وحدت نیوز(ہنگو) سیکرٹری جنرل مجلس وحدت مسلمین ضلع ہنگو کے انتحاب کے لئے علاقہ ہنگو میں تقریب منعقد ہوئی، جس میں کئی اہم شحصیات نے شرکت کی۔ ضلع کنونشن سے جہاں علاقے کے معززین نے خطاب کیا وہاں علماء نے بھی کنونشن کو رونق بخشی، کنونشن میں شرکت کرنے والوں میں سیکرٹری جنرل ایم ڈبلیو ایم کے پی کے علامہ سید محمد سبطین حسین الحسینی، ڈپٹی سیکرٹری جنرل علامہ سید وحید عباس کاظمی، علامہ سبیل حسن مظاہری، علامہ سید باقرحسین منتظری، علامہ ارشادعلی شامل تھے۔ کنونشن سے خطاب کرتے ہوئے صوبائی سیکرٹری جنرل علامہ سید محمد سبطین نے کہا کہ پاکستان میں جہان مومنین کی نسل کشی جاری ہے وہاں گزشتہ سات مہینوں میں 129 اہل تشیع ڈاکٹروں اور وکلا کو بھی شہید کیا گیا۔ ستم ظریفی یہ ہے کہ ایک ہی خاندان کے کئی کئی افراد ٹارگٹ کلنگ کا نشانہ بن چکے ہیں مگر دوسری طرف نواز اور شہباز حکومت بے گناہ اہل تشیع کے نام تھری ایم پی، سولہ ایم پی اور شیڈول فور میں ڈالنے میں مصروف ہے اور بے گناہ افراد کو جیل بھیجا جا رہا ہے۔ ایسے حالات میں ضروری ہے کہ ہم متحد ہوکر ہر سازش کو ناکام بنادیں۔ انہوں نے مزید کہا کہ ہم آپس کے مسائل اور مومنین کے مسائل حل کرنے کی کوشش کریں تاکہ اگر کل امام زمانہ ظہور فرمائیں توان کے سامنے سرخرو ہوسکیں۔

اس موقع پر سابق صوبائی سیکرٹری جنرل علامہ سبیل حسن مظاہری کا کہنا تھا کہ کوئی بھی فرد یا قوم اس وقت تک کامیاب نہیں ہوسکتا جب تک وہ منظم طریقے سے اپنے امور کو انجام نہ دے۔ اور کوئی بھی اکیلا فرد کامیاب تب ہوسکتا ہے جب اس کے ساتھ افراد کی کمی نہ ہو۔ آج تنظیم نو کی صورت میں جو بھی سیکرٹری جنرل منتخب ہوتا ہے اگر آپ اس کا ساتھ نہ دیں تو کامیابی کی کوئی امید نہیں۔ اس لئے ضروری ہے کہ ہم ہر قسم کے اختلافات کو بھلا کر ملت کی سربلندی کے لئے کام کریں۔ انہوں نے جذباتی انداز میں کہا کہ آج ہر طرف مومنین کی لاشیں ہی لاشیں گر رہی ہیں لیکن ہم ان حالات سے بے نیاز ہیں تو پھر امام زمانہ (عجل) کے سامنے کیا جواب دینگے۔

