خوش آیند قرار دیا اور کہا کے ملت تشیع کے اس پلیٹ فارم پر پابندی لگانا شروع سے ہی غلط تھا لیکن اب اس بہانے دوسرے شدت پسند گروہوں کو آزاد کرنا بھی صحیح نہیں ہے اور حکومت کا یہ اقدام پاکستان میں دوبارہ کسی بڑی شدت پسندانہ لہر کے ایجاد کا عندیہ دے رہا ہے۔

علامہ امین شہیدی کا مزید کہنا تھا کہ آج دنیا میں تمام لوگ اور پارٹیاں متحد ہو رہی ہیں، ہم بھی تقسیم کار کے ذریعے متحد ہوسکتے ہیں۔ اگر پاکستان میں ہر کوئی، جو جس کام کو اچھے انداز میں انجام دے سکتا ہے، وہ اس کام کو اپنے ذمہ لے لے لیکن تمام کاموں کی جہت ایک ہو اور ایک عالی ہدف کی خاطر تمام جماعتیں اور شخصیات کام کریں تو اتحاد کی صورت پیدا ہوسکتی ہے۔ پاکستان میں بہت سے مواقع ایسے سامنے آئے تھے، جن کے بہانے اتحاد کے امکانات فراہم ہوسکتے تھے لیکن ہم نے ان کو مواقعوں کو ہاتھ سے نکال دیا ہے۔

وحدت نیوز (ٹوبہ ٹیک سنگھ) ٹوبہ ٹیک سنگھ میں میڈیا سے بات چیت کرتے ہوئے مجلس وحدت مسلمین کے مرکزی رہنما علامہ امین شہیدی نے کہا ہے کہ امریکہ داعش کو ذاتی مقاصد کے لئے استعمال کر رہا ہے۔ امت مسلمہ کو داعش جیسے فتنہ کو سختی سے کچلنے کے لئے مثبت حکمت عملی اپنانا ہو گی۔ علامہ محمد امین شہیدی نے مرکزی امام بارگاہ ٹوبہ میں پریس کانفرنس سے خطاب کرتے ہوئے کہا کہ وطن عزیز ماضی کی نسبت اس وقت شدید ترین بحرانوں کا شکار ہے، جس کی سب سے بڑی وجہ موجودہ حکمرانوں کی غلط معاشی اور سیاسی حکمت عملی ہے۔ انہوں نے کہا کہ جیلوں میں 8 ہزار سزائے موت کے قیدی موجود ہیں، جو جرائم کی جڑ ہیں، انہیں فوری طور پر پھانسی دی جائے۔ واضح رہے کہ اس موقع پرعلامہ سید ظہیرا لحسن نقوی، علامہ ہدایت حسین ہدایتی، فدا حسین رانا، رانا نعیم عباس اور رائے شاہد علی خاں بھی ان کے ہمراہ تھے۔ انہوں نے کہا کہ انتہا پسندی کے خاتمے کے لئے بیرونی مداخلت کو روکنا ہو گا جو ممالک انتہا پسندوں کو فنڈنگ کرتے ہیں وہ کسی بھی صورت پاکستان کے خیر خواہ نہیں پاکستان میں شدت پسندوں کو اسرائیل، انڈیا اور عرب ممالک کی آشیرباد حاصل ہے اور یہ بات کسی سے ڈھکی چھپی نہیں کہ ان ممالک نے نہ صرف پاکستان بلکہ مسلم دنیا میں شدت پسندوں کی پشت پناہی میں بڑا کردار ادا کیا، جس کا خمیازہ آج مسلم امہ بھگت رہی ہے۔

