The Latest
وحدت نیوز ( پشاور) پشاور کے چرچ میں خودکش حملوں کے باعث زخمی ہونے والے درجنوں مرد، خواتین اور بچے لیڈی ریڈنگ اسپتال میں زیر علاج ہیں، مجلس وحدت مسلمین کے وفد نے بزرگ عالم دین علامہ خورشید انور جوادی کے ہمراہ زخمیوں کی عیادت کی۔ ایم ڈبلیو ایم کے وفد میں صوبائی سیکرٹری اطلاعات ایس اے زیدی، صوبائی آفس مسول ارشاد حسین بنگش، ضلع پشاور کے قائمقام سیکرٹری جنرل منصور الحسن اور ضلعی میڈیا سیکرٹری عدنان عباس شامل تھے۔ اس موقع پر علامہ خورشید انور جوادی نے دھماکوں پر انتہائی افسوس کا اظہار کیا۔ ان کا کہنا تھا کہ دہشتگرد نہ صرف مسلمانوں بلکہ تمام انسانیت کے دشمن ہیں، مسیحی برادری پر ڈھائے جانے والے اس ظلم پر ہر پاکستانی غمگین ہے۔ انہوں نے کہا کہ حکومت فوری طور پر اپنی پالیسیاں تبدیل کرے اور عوام کو تحفظ فراہم کرے۔ دہشتگردوں کیلئے ہر پاکستانی کے دل سے صرف بدعائیں ہی نکل رہی ہیں۔
وحدت نیوز ( بلتستان )مجلس وحدت مسلمین پاکستان بلتستاں ڈویژن کے سیکرٹری جنرل علامہ آغا علی رضوی نے اپنے ایک بیان میں کہا کہ پشاور میں گرجا گھر پر حملہ در اصل ریاست اور آئین پاکستان پر حملہ ہے اس سانحہ سے ریاست کو ناقابل تلافی نقصان پہنچے گا اور عالمی برادری میں پاکستان کا تشخص اور تقدس مزید پائمال ہو گا۔ انہوں نے کہا کہ پاکستان ان دنوں مٹھی بھر، بزدل دہشت گردوں کے ہاتھوں یرغمال بنا ہوا ہے، کوئی طبقہ فکر اور مقام محفوظ نہیں۔ مسجد، امام بارگاہ، اسکول، تعلیمی ادارے، مارکیٹ، شیعہ، سنی، عیسائی الغرض کوئی جگہ محفوظ ہے اور نہ طبقہ فکر۔ اگر اس وقت کوئی طبقہ فکر محفوظ ہے تو وہ دہشت گرد ٹولہ ہے۔ دہشت گردوں کے خلاف کوئی ضابطہ ہے اور نہ کوئی قانون، ان دہشت گردوں کو جیلوں سے باعزت رہا کیا جاتا ہے اور سرکاری پشت پناہی حاصل ہے۔ دہشت گردوں کو جب تک کیفر کردار تک نہیں پہنچایا جاتا امن بحال ہونا ممکن نہیں۔ حکومت مذاکرات کا مذاق بند کریں اور دہشت گردوں کو سزا دیں۔ آغا علی رضوی نے کہا کہ میں آزاد عدلیہ سے سوال کرتا ہوں کہ عدلیہ کب ریاست کے دشمنوں، قاتلوں اور دہشت گردوں کو تختہ دار پر لٹکائے گی۔
وحدت نیوز (پشاور) پشاور میں کوہاٹی گیٹ کے سامنے گرجا گھر میں خودکش دھماکے میں 64 افراد جاں بحق اور 100 سے زائد زخمی ہوگئے۔ زخمیوں کو لیڈی ریڈنگ اسپتال منتقل کر دیا گیا۔ ریسکیو ذرائع کے مطابق جاں بحق اور زخمیوں میں خواتین اور بچے شامل ہیں۔ عینی شاہدین کے مطابق جیسے ہی چرچ میں عبادت ختم ہوئی، خودکش حملہ آور نے خود کو دھماکے سے اڑا لیا۔ جس کے فوری بعد دوسرے خودکش حملہ آور نے بھی خود کو دھماکے سے اڑالیا۔ اتوار کے روز بڑی تعداد میں مسیحی برادری عبادت کیلئے گرجا گھر آتی ہے، جن کی تعداد سینکڑوں میں بتائی جا رہی ہے۔ پولیس اور ریسکیو ٹیموں نے جائے وقوعہ پر پہنچ امدادی کاررائیوں میں حصہ لیا اور زخمیوں کو لیڈی ریڈنگ اسپتال منتقل کیا۔
