وحدت نیوز(گلگت) مقپون داس سے ہراموش کے چرواہوں کو بیدخل کرنا عدالتی فیصلے کی خلاف ورزی ہے،رات کے اندھیرے میں حکومت کا مقپون داس میں آپریشن اور مکانات کو منہدم کرنے کے عمل سے حکومت کی بد نیتی عیاں ہوگئی ۔

مجلس وحدت مسلمین گلگت بلتستان کے سیکرٹری جنرل شیخ نیئر عباس مصطفوی نے کہا ہے کہ حکومت لینڈ مافیا کے ساتھ ملی ہوئی ہے اور علاقے کی بنجر زمینوں پر قبضہ کرکے من پسند افراد کو نوازنے کی پالیسی پر گامزن ہے۔دنیا بھر میں حکومتیں زرعی شعبے کو ترقی دینے کیلئے کوشاں ہیں تاکہ آباد کاری کے ذریعے زرعی اجناس کی ضرورتوں کو پورا کیا جائے اور اس سلسلے میں کسانوں کیلئے سپیشل پیکیجز تیار کئے جارہے ہیں جبکہ گلگت بلتستان میں حکومت عوام سے زمینیں ہتھیاکر عوام کو ہجرت کرنے پر مجبور کررہی ہے۔گلگت بلتستان میں قابل کاشت اراضی نہ ہونے کے برابر ہے اور برسوں سے بنجر اراضیوں کو قابل کاشت بنانے کیلئے حکومت نے ایک پیسہ خرچ نہیں کیا اور یہاں کے کسانوں کی حوصلہ افزائی تو درکنار حکومت مختلف حیلے بہانوں سے عوام کی زمینوں پر غیر قانونی قابضین کی پشت پناہی کررہی ہے۔انہوں نے کہا کہ مقپون داس کا معاملہ عدالت میں ہے اور عدالت کی جانب سے سٹیٹس کو بحال رکھنے کا فیصلہ پہلے سے موجود تھا ،عوام کی جانب سے کسی خلاف ورزی کے بغیر حکومت کا مکانات کو منہدم کرنا عدالتی فیصلے کی خلاف ورزی ہے۔انہوں نے کہا کہ قدیم زمانے سے ہر گاؤں کے حدود متعین ہیں لیکن حکومت عوام کے مابین تنازعات کو ہوا دیکر بنجر اراضیوں پر عوام کو آپس میں لڑانے کی سازش کرکے لڑاؤ اور حکومت کرو کی پالیسی اپنائی ہوئی ہے۔اگر حکومت عوام کے ساتھ مخلص ہے تو انصاف کے تقاضے پورے کرے یا پھر فریقین کے باہمی تنازعے کا کوئی قابل قبول حل تلاش کرکے مقپون داس کو قابل کاشت بنانے پر اپنی توانائی صرف کرے ۔

وحدت نیوز (شکارپور) مجلس وحدت مسلمین ضلع شکارپورکے تحت تنظیم سازی مہم زور شور سے جاری ہے، اس سلسلے میں ضلعی سیکریٹری جنرل فدا عباس اور سیکریٹری امور تنظیم سازی شاکر حسین سومرونے چک سٹی اور بھرکھان کا دورہ کیا اور وہاں دو نئے تنظیمی یونٹس تشکیل دیئے، چک سٹی میں منعقدہ جنرل باڈی اجلاس میں کارکنان نے کثرت رائے سے برادرسید سچل شاہ کو جبکہ بھرکھان میں منعقدہ جنرل باڈی اجلاس میں کارکنان نے کثرت رائے سے برادر مظہر عباس کو نیا یونٹ سیکریٹری جنرل منتخب کرلیا ، دونوں منتخب سیکریٹری جنرلز سے ضلعی سیکریٹری جنرل فدا عباس نے حلف لیا، اس موقع پر ان کا کہنا تھا کہ ایم ڈبلیوایم الہیٰ اہدافات کی حامل جماعت ہے، جس کا بنیادی مقصد ملت تشیع کو نظم کی لڑی میں پرو کردرپیش چیلنجز کا مقابلہ کرنا ہے۔امید کرتے ہیں کہ نومنتخب سیکریٹری جنرل صاحبان جماعت کی پالیسیوں کے مطابق اپنی فعالیت سے قوم کی خدمت میں مصروف عمل ہوں گے ، انشاء اللہ تنظیم سازی کا یہ عمل جاری رہے گا اور مذید نئے یونٹس جلد تشکیل دیئے جائیں گے۔

وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ ناصرعباس جعفری نے سفیر انقلاب شہید ڈاکٹر محمد علی نقوی ؒکی اکیسویں برسی کے موقع پر وحدت سوشل میڈیا ٹیم کو جاری ویڈیوپیغام میں کہا ہے کہ پاکستان میں عدالت خواہی کے عظیم علمبردار شہید قائد حسینی ؒ اور ڈاکٹر شہید محمد علی نقوی تھے،جتنے بھی انبیاءآئے ان کی تحریک عدل خواہی کی تحریک تھی کہ لوگوں کو بیدار کریں باشعور کریں تاکہ انسان عدل کے نفاذکے لئے اُٹھیں،انبیا ءکی تحریک کو  دو لفظوں میں اگر خلاصہ کیا جائے تو یہ کہیں گئے کہ انبیا کی جدوجہد عدالت خواہی ، عدل کے نفاذ کے لئے تھی اور ظلم مٹانے کے لئے تھی ،یہ سلسلہ آگے بڑھتا گیا،انبیا کے ساتھ اولیا ءاللہ اس رستے پر چلتے رہے آئمہ اہل بیت ؑ نے اسی رستے کو اپنایااور اس جدوجہد میں کربلا ایک اہم موڑ ہے کربلا ایک اہم مرحلہ ہے عدالت خواہی کی تحریک کا ظلم ستیزی کا ظلم سے ٹکرانے کی تحریک کا !