ضروری ہے کہ ہم ملت تشیع کے تمام مسائل سے باخبر رہیں اور اپنی استطاعت کے مطابق اقدام بھی اٹھائیں۔ اس دوران علامہ سید وحید کاظمی کا کہنا تھا کہ ایم ڈبلیوایم کی کارکردگی اگر صرف اور صرف سانحہ راولپنڈی کے حوالہ سے بھی دیکھیں تو پتہ چلتا ہے کہ اس وقت مجلس وحدت مسلمین کی کتنی ضرورت ہے کیونکہ جب فقہ دیوبند سمت بریلوی اہل سنت بھی ملت تشیع کے خلاف میدان میں آئے تو پتہ یہ چلتا تھا کہ اب ہم آسانی سے جلوس عزاء کو برآمد نہیں کر پائیں گے مگر امام حسین ؑ کے سچے سپاہیوں نے ہر میدان سنبھالا اور قیائدین نے الیکٹرانکس میڈیا کے سامنے سازشوں کو بے نقاب کردیا تو جوانوں نے شوشل میڈیا پر دن رات تکفیری سوچ کو خاک میں ملا دیاجس سے صرف ایم ڈبلیوایم کو فتح نہیں ملی بلکہ پورے قوم کو فتح کی خوشی نصیب ہوئی اور انہی کی کوششوں سے پنڈی کے تمام کے تمام اسیروں کو گھر گھر پہنچاکر یہ بتا دیا کہ ہم کمزور نہیں ہے۔

اس موقع پر سابق سیکرٹری جنرل ضلع ہنگو علامہ ارشاد علی نے ضلع ہنگو کے ذمہ داری سبکدوش ہونے کا اعلان کیا اور کہا کہ ہم مجلس وحدت مسلمین کے ساتھ آج بھی ہیں اور کل بھی بھی ہونگے بلکہ خون کے آخری قطرے تک ایم ڈبلیوایم کے ساتھ رہیں گے ۔انہوں نے کہا کہ مجلس وحدت مسلمین کے ہاتھ میں شہید سید عارف حسین الحسینی کاوہ خون آلودہ پرچم ہے جس کو دشمن نے گرانے کی سازش کی تھی۔ ہمارا ناصر عباس جعفری پر بھر پور اعتماد ہے جس طرح وہ قیادت کر رہے ہیں آج اسی انداز کی قیادت درکار تھی۔ اس موقع پر نئے سیکرٹری جنرل کے لئے الیکشن بھی ہوااور گل یوسف نے 51 فیصد سے زیادہ ووٹ لے کر کامیابی حاصل کی۔ ہنگو کے نئے سیکرٹری جنرل سے علامہ سید باقر حسین منتظری نے حلف لیا۔ اور ان کی کامیابی کے لئے دعا کی۔ اس دوران علامہ سید باقر حسین منتظری نے امام موسیٰ کاظم کے شہادت کے حوالے سے مصائب بیان کئے

وحدت نیوز(گلگت) مجلس وحدت مسلمین گلگت ڈویژن کے ترجمان اور سابق ممبر بلدیہ گلگت سعید الحسنین نے اپنے ایک بیان میں کہا ہے کہ ایم ڈبلیوایم گلگت بلتستان میں اقدار کی سیاست کو فروغ دینا چاہتی ہے۔ انکا کہنا ہے کہ ہم محض نمود و نمائش کیلئے اور اپنی سیاسی پوزیشن مستحکم کرنے کیلئے کرپٹ اور نااہل سیاسی بازی گروں سے سودا بازی کرنے اور انکی حمایت کرنے کا سوچ بھی نہیں سکتے ہیں۔ انہوں نے کہا ہے کہ ایم ڈبلیو ایم ایک نظریاتی جماعت ہے اور عوام کو ہم سے توقعات وابستہ ہیں کہ ہم عوام کو باشعور اور پڑھی لکھی لیڈ شپ مہیا کرینگا۔ انہوں نے مزید کہا کہ گلگت بلتستان انتخابات میں ہمارا ہدف باشعور اور اہل افراد کو ایوانوں تک پہنچانا ہے اور ہم اسی پالیسی پر گامزن رہ کر آئندہ انتخابات میں اپنا بھرپور کردار ادا کرینگے۔