دیگر ذرائع کے مطابق جیسے ہی چرچ میں عبادت ختم ہوئی ایک خودکش حملہ آور نے اندر گھس کر خود کو دھماکہ سے اڑا دیا۔ دھماکہ اتنا زور داد تھا کہ اس کی آواز دور تک سنی گئی۔ جس کے فوری بعد ایک دوسرا دھماکہ بھی ہوا۔ ذرائع کے مطابق دھماکہ کے بعد چرچ میں ہر طرف زخمی، جاں بحق افراد کے جسم کے ٹکڑے بکھرے پڑے تھے۔ فوری طور پر قریب واقع لیڈی ریڈنگ اسپتال میں ایمرجنسی نافذ کردی گئی اور زخمیوں کو اسپتال منتقل کیا گیا۔ واضح رہے کہ مزکورہ گرجا گھر شہر کے وسط میں انتہائی گنجان آباد علاقہ میں واقع ہے۔ اور یہاں سیکورٹی کا بھی کوئی بہتر نظام نہیں تھا۔
وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل ناصر ملت علامہ راجہ ناصر عباس جعفری نے کہا ہے کہ پشاور میں مسیحی برادری کی عبادر گاہ پر حملے کی مذمت کرتے ہیں، مسیحی برادری پر حملہ پاکستان کی بنیادوں پر حملہ ہے۔ ان خیالات کا اظہار انہوں نے پشاور میں چرچ کے اندر خودکش حملوں کی مذمت کرتے ہوئے کیا۔ علامہ راجہ ناصر عباس جعفری کا کہنا تھا کہ پورا ملک دہشت گردی کی لپیٹ میں ہے، کبھی سیکورٹی اداروں کو نشانہ بنایا جارہا ہے، کبھی مساجد اور امام بارگاہوں پر حملے کئے جارہے ہیں، کبھی مارکیٹوں میں بم دھماکے ہو رہے ہیں تو کبھی چرچ پر حملہ کیا جارہا ہے مگر نواز حکومت دہشت گردوں کے خلاف ملک گیر آپریشن کے بجائے ان سے مذاکرات کی باتیں کررہی ہے۔ انہوں نے کہا کہ دہشت گردوں کے ساتھ حکومت کی مفاہمانہ پالیسی پاکستان کو کمزور کر رہی ہے۔
علامہ راجہ ناصر عباس جعفری نے مزید کہا کہ شیعیان پاکستان مسیحی برادری کے غم میں برابر کے شریک ہیں اور اس بات کا اعلان کرتے ہیں کہ مشکل کی اس گھڑی میں اپنے ہم وطنوں کو تنہا نہیں چھوڑیں گے۔ انہوں نے کہا کہ ضرورت اس امر کی ہے کہ پاکستان کی تمام مظلوم اکثریت خواہ شیعہ ہوں ،سنی ہوں یا بریلوی، سب کو مل کر دہشت گردی کے خلاف ایک مشترکہ پلیٹ فارم پر آنا ہوگا اور دہشت گردی کے خیبر کو فتح کرنے کیلئے جدوجہد کو تیز کرنا ہوگا۔
وحدت نیوز (کراچی) حکومت دہشت گردوں کے ایسے ناز اٹھا رہی ہے جیسے سسرال میں داماد کے اٹھائے جاتے ہیں ،روزانہ کی نئی نئی فرمائشیں حکومت کے لئے باعث شرم ہو نی چائیں ، حکومت کا دہشت گردوں کو آسان راستہ فراہم کرنا پاکستان کو مذید مشکلات سے دوچار کرے گا ، مذاکرات کے آغاز پر ہی فوجی افسران کو شہید کر کے طالبان نے اپنے آئندہ کے حکمت عملی ظاہر کر دی تھی ، طالبان کی جانب سے کالعدم تکفیری جماعتوں کے گرفتار دہشت گردوں کی رہائی کا مطالبہ تشویش ناک ہے، اس کے خطرناک نتائج سامنے آئیں گے ۔