ان کا کہنا تھا کہ شہید ڈاکٹر نقویؒ اور قائد شہید ؒاس سرزمین پرعظیم رہنما تھے،شہیدڈاکٹر نقویؒ،انبیاءکی عدالت خواہی اور ظلم ستیزی کی تحریک کے روحِ رواں تھے،انبیاء، آئمہ اور اولیاءکی تحریک عدل خواہی کو آگے بڑھانے کیلئے یہ دونوں شخصیات نمونہ عمل ہیں اور دونوں نے اس راستے میں قربانی دی شہید ہوئے،ڈاکٹر شہید میڈیکل کالج میں پڑھتے رہے تھے تو اس کے ساتھ وہ اپنی اجتماعی ذمہ داریوں سے بھی غافل نہیں تھے ،جب انقلاب اسلامی نہیں آیا تھا ۔جب دنیا اس طرح کے افکار سے زیادہ آشنا نہ تھی انہوں نے پاکستان کی سرزمین پر اس تحریک کو شروع کیا لوگوں کو منظم کیا ان کی تربیت کرنا شروع کی۔،ڈاکٹر نقوی ،عدالت خواہی اور ظلم ستیزی کی تحریک کا شجرہ طیبہ تھے ، جس کے پھل آج تک ہم دیکھ رہے ہیں،آج پاکستان میں اور دنیا بھر میں جہاں چلے جائیں آپ کو ڈاکٹر شہید محمد علی نقوی رح کے تربیت شدہ لوگ ملیں گے ، ہمیں شہید ڈاکٹر کے مشن کی تکمیل کے لئے خود کو آمادہ وتیار کرنا ہوگا۔

وحدت نیوز (کراچی) کے الیکٹرک انتظامیہ شہر کراچی کے باسیوں کو ذہنی مریض بنانے پر تلی ہوئی ہے،مختلف علاقوں میں غیر اعلانیہ،طویل اور بلاجواز بجلی بندش نے شہریوں کا جینا دوبھر کردیا ہے، موسم گرما کی آمد سے قبل ہی بجلی لوڈشیڈنگ کے اوقات میں اضافہ عوام کو ذہنی اذیت میں مبتلا کرنے کی کوشش ہے،قانون نافذ کرنے والے ادارے کے الیکٹرک انتظامیہ کی عوام دشمنی کا نوٹس لیں، ان خیالات کا اظہار مجلس وحدت مسلمین کراچی ضلع ملیر کے سیکریٹری جنرل احسن عباس رضوی نے کابینہ کے اجلاس سے خطاب کرتے ہوئے کیا۔

ان کاکہنا تھا کہ پاکستان کا سب سے بڑا تجارتی حب کراچی کے الیکٹرک انتظامیہ کی نا اہلی کی بھینٹ چڑھ گیا ہے، صنعتیں اور تجارتی مراکز تباہی کے دھانے پہنچ چکے ہیں، گھریلو صافین بوگس بلنگ اور بلاجواز لوڈشیڈنگ کے باعث کرب میں مبتلا ہیں، مختلف علاقوں میں دس تا بارہ گھنٹے کی غیر اعلانیہ لوڈشیڈنگ جاری ہے، بعض علاقوں میں لوڈشیڈنگ کا کو ئی شیڈول ہی مکررنہیں، جس سے شہریوں کو شدید مشکلا لاحق ہیں، انہوں نے مزید کہا کہ ابھی تو موسم گرما کا ٹھیک سے آغاز بھی نہیں ہوااور کے الیکٹرک انتظامیہ نے عوام کواذیت میں مبتلا کردیا ہے،کنڈہ سسٹم اور بجلی چوری کو بنیاد بناکر لوڈشیڈنگ کا آغاز کرنے والے ادارے نے شہر بھر میں لوڈشیڈنگ کا غیر منصفانہ نظام تشکیل دے رکھا ہے، دیکھنے میں آیا ہے کہ بعض علاقوں میں رات بارہ بجے اور ایک بجے تک لوڈشیڈنگ جاری رہتی ہے اور بعض جگہ دو تین بجے رات کو بھی بجلی بند کردی جاتی ہے، حکمران طبقہ یو پی ایس ، جنریٹرز اور پاور جنریشن سسٹم کی بدولت شاہانہ زندگی گزار رہا ہے جبکہ غریب آدمی فقط کے لیکٹرک انتظامیہ کو کوسنے پر مجبورہے، اگر کے الیکٹرک انتظامیہ شہریوں کو بلاتعطل اور منصفانہ انداز میں بجلی فراہم کرنے کی اہلیت نہیں رکھتی تو اپنی ذمہ داریاں حکومت کے حوالے کردے ۔