وحدت نیوز(اسلام آباد) سانحہ راولپنڈی کے بعد پیدا شدہ صورتحال ، سید الشہداء امام حسین (ع) کی شان اقدس میں ہو نے والی گستاخی ، مساجد ،امام بارگاہوں و علم حضرت عباس (ع) کی بے حرمتی اور بیرونی ایجنڈے پر کارفرما تکفیری دہشت گردوں کی درندگی کے خلاف اور ملک میں قیام امن کے لئے مجلس وحدت مسلمین پاکستان کے سربراہ علامہ راجہ ناصر عباس جعفری کی اپیل پر ۲۲ نومبربروز جمعہ ملک بھر میں یوم عظمت نواسئہ رسول  (ص) منایا جائے گا، اس سلسلے میں ایم ڈبلیو ایم کے مرکزی سیکریٹریٹ سے تمام اضلاع کو ہدایات جاری کر دی گئی ہیں کہ نماز جمعہ کے اجتماعات کے بعد ، تمام اضلاع جامع مساجد اور پریس کلب  کے باہر پر امن احتجاجی مظاہروں اور امن واک کا اہتمام کریں ،علامہ راجہ ناصر عباس جعفری نے تمام محب وطن شیعہ سنی عوام سے اپیل کی ہے کہ یوم عظمت نواسئہ رسول (ص)کے موقع پر اپنے گھروں سے باہر نکلیں اور سید الشہداء نواسئہ رسول (ص) سے اپنے حقیقی عشق و محبت کو ثبوت دیتے ہو ئے ، امن دشمن ، اسلام دشمن اور رسول(ص)  اور آل رسول (ص)کے مخالفین سے اظہار برائت کریں ۔

وحدت نیوز(ملتان) مجلس وحدت مسلمین ملتان کے زیراہتمام ''آل پارٹیز امن اکانفرنس''ملتان کے مقامی ہوٹل میں منعقد ہوئی۔ امن کانفرنس میں صوبائی وزیرجیل خانہ جات ومسلم لیگ کے رہنما چوہدری عبدالوحید آرائیں، سابق ایم این اے شیخ طارق رشید، ممبر اسلامی نظریاتی کونسل مفتی غلام مصطفی رضوی، مجلس وحدت مسلمین ملتان کے سیکرٹری جنرل علامہ اقتدارحسین نقوی، انجمن تحفظ عزادری کے صدر الحاج شفقت حسنین بھٹہ، بزرگ تاجر رہنما خواجہ شفیق احمد، مجلس وحدت مسلمین کے مرکزی سیکرٹری تربیت علامہ اعجاز حسین بہشتی، مرکزی رہنمایافث نویدہاشمی، جماعت اہلسنت ملتان کے ناظم صاحبزادہ مطیع الرسول، پاکستان سرائیکستان ڈیموکریٹک پارٹی کے مطلوب بخاری، تحریک منہاج القرآن کے امیر میجر(ر)اقبال چغتائی، پاکستان عوامی تحریک کے میڈیا کوارڈینیٹر رائو عارف رضوی، پاکستان پیپلزپارٹی کے رہنمانفیس احمد انصاری، پاکستان تحریک انصاف کے رہنمابیرسٹر وسیم بادوزئی، جماعت اسلامی کے رہنما حافظ محمد اسلم، سینیئرصحافی وملتان پریس کلب کے نائب صدر مظہرجاوید، سینئرنائب صدر ہائیکورٹ بار ایسوسی ایشن مہرنصیرتھہیم، انجمن لائسنسداران ملتان کے رہنماسید اسد عباس بخاری، متحدہ قومی موومنٹ کے سید وصیح حیدر، ذیشان حیدر، انجمن لائسنسداران ملتان کے صدر سید اصغر عباس نقوی، تحریک صوبہ ملتان کے چیئرمین رانا تصویراحمد، مستقبل پاکستان کے صدر وسیم فاروقی، مسلم لیگ ن کے رہنما اطہرممتاز، تاجر رہنماسلطان محمود ملک، مہر شاکر احمد، ایپکا کے رہنمامحمد عباس صدیقی، مہرسخاوت علی، اسلامک میڈیافائونڈیشن کے کوارڈینیٹر محمد علی رضوی، فلسطین فائونڈیشن ملتان کے ترجمان ثقلین نقوی ودیگرنے شرکت کی۔