ان خیالات کااظہار مجلس وحدت مسلمین پاکستان کے مرکزی ڈپٹی سیکریٹری جنرل وترجمان علامہ سید حسن ظفر نقوی نے وحدت ہاؤس کراچی سے جاری اپنی بیان میں کیا ، ان کا کہنا تھا کہ وفاقی حکومت خصوصاً چوہدری نثار علی خان مادر وطن کے دشمن طالبان کیلئے جو ہمدردیاں رکھے ہو ئے ہیں وہ ہماری قومی خودمختاری اور ملی غیرت کے خلاف ہے ، حکمران ایسے ردعمل دے رہی ہے جیسے طالبان نہیں بلکہ حکومت مجرم ہو، ان کا کہنا تھا کہ طالبان سے مزاکرات اور ان کی ہر ناجائز فرمائش کو پورا کر نے والی سیاسی مذہبی جماعتیں جلد ان کے مکر وفریب کامزہ چکھیں گی او ر خمیازہ اس ملک کے اٹھارہ کڑوڑ مظلوم شہریوں کو بم دھماکوں ، کود کش حملوں اور ٹارگٹ کلنگ کی صورت میں بھگتا ہو گا ۔
علامہ حسن ظفر نقوی نے طالبان دہشت گردو ں کی خواہش پر بدنام زمانہ کالعدم دہشت گرد جماعتوں کے گرفتار دہشت گردوں کی رہائی پر شدید تحفظات کا اظہار کرتے ہو ئے کہا ہے کہ مادر وطن کو خون میں آلودہ کرنے والے ان دہشت گردوں کی رہائی کے لئے طالبان کے اسرار نے ثابت کر دیا کہ یہ دہشت گرد تکفیری برائے راست طالبان اور القائدہ کے ایجنڈے پر دہشت گردی پھیلا رہے ہیں ، حکومت ان دہشت گردوں کو رہا کر کہ ایک مرتبہ پھر پاکستان میں شیعہ مکتب فکر کی نسل کشی کی سازش کا حصہ بن رہی ہے ۔
انہوں نے وفاقی حکومت کو متنبہ کیا ہے کے ملکی سالمیت کو داؤ پر نہ لگائے ، طالبان سے وفا کی امید نہ رکھی جائے ، مایوسی کہ سوا کچھ ہا تھ نہیں آئے گا ، عوام حکمرانوں سے ناامید ہو چکے ہیں ، اگر عوام کو کسی سے ملکی سالمیت کے تحفظ کا آسرا ہے تو وہ پاک فوج ہے ، فوج اپنے محب وطن ہو نے کو ثبوت دیتے ہو ئے پو رے ملک میں طالبان اور ان کے لوکل ایجنٹوں کے خلاف موثر کاروائی عمل میں لائے ۔
وحدت نیوز (کراچی )سندھ حکومت کی تین ماہ کی کارکردگی انتہائی مایوس کن ہے ، ٹارگٹڈ آپریشن سے وہ نتائج حاصل نہیں ہو ئے جس کی عوام کو توقع تھی ،لانڈھی کورنگی لیاری اور اورنگی ٹاؤن کی طرح دہشت گردوں کی جنت بن چکا ہے، اگرشہر میں نقص امن کی صورت حال اسی طرح برقرار رہی تو آئندہ حال سکیورٹی اداروں کے بس سے بھی باہر ہونگے ان خیالات کا اظہار مجلس وحدت مسلمین پاکستان صوبہ سندھ کے سیکریٹری جنرل علامہ مختار احمد امامی نے وحدت ہاؤس کراچی سے جاری اپنے مذمتی بیان میں کیا ۔
ان کا کہنا تھا کہ مجید کالونی کے سجادیہ امام بارگاہ پر کریکر حملہ محرم الحرام سے قبل نیک شکون نہیں ہے ،لانڈھی کے مختلف علاقوں فیوچر کالونی ، بلال کالونی ، عوامی کالونی ،بھینس کالونی، شاہ لطیف ٹاؤن وغیرہ میں کالعدم جماعتوں کی دہشت گرد کاروائیوں میں کئی بیگناہ شہری لقمہ اجل بن چکے ہیں، صوبائی حکومت ، خفیہ ایجنسیاں اور سکیورٹی ادارے اپنی ذمہ داریوں کوسنجیدگی سے انجام دیں ، ورنہ شہر کسی بڑی دہشت گرد کاروائی کا متحمل نہیں ہو سکتا ، انہوں نے کہا کہ ٹارگٹڈ آپریشن اور اس سے قبل گرفتار کیئے گئے سینکڑوں دہشت گردوں کو جیلوں میں کیوں مہمان بنا کر رکھا گیا ہے ؟ کہیں حکیم اللہ محسود کے حکم کو انتظار تو نہیں کیا جا رہا ، انہوں نے طالبان کی جانب سے کالعدم جماعتوں کے گرفتار دہشت گردوں کی ممکنہ رہائی کے مطالبے پر تشویش کا اظہار کر تے ہو ئے کہا کہ اگر وفاقی حکومت نے ان خطرناک دہشت گردوں کو رہا کر نے کا سوچا بھی تو ، یہ حکومت کے لئے بہتر نہیں ہو گا ، پاکستان کے محب وطن عوام حکومت کے اس وطن دشمن اور عوام دشمن فیصلے کے خلاف سراپا احتجاج بن جا ئیں گے ۔
انہوں نے پشاور میں اہل سنت مکتب فکر کی مسجد پر کریکر حملے کی بھی پرزور مذمت کی ہے ، انہوں نے صوبائی حکومت ، قانون نافذ کر نے والے ادارو ں ، خصوصاً وزیر اعلیٰ سندھ قائم علی شاہ ، ڈی جی رینجرز، اور آئی جی سے مطالبہ کیا ہے کہ جلد از جلد مجید کالونی امام بارگاہ پر حملے میں ملوث دہشت گردوں کو گرفتار کیا جائے اور انہیں عوام کے سامنے کیفر کردار تک پہنچایا جائے ، تاکہ اس قسم کی دہشت گرد کاروائیوں کا تدارک ممکن ہو سکے۔
وحدت نیوز ( اصفہان) مجلس وحدت مسلمین شعبہ اصفہان نے کابینہ کا اعلان کردیا، کابینہ کا اعلان ایک تقریب میں کیا گیا جس کی صدارت سیکرٹری جنرل سید محمد تقی زیدی نے کی۔ کابینہ میں مولانا تصور علی ڈپٹی سیکرٹری جنرل، مولانا شجاعت علی سیکرٹری روابط، سیکرٹری نشرواشاعت آل حسن، سیکرٹری شعبہ عزادری عسکری رضا، سیکرٹری اُمور شہداء محسن مختار فانی، سیکرٹری تعلیم مولانا شجاعت علی، سیکرٹری مالیات جواد حسین، معاون مجالس و منقبت خواں و نوحہ خوان ابوذر جعفری شامل ہیں۔ تقریب سے خطاب کرتے ہوئے سیکرٹری جنرل اصفہان سید محمد تقی زیدی نے کہا کہ رہبر معظم سید علی خامنہ ای نے اپنے خطاب میں وحدت کو ضروری قرار دیا ہے اس لیے رہبر کے حکم پر ہم سب کو لبیک کہنا چاہیے اور اس پر عمل بھی کرنا چاہیے۔ اس سوال کے جواب میں کہا کہ اگر کوئی آپ کے خلاف مکر کرتا ہے تو اُس کو اللہ پہ چھوڑ دو۔ وہ سب سے بہتر انتقام لینے والا ہے۔
شام کے حوالے سے گفتگو کرتے ہوئے تقی زیدی کا کہناتھا کہ بہت جلد قائد مقاومت سید حسن نصراللہ کا وہ وعدہ جو اُنہوں شام کی عوام اور دنیا سے کیا تھا پورا ہوتا دکھائی دے گا۔ دنیا کے تمام دہشتگردوں کو شام میں عبرتناک شکست ہوگی۔ اُنہوں نے کہا کہ ہم ہر اُس پاکستانی کی مذمت کرتے ہیں جو طالبان سے مذاکرات کا خواہاں ہے۔ جو طالبان سے مذاکرات کی باتیں کرتے ہیں کیا وہ پاک فوج، پولیس، رینجرز اور شہداء کو بھول گئے ہیں جو طالبان سے مذاکرات کرنا چاہتے ہیں اصل میں وہی طالبان ہیں۔
وحدت نیوز( لاہور) مجلس وحدت مسلمین کی غیر جماعتی بنیادوں پر بلدیاتی الیکشن کرانے کی درخواست کی سماعت لاہور ہائیکورٹ کے چیف جسٹس عمرعطا بندیال نے کی۔ دوران سماعت چیف جسٹس لاہور ہائی کورٹ نے پٹیشن کو آئینی و قانونی قرار دیتے ہوئے حکومت پنجاب سے 25 ستمبرتک جواب طلب کیا ہے۔ ذرائع کے مطابق چیف جسٹس لاہور ہائیکورٹ عمر عطا بندیال نے ریمارکس دئیے کہ حکومت اس حوالے سے اپنا واضح جواب دے اس سے پہلے کہ عدالت خود کوئی اقدام کرے۔
