The Latest
وحدت نیوز (اسلام آباد) مجلس وحدت مسلمین پاکستان کے مرکزی رہنما علامہ اصغر عسکری نے ایم ڈبلیو ایم چوہڑ ہرپال یونٹ راولپنڈی کے ڈپٹی سیکرٹری جنرل اشتیاق حسین کی جواں سال ہمشیرہ کے مبینہ قتل پر رنج و غم کا اظہار کرتے ہوئے کہا ہے کہ اس المناک سانحہ کے مرتکب افراد کو گرفتار کر کے کیفر کردار تک پہنچایا جائے۔انہوں نے کہا کہ لواحقین کے مطابق میڈیکل رپورٹ میں واضح طور پر موجود ہے کہ مقتولہ کو گلا گھونٹ کر ہلاک کیا گیا ہے۔اس سلسلے میں پولیس کو انصاف کے تقاضے پورے کرنے چاہیے۔
مقتولہ کے بھائیوں کا کہنا ہے کہ رابعہ بی بی کی تین بیٹیاں تھیں اور وہ اولاد نرینہ سے محروم تھیں۔ یہی محرومی اس کی موت کا باعث بنی۔ اسے اس کے گھر میں بے رحمانہ طریقے سے قتل کیا گیا۔ اس جاہلانہ اقدام اور بربریت پر اُن انسانی حقوق کی تنظیموں کو بھی اپنی آواز بلند کرنی چاہیے جو حقوق نسواں کے لیے سرگرم ہیں۔ یاد رہے کہ سات اگست 2015 کو تھانہ رتہ امرال کی حدود میں بتیس سالہ رابعہ بی بی نامی خاتون کو گھر کے اندر قتل کر دیا گیا۔ مقتولہ کے بھائیوں کی طرف سے مقتولہ کے خاوند ذوالفقار اور اس کی ا یک بہن کو اس قتل کا ذمہ دار ٹہرایا جا رہا ہے۔ڈھوک رتہ پولیس نے اقدام قتل کا مقدمہ درج کر کے تفتیش شروع کر رکھی ہے۔ مقتولہ کا ایک بھائی الطاف حسین سپریم کورٹ آف پاکستان کا حاضر سروس ملازم بھی ہے
وحدت نیوز (گلگت) یمنی مظلوم مسلمانوں کی حمایت اور سعودی جارحیت کے خلاف صدائے احتجاج بلند کرنے کے جرم میں پابند سلاسل ایم ڈبلیوایم گلگت بلتستان کے صوبائی سیکریٹری امورسیاسیات غلام عباس سینٹرل جیل گلگت سے وحدت نیوزکے نمائندے سے ٹیلیفونک گفتگو کرتے ہوئے کہا کہ اسیری اور جیلیں ہمارے حوصلوں کو پست نہیں کرسکتے، مظلوموں کی حمایت اور ظالموں کی مذمت وصیت امیر المومنین (ع)ہے،جس سے کبھی سرمنہ انحراف نہیں کریں گے، انہوں نے مزید کہا کے پاکستان مسلم لیگ نواز کی جانب سے مجلس وحدت مسلمین کی پولیٹیکل ویکٹمائزیشن جاری ہے، جسے بند ہونا چاہئے، ن لیگ کا یہ سیاسی انتقام گہنائونی سازش ہے، نیشنل ایکشن پلان کی آڑمیں سیاسی مخالفت پر منبی گلگت بلتستان میں پہلا مقدمہ ایم ڈبلیوایم کے خلاف درج کیا گیا۔ انہوں نے کہا کے سینٹرل جیل گلگت میں اسیر ایم ڈبلیوایم کے دیگر رہنما شیخ شہادت حسین، مطہر عباس اور آئی ایس او کے صدر جمال حیدر کے حوصلے بلند ہیں اورکسی صورت اپنے اصولی موقف سے پیچھے ہٹنے کو آمادہ نہیں ، ہم نے اے ٹی سی کورٹ میں درخواست ضمانت جمع کروائی تھی جو کہ تعصب کی بنیاد پر مسترد کردی گئی، اب ہم چیف کورٹ میں اپیل دائر کرنے جا رہیں ہیں امید ہے کہ ہماری ضمانت منظور ہوجائے گی، ہماری تمام احباب اور مومنین سے اپیل پے کہ تمام اسیران کی استقامت کیئے دعا فرمائیں ۔