امن کانفرنس میں مذہبی وسیاسی جماعتوں اور سول سوسائٹی کے رہنمائوں نے امن وامان کی صورتحال کو بہتر رکھنے کے لیے (9)نکاتی مشترکہ اعلامیہ میں کہا کہ ملتان شہر کے پُرامن ماحول کو سبوتاژ کرنے کرنے کی گہری سازش ہے جن میں ملک دشمن عناصر ملوث ہیں۔ اہلبیت، ازدواج مطہرات، صحابہ کرام، کا احترام ہر مسلمان پر واجب ہے اور ان کی توہین کرنا قطعی حرام اور قابل تعزیرجُرم ہے ملک بھر میں مذہب کے نام پر دہشت گردی اور قتل وغارت گری کو اسلام کے خلاف سمجھتے ہیں اور اس کی پُرزور مذمت کرتے ہیں۔ گزشتہ ایام میں ملتان میں پیداہونے والے کشیدہ حالات کی پُرزور مذمت کرتے ہیں۔

 
ہم یہ مطالبہ کرتے ہیں کہ ملتان میں کشیدہ حالات پیداکرنے والے سازشی عناصر کو فی الفور گرفتار کرکے قرار واقعی سزا دی جائے۔ آل پارٹیز امن کانفرنس اس بات کا بھی اعلان کرتی ہے کہ ایسی تقریر وتحریر سے بھی گریز کیا جائے جن کی وجہ سے کسی بھی مکتب فکر کی دل آزاری ہو اور اشتعال پھیلے۔ تمام مسلمان خواہ وہ کسی بھی فرقے سے تعلق رکھتے ہوں قابل احترام ہیں لہذا کسی کو یہ حق نہیں پہنچتا کہ کسی دوسرے فرقے کے مسلمانوں کی دل آزاری کرے۔ تمام مکاتب فکر کے مقامات مقدسات، عبادت گاہوں، مساجد، امام بارگاہوں کا احترام کیا جائے اور ان کا تحفظ کیا جائے۔ اسلام پیار، محبت، امن وآشتی کا دین ہے۔ آپس میں رواداری اور پیار ومحبت کو مزید مستحکم کرنے کے لیے علماء عمائدین اور ملک کے تمام طبقات کو اپنا کردار ادا کرنا چاہیے۔

وحدت نیوز(گلگت) مجلس وحدت مسلمین صوبہ گلگت بلتستان کے سیکریٹری جنرل علامہ شیخ نیئرعباس مصطفوی کی زیر قیادت ایک وفد نے وزیر اعلیٰ گلگت بلتستان مہدی شاہ سے ملاقات کی ،اس موقع پر علامہ نیئر عبا س کا کہنا تھا کہ پنجاب حکومت خاص کر رانا ثنا ء اللہ عزاداروں کے خلاف بے بنیاد پروپیگنڈہ  کے ذریعے پاکستان بھر میں فرقہ واریت کو فروغ دینے کے ایجنڈے پر گامزن ہیں۔ چونکہ طالبان کے ساتھ مذاکرات کی ناکامی کے بعد ان کی توپوں کا رخ پنجاب حکومت کی طرف ہوا ہے جس سے خوف زدہ ہوکرپنجاب حکومت اور ن لیگ طالبان کے حملوں کا رخ اہل تشیع کی جانب موڑنے کی بھونڈی کوشش کررہی ہے جس سے ملت تشیع پاکستان کبھی بھی خوفزدہ نہیں ہوگی چونکہ ملت تشیع ایک شہید پرور ملت ہے۔ نیز راولپندی میں مقیم گلگت بلتستان کے طالب علموں اور کاروباری حضرات کو جان بوجھ کر تنگ کیا جارہا ہے جس سے گلگت بلتستان میں مسلم لیگ ن کو سیاسی طور پر بہت نقصان آٹھانا پڑیگا۔ وزیر اعلیٰ ہمارے خدشات کو پنجاب حکومت کے گوش گزار کرے اور انہیں ایسی حرکتوں سے باز رکھے۔

وحدت نیوز(حیدرآباد) ملی یکجہتی کونسل کے سربراہ صاحبزادہ ابوالخیر محمد زبیر نے کہا کہ راولپنڈی کے سانحہ کے بارے میں علامہ امین شہیدی، علامہ ساجد علی نقوی، مولانا سمیع الحق، لیاقت بلوچ، حافظ محمد سعید، سینٹر سراج الحق سمیت دیگر اکابرین اور قائدین سے رابطے اور ان سے فرقہ وارانہ آگ بجھانے کےلئے مشورے ہوئے سب کی متفقہ رائے یہ تھی کہ یہ سانحہ پاکستان کو غیر مستحکم کرنے کی بین الاقوامی سازش کا ایک حصہ ہے، مصر اور شام میں جو فرقہ واریت کی آگ بھڑکائی جارہی ہے یہ اسی عالمی سازش کی ایک کڑی ہے۔ ان خیالات کا اظہار انہوں نے حیدرآباد پریس کلب میں پریس کانفرنس سے خطاب کرتے ہوئے کیا۔ پریس کانفرنس میں مجلس وحدت مسلمین حیدرآباد کے سیکریٹری جنرل علامہ امداد نسیمی ، جماعت اسلامی کے عبدالوحید قریشی، م، شیعہ علماء کونسل کے آغا محمد قمرانی، جمعیت علماء پاکستان کے ڈاکٹر محمد یونس دانش سمیت دیگر رہنما بھی موجود تھے۔