یاد رہے کہ مجلس وحدت مسلمین کے پولیٹیکل کونسل کے اجلاس میں سربراہ مجلس وحدت مسلمین پاکستان علامہ راجہ ناصر عباس جعفری کے حکم پر فیصلہ کیا گیا تھا کہ پنجاب میں بلدیاتی انتخابات کو غیر جماعتی بنیادوں پر کرانے کے خلاف عدالتی و عوامی سمیت ہر فورم پر آواز اٹھائی جائی گی کیونکہ غیر جماعتی بنیادوں پر الیکشن کرانا غیر آئینی اور غیر جمہوری اقدام ہیں اور آمرانہ سوچ کی عکاسی ہے جس پر پہلے مرحلے میں ہائیکورٹ سے رجوع کیا گیا ہے جس پر عدالت نے پنجاب حکومت سے جواب طلب کر لیا ہے۔
وحدت نیوز (ڈیرہ اسماعیل خان) شہدائے سنٹرل جیل ڈیرہ اسماعیل خان کا چہلم حاجی مورہ ڈیرہ اسماعیل خان میں منعقد ہوا۔ جس میں وارثان شہداء کے علاوہ مومنین کی کثیر تعداد نے شرکت کی۔ چہلم کی مجلس سے شیعہ علماء کونسل اور مجلس وحدت مسلمین پاکستان کے رہنماؤں نے خطاب کیا۔ ایم ڈبلیو ایم صوبہ خیبر پختون خواہ کے صوبائی سیکرٹری تنظیم سازی علامہ وحید عباس کاظمی نے کہا کہ آج ریاست دہشت گردوں کے سامنے سرنڈر کر رہی ہے۔ لیکن شیعہ قوم نے دہشت گردوں سے اپنے خون کا حساب لینا ہے۔ ڈیرہ اسماعیل خان کے مومنین نے عصر کی کربلا میں کردار زینبی (س) ادا کیا۔ شہداء نے اپنا کردار بطریق احسن پورا کیا، اب ہمیں اپنا کردار ادا کرنا ہوگا۔ مولانا وحید عباس نے کہا کہ حزب اللہ لبنان نے شہید وں کے خون کی طاقت سے وقت کی استعماری طاقتوں کو سرنگوں کر دیا۔ استعماری طاقتیں جو شام کے درپے تھیں، صرف حزب اللہ کی وجہ سے پسپاہ ہوئیں۔ انہوں نے کہا کہ آج پاکستان میں دہشت گردوں کے سامنے ریاست ہتھیار ڈال کر مذاکرات میں محو ہے۔ لیکن افسوسناک امر ہے کہ اس دہشت گردی کے ہاتھوں سب سے زیادہ متاثر ہونے والے ملت تشیع کی نمائندگی کو آل پارٹیز کانفرنس میں اہمیت نہیں دی گئی۔
وحدت نیوز (ڈیرہ اسماعیل خان) شہدائے سنٹرل جیل ڈیرہ اسماعیل خان کے چہلم کی تقریب سے خطاب کرتے ہوئے ایم ڈبلیو ایم صوبہ خیبر پختون خواہ کے صوبائی سیکرٹری فلاح و بہبود علامہ ارشاد حسین نے کہا کہ ہمارا دشمن جان لے کہ ہم شہادتوں سے خوفزدہ ہونے والے نہیں بلکہ ہم شہادت کو سعادت سمجھتے ہیں اور شہداء کے لہو سے ہماری قوم مضبوط تر ہوتی ہے۔ سنٹرل جیل ڈیرہ میں مومنین کو صرف اس جرم میں مارا گیا کہ وہ ولایت علی ابن ابیطالب (ع) پر یقین رکھتے تھے۔ شہداء نے اپنے سینوں پر گولیاں کھا کر اپنا فرض پورا کر دیا۔ اب ہماری ذمہ داری ہے کہ شہداء کے خون سے وفاداری کا ثبوت دیتے ہوئے مشن شہداء کوپورا کریں۔ ہم شہیدوں کے خون کے وارث ہیں، ہم حکومت سے سوال کرتے ہیں کہ ڈیرہ اسماعیل خان جیل میں اختر عباس اور ان کے ساتھیوں کو کس جرم میں قتل کیا گیا، حکومت ہمیں اس خون کا قصاص دے۔