وحدت نیوز ( کوئٹہ) مجلس وحدت مسلمین کوئٹہ ڈویژن کے زیر اہتمام 27 وین برسی شہید علامہ سید عارف حسین الحسینی رح منائی گئی جس میں قائد شہید کو زبردست خراج عقیدت پیش کی گئی۔ علاوہ ازیں ایم پی اے آغارضا کے 15-2014 کے ڈی ڈی پی فنڈ سے 155 مریضوں اور 37 اسپورٹس کلبز کے علاوہ تعلیمی اداروں ، سوشل ویلفیر آرگنائزیشنز ، ہسپتالوں اور مراکز صحت میں مبلغ چار کروڑ روپے چیکس تقسیم کیے گئے، اس موقع پر کوئٹہ کے معززین ، علماء، اساتذہ اور سیاسی وسماجی شخصیات کی بڑی تعداد بھی موجود تھی، مجلس وحدت مسلمین کے رہنماء اور ممبر صوبائی اسمبلی آغا رضا نے یزدان خان ماڈل ہائی سکول میں اپنے جی ڈی پی فنڈز سے مستحق مریضوں اور اسپورٹس کلبوں میں چیکس تقسیم کرنے کی تقریب سے خطاب کرتے ہوئے کہا کہ انہوں نے کہا کہ ہمارا مقصد عوام کی فلاح و بہبود اور ترقی کو عملی جامہ پہنانا ہے ،شہید قائد علامہ عارف حسینی کی تعلیمات اور قائد وحدت علامہ راجہ ناصرعباس کی ہدایت پربلا تفریق رنگ و نسل ، مذہب عوام کی خدمت ہمارا نصب العین ہے، علاقے کو ترقی دینے کیلئے مختلف ترقیاتی ا سکیموں پر کام زور و شور سے جاری ہے ہم نے عوام کا حق انکی دہلیز تک پہنچانے کا عزم کر رکھا ہے ۔ کسی کو اجازت نہیں دی جائے گی کہ وہ عوام کے حقوق کو پامال کریں۔ ہمارا نصب العین بلا تفریق عوام کی خدمت کرنا ہے ۔ ہم نے ہمیشہ اصولوں کی سیاست کی ہے ہمیں عوام کے مفادات عزیز ہیں ، نفرت کی سیاست پر یقین نہیں رکھتے جس کا عملی ثبوت آج کی یہ پر وقار تقریب ہے ،جس میں تمام برادر اقوام سے تعلق رکھنے والے لوگ موجود ہیں عوام نے جو توقعات ہم سے وابستہ کر رکھی ہے ہم ان توقعات کو پورا کرنے کی ہر ممکن کوشش کریں گے ایم پی اے فنڈز سے تمام علاقوں میں یکساں ترقیاتی کام کروائے جا رہے ہیں ۔ عوام نے اپنے مینڈیٹ کے زریعے جس محبت اور خلوص کا اظہار کیا ہے ہم انکی توقعات پر پورا اترنے کی بھر پور کوشش کریں گے۔ عوام کی خدمت ہماری سیاست کا محور ہے۔
علاوہ ازیں قائد شہید علامہ عارف حسین الحسینی کی ستائیسویں برسی کی مناسبت سے علامہ سید ھاشم موسوی نے خطاب کرتے ہوئے کہا کہ ستائیس سال گزرنے کے باوجود بھی شہید قائد ہمارے دلوں میں زندہ ہے انکے افکار و مشن زندہ ہیں شہید قائد کی یادیں تازہ ہیں شہید کا مشن جو ایک الہیٰ ،علوی و قرآنی مشن تھا وہ جاری رہے گا ، مجلس وحدت مسلمین کے پلیٹ فارم سے شہید قائد کے ان خوابوں کو پایہ تکمیل تک پہنچایا جائے گا جو شہید نے ملت کی سر بلندی کیلئے دیکھے تھے اور جسکے لئے شہید قائد نے چار سالہ عملی جد و جہد کی دشمنوں نے عالم جوانی میں شہید قائد کو ہم سے چھینا لیکن انکی روح ، انکی فکر اور انکی یادوں کو ملت کے دلوں سے کوئی نہیں نکال سکتا ۔ اس پر وقار تقریب میں علاقے کے معتبرین اور لوگوں کی کثیر تعداد نے شرکت کی۔