وحدت نیوز(اسلام آباد) مجلس وحدت مسلمین کے سربراہ علامہ ناصرعباس جعفری نے کہا ہے کہ دھاندلی کے نتیجے میں قائم ہونے والی مسلم لیگ نواز کی حکومت ہر محاذ پر ناکام ہوچکی ہے، کہیں پر بھی حکومت کی رٹ نظر نہیں آتی، ٹارگٹ کلنگ اور فرقہ وارانہ قتل و غارت کے نتیجے میں بے گناہ مسلمانوں کا خون بہہ رہا ہے، توہین اہلبیت ؑ کے ذمہ داروں کے خلاف کارروائی میں جان بوجھ کر تاخیر ی حربے استعمال کئے جا رہے ہیں، وہ عدلیہ جس نے توہین عدالت کے نتیجے میں دو وزراء اعظم کو ہٹا دیا، توہین اہلبیت ؑ پر مکمل خاموش ہے۔ ان خیالات کا اظہار انھوں نے اسلام آباد میں سنی اتحاد کونسل کے سربراہ صاحبزادہ حامد رضا کے ساتھ مشترکہ پریس کانفرنس سے خطاب کرتے ہوئے کیا۔ انھوں نے کہا کہ وفاقی اور پنجاب حکومت سمیت اعلٰی عدلیہ عوام کو انصاف فراہم کرنے کی بجائے دہشتگردوں کی پشت پناہی کر رہی ہیں۔ ان کا کہنا تھا کہ ہم طالبان کے ساتھ مذاکرات کے مخالف ہیں، جب تک دہشتگردوں کا خاتمہ نہیں ہوجاتا ملک میں امن قائم نہیں ہوسکتا، ہم عمران خان کے اس موقف کو رد کرتے ہیں کہ طالبان کے خلاف کارروائی سے بلوچستان ہم سے الگ ہوجائیگا۔ علامہ ناصر عباس نے کہا کہ ٹارگٹ کلنگ اور فرقہ وارانہ تشدد کے خلاف یکم جون کو کراچی میں احتجاج کیا جائے گا۔ انھوں نے پنجاب حکومت کی جانب سے بے گناہ لوگوں کو بےجا تنگ کرنے اور جھوٹے مقدمات میں پھنسا کر ظلم اور بربریت کرنے پر پنجاب حکومت اور رانا ثناءاللہ کو تنبیہ کی کہ وہ منفی ہتھکنڈوں سے باز رہیں۔

پریس کانفرنس سے خطاب کرتے ہوئے صاحبزادہ حامد رضا نے کہا کہ اعلٰی عدالتوں میں جب تک پی سی او ججز بیٹھے ہیں، انصاف کی فراہمی ناممکن ہے۔ ان کا کہنا تھا کہ موجودہ حکومت عوام کو انصاف فراہم کرنے میں مکمل ناکام ہوچکی ہے، ان کی تمام پالیساں عوام اور ریاست کے خلاف ہیں، انہوں نے کہا کہ وزیراعظم کا دورہ بھارت ان کی ناکامی کا منہ بولتا ثبوت ہے، وزیراعظم نے اپنے دورہ کے موقع پر مسئلہ کشمیر کا ذکر تک نہیں کیا اور نہ ہی بلوچستان میں انڈیا کی مداخلت پر بات کی۔ حمزہ شہباز کو طالبان کی جانب سے دھمکیوں کے حوالے سے ان کا کہنا تھا کہ یہ میاں برادران اور مسلم لیگ نواز کا کا ڈرامہ ہے، وہ خود طالبان کی سرپرستی کرتے ہیں، ان کو طالبان کیسے دھمکی دے سکتے ہیں۔ چوہدری نثار ہر مشکل وقت میں منظر سے غائب ہوجاتے ہیں، اس وقت بھی جب طالبان کے ساتھ مذاکرات ناکام ہوچکے تو چوہدری نثار منظر سے غائب ہوگئے ہیں، انہیں چاہیے کہ وہ منظر پر آکر عوام کو حقیقت سے آگاہ کریں۔ انھوں نے بری امام کی قبر مبارک کو مسمار کرنے کی مزموم کوشش کی مذمت کرتے ہوئے کہا کہ قبر مبارک مسمار کرنے سے باز رہا جائے۔