وحدت نیوز(راولپنڈی/کراچی/لاہور ) چہلم امام حسین  و شہدائے کربلا کا جلوس ملک بھر میں نہایت عقیدت و احترام سے نکالے گئےجو کے  اپنے مقررہ راستوں سے ہوتے ہوئےاپنی منزل مقصود پر اختتام پذیر ہوئے، عزاداران امام حسین  نے روائتی جو ش جذبے کیساتھ جلوس ہائے عزاء میں بھر پور شرکت کی ،راولپنڈی میں بھی چہلم شہدائے کربلا عقیدت و احترام سے منایا گیا، چہلم سید الشہداء امام حسین علیہ السلام کا مرکزی جلوس صبح امام بارگاہ کرنل مقبول سے برآمد ہوا، جو اپنے مقررہ راستوں سے ہوتا ہوا قدیمی امام بارگاہ میں اختتام پذیر ہوا،مجلس وحدت مسلمین پاکستان کے سربراہ علامہ راجہ ناصر عباس جعفری اور مرکزی ڈپٹی سیکرٹری جنرل مجلس وحدت مسلمین پاکستان علامہ امین شہیدی نے راولپنڈی جلوس چہلم سید شہداء میں شرکت اور جلوس کی قیادت کی ،جبکہ نماز ظہرین دوران مرکزی جلوس علامہ محمد امین شہیدی کی زیر اقتداء ادا کی گئی،عزاداران کی حفاظت کے لئے وحدت ا سکاوٹس اور مقامی رضا کاروں نے انتظامیہ کیساتھ بھر پور تعاون کیا ،لاہور میں مرکزی جلوس کے راستوں میں مجلس وحدت مسلمین لاہور کی جانب سے عزاداروں کی سہولیات کے لئے سبیل ،میڈیکل کیمپ کا اہتمام کیا گیا تھا ،جلوس میں خواتین،بچے بوڑھے اور معذور افراد نے شرکت کرکے امام عالی مقام اور شہدائے کربلا کو خراج عقید ت پیش کیا ،کراچی میں مرکزی جلوس نشتر پارک سے برآمد ہو جو اپنے مقررہ راستوں سے ہوتے ہوئے امام بارگاہ حسینیہ ایرانیاں کھارادرپر اختتام پذیر ہوا ،  جلوس میں مجلس وحدت مسلمین پاکستان کےمرکزی  رہنما سید ناصر شیرازی ،علامہ احمد اقبال رضوی،ایم ڈبلیوایم سندھ کے سیکرٹری جنرل علامہ مختار امامی ،حسن ہاشمی سمیت سنی اتحاد کونسل کےوفد نے  مرکزی رہنما صاحبزادہ اظہر رضا قادری اور آل پاکستان سنی تحریک کے وفدنے مرکزی  چیئرمین طلوب اعوان قادری کی سربراہی میں مرکزی جلوس چہلم امام حسین ؑ کراچی میں خصوصی شرکت کی۔

راولپنڈی میں عزاداران امام عالی مقام سے خطاب کرتے ہوئے سربرا ہ مجلس وحدت مسلمین پاکستان علامہ راجہ ناصرعباس جعفری کا کہنا تھا کہ عزاداری امام حسین  ہماری شہ رگ حیات ہے اور مظلوم کربلا کی یاد اسلامی اقدار کی بقا کا ضامن ہے دشمن درس حریت سے خوف زدہ ہے ملک میں استعماری قوتیں عزاداری کو محدود کرانے کی سازشوں میں مصروف ہیں میرا سلام ہو عاشقان حسین اور کربلا کے راہیوں پر آپ نے جس استقامت اورجذبے کیساتھ آج اس جلوس میں شرکت کی ہے اس سے اسلام دشمنوں کے ناپاک عزائم خاک میں مل گئے ہیںانہوں نے کہا اسلام امن و محب کا دین ہے دشمن ہمیں فرقوں میں تقسیم کرکے اسلامی تشخص کو پامال کرنے کے درپے ہیں ہم نے اپنے مشترکہ دشمن کو پہچاننا ہے اور اس کے خلاف کھڑا ہو نا ہے تاکہ امت محمدیۖ ازلی دشمن کیخلاف مل کر مقابلہ کر سکیں آج عراق،شام ،لبنان کے شیعہ سنی مسلمانوں نے اپنے دشمن کو نہ صرف بے نقاب کیا ہے بلکہ اس کے لئے دنیا بھر میں زمین تنگ کردی ہے استعمار خود ساختہ جہادیوں کو اسلام کے روپ میں مسلمانوں پر مسلط کرکے اسلام کو بدنام کر رہاہے ایسے میں ہمیں کسی مکتب یا فرقے کا نہیں اسلام کا دفاع کرنا ہے کلمہ لاالہ الا اللہ پڑھنے والوں کا خون بہنا حرام ہے۔

 علامہ راجہ ناصرعباس جعفری کا کہنا تھا کہ پاکستان میں ہم وحدت امت کو فروغ دے کر دشمن کو رسوا کرینگے اور شیعہ سنی مل کر وطن عزیز اور مسلمانوں کے مشترکہ دشمن کیخلاف میدان میں اتریں گے انشااللہ قائد اور اقبال کے پاکستان کو تکفیری سٹیٹ نہیں بننے دینگے پاکستان میں بسنے والے اقلیتی برادری ہمارے بھائی ہیں اور ان کی جان مال ناموس کی حفاظت ہم پر فرض ہے انہوں نے کہا کہ پیغام حسینیت  ظلم اور فاسد نظام کے کیخلاف سینہ سپر ہونا اور کسی بھی جابر حکمران کے سامنے نہ جھکنا ہے انشااللہ وہ دن دور نہیں جب قائد اعظم اور اقبال کے پاکستان میں کرپٹ حکمرانوں کا خاتمہ اور عدل وانصاف کا بول بالاہوگا ۔

وحدت نیوز (راولپنڈی) ملک بھر کی طرح راولپنڈی میں بھی چہلم شہدائے کربلا عقیدت و احترام سے منایا گیا، چہلم سید الشہداء امام حسین علیہ السلام کا مرکزی جلوس صبح امام بارگاہ کرنل مقبول سے برآمد ہوا، جو اپنے مقررہ راستوں سے ہوتا ہوا قدیمی امام بارگاہ میں اختتام پذیر ہوا۔ فوارہ چوک میں شرکائے جلوس نے نماز ظہرین مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی کی اقتداء میں باجماعت ادا کی۔ نماز کا اہتمام امامیہ اسٹوڈنٹس آرگنائزیشن پاکستان راولپنڈی ڈویژن اور امامیہ آرگنائزیشن راولپنڈی ریجن نے کیا تھا۔ عزاداران امام حسین علیہ السلام سے خطاب میں  علامہ امین شہیدی نے کہا کہ آج اربعین حسینی کے موقع پر عراق کی شاہراہوں پر حسینیوں کا ٹھاٹھیں مارتا سمندر جمع ہے۔ تمام تر خطرات اور دھمکیوں کے باوجود دو کروڑ حسینی کربلا پہنچ چکے ہیں۔ علامہ امین شہیدی کا کہنا تھا کہ آج دنیا نے عزاداری کے جلوسوں کا میڈیا بائیکاٹ کر رکھا ہے۔ دنیا میں اگر کہیں صرف پانچ سو لوگ جمع ہو جائیں تو پورا دنیا کا میڈیا اپنے کیمروں کو وہاں فوکس کر دیتا ہے۔ اس وقت دو کروڑ آزاد منش انسان، جن فکریں اور روحیں کربلا اور حسین ابن علی (ع) سے جڑی ہوئی ہیں کربلا میں حسین (ع) کو خراج تحسین پیش کر رہے ہیں۔ یہ عشق و محبت کی انتہا ہے۔ عشق حسین پاکیزہ شے ہے جس سے پاکیزہ انسان ہی مستفید ہو سکتے ہیں۔ ان کا کہنا تھا کہ ہمیں اپنے نوحوں اور مرثیوں میں حسین ابن علی (ع) کا وہ ولولہ پیدا کیا جائے، ہمارے نوحے خطبہ زینب (س) کی عکاسی کریں۔

وحدت نیوز(لبنان) لبنانی خبررساں ادارے جریدۃ العہد کے دفتر میں صحافیوں کو پاکستان کے سیاسی تحرک اور موجودہ صورتحال پر بریفنگ دیتے  ہوئے مجلس وحدت مسلمین پاکستان کے مرکزی سیکریٹری امور خارجہ علامہ ڈاکٹر شفقت حسین شیرازی نے کا کہنا تھا کہ  قیام پاکستان کی بنیاد ہی دو قومی نظریہ پر رکھی گئی تھی ،جو نظریہ علامہ محمد اقبال نے مسلمانان ہند کو دیا تھا یعنی مسلمان اپنے تشخص کے ساتھ زندگی گزاریں کیوں کہ ایک بندہ مومن کو زیب ہی نہیں دیتا کہ وہ کسی کی غلامی کرے کیوں کہ اس قوم و ملت نے اقبال لاہوری سے خودی کا درس سیکھا ہوا تھا جس کے نتیجے میں پاکستان وجود میں آیا۔ قیام پاکستان سے لے کر آج تک مملکت خداداد کو مادر وطن کے پاک باز او ر محب وطن فرزندوں نے ہی بچا کر رکھا ہے،  ورنہ پاک وطن کے خلاف تو اسلام دشمن اور پاکستان دشمن روز اول سے ہی بر سر پیکار ہیں اوروہ   کبھی بھی نہیں چاھتیں  کہ پاکستان اپنے اسلامی تشخص کے ساتھ دنیا کے نقشے پر موجود رہے۔

انہوں نے کہا کہ پاکستان اپنے قدرتی وسائل کی وجہ سے ہمیشہ بڑی طاقتوں کی آنکھ کا کانٹا رہا ہے اور پاکستان دشمن عناصر اور ممالک کی ہمیشہ کوشش رہی ہے کہ یہاں کے قدرتی وسائل کو ہتھیا یا جائے اور جس کی وجہ سے وہ ممالک پاکستان کے اندر آئے روز بحرانات پیدا کرواتے ہیں تاکہ عوامی شعور بیدار نہ ہو اور لوگوں کو اپنے ملک کے وسائل اور طاقت کا اندازہ نہ ہو جائے۔اور ملت پاکستان کو اپنی خودی اور نظریہ سے دور رکھنے کے لئے مختلف ہتھکنڈے اپنائے گئے اور اپنائے جا رہے ہیں۔ یہ ملک دنیا کے اندر اپنی ساکھ کے اعتبار سے بہت اہمیت کا حامل ہے۔ دنیا کی بڑی طاقتوں کی ہمیشہ سے کوشش رہی ہے کہ یہاں ان کی من مانی اور ڈکٹیشن لینے والی حکومتیں آئیں تاکہ ان کو اپنا ایجڈا چلانے میں آسانی ہو اور وہ ان حکمرانوں کو استعمال کرتے ہیں ۔

ان کا مذید کہنا تھا کہ الحمدللہ پاکستان جهان اسلام کے اندر واحد ایٹمی طاقت ہے اور دنیائے اسلام کے اندر تمام اسلامی ممالک کے لئے ایک سہارے اور ڈھارس کی حیثیت رکھتا ہے۔ اور پاکستا ن کی یہ طاقت بھی پوری دنیا کے اندر صیہونی و حامیان صیہونیت کے لئے گلے کی ہڈی کی سی حیثیت رکھتاہے۔ اور ان ممالک کے پروپیگنڈ ے ہمیشہ پاکستان کی اس ابھرتی ہوئی طاقت کو ختم کیا جائے جس کے لئے ان کی کوشش رہی ہے کہ پاکستان کے انتظامی اداروں یعنی افواج کو کمزور کیا جائے اور عوام کو فوج کے مقابلے میں لا کھڑا کیا جائے جس کی مثالیں ہمیں دنیا کے مختلف ممالک میں نظر آتی ہیں مثلا مصر ،لیبیا ، عراق اور شام ۔ اور یہی چال پاکستان کے اندر چلانے کی کوشش ہے۔ تاکہ پاکستان کی فوج اپنی طاقت کو بھول کر سپر پاور ممالک کے اشاروں پر چلے۔ جس کے لئے وہ پاکستان کو نا امن کرتے ہیں اور یہاں پر لسانی ، قومی، مذہبی بنیادوں پر خانہ جنگی کرواتے ہیں ۔

علامہ شفقت شیرازی کا کہنا تھا کہ پاکستان کی اندر ہمیشہ سے کٹھ پتلی حکومتیں رہی ہیں جس کی وجہ سے ملک تنزلی کی طرف جا تا رہا ہے اور حالات کبھی بھی معمول پر نہیں آئے۔ اور یہ حکمران اپنے اقتدار کو دوام دینے کے بہت مہنگی قیمت تک ادا کرنےکو تیار ہو جاتے ہیں ۔ مختلف ادوار میں پاکستان کے سیاسی منظر نامے پر چند خاندانوں کے نام ہی نظر آتےہیں جو حکومت کرتے رہے ہیں۔ حالیہ سیاسی بحران کی وجوہات بھی یہی ہیں کہ ایک منظم دھاندلی کے ذریعے ایک جماعت کو آگے لایا گیا جس کے لئے عدالتی سسٹم میں بیٹھے ہوئے لوگوں نے بھی ان کو سپورٹ کیا اور عوام کی مینڈیٹ چوری کر کے یہ حکومت قائم ہوئی ۔ اور اس کے بعد مختلف سیاسی گروہوں نے جو حکومت کے خلاف آواز اٹھانے کی کوشش کی ہے تو ان کے ساتھ جس طرح پیش آیا گیا وہ روز روشن کی طرح عیاں ہے۔ سانحہ ماڈل ٹاون لاہور کے اندر حکومت مخالف عوامی تحریک کے لوگوں کو جو اپنے جائز حقوق کے لئے نکلے تھےجس بے دردی کے ساتھ ان کو شہید کیا گیا اور پھر اس مکمل خاموشی اور پردہ پوشی کی گئ اس سے یہ صاف ظاہر ہوتا ہے یہ حکومت دھاندلی زدہ ہے اور اپنے اس گھناونے جرم کو چھپانے کے لئے یہ اقدامات کر رہی ہے۔

آخر میں ان کا کہنا تھا کہ  پاکستان کے اندر حامیان مظلومین اکھٹے ہیں جس کا مظہر مجلس وحدت مسلمین ، سنی اتحاد کونسل، عوامی تحریک اور مسلم ليك (ق) پاکستان کا الائنس ہے ۔ اور یہ سیاسی جماعتیں پاکستان کا نیچرل ڈیفنس ہیں جنہوں نے ہمیشہ پاکستان کی بقا و سلامتی کی جنگ لڑی ہے چاہے وہ پاکستان کے اندر ہو یا باہر ہو۔ حالیہ سیاسی بحران سے عوامی شعور کی ایک لہر نکلی ہے جس نے پاکستان کے ہر ذی شعور شہری کو اپنی لپیٹ میں لیا ہے اور لوگوں کو اس بات پر سوچنے پہ مجبور کردیا ہے کہ یہ حکومتیں عوام کو ان کے جائز حقوق دینے سے قاصر ہیں اور لوگ آج متوجہ ہیں کہ جب تک پارلیمنٹ کے اندر عوامی نمائندے نہیں آئیں گے تب تک یہ مسائل رہیں گے۔ اور ملت پاکستان اپنی حقوق کی جنگ لڑ رہی ہے جس کا منہ بولتا ثبوت انقلاب مارچ ، آزادی مارچ اور مختلف شہروں میں سیاسی جلسوں کے اندر لاکھوں لوگوں کا آنا اور جوش و ولولہ ہے۔انشاء اللہ وہ وقت دور نہیں ہے جب اس پاک دھرتی پر اس دھرتی کے حقیقی بیٹے حکومت کریں گے اور عوامی مسائل کو حل کریں گے اور پاکستان دوبارہ سے اپنے تشخص کے ساتھ دنیا میں اپنا وقار قائم کرے گا۔ اور اپنی طاقت و اہمیت کے لحاظ سے دنیا کے اندر تبدیلی کا باعث ثابت ہو گا۔

وحدت نیوز (اسلام آباد) امام حسین وشہدائے کربلاکی قربانی دین محمدی کی بقا اور انسانیت کے لئے حق پرستی اور باطل قوتوں کیخلاف ڈٹ جانے کی بہترین مثال ہے کربلا درس حریت کا نام ہے اسلام اصولوں کی احیا اور انسانیت کی فلاح کے لئے امام حسین وکربلا کے شہداء کی یاد کو تازہ رکھنا ہر بنی نوع انسان پر فرض ہے اگرسید شہداء امام حسین و شہدائے کربلا کی قربانیوں کو فراموش کیا گیا تو یزید جسیے فاسق حکمران مسلمانوں پر مسلط ہونگے ،ان خیالات کا اظہار مجلس وحدت مسلمین پاکستان کے سربراہ علامہ راجہ ناصرعباس جعفری نے شہدائے کربلا کے چہلم پر اپنے پیغام میں کیا، انہوں نے کہا کہ عزاداری امام حسین و شہدائے کربلا دراصل ہر دور کے یزدیت کیخلاف احتجاج اورظلم و ظالم نظام کیخلاف ابدیتحریک ہے جسے دنیا کا کوئی مستکبر و یزیددبا نہیں سکتا انہوں نے کہا عزاداری امام حسین اور عشق حسین جغرافیائی سر حدوںکا پابند نہیں ،مرکزعشق و وفاالہیٰ کربلا میں عشاق حسینی کی عظیم الشان شرکت تکفیریت کی شکست ہے،آج تکفیری قوت داعش کی تمام تر سفاکیت بربریت اور ظلم وستم کے باوجود دنیا بھر سے 2کڑوڑ پیروان حسین عراق کی سر زمین پر اسلام اور عالم انسانیت کے پیشوا سید شہداء حضرت امام حسین اور ان کے جانثار باوفا ساتھیوں کو سلام عقیدت پیش کرنے کے لئے پہنچے ہیں جو دنیا کی تاریخ میں ایک ریکارڈ ہے پاکستان میں بھی سید شہداء کا چہلم اسی جوش و جذبے سے منایا جائے گا جس میں تمام مسلمان اور انسانیت کا درد رکھنے والے لوگ نواسہ رسولۖاور ان کے جانثاروں کی عظیم قربانی کی یاد منا کر کربلا والوں سے تجدید عہد کریں گے کہ وقت کے نمردو ویزیدیت کیخلاف اور انسانیت کی بقا کے لئے کسی بھی قسم کی قربانی سے دریغ نہیں کریں گے ۔

علامہ راجہ ناصر عباس نے اپنے پیغام میں کہا کہ وطن عزیز میں دہشت گردی کے بڑھتے واقعات کے سبب حکمرانوں کا یہ فریضہ ہے کہ وہ عزاداران امام حسین کو فول پروف سکیورٹی کی فراہمی کو یقینی بنائیں اور شرپسندوں کے خلاف ٹھوس کاروائی کریں انہوں نے وحدت یوتھ کے کارکنان کو ہدایات جاری کی کہ وہ ملک بھر میں جلوس ہائے عزاء میں عزادروں کی خدمت میں بھر پور حصہ لیں اور انتظامیہ کیساتھ مل کر سکیورٹی انتظامات کو یقینی بنائیں انہوں نے اپنے پیغام میں ذاکرین اور خطباء سے اپیل کی کہ وہ اتحاد بین المسلمین کو ملحوظ خاطر رکھیں اور منبر سے وحدت ،اخوت اور اتحاد کا درس دیں تاکہ دشمن اپنے مذموم مقاصد میں کامیاب نہ ہو سکیں کیونکہ مقصد حسینیت اتحاد امت کا نام ہے۔

وحدت نیوز (ملتان) مجلس وحدت مسلمین پاکستان کے سیکرٹری تبلیغات علامہ اعجاز حسین بہشتی نے ملتان میں عشرہ مجلس اربعین سے خطاب کرتے ہوئے کہا کہ امام حسین ؑ کی ذات اقدس تمام امت مسلمہ کے لئے نقطہ وحدت ہے،قیام امام حسین ؑ کا اصل مقصد دین اسلام کو ظالم اور بے دین حکمرانوں کی شر سے بچانا ہے اور شریعت محمدی ؐ کو پھیلانا ہے ،لہٰذا تمام عالم اسلام کو چاہیے کی فکر حسینی کو عام کریں۔

علامہ اعجاز بہشتی کا مزید کہنا تھا کہ ملکی سیاسی صورت حال کو دیکھتے ہوئے حکومت کو چاہئے کی اربعین امام حسین ؑ پر ملک بھر میں تمام جلوسوں اور مجالس عزاء کی سیکورٹی کو یقینی بنایا جائے۔ملک عزیز پاکستان میں داعش اور اس جیسی دوسری دہشت گرد تنظیموں کے لئے کوئی جگہ نہیں ہے یہ ملک ہزاروں پاک اور معصوم مسلمانوں نے اپنے جان و مال کی قربانی دے کر حاصل کی ہے اس کو آسانی سے کسی ملک دشمن عناصر کے حولے نہیں کرنے دینگے۔

علامہ اعجاز بہشتی نے فوج اور رینجرز کی دہشت گرد ی کے خلاف کاروائی کو سراہتے ہوئے کہا کہ قانون نافذکرنے والے اداروں کا شہر قائد سمیت ملک بھر میں دہشت گردوں کے خلاف کریک ڈاؤن قابل تحسین ہے اور ملت تشیع استحکام پاکستان کے لئے ہر محاذ پر پاک فوج کے ساتھ ہے۔

وحدت نیوز (سہون شریف) مجلس وحدت مسلمین پاکستان کے مرکزی ڈپٹی سیکریٹری جنرل علامہ محمد امین شہیدی نے حالیہ دورہ سندھ کے موقع پر سہون شریف میں معروف صوفی بزرگ اور وادی مہران کی پہچان حضرت عثمان مروندی المعروف لعل شہباز قلندرؒکے مزار مبارک پر حاضری دی، فاتحہ خوانی کی اور وطن عزیز کے استحکام ، دہشت گردی کے خاتمے، وحدت بین المسلمین کیلئے خصوصی دعا کی، اس موقع پر ایم ڈبلیوایم صوبہ سندھ کے ڈپٹی سیکریٹری جنرل عالم کربلائی ، صوبائی آفس سیکریٹری ناصر حسینی اور صوبائی ڈپٹی سیکریٹری وحدت یوتھ ندیم جعفری بھی علامہ امین شہیدی کے ہمراہ موجود تھے۔