وحدت نیوز (گلگت) انسداد دہشت گردی عدالت گلگت نے یمنی مظلوم مسلمانوں کی حمایت کے جرم میں گرفتار ایم ڈبلیوایم اور آئی ایس او کے رہنماوں کی درخواست ضمانت مسترد کردی ہے، تفصیلات کے مطابق مجلس وحدت مسلمین کے صوبائی سیکریٹری امورسیاسیات غلام عباس ، ڈویژنل رہنما شیخ شہادت حسین ، سابق امیدوار حلقہ ۲ مطہر عباس اور آئی ایس او کے ڈویژنل صدر جمال حیدر کی درخواست ضمانت انسداد دہشت گردی عدالت میں جج راجہ شہباز خان کے روبروپیش کی گئی جسے دلائل سننے کے بعد مسترد کردیا گیا، ایم ڈبلیوایم کے صوبائی ترجمان الیاس صدیقی نے وحدت نیوز ست گفتگو کرتے ہوئے کہا کہ گلگت بلتستان میں اینٹی ٹیرارسٹ ایکٹ( اے ٹی اے )کی دفعہ کا غیر ضرورری اور سیاسی انتقام کیلئے استعمال کیا جارہا ہے جو قابل مذمت ہے ، ریاستی ادارے اس عمل کو روکیں ، انہوں نے کہا کہ ہم اپنے بے گناہ اسیروں کی ضمانت کیلئے جلد چیف کورٹ میں اپیل دائر کریں گے۔
وحدت نیوز(تہران) مجلس وحدت مسلمین پاکستان کےمرکزی سیکرٹری جنرل علامہ راجہ ناصرعباس جعفری کی سربراہی میں مرکزی قیادت کا سہ رکنی وفد تہران پہنچ گیا۔ جہاں پر وہ مجمع جہانی اہلبیت کے زیر اہتمام ہونے والی انٹرنیشنل کانفرنس میں شرکت کریں گے۔ وفد میں ایم ڈبلیو ایم کے سیکرٹری جنرل علامہ راجہ ناصر عباس جعفری کے علاوہ مرکزی ڈپٹی سیکرٹری جنرل علامہ امین شہیدی اور سیکرٹری امور خارجہ ڈاکٹر علامہ سید شفقت حسین شیرازی شامل ہیں،کانفرنس آج سے بعد از ظہرین شروع ہو گی جو کہ چار دن تک رہے گی۔ کانفرنس میں پاکستان اور پاکستانی عوام کی نمائندگی کرتے ہوئے ایم ڈبلیو ایم کے مرکزی قائدین خطاب کریں گے۔ اور پاکستانی عوام کی ترجمانی کریں گے۔ امید ہے کہ اس کانفرنس میں رہبر معظم آیت اللہ سید علی خامنہ ای بھی خطاب کریں گے۔
وحدت نیوز (تہران) رہبر انقلاب اسلامی آیت اللہ العظمٰی سید علی خامنہ ای نے کہا ہے کہ ہم امریکہ کو اپنے ملک میں اثر و رسوخ کی اجازت نہیں دیں گے۔ اسلامی ریڈیو اور ٹی وی چینلوں کی یونین کے اجلاس کے شرکاء نے پیر کے دن تہران میں اسلامی انقلاب کے سربراہ سے ملاقات کی۔ رہبر انقلاب اسلامی نے اس موقع پر کہا کہ امریکی حکام ایٹمی معاہدے کے ذریعے ہمارے ملک میں اثر و رسوخ حاصل کرنا چاہتے تھے، لیکن ہم نے ان کے اثر و رسوخ کا راستہ روک دیا ہے اور ہم یقینی طور پر اس راستے کو بند کر دیں گے۔ ہم امریکہ کو اپنے ملک میں نہ اقتصادی اثر و رسوخ کی اجازت دیں گے اور نہ ہی سیاسی اور ثفاقتی اثر و رسوخ کی۔ انکا کہنا تھا کہ ہم پوری طاقت کے ساتھ اس اثر و رسوخ کا مقابلہ کریں گے اور اللہ تعالٰی کا شکر ہے کہ ایسا کرنے کی یہ طاقت آج ایران کے پاس موجود ہے۔ رہبر انقلاب اسلامی نے ایٹمی معاہدے کے بارے میں کہا کہ ابھی تک یہ بھی واضح نہیں ہے کہ اسے امریکہ اور ایران میں منظوری بھی دی جائے گی یا نہیں۔ رہبر انقلاب اسلامی نے مزید کہا کہ امریکی حکام خطے میں اثر و رسوخ اور اپنے اہداف کے حصول کے درپے ہیں، لیکن ہم ان کو کامیاب نہیں ہونے دیں گے۔ وہ عراق اور شام کو تقسیم کرنے کے درپے ہے، اللہ تعالٰی کے فضل و کرم سے ایسا کبھی نہیں ہوگا۔
رہبر انقلاب اسلامی آیت اللہ العظمٰی سید علی خامنہ ای نے یمن کے خلاف سعودی عرب کی جارحیت کی جانب اشارہ کرتے ہوئے کہا کہ آج ہمیں یمن کے مظلوم عوام کی صورتحال پر رنج اور دکھ ہے، ہم ان کے لئے دعا گو ہیں اور ہم ان کی حتی المقدور مدد کر رہے ہیں۔ اسلامی جمہوری ایران کے سپریم لیڈر نے کہا کہ ایک ملک کو تباہ کیا جا رہا ہے اور حماقت کے ساتھ سیاسی مقاصد کو حاصل کرنے کی کوشش کی جا رہی ہے۔ رہبر انقلاب اسلامی نے فلسطین کی استقامت کو اسلامی تاریخ کا ایک روشن باب قرار دیا اور کہا کہ ہم خطے میں جاری استقامت اور فلسطین کی استقامت کا دفاع کرتے ہیں اور جو بھی اسرائیل کے خلاف جہاد کرے گا، صیہونی حکومت کو ضرب لگائے گا اور استقامت کی حمایت کرے گا، ہم اس کی ہر ممکن مدد کریں گے۔ رہبر انقلاب اسلامی نے دنیا کے ذرائع ابلاغ پر صیہونزم کے تسلط کی جانب اشارہ کرتے ہوئے اسلامی ریڈیو اور ٹی وی چینلوں کی یونین کے اراکین کو مخاطب قرار دیا اور کہا کہ بی بی سی کے حکام اپنے غیر جانبدار ہونے کا دعویٰ کرتے ہیں لیکن وہ جھوٹ بولتے ہیں، وہ سامراجی پالیسیوں کو عملی جامہ پہناتے ہیں۔ ریڈیو ٹی وی اور عصر حاضر کے عجیب وسائل و ذرائع پر صیہونیوں کا تسلط ہے اور ان سے صیہونی اپنے مقاصد حاصل کرتے ہیں۔ ان کا مقابلہ کیا جانا ضروری ہے۔ آپ لوگوں کا کام ایک تحریک کا آغاز ہے، اس میں تیزی آنی چاہئے اور اس کی تقویت کی جانی چاہئے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے بھارتی افواج کی طرف سے لائن آف کنٹرول کی مسلسل خلاف ورزیوں پر سخت تشویش کا اظہار کرتے ہوئے کہا ہے کہ بھارت کا یہ جارحانہ طرز عمل پورے خطے کے لئے سخت نقصان دہ ثابت ہوسکتا ہے۔ بھارتی افواج کی مسلسل گولہ باری سے اب تک متعدد پاکستانی جاں بحق ہوچکے ہیں، جو بین الاقوامی قوانین کی سنگین خلاف ورزی ہے۔ پاکستان کے داخلی حالات کو اپنے لئے سازگار سمجھتے ہوئے بھارتی افواج کی طرف سے کسی بھی طرح کی دراندازی اس کی بقاء و سلامتی کو خطرے میں ڈال دے گی۔ افواج پاکستان اور قوم ملک میں دہشت گردی کے مقابلے کے ساتھ ساتھ ہر قسم کی بیرونی جارحیت سے نبردآزما ہونے کی پوری صلاحیت رکھتی ہے۔ بھارت کسی مغالطے میں نہ رہے۔ پاکستان ایک ایٹمی طاقت ہے اور اپنے دفاع کے لئے ہر قسم کے ہتھیاروں کے استعمال کرنے میں مکمل طور پر بااختیار ہے۔