صاحبزادہ ابوالخیر محمد زبیر نے کہا کہ پاکستان کے محب وطن عوام کا فرض بنتا ہے کہ وہ اس نازک موقع پر اپنے اتحاد سے اس سازش کو ناکام بنادیں۔ ملی یکجہتی کونسل نے جو ضابطہاخلاق علامہ شاہ احمد نورانی کی قیادت میں بنایا تھا تمام مسالک کے لوگ اس پر متفق ہیں اور باہم اتفاق و اتحاد سے رہتے ہیں بالخصوص محرم سے قبل ملی یکجہتی کونسل کی طرف سے ملک کے مختلف حصوں میں اتحاد امت کانفرنسیں منعقد ہوئیں جس میں تمام مسالک کے علماء اور قائدین اور عوام نے ایک ساتھ شرکت کرکے باہم اتفاق و اتحاد کا ثبوت دیا لیکن بعض شرپسند غیر ملکی ایجنٹوں کو یہ اتحاد پسند نہیں آیا اور انہوں نے راولپنڈی میں فرقہ وارانہ تعصبات کی آگ بھڑکا کر پورے ملک کو اس آگ میں جھوکنے کی سازش کی، اس واقعہ پر جن شرپسندوں نے مساجد، مدارس، امام بارگاہوں اور مارکیٹوں کو جلایا اور بے گناہ لوگوں کا قتل عام کیا حکمرانوں کی ذمہ داری ہے کہ ایک ایک دہشت گرد کو پکڑے اور اس کو کیفر کردار تک پہنچائے، ایسے عناصر کے خلاف حکمراں پہلے بھی مصلحت کا شکار ہوتے رہے ہیں اور دہشت گردوں کی سرپرستی کرتے رہے ہیں جس کی وجہ سے اس قسم کے سانحات رونما ہوتے رہتے ہیں، محض عدالتی کمیشن قائم کرنے سے کام نہیں بنے گا۔

صاحبزادہ ابوالخیر محمد زبیر کا مزید کہنا تھا کہ اگر حکمراں واقعی ملک میں حقیقی امن کے خواہاں ہیں تو ان کو اس سازش کے پیچھے جو ہاتھ کار فرما ہیں ان کو بے نقاب کرنا ہوگا۔ ان کا کہنا تھا کہ ملک میں بدامنی، خونریزی، لاقانونیت کو فروغ دینے والوں کو قانون کی گرفت میں لانا ہوگا اور قرار واقعی سزائیں دے کر عبرت کا نشان بنانا ہوگا۔ انہوں نے کہا کہ سانحہ راولپنڈی سے پنجاب حکومت کی ناہلی تو کھل کر سامنے آگئی تھی لیکن بعد میں صوبائی حکومت کی بے بسی بھی ظاہر ہوگئی کہ وہ اس آگ کو دیگر شہروں میں پھلنے سے نہ روک سکی اور اس سے زیادہ وفاقی حکومت کی بے حسی بھی ظاہر ہوگئی کہ ملک آگ میں جلتا رہا اور وزیراعظیم کو اپنا غیر ملکی دورہ مختصر کرکے واپس آنے کی توفیق نہیں ہوئی، ہم ہائی کورٹ کے جج کی نگرانی میں قائم ہونے والے کمیشن سے مطالبہ کرتے ہیں کہ وہ اس واقعہ کا باریک بینی سے جائزہ لے اور اس کے اصل محرکات کو سامنے لائے اور حکومت صرف فیکٹ فائینڈنگ کمیشن کی رپورٹ تک محدود نہ رہے بلکہ عدالتی کمیشن اور فیکٹ فائینڈنگ کمیشن کی رپورٹوں کی روشنی میں بلا امتیاز اور جلد اس واقعہ کے ذمہ داروں کے خلاف کاروائی کرکے مجرموں کو جلد کیفر کردار تک پہنچائے۔