ایم ڈبلیوایم کے میڈیا سیل کے انچارج مظاہر شگری کے مطابق علامہ امین شہیدی نے عزاداروں کے اجتماع سے خطاب بھی کیا۔ انہوں نے کہا مجلس وحدت مسلمین پاکستان نے اپنے کارکنوں کی تربیت میں ہمیشہ رواداری، اتحاد بین المسلمین، احترام انسانیت اور حب الوطنی کو بنیاد بنایا،یہی وجہ ہے کہ آج تک ہمارے کارکنان نے انتہا پسندوں کے ملک میں بچھائے ہوئے نفرت کے کانٹے چنتے چنتے اپنی جان تو دے دی، مگر احترام انسانیت اور وحدت کے پرچم کو سرنگوں نہیں ہونے دیا، پاکستان میں ایک مخصوص سوچ کے حامل انتہا پسندوں نے اب عالمی دہشت گرد داعش کو لاجسٹک سپورٹ کرنے کا بیڑا اُٹھا لیا ہے، ہمارے حکمران ان دہشت گردوں کیخلاف کسی بھی کاروائی سے گریزاں ہیں، دراصل ان دہشت گردوں کا اصل ہدف ہمارے سکیورٹی ادارے اور وہ پاکستانی سول سوسائٹی ہے، جو شدت پسندی کے مخالف ہیں موجودہ حکمرانوں سے ان کی ساز باز ہے ۔

انہوں نے کہا کہ لاہور، کراچی، پشاور، کوئٹہ اور جنوبی پنجاب میں یہ گروہ منظم ہو رہے ہیں، ماہ محرم الحرام کے بعد اب ماہ ربیع الاول میں عاشقان مصطفٰیۖ کے خلاف بڑی دہشت گردی کے لئے منصوبہ بندی انہی علاقوں میں یہی دہشت گرد گروہ ترتیب دینے میں مصروف ہیں، لیکن ہمارے وزیر داخلہ نہ مانوں کی رٹ لگانے اور سکیورٹی اداروں کو کرسی بچانے کے لئے استعمال کرنے میں مصروف ہیں۔ علامہ امین شہیدی نے کہا کہ وقت کا تقاضا ہے، کہ شمالی وزیرستان طرز کا آپریشن پنجاب، بلوچستان اور سندھ میں بھی شروع کیا جائے، بصورت دیگر ہم ایک ناقابل تلافی نقصان کے لئے تیار رہیں۔ علامہ امین شہیدی نے جہلم میں پاکستان تحریک انصاف کے پر امن کارکنوں پر فائرنگ کے واقعے کی شدید الفاظ میں مذمت کرتے ہوئے کہا کہ حکمران گلو کریسی کے ذریعے حکمرانی کے خواب دیکھنا چھوڑ دیں، دھاندلی، کرپشن، اقربا پروی اور خاندانی حکمرانی کے خلاف جد و جہد کو ایسے اوچھے ہتھکنڈوں کے ذریعے نہیں روک سکتے، ظالم نظام اور ظلم کا خاتمہ ہو کر رہے گا۔

وحدت نیوز (کراچی) انتہا پسندوں کیخلاف گھیرا تنگ کیے بغیر امن کا قیام ناممکن ہے ملک کے مختلف شہروں میں عالمی دہشت گرد تنظیم کی وال چاکنگ تشویش ناک ہے پر امن معاشرے کے قیام کیلئے رواداری اور برداشت کے کلچر کو فروغ دینا ہوگا اقلیتی برادری قوم کا حصہ ہے ان کا احساس محرومی دور کرنا حکومتوں کا فرض ہے، ان خیالات کا اظہار مجلس وحدت مسلمین پاکستان کے مرکزی ڈپٹی سیکرٹری جنرل اور رکن اسلامی نظریاتی کونسل علامہ امین شہیدی نےشہدائے سانحہ انچولی کی یاد میں منعقدہ تقریب  سے خطاب میں کیا۔