علامہ ناصر عباس جعفری کا کہنا تھا کہ اقوام متحدہ سمیت عالمی طاقتیں بھارت کے اس رویے کا نوٹس لیں، جو اپنے غیر مدبرانہ اور جارحانہ رویے سے اقوام عالم کو شدید خطرات سے دوچار کرنا چاہتا ہے۔ پاکستان ایک پُرامن ملک ہے اور کبھی بھی جنگ کا حامی نہیں رہا، لیکن تاریخ شاہد ہے کہ جب بھی اس ملک پر جنگ مسلط کی گئی تو اس نے میدان جنگ کو دشمن کے قبرستان میں بدل کر اپنی طاقت کے جوہر کو عالمی سطح پر منوایا ہے۔ انہوں نے کہا کہ سمجھوتہ ایکسپریس کے مرکزی ملزم سوامی آسیم آنند کی رہائی اور بھارت کی طرف سے بغیر پیشگی اطلاع کے پانی چھوڑ دینا پاکستان کی سلامتی کے خلاف اقدامات ہیں۔ بھارت کی اس آبی جارحیت سے ملک کا لاکھوں ایکڑ رقبہ متاثر ہو رہا ہے۔ بھارتی وزیر اعظم نریندر موودی ایک متعصب شخص ہے، جو پاکستان کی سلامتی کا کھلے عام دشمن ہے۔ علامہ راجہ ناصر نے سلامتی کونسل سے مطالبہ کیا ہے کہ اس بھارتی جارحیت کا فوری نوٹس لیتے ہوئے ضروری اقدامات کریں، تاکہ خطے کی سلامتی و استحکام کو یقینی بنایا جا سکے۔
وحدت نیوز(اسلام آباد) ن لیگی وزراء آئے روز عسکری اداروں کی کردار کشی پر مبنی بیانات دے کر ملک کو عدم استحکام کا شکار کررہے ہیں ، عسکری ادارے اور اعلیٰ عدلیہ وفاقی وزراءکی ہرزہ سرائیوں کا فوری نوٹس لیں ، ان خیالات کا ظہار مجلس وحدت مسلمین کے مرکزی سیکریٹری امور سیاسیات سید ناصر عباس شیرازی نے دورہ کراچی کے موقع پر نمائندہ وحدت نیوز سے گفتگو کرتے ہوئے کیا، ان کا کہا تھا کہ مسلم لیگ ن کے سینیٹر مشاہد اللہ خان کا عسکری حکام اور ادارے کے خلاف حقیقت کے منافی بیان قابل مزمت ہے، ن لیگ کے متعدد وزراءریاستی اداروں کی کردار کشی پر مبنی بیانات دیتے رہے ہیں جس سے قومی سلامتی اور استحکام کو شدید خطرات لاحق ہوئے ہیں ، دھرنا تحریک کو فوجی حمایت سے منصوب کرنے کی سازش ن لیگی حکومت کا مخفی ایجنڈا ہے ، جسے اعلیٰ قیادت کی بھر پو رحمایت حاصل ہے، انہوں نے کہا کے پیپلز پارٹی کی سندھ حکومت نے کرپشن اور لوٹ کھسوٹ کی اعلیٰ مثالیں قائم کیں ہیں ، باریاں بدل بدل کر عوام کو لوٹنے والے حکمرانوں نے عوام کا جینا محال کردیاہے ، انہوں نے کے الیکٹرک کی جانب سے بجلی کے نرخوں میں ہوشربہ اضافے کو عوام دشمن اقدام قرار دیا ، انہوں نے کہا کہ لوڈشیڈنگ ، غربت اور بے روزگاری سے تنگ عوام پر کے الیکٹرک انتظامیہ کی جانب سے قیمتوں میں اضافہ کسی صورت قبول نہیں کیا جائے گا، اگر کے الیکٹرک انتظامیہ نے بجلی کی قیمتوں میں اضافہ واپس نہ لیا تو ایم ڈبلیوایم بھر پور احتجاج کرکے گی۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے خودکش حملے کے نتیجے میں صوبائی وزیر داخلہ کرنل ریٹائرڈ شجاع خانزادہ سمیت متعدد قیمتی جانوں کے ضیاع پر گہرے رنج و غم کا اظہار کرتے ہوئے کہا ہے کہ شجاع خانزادہ دہشت گرد قوتوں کے خلاف ایک مضبوط سیسہ پلائی ہوئی دیوار تھے۔ ملک بھر میں دہشت گردی کے خلاف جاری آپریشن سے ان مذموم عناصر کے قدم اکھڑ چکے ہیں اور اب یہ بوکھلاہٹ کا شکار ہیں۔ پنجاب میں دہشت گردی کے بہت سارے مراکز ابھی تک دہشت گردوں کی محفوظ پناہ گاہوں کی شکل میں موجود ہیں۔ وفاقی دارالحکومت اور پنجاب کے ان مدارس کا بھی آپریش کیا جانا چاہیے، جہاں طالبانی فکر کا نصاب پڑھایا جاتا ہے۔ کالعدم مذہبی تنظیموں کے سہولت کار اور معاونین خواہ وہ کسی بھی شعبہ میں ہوں، ان پر آہنی ہاتھ ڈالنے کی ضرورت ہے۔ جو بھی شخص دہشت گردوں کو ہیرو بنا کر پیش کرتا ہے، اسے نیشنل ایکشن پلان کے تحت گرفتار کیا جانا چاہیے۔
انہوں نے کہا شجاع خانزادہ کی شہادت ملک و قوم کے لئے ایک ناقابل تلافی نقصان ہے۔ ان سے کالعدم دہشت گرد تنظیم لشکر جھنگوی کے سربراہ ملک اسحق کی ہلاکت کا بدلہ لیا گیا ہے۔ انہوں نے کہا کہ افواج پاک اور حکومت دہشت گردی کے خاتمے میں پرعزم ہے۔ اس طرح کی بزدلانہ کارروائیاں مذموم عناصر کی سرکوبی کی راہ میں رکاوٹ نہیں بن سکتیں۔ علامہ راجہ ناصر نے اس سانحہ پر مجلس وحدت مسلمین کی طرف سے ایک روزہ سوگ کا اعلان کرتے ہوئے شجاع خانزادہ سمیت دیگر شہداء کے خاندانوں سے اظہار تعزیت کرتے ہوئے مرحومین کی بلندی درجات اور لواحقین کے لئے صبر جمیل کی دعا کی ہے۔
وحدت نیوز (لاہور) مجلس وحدت مسلمین پنجاب کے صوبائی سیکریٹری جنرل علامہ عبدالخالق اسدی نے وحدت ہاوس لاہور میں جاری صوبائی کابینہ کے اجلاس سے خطاب کرتے ہوئے کہا کہ پنجاب بھر میں کالعدم جماعتوں کے زیر اثرمدارس دہشت گردوں کی نرسریوں میں تبدیل ہو چکے ہیں،صوبائی وزیر داخلہ شجاع خانزادہ وطن عزیز کے غیور فرزند تھے،ان کی شہادت پاکستانی عوام کا عظیم نقصان ہے،چوہدری شیر علی کا رانا ثناءاللہ سے متعلق بیان حساس نوعیت کا ہے،رانا ثناءاللہ کے کالعدم جماعتوں سے گہرے مراسم کے بارے میں پوری دنیا آگاہ ہے، انہوں نے وفاقی حکومت سے مطالبہ کیا کہ پنجاب کو دہشت گردی سے پاک کرنے کیلئے صفائی کا آغاز راناثناءاللہ سے کیا جائے، پنجاب حکومت نیشنل ایکشن پلان کی آڑ لے کر محب وطن شیعہ سنی عوام کو نشانہ بنا رہی ہے جو قابل مذمت ہے، پاکستان کو خطرہ لبیک یا رسول اللہ اور لبیک یا حسین کہنے والوں سے نہیں بلکے کافر کافر شیعہ کافر اور کافر کافر بریلوی کافر کے نعرے لگانے والوں سے ہے، انہوں نے کہا کےپنجاب کے مختلف اضلاع سے بلاجواز گرفتار ایم ڈبلیوایم کے متعدد رہنماوں کو فوری طور پر رہا کیا جائےْ۔