 انہوں نے کہا کہ حکمرانوں میں انسانیت نام کی کوئی چیز نہیں تھر میں انسانیت بھوک اور افلاس کے ہاتھوں مر رہی ہے لیکن روٹی کپڑا اور مکان کے دعویدار موت بانٹنے میں مصروف ہیں پاکستان کو بیرونی سے زیادہ اندرونی دشمنوں سے خطرہ ہے انہوں نے کہا کہ کراچی اور پشاور میں ملت جعفریہ کیخلاف منظم انداز میں ٹارگٹ کلنگ جاری ہے آئے دن گھروں سے جنازے اُٹھ رہے ہیں دہشت گردوں کے ہاتھوں ان دونوں صوبوں کے حکمران یرغمال بنے ہوئے ہیں پنجاب میں انتہا پسندوں کو کھلی چھٹی دے دی گئی ہے گجرات اور کوٹ رادہ کشن کے ملزموں کو عبرت کا نشان نہ بنایا گیا تو یہاں عراق اور شام جیسے حالات پیدا ہونے سے کوئی نہیں بچا سکتا اسلام امن ،محبت ،بھائی چارے کا دین ہے اور ہمیں انسانیت کے احترام کا درس دیتا ہے علامہ شہیدی نے کوئٹہ میں گذشتہ 6 دن سے پھنسے زائرین کو فوری کوئٹہ لانے کا مطالبہ کرتے ہوئے بلوچستان گورنمنٹ کے ذمہ داران سے کہا کہ اگر غفلت کے نتیجے میں کسی بھی قسم کا زائرین کو کوئی نقصان پہنچا تو وہ اس کے ذمہ دار ہونگے۔

وحدت نیوز (کراچی) مجلس وحدت مسلمین کے مرکزی ڈپٹی سیکریٹری جنرل علامہ امین شہیدی نے کراچی میں عائشہ منزل کے قریب اسلامک ریسرچ سینٹر میں امام بارگاہ سیدالشہداء کے باہر عزاداران امام حسین ؑ پر بم حملے کی مذمت کرتے ہوئے اسے اسلام دشمن تکفیری دہشت گردوں کی کارروائی قرار دیا۔گلشن حدید کراچی میں عشرہ محرم الحرام کی مجلس عزاسے خطاب کرتے ہوئے انہوں نے کہا کہ اس دھماکے میں 9 ماہ کی معصوم بچی بتول عزاداری امام حسین ؑ کی عظمت پر قربان ہوگئی لیکن انسانیت دشمن دہشت گردوں کو بے نقاب بھی کرگئی۔ انہوں نے کہا کہ حکومت خاندان نبوت ﷺ کے سوگواروں کو تحفظ فراہم کرنے میں ناکام ہوگئی ہے۔ انہوں نے کہا کہ بانی پاکستان محمدعلی جناح اور نظریہ ساز مفکر علامہ اقبال بھی امام حسین ؑ کے عزادار تھے اور عزاداری پر حملہ اسلامی روایات ہی نہیں بلکہ پاکستان کی نظریاتی بنیادوں پر بھی حملہ ہے۔انہوں نے کہا کہ پاکستان کی سالمیت عزاداری امام حسین ؑ سے قائم ہے۔ مجالس و جلوس عزاء پر حملے کرنے والے یزیدیت کے پیروکار ہیں کیونکہ امام حسین ؑ اور ذکر امام حسین ؑ سے بغض و کینہ یزید کی اموی ملوکیت کو تھا ورنہ سب کو معلوم ہے کہ خاندان نبوت عظمت کیا ہے۔انہوں نے کہا کہ نواسہ رسول امام حسین علیہ السلام کی سیرت ہی حقیقی دین ہے پوری دنیامیں اسلام کا چہرہ مسخ کرنے والے یزیدی پیروکار ہیں، محرم الحرام کا مقدس مہینہ اتحاد امت اور ظلم کے خلاف آواز حق بلند کرنے کا درس دیتا ہے ،الحمد للہ آج پوری دنیا میں عزاداری سید الشہدا ء ؑ بڑی عقیدت سے منائی جاتی ہے۔ عزاداری کے دشمن دین اسلام کے دشمن ہیں کل بھی یزید یت کو شکست فاش ہوئی تھی اور آج بھی عاشقان امام حسین علیہ السلام ان دہشت گردوں کے عزائم کو ناکام بنا رہے ہیں۔

وحدت نیوز(لاہور) مجلس وحدت مسلمین پنجاب کے رہنماوُں نے خیبر پختونخواہ حکومت کی جانب سے سربراہ مجلس وحدت مسلمین علامہ راجہ ناصرعباس اور مرکزی ڈپٹی سیکرٹری جنرل علامہ امین شہیدی کی ایبٹ آباد اور ڈیرہ اسماعیل خان داخلے پر پابندی کی شدید مذمت کی ہے۔ سیکرٹری جنرل مجلس وحدت مسلمین پنجاب علامہ عبدالخالق اسدی، ڈپٹی سیکرٹری جنرل پنجاب سید اسد عباس نقوی و دیگر رہنماوُں نے پاکستان تحریک انصاف کی مرکزی قیادت سے مطالبہ کیا کہ وہ اس واقعے کا نوٹس لیں بصورت دیگر ہم کے پی کے حکومت کیخلاف احتجاج کا راستہ اختیار کریں گے۔ علامہ عبدالخالق اسدی نے کہا کہ دہشت گردوں کیخلاف خاموش تماشائی بننے والے آج پر امن شہریوں کو علاقہ بندی کے احکامات دے رہے ہیں، پاکستان میں دہشت گردی سے سب سے زیادہ ہم متاثر ہوئے، ہمارے قاتلوں کے لئے کے پی کے جنت بن چکا ہے، دہشت گردی کیخلاف ملک بھر میں ہم نے اسٹینڈ لیا اور آج ہمارا ہمارا موقف سچا ثابت ہوا، اور اگر آپریشن ضرب عضب کو لیت و لعل کیے بغیر شروع دن سے ہی ان ملک دشمنوں کیخلاف شروع کرتے تو بہت سی قیمتی جانیں بچ جاتیں۔

علامہ اسدی کا کہنا تھا کہ ہم پاکستان کے پر امن شہری ہیں اور دشمنوں کی سازشوں کو کامیاب نہیں ہونے دینگے۔ مجلس وحدت مسلمین پنجاب کے ڈپٹی سیکرٹری جنرل سید اسد عباس نقوی نے سانحہ کوئٹہ اور کے پی کے گورنمنٹ کی جانب سے مجلس وحدت مسلمین کے رہنماوں کے ساتھ ناروا سلوک کی شدید مذمت کرتے ہوئے کہا کہ دہشت گردوں کیخلاف گھٹنے ٹیکنے والے حکمران آج محب وطن شہریوں کو پریشان کرنے میں مصروف ہیں ہم کوئی بھی غیر آئینی اقدام ماننے کو تیار نہیں۔ پاکستان تحریک انصاف کے قیادت اس بات پر نوٹس لے۔ انہوں نے سانحہ کوئٹہ کو حکومت اور دہشت گردوں کی ملی بھگت کا نتیجہ قرار دیتے ہوئے کہا ہمارے ہزاروں شہداء کے قاتل ابھی تک گرفتار نہیں ہوئے، حکمران شہریوں کو تحفظ دینے مکمل ناکام ہو چکے ہیں، دہشت گردوں کیخلاف ملک گیر آپریشن کے بغیر اس ناسور سے جان چھڑانا ممکن نہیں۔

وحدت نیوز(کراچی) اٹھارہ اکتوبر کو منعقدہ شہدائے راہ ولایت کانفرنس غدیرسے تمسک کی تجدید کرے گی، گلگت، پشاور اور کوئٹہ میں ملت جعفریہ کے بے گناہ افراد کا قتل عام ایک سوچی سمجھی سازش کا حصہ ہے، حکمرانوں نے اپنی ناکامی پر پردہ ڈالنے کے لئے ملک میں دہشت گردی کا بازار گرم کر رکھا ہے۔ محرم الحرام میں جلوس وعزاداری کے خلاف کسی سازش کو برداشت نہیں کریں گے،ہم اپنا سب کچھ عزاداری کی بقاء کی خاطر قربان کر سکتے ہیں ، لیکن عزاداری کو کسی چیز پر قربان نہیں کر سکتے ، راولپنڈی سانحے کے تدارک کیلئے حکومت اور قومی ادارے پیشگی حکمت عملی مرتب کریں روٹ  کی  تبدیلی،  جلوسوں کی بندش، عزاداری کی محدودی کا خواب دیکھنے والے احمقوں کی جنت میں رہتےہیں۔ ان خیالات کا اظہار مجلس وحدت مسلمین پاکستان کے مرکزی ڈپٹی سیکرٹری جنرل اور اسلامی نظریاتی کونسل کے رکن علامہ امین شہیدی نے اپنے حالیہ دورہ کراچی کے موقع پر گلشن حدید ، پپری گوٹھ، آثار قدیمہ چوکنڈی، فیوچر کالونی اور جعفرطیار سوسائٹی میں منعقدہ جشن غدیر کے مختلف عوامی اجتماعات اور شہدائے واہ ولایت عوامی رابطہ مہم سے خطاب کرتے ہوئے کیا، اس موقع پر ایم ڈبلیوایم ضلع ملیر کے سیکریٹری جنرل احسن عباس رضوی ، ضلعی ڈپٹی سیکریٹری جنرل ثمر زیدی، سعید رضااور اسد زیدی، حسن عباس اور ڈاکٹرحسن جعفر بھی موجود تھے ۔

مسجد حسنین جعفر طیار سوسائٹی میں اجتماع سے خطاب کرتے ہوئےعلامہ امین شہیدی نے کہا کہ ملک بھر میں دہشت گردوں کو فری ہینڈ دیا گیا ہے جبکہ دوسری جانب پرامن اور محب وطن لوگوں کو ہراساں کرنے، اُن کیخلاف بےبنیاد مقدمات قائم کرنے اور پابند سلاسل کرنے کا عمل جاری ہے ہم وطن کے اندر دہشت گردی اور بے گناہوں کے قتل کو حرام سمجھتے ہیں۔ دنیا بھر میں ایک مخصوص تکفیری گروہ اسلام کی بدنامی اور مسلمانوں کے لئے رسوائی کا سبب بن رہا ہے آج امام کعبہ کو بھی ان تکفیریوں کیخلاف اعلان کرنا پڑا کہ اس گروہ کا اسلام کیساتھ کوئی تعلق نہیں۔ انہوں نے کہا کہ ملک میں دیرپا امن اور رواداری کیلئے انتہا پسندوں کیخلاف گھیرا تنگ کرنا ہو گا، بصورت دیگر یہ انتہا پسند تکفیری گروہ کی جانب سے خانہ جنگی کو کوئی نہیں روک سکے گا۔ علامہ امین شہیدی نے کہا کہ انشاءاللہ فیصل آباد اور لاہور میں منعقدہ عوامی اجتماعات ملت اسلامیہ پاکستان کے لئے دہشت گردوں، لٹیروں اور خاندانی اقتدار سے نجات کا باعث بنیں گے۔

انہوں نے مذید کہا کہ محرم الحرام کی آمد پر ہی عزاداری کے خلاف سازشوں کی بو آنا شروع ہو چکی ہے، آزادانہ مذہبی رسومات کی ادائیگی ملت جعفریہ کا آئینی، قانونی ، جمہوری اور اخلاقی حق ہےجسے کسی صورت کوئی نہیں چھین سکتا، گذشتہ برس راجہ بازار راولپنڈی میں ہونے والے اندھوناک سانحے کے تدارک کیلئے سکیورٹی اداروں ، لائسنسداروں اور قومی تنظیموں کو پیشگی طور پر مشترکہ حکمت عملی مرتب کرنا ہوگی، ہم کسی صورت عزاداری سید الشہداء علیہ السلام پر کوئی قدغن برداشت نہیں کریں گے